1-КЫ БАЖАЛЫК
Кудайды сӱӱп турганыс недеҥ кӧрӱнет
«Кудайдыҥ јакылталарын бӱдӱрип јӱргенисте, Оны сӱӱп јадыбыс ине. Оныҥ јакылталары уур эмес» (ИОАННЫҤ 1-КЫ САМАРАЗЫ 5:3).
1, 2. Сен Иегова Кудайды нениҥ учун сӱӱп јадыҥ?
СЕН Кудайды сӱӱп тургаҥ ба? Иегова Кудайга учурланып калган болзоҥ, акту јӱрегиҥнеҥ: «Эйе!» — деп айдар болорыҥ. Андый болзо, сӱреен јакшы. Кудай бисти сӱӱп јат, оныҥ учун Оны сӱӱрге бир де кӱч эмес. Бу керегинде Агару Бичикте мындый сӧстӧр бар: «Бис Оны [Иегованы] сӱӱрис, нениҥ учун дезе Ол бисти озо сӱӱген» (Иоанныҥ 1-кы самаразы 4:19).
2 Иегова бисти сӱӱп турганын озо кӧргӱскен. Бис Кудайдыҥ шылтузынаҥ улам сӱреен јараш Јерде јададыс. Ол бистиҥ эди-каныстыҥ ла јадын-јӱрӱмистиҥ керексиништерин јеткилдеп јат (Матфей 5:43—48). Је Оныҥ эҥ јаан болужы — бистиҥ ич-кӧгӱс керексиништеристи јеткилдеп турганы. Бисте Оныҥ Сӧзи — Агару Бичик бар. Анайда ок, Ол бисти мӱргӱӱлдереерди угарым ла агару тын берерим деп, бӱдӱмјилеп јат. Оныҥ учун мӱргӱп турзын деп кӱӱнзедет (Сарын 65:2; Лука 11:13). Је эҥ учурлузы, Кудай бисти кинчектеҥ ле ӧлӱмнеҥ јайымдап аларга, Бойыныҥ сӱӱген Уулын толынты эдип бергени. Анайып Иегова бисти сӱреен тыҥ сӱӱп турганын кӧргӱскен! (Иоанн 3:16; Римдегилерге 5:8 кычыр.)
3. а) Кудайдыҥ сӱӱжинде артарга, нени эдер керек? б) Биске јаан учурлу кандый суракты шӱӱп сананар керек ле оныҥ каруузын кайдаҥ табып аларга јараар?
3 Иегова Бойыныҥ сӱӱжин биске ӱргӱлјиге туза экелзин деп кӱӱнзейт. Је туза болор бо, јок по бистеҥ камаанду. Кудайдыҥ Сӧзи бисти: «Ӱргӱлји јӱрӱм аларга... бойыгарды Кудайдыҥ сӱӱжинде чеберлегер» — деп кычырат (Иуданыҥ самаразы 21). «Бойыгарды чеберлегер» деген сӧстӧр Кудайдыҥ сӱӱжинде артарга, бойыстыҥ јаныстаҥ албаданарын кӧргӱзет. Кудайдыҥ сӱӱжи учун быйанду болгоныс эткен керектеристеҥ кӧрӱнер учурлу. Биске мындый јаан учурлу суракты шӱӱп сананар керек: «Мен Кудайга сӱӱжимди канайып кӧргӱзерим?» Карууны Кудайдыҥ агару тыныла бичиген элчи Иоанныҥ сӧстӧринеҥ таап аларга јараар: «Кудайдыҥ јакылталарын бӱдӱрип јӱрзебис — Оны сӱӱп јадыбыс. Оныҥ јакылталары уур эмес» (Иоанныҥ 1-кы самаразы 5:3). Бу сӧстӧрдиҥ учурын лаптап шиҥдеер керек, нениҥ учун дезе бис Адабыска сӱӱжисти кӧргӱзерге кӱӱнзейдис.
КУДАЙДЫ СӰӰП ТУРГАНЫС НЕДЕҤ КӦРӰНЕТ
4, 5. Сен Иегованы канайып сӱӱп баштагаҥ? Куучындап бер.
4 Элчи Иоанныҥ «Бис Оны [Иегованы] сӱӱрис» деген сӧстӧри нени темдектейт? Бу сӧстӧр јӱректиҥ тереҥ сезимдерин кӧргӱзет. Сен Кудайды качан сӱӱп баштагаҥ, санааҥга кирет пе?
