Нениҥ учун Кудай кыйын-шыраны токтотподы?
6-чы бӧлӱк
Нениҥ учун Кудай кыйын-шыраны токтотподы?
1, 2. Кудайдыҥ сӱреен јараш сыйлаган башталганын бистиҥ ӧбӧкӧлӧрис канайып ӱрегилеп салгандар?
НЕ БОЛО берди? Кудайдыҥ ӧбӧкӧлӧриске сыйлаган Едем јериндеги јараш башталганды не ӱреп ийген? Нениҥ учун сӱрекей јараш јердиҥ амыр-энчӱзиниҥ ордына муҥ јылдардыҥ туркунына јаман керектер ле кыйын-шыра бийленип јат?
2 Оныҥ шылтагы Адам ла Ева бойыныҥ јайым кӱӱнин ӧйинеҥ ӧткӱре тузаланганда. Олор Кудайдыҥ јасактары јокко ырысту болгылап болбос эдип јайатканын керекке алгылабаган. Олор Кудайдаҥ камааны јокко јӱрерге, ол ло ок ӧйдӧ бойлорыныҥ јӱрӱмин оноҥ до јакшы эдип алар деп санангылаган. Оныҥ учун Кудайдыҥ берген ӧйлӱ-кемдӱ јайымын олор ажыра баскандар (Бытие, 3 бажалык).
Иегова — эҥ бийик деген блааш-тартышту сурак
3—5. Нениҥ учун Кудай Адам ла Еваны јоголтоло, ӱзе јаҥыдаҥ баштабаган?
3 Нениҥ учун Кудай беленинче Адам ла Еваны јоголтып, ӧскӧ эжердеҥ ойто ӱзе баштабаган? Нениҥ учун дезе Оныҥ бастыра бийленери, чокумдап айтса Оныҥ Бойыныҥ башкаратан јаҥы суракка тургузылган.
4 Сурак мындый болгон: кем башкараар јаҥду ла кемниҥ башкарузы чын? Кудай бастыраны эдип ийер ле оноҥ ончо јайаандардыҥ Јайаачызы болуп турарда, бу Ого олорло башкаратан јаҥ берет. Ол эҥ ле ойгор учун, Оныҥ башкарузы ончо јайаандарга эҥ ле артык. Је бу ла ӧйдӧ Кудайдыҥ башкарузы суракка тургузылган. Анайда ок Оныҥ јайаанында, кижиде, не де једикпестӱ болгон бо? Мынаҥ ары кижиниҥ чындыгы керегинде сурак бери канайда кирип турганын бис кӧрӧрис.
5 Улус Кудайдаҥ каманы јок боло берерде, туразынаҥ база бир сурак тургузылган: улус Кудайдыҥ башкарузы јокко оноҥ ырысту болор бо? Јайаачы карууны алаҥзу јогынаҥ билген, је улус оны билзин деп, кӱӱнзеп турган толо јайымды олорго берери — эҥ ле чындык јол болгон. Олор бу јолды бойлоры талдап алгылаган, оныҥ учун Кудай олордыҥ бу кӱӱнин јараткан.
6, 7. Нениҥ учун Кудай улуска ондый узак ӧйгӧ толо јайымды јарадып јат?
6 Улуска толо јайымга ченемел тургузар ӧйди јеткилинче берип, олорго Кудайдыҥ башкарузы артык па, эмезе камааны јокко артык па деп, Кудай аайына чыгар. Улустыҥ бийик ле деген политикалык, промышленный, билимдик, эмчилик једимдер деп айдып турган једимдерине берилген ӧй јеткилинче болор учурлу.
7 Оныҥ учун Кудайдаҥ камааны јок башкару јакшыга экелбези бир де алаҥзу јогынаҥ јарт кӧрӱне берзин деп, Кудай кижиликке бӱгӱнги кӱнге јетире јайым башкарынзын деп ӧй берген. Анайдарда кижи јобош ло казырдаҥ, сӱӱш ле кӧрӧр кӱӱни јоктоҥ, чындык ла чындык эместеҥ талдаар аргалу болгон. Је ол анайдала ок бойыныҥ талдажыныҥ једикпестериле кийнинде тушташкан: јакшыла, амыр-энчӱле, эмезе јаман немеле, кыйын-шырала.
Кӧскӧ кӧрӱнбес јайаандардыҥ тӱймеени
8, 9. а) Теҥериде тӱймеен канайда башталган? б) Адам ла Еванаҥ ӧскӧ Сатана кемди тӱймеенге ийде салган?
8 Ајаруга база бир шылтакты алар керек. Кудайдыҥ башкарузына удура тӱймеен кӧдӱргенинде јаҥыс ла бистиҥ ӧбӧкӧлӧрис болгылабаган. Је ол ӧйдӧ база кемдер болгон? Кӧскӧ кӧрӱнбес јайаандар. Улусты јайаардаҥ озо, Кудай теҥериде јадатан јӱрӱмниҥ канча катап бийик бӱдӱмин — кӧп тоолу ангелдерди — јайаган. Олор анайда ла ок јайым кӱӱндӱ ле Кудайдыҥ башкарузыныҥ сӧзин угар учурлу эдип јайадылгандар (Иов 38:7; Псалом 103:4; Откровение 5:11).