Учурланары ла чӧҥӱрилери — Иеговага акту јӱректеҥ уккур болорын баштапкы јерге тургузып баштаганы
5 Иегова ла Оныҥ амадузы керегинде чындыкты баштапкы катап качан укканыҥды ла бӱдӱп баштаганыҥды эске алып ий. Сен кинчектӱ де чыккан болзоҥ, Кудайдаҥ ыраак та болгон болзоҥ, Ол сеге Христос ажыра толо кемдӱ болотон ло ӱргӱлјиге јӱретен арга берген деп, оҥдоп баштагаҥ (Матфей 20:28; Римдегилерге 5:12, 18). Анайда ок Иегова сеге болуп Бойыныҥ кару Уулын ӧлӱмге ийип, сӱреен баалу тайылга эткенин оҥдоп алгаҥ. Бу билгирлер јӱрегиҥди томултып, улу сӱӱжин кӧргӱскен Кудайды сӱӱп баштаарга кӱӱнзеткен. (Иоанныҥ 1-кы самаразы 4:9, 10 кычыр.)
6. Чын сӱӱш недеҥ кӧрӱнет ле Кудайды сӱӱгениҥ сени неге кӱӱнзетти?
6 Је мындый сезимдер Кудайды јаҥы ла сӱӱп баштаганыҥды кӧргӱзет. Сӱӱш јӱк ле сезимдердеҥ ле сӧстӧрдӧҥ кӧрӱнбей јат. «Мен Иегованы сӱӱп јадым» — деп айдып турганы, Кудайды чыннаҥ сӱӱп турганын кӧргӱспей јат. Чын сӱӱш бӱдӱп турганы чылап, эткен керектердеҥ кӧрӱнет (Иаковтыҥ самаразы 2:26). Анчада ла ол сӱӱп турган кижини сӱӱндирерге эдип турган керектердеҥ јарт кӧрӱнет. Анайдарда, Иеговага сӱӱжиҥ тыҥый берерде, сен теҥеридеги Адаҥды сӱӱндирип, Оныҥ табы аайынча јӱрерге кӱӱнзегеҥ. Сен сууга чӧҥӱрилген керечи бе? Эйе болзо, јӱрӱмиҥде эҥ учурлу мындый алтам эдерге, Кудайга чындык артарга кӱӱнзегениҥ ле Оны тыҥ сӱӱгениҥ кӱӱнзеткен. Анайып, сен Кудайдыҥ табын бӱдӱрерге, Иеговага учурланып, сууга чӧҥӱрилгеҥ. (Римдегилерге 14:7, 8 кычыр.) Элчи Иоанныҥ мынаҥ ары айткан сӧстӧри, учурланган ӧйдӧ Иеговага берген сӧзисти бӱдӱрерге, нени эдер керек деп кӧргӱзип јат.
ОНЫҤ ЈАКЫЛТАЛАРЫН БӰДӰРЕДИС
7. Кудайдыҥ кезик јакылталарын тоолоп беригер. Бу јакылталарды бӱдӱрип турганаарды канайып кӧргӱзереер?
7 Кудайды сӱӱп турганыс, Оныҥ «јакылталарын бӱдӱрип јӱрзебис» кӧрӱнет деп, Иоанн јартайт. Кандый јакылталарды? Иегова Бойыныҥ Сӧзи ажыра биске чокум, јарт јакарулар берет. Темдектезе, Ол мындый керектерди эдерге јарабас деп айдат: аракыдаарын, балыр јӱрӱм јӱрерин, чалуларга бажырарын, уурданарын ла тӧгӱндеерин (1 Коринфтегилерге 5:11; 6:18; 10:14; Ефестегилерге 4:28; Колоссыдагыларга 3:9). Кудайдыҥ јакылталарын бӱдӱрери — Агару Бичиктеги јарт бичилген нормаларыла јӱрери дегени.
8, 9. Бистиҥ айалга аайынча Агару Бичикте чике јасак берилбеген болзо, Иегованы не сӱӱндирер деп, канайып билип алар? Тем куучындап беригер.
8 Је Иегованы сӱӱндирерге, јӱк ле чике берилген јакаруларды бӱдӱрер керек деп сананбас керек. Нениҥ учун дезе Иегова кажы ла учуралга јасак тургуспай јат. Бис Агару Бичикте чике јакарулар берилбеген айалгаларга кажы ла кӱн учураар болорыс. Андый болзо, Иегованы не сӱӱндирер деп, канайып билип алар? Агару Бичикте Кудайдыҥ кӧрӱм-санаазы јарт бичилген. Оныҥ учун Агару Бичикти ӱренип турзаас, Иегова нени сӱӱп турганын ла нени чек јаратпай турганын билип аладыс (Римдегилерге 12:9 кычыр; Укаа сӧстӧр 6:16—19). Анайда ок, Ол кандый керектерди ле кандый кӧрӱмди јарадып турганын оҥдоп баштайдыс. Иегова керегинде канча ла кире кӧп билип турзаас, ончо ло кире Оныҥ кӧрӱм-санаазындый кӧрӱмдӱ болорыс, анайып бу биске чын алтамдар эдерге болужар. Оныҥ учун Агару Бичикте чике јасак берилбеген айалгага да туштазаас, «Кайраканныҥ кӱӱни незинде болгонын» оҥдоп турарыс (Ефестегилерге 5:17).
9 Темдектезе, калју базынышты эмезе балыр јӱрӱмди кӧргӱзип турган кинолорды ла телеберилтелерди кӧрбӧзин деп, Агару Бичикте чике башкарту јок. Је биске мындый программаларды кӧрӧргӧ јарабас деп, чике јасак керек пе? Мындый керектерге Иегованыҥ кӧрӱми кандый болгонын бис јакшы билерис. Оныҥ Сӧзинде јарт айдылат: «Базынышты сӱӱп турган кандый ла кижини Оныҥ [Иегованыҥ] кӧрӧр кӱӱни јок» (Сарын 11:5). Анайда ок мындый сӧстӧр база бар: «Балыр јӱрӱмдӱ ле чайдам улусты Кудай јаргылаар» (Еврейлерге 13:4). Иегованыҥ тыныла бичилген сӧстӧрди шӱӱп сананып турзабыс, Оныҥ табын јакшы оҥдоорыс. Оныҥ учун Иеговага јарабай турган керектерди кӧргӱзип турган телеберилтелерди кӧрбӧй јадыс. Бу телекейдиҥ бир де јаман неме јок деп кӧргӱзерге албаданып турган балыр керектеринеҥ кыйып турзаас, бис Иегованы сӱӱндирип јадыс *.
10, 11. Бис нениҥ учун Иеговага сӧсуккур болодыс, бистиҥ сӧсуккурыс керегинде нени айдарга јараар?
10 Кудайдыҥ јакылталарын бӱдӱрерге, бисти озо ло баштап не кӱӱнзедет? Бис нениҥ учун кажы ла кӱн Кудайдыҥ кӧрӱм-санаазы аайынча јӱрерге кӱӱнзейдис? Бис мындый јӱрӱмди кату каруузына турарынаҥ кыйарга эмезе Кудайдыҥ табын бӱдӱрбегениниҥ салтарынаҥ кыйарга болуп талдабайдыс (Галаттарга 6:7). Карын, Иегова Кудайдыҥ сӧзин бӱдӱрип, Ого сӱӱжисти кӧргӱзип јадыс деп сананадыс. Канайып бала адазыныҥ јарадузын аларга кӱӱнзейт, анайып ла бис Иегованыҥ јарадузын аларга кӱӱнзейдис (Сарын 5:12). Ол бистиҥ Адабыс ине, бис Оны сӱӱп јадыбыс. Иегова бистиҥ јӱрӱмисти јарадып турган деп билип турганыстаҥ улам сӱӱнчи ле токунал аладыс (Укаа сӧстӧр 12:2).
11 Бисти Кудайга сӧсуккур болзын деп, кем де албадабай јат *. Анайда ок, Кудайдыҥ јакылталарын јӱк ле кандый бир учуралда бӱдӱрерис деп талдабай јадыс. Бис Иеговага јаҥыс ла эптӱ болзо эмезе кӱч эмес болзо сӧсуккур болуп турган эмезис. Карын, Кудайга акту јӱрегистеҥ уккур болодыс (Римдегилерге 6:17). Сарнаачыныҥ: «Јакылталарыҥды сӱӱп јадым, олорды баалап јӱрерим» — деген сӧстӧриле јӧпсинип јадыс (Сарын 119:47). Бис база Иегованыҥ сӧзин угарга кӱӱнзейдис. Ол бистеҥ кыйалта јогынаҥ сӧсуккур болорын некеер јаҥду деп, оҥдоп јадыс (Јаҥды такыганы 12:32). Чындык Ной керегинде Кудайдыҥ Сӧзинде айдылат: «Ной ончозын Кудайдыҥ јакарганынча эдип койгон» (Башталганы 6:22). Анайып ла бис, кӧп јылдардыҥ туркунына Кудайды сӱӱп турганынаҥ улам сӧсуккур болгон Ной чылап, Кудайдыҥ алдына јакшы тоодо болорго кӱӱнзейдис.