9 Озо ло баштап тӱймеен теҥериде башталган деп Библия кӧргӱзип јат. Бир кӧскӧ кӧрӱнбес тын текши јайымды кӱӱнзей берген. Керек дезе улустыҥ ого бажырарын кӱӱнзеген (Матфейдеҥ 4:8, 9). Бу тӱймеечи тын, Кудай Адам ла Еванаҥ та кандый да јакшыны јажырып турган деп тӧгӱндеп, олорды тӱймеп чыксын деп салтарын јетирди (Бытие 3:1—5). Оныҥ учун оны Јелбис (тӧгӱнчи) ле Сатана (удурлажаачы) деп адагылайт. Кийнинде ол ӧскӧ дӧ кӧскӧ кӧрӱнбес јайаандарды бойына тартып алды. Олор кӧрмӧстӧр деп јарлу боло бергендер (Второзаконие 32:17; Откровение 12:9; 16:14).
10. Улустыҥ ла кӧскӧ кӧрӱнбес јайаандардыҥ тӱймеенге туруп чыкканы неге экелди?
10 Улус Кудайга удура туруп, Сатана ла оныҥ кӧрмӧстӧриниҥ јолына киргендер. Бот нениҥ учун Библия Сатананы «[Кудайга бӱтпей тургандардыҥ] санааларын неме аайлабас эткен» «бу чактыҥ кудайы» деп адайт. Оныҥ учун Кудайдыҥ Сӧзи «бастыра телекей мекеечиниҥ колында» деп айдып јат. Иисус Бойы Сатананы «телекейдиҥ јайзаҥы» деп адаган (2 Коринфяндарга 4:4; 1 Иоанныҥ 5:19, «Сӱӱнчилӱ Јетирӱ Кудайдаҥ»; Иоаннаҥ 12:31).
Эки блааш-тартышту сурак
11. Кандый ӧскӧ блааш-тартышту сурактаҥ улам Сатана Кудайга кычыру этти?
11 Сатана Кудайга кычыру эдип, база бир сурак кӧдӱрген. Сурактыҥ учуры мындый бурулу болуптыр: Кудай улусты јайаарда јастырып салган, албан кӱч тушта кем де чын керектер эдерге кӱӱнзебес. Оныҥ айтканыла, улус ченелтелерде болзо, Кудайды јектеп салар (Иов 2:1—5). Анайып, Сатана кижилердиҥ чындыгын алаҥзуга тургускан.
12—14. Сатананыҥ кӧдӱрген эки блааш-тартышту сурагы аайынча, ӧй канайда чындыкты кӧргӱзер учурлу болгон?
12 Оныҥ учун бу блааш-тартышту суракла, Кудайдыҥ эҥ бийик болгоны керегинде блаашту сурак канайда аайына чыгарын, бастыра санаалу јайалталары кӧрзин деп, Кудай јеткилинче ӧй берген. (Исход 9:16 тӱҥдештир.) Кижиликтиҥ тӱӱкизиниҥ учы-тӱбинде јуулган ченемели бу эки тартышту сурактар аайынча чынын кӧргӱзер учурлу болгон.
13 Озо ло баштап ӧй Кудайдыҥ бийленери јанынаҥ, эмезе Кудай Бойыныҥ јаҥыла башкарар јанынаҥ нени кӧргӱзер? Улус Кудайдаҥ артык бойлорыла башкарынар ба? Кижиликтиҥ кандый-бир башкарузы јуу-чак, јаман кылык, чындык эмези јок ырысту јӱрӱмге экелип болор бо? Олордыҥ кажызы-кажызы јоксырашты јоголтып, ончо улусты јеткилдеп болор бо? Ол башкарулардыҥ кандый-бирӱзи ооруларды, карыырын ла ӧлӱмди јеҥип болор бо? Кудайдыҥ башкарузы бастыра бу немени бӱдӱрерге амадайт (Бытие 1:26 —31).
14 Экинчи блааш-тартышту сурак аайынча, јайаткан кижиниҥ јарамыгы јанынаҥ ӧй нени кӧргӱзер? Улусты онойдо јайап, Кудай јастырды эмеш пе? Ченемелдӱ ӧйлӧрдӧ олордыҥ кемизи де чын керектер эдер бе? Улустаҥ кем-кем кижиликтиҥ камаан јок башкарузыныҥ ордына Кудайдыҥ башкарузын кӱӱнзеп турган деп кӧргӱзер бе?
[Ӱренериниҥ сурактары]
[13 бӱктеги јурук]
Улус бойлорыныҥ једимдериниҥ эҥ бийигине јединзин деп Кудай ӧйди јеткилинче берген.
[Чыгыды керегинде јетирӱлер]
Shuttle: Based on NASA photo