12. Бистиҥ сӧсуккурыс кандый болзо, Иегова сӱӱнип јат?
12 Бис Иегованыҥ сӧзин акту кӱӱнистеҥ угуп турзабыс, Ол нени сезет? Агару Бичикте айдылганыла болзо, Ол сӱӱнип јат (Укаа сӧстӧр 27:11). Јер-телекейдиҥ Бийине сӧсуккур болгоныс Оны чын ла сӱӱндирет пе? Эйе, чын ла сӱӱндирет! Нениҥ учун мынайып айдарга јараар? Нениҥ учун дезе Иегова бисти јайым кӱӱндӱ эдип јайаган. Мынаҥ улам, Кудайды угатан ба, јок по деп талдаар арга бар (Јаҥды такыганы 30:15, 16, 19, 20). Оныҥ учун Иегованы акту јӱректеҥ сӱӱп турганыстаҥ улам Ого сӧсуккур болорго шӱӱп алзаас, Теҥеридеги Адабыска сӱреен јаан сӱӱнчи экеледис (Укаа сӧстӧр 11:20). Ого ӱзеери, бис јӱрӱмниҥ эҥ јакшы јолын талдап аладыс.
«ОНЫҤ ЈАКЫЛТАЛАРЫ УУР ЭМЕС»
13, 14. Кудайдыҥ «јакылталары уур эмес» деп, нениҥ учун айдарга јараар? Тем куучындап беригер.
13 Элчи Иоанн Иегованыҥ некелтелери керегинде кӱӱнисти кӧдӱрер сӧстӧр айдат: «Оныҥ јакылталары уур * эмес». Иегованыҥ некелтелери кӱч эмес. Оныҥ учун толо кемдӱ эмес улуска Оныҥ јасактарына багынарга уур эмес.
14 Темдектезе: најыҥ сени кӧчӧргӧ болужып ийзин деп сураган болзын. Кӧчӱретен јӧӧжӧ кӧп: кезиги јеҥил, је кезигин јаҥыскан апарып болбозыҥ. Најыҥ сеге јеҥил немелер берет. Ол сени кӧдӱрип болбос неме апарзын деп сураар ба? Јок, нениҥ учун дезе, сениҥ су-кадыгыҥа каршу јетирерге кӱӱнзебей јат. Анайып ла бисти сӱӱп турган јалакай Кудайыс бӱдӱрерге кӱч јасактар бербей јат (Јаҥды такыганы 30:11—14). Ол бисти мындый уур јӱкти апарзын деп качан да сурабас эди. Иегова бистиҥ ийде-кӱчисти оҥдоп, «тобырактаҥ эдилгенисти ундыбай јат» (Сарын 103:14).
15. Иегованыҥ јасактары биске эҥ јаан туза берет деп, бис нениҥ учун алаҥзыбас аргалу?
15 Иегова Кудайдыҥ јакылталары бистиҥ јӱрӱмисти уур этпей јат, карын сӱреен јаан туза экелет. (Исаия 48:17 кычыр.) Оныҥ учун Моисей израиль албатыга мынайып айткан: «Иегова, биске ле тузалу болзын деп, Оноҥ јаантайын айап, бӱгӱнги де кӱнде чилеп тирӱ јӱрерге, бу јакылталарды ончозын бӱдӱрзин деп јакарган» (Јаҥды такыганы 6:24). Иегова бисти ӱргӱлјиге ырысту јӱрзин деп кичееп турганынаҥ улам јасактар берген деп, бис те Моисей чилеп алаҥзыбас аргалу. Бу сӧстӧргӧ бӱдерге јараар ба? Иегова Кудайдыҥ «ойгоры... кандый тереҥ!» (Римдегилерге 11:33). Оныҥ учун биске нени этсе јакшы болорын јаҥыс Иегова билер. Анайда ок, Кудай — ол сӱӱш (Иоанныҥ 1-кы самаразы 4:8). Оныҥ сӱӱжи айткан сӧстӧринеҥ ле эткен керектеринеҥ кӧрӱнет. Оныҥ учун Иегованыҥ Бойыныҥ ишчилерине берген ончо јакылталары да сӱӱшке тӧзӧлӧнӧт.
16. Быјарсып калган телекей ле кинчектӱ эди-каныс биске салтарын јетирип те турган болзо, нениҥ учун бис Кудайга сӧсуккур болор аргалу?
16 Је андый да болзо, Кудайга сӧсуккур болуп јӱрерге јеҥил деп айдып болбозыҥ. Биске «јаманныҥ табында» јаткан, быјарсыган телекейдиҥ салтарына удурлажар керек (Иоанныҥ 1-кы самаразы 5:19). Анайда ок бис Кудайдыҥ јасактарын бузарга кӱӱнзедип турган эди-канысла тартыжар учурлу (Римдегилерге 7:21—25). Је бу тартыжуда јеҥип чыгарга, Кудайды сӱӱп турганыс болужар аргалу. Бойыныҥ сӧсуккурыла Кудайга сӱӱжин кӧргӱзерге кӱӱнзеп тургандарга Иегова алкыжын берет. Анайып, Ол «сӧсуккур улуска» Бойыныҥ агару тынын берип јат (Апостолдордыҥ ижи 5:32). Бу агару тын, биске сӧсуккур болорго керектӱ кылык-јаҥдарга ӱренип аларга болужат (Галаттарга 5:22, 23).
17, 18. а) Бу бичикте бис нени шӱӱп кӧрӧрис, бу бичикти ӱренген ӧйдӧ, нени ундыбас керек? б) Экинчи бажалыкта нени шӱӱп кӧрӧрис?
17 Бу бичикте Иегова Кудайдыҥ берген принциптерин, бийик нормаларын, анайда ок Оныҥ табын кӧргӱзип турган оноҥ до ӧскӧ јетирӱлерди шӱӱп кӧрӧрис. Бу бичикти ӱренип јаткан ӧйдиҥ туркунына, Иегова бисти Оныҥ јасактарын ла принциптерин бӱдӱрип турзын деп албадабай, карын акту јӱректеҥ сӧсуккур болзын деп кӱӱнзедип турганын ундыбай тураактар. Анайда ок, бистиҥ јӱрӱмис эмдиги де ӧйдӧ кӧп алкыштар экелзин деп ле бисти келер ӧйдӧ ӱргӱлји јӱрӱм јӱрзин деп Иегованыҥ кӱӱнзеп турганын эске алып јӱреектер. Анайдарда, Иегова Кудайды сӱреен тыҥ сӱӱп турганысты акту кӱӱнистеҥ сӧсуккур болгонысла кӧргӱзерис деп, ундыбай јӱреектер.
18 Јаманды јакшынаҥ ылгаштырып турарга, Иегова бисти сӱӱп турганынаҥ улам биске уйат берген. Уйадысты ӱредип турзаас, биске ол јаан болуш болор. Бу суракты экинчи бажалыкта шӱӱп кӧрӧрис.
^ 9 абз. Тузалу соот-јыргалды канайып талдаары керегинде сурак бу бичиктиҥ 6-чы бажалыгында јарталат.
^ 11 абз. Кезикте, керек дезе калју тындарга да сӧсуккур болорго келижет. Темдектезе, качан Иисус олорды улустаҥ чыксын деп јакарып ийерде, кӧрмӧстӧргӧ албан кӱчле Иисустыҥ јаҥына багынарга келишкен (Марк 1:27; 5:7—13).
^ 13 абз. Иоанныҥ 1-кы самаразында 5:3-те грек тилдеҥ кӧчӱрилген «уур» деген сӧс Матфей 23:4-тӧ «уур јӱктер» деп бичилет. Бу «уур јӱктер» тегин албатынаҥ некелип турган бичикчилердиҥ ле фарисейлердиҥ сананып тапкан ээжилерин ле чӱм-јаҥдарын кӧргӱзет. Анайда ок, «уур» дегени Апостолдордыҥ ижи 20:29, 30-та «казыр» деген сӧслӧ кӧчӱрилет. «Казыр» дегени ол улусты булгап саларга албаданып, «кӱн-тескери неме айдар» јана баскан калју улус болот.
