КАНДЫЙ эҥ учурлу сурактар? Улустыҥ сурап турган эҥ учурлу кезик сурактары. Бу мындый сурактарды слер байла бойыгардаҥ сураганар:

• Кудай бистерди кичееп турган ба?

• Јуу-чактар ла кыйын-шыралар качан-бирде токтоор бо?

• Кижи божогон кийнинде не болот?

• Божоп калган бистиҥ јуук улузысты бис база кӧрӧрис пе?

• Мени Кудай уксын деп канайып мӱргӱӱр керек?

• Јӱрӱмде ырысты канайып таап алар?

Бу сурактардыҥ каруузын слер санаанзар кайдаҥ бедирер керек? Башка-башка улустардаҥ сураза, каруузы башка-башка болор. Керек дезе ойгор ло тоомјылу да улустардаҥ сураза, олордыҥ каруулары база башка-башка болор. Ол каруулардыҥ кандый-бирӱзи бӱгӱнги ӧйгӧ келижип тургандый билдирер, је бир эмеш ӧй ӧткӧн кийнинде эскирип калат.

Је бир аҥылу бичик бар, оныҥ карууларына алаҥзыбай бӱдерге јараар. Бу бичик качан да тӧгӱндебей јат. Иисус Христос Кудайга мӱргӱӱрде: «Сениҥ сӧзиҥ — чындык» деп айткан (Иоанн 17:17). Бу чындык бӱгӱн Агару Бичикте бичилген. Бу буклеттиҥ бӱктеринде слер бу сурактардыҥ кыска да болзо, је јарт ла алаҥзу јок карууларын Кудайдыҥ Сӧзинеҥ таап аларар.

НЕНИҤ УЧУН МЫНДЫЙ СУРАК ТУРАТ: Бистиҥ јадып турган телекей калјула, чындык јогыла тооло. Кӧп кудайлык јаҥдардыҥ ӱреткениле болзо, кижиликтиҥ бастыра кыйын-шыразы Кудайдыҥ кӱӱн-табыла болот.

КУДАЙДЫҤ СӦЗИ НЕНИ АЙДАТ: Кудай качан да јаманды јетирбей јат. «Чындык Кудай тӧгӱндебес, Бастыраны Эдеечи чынга турбас неме этпес» деп Иов 34:10 айдылат. Кудай улусты сӱӱп јат, ол олорго сӱрекей јакшы келер ӧй белетеп салган. Оныҥ учун Иисус «Теҥеридеги бистиҥ Адагыс... Сениҥ Каандыгыҥ келзин. Сениҥ кӱӱн-табыҥ теҥериде чилеп јерде болзын» деп мӱргӱӱрге ӱреткен (Матфей 6:9, 10). Кудай бистерди сӱреен тыҥ сӱӱп јат, керек дезе бойыныҥ кӱӱн-табын бӱдӱрерге ол эҥ баалу тайылга берген.

Башталганы 1:26—28; Иаковтыҥ 1:13; 1 Петрдыҥ 5:6, 7 база кӧр.

НЕНИҤ УЧУН МЫНДЫЙ СУРАК ТУРАТ: Јуу-чактар тоозы јок улустыҥ јӱрӱмин апарат. Бистер ончогыс, эмезе бистиҥ тӧрӧӧн-тугандарыс кыйын-шырага качан-бирде табартканыс.

КУДАЙДЫҤ СӦЗИ НЕНИ АЙДАТ: Бастыра јердиҥ ӱстинде амыр-энчӱниҥ ӧйи болор деп Кудай озолодо айдып јат. Кудай јердиҥ ӱстиле башкарып баштаза, улус «јуулажарга база ӱренбес». Олор «бойлорыныҥ кылыштарын салданыҥ мӱӱзине јаҥыдаҥ согуп эдер» (Исаия 2:4). Кудай ончо кыйын-шыраны ла чындык јокты јоголтып салар. «Кудай олордыҥ кӧстӧриниҥ јажын арчып салар, ӧлӱм де болбос, ый-сыгыт та, комудал да, оору-јобол до база болбос. Азыйгызы [бӱгӱнги кыйын-шыра ла чындык јогы бого база кирет] ӧдӱп калган» (Ачылта 21:3, 4).

Сарын 37:10, 11; 46:9; Михей 4:1—4 база кӧр.

НЕНИҤ УЧУН МЫНДЫЙ СУРАК ТУРАТ: Кӧп саба кудайлык јаҥдар кижи божогон кийнинде та канайып та оноҥ ары јӱрӱп турган деп ӱредет. Божоп калган улус тирӱ улуска каршузын јетирип турган, эмезе јаман улусты Кудай чактыҥ-чакка кыйнап турган деп ӱредет.

КУДАЙДЫҤ СӦЗИ НЕНИ АЙДАТ: Божогон кийнинде улус јоголып калат. «Божоп калгандар нени де билбес» деп Экклезиаст 9:5 айдылат. Божоп калган улус нени де билбес, сеспес болгондо, олордо тирӱ улуска кандый да салтаарын јетирер аргазы јок (Сарын 146:3, 4).

Башталганы 3:19; Экклезиаст 9:6, 10 база кӧр.

НЕНИҤ УЧУН МЫНДЫЙ СУРАК ТУРАТ: Бис бойыс јӱрӱм јӱрер кӱӱндӱ, анайда ла ок бистиҥ јуук улузыс јӱрзин деп кӱӱнзейдис. Божоп калган јуук улузысты кӧрӧргӧ амадап турганыс тегиндӱ эмес.

КУДАЙДЫҤ СӦЗИ НЕНИ АЙДАТ: Божоп калган кӧп саба улус тирилер. «Сӧӧктӧрдӧ јаткандардыҥ ончозы... туруп чыгар» деп Иисус айткан (Иоанн 5:28, 29). Кудайдыҥ алдынаҥ бери сананып салганыла тирилген улус јердиҥ ӱстинде сӱреен јакшы айалгада јадар аргалу болор. Келер ӧйдӧ сӧс уккур улус ӱргӱлјиге јӱрӱп, су-кадыгы бийик кеминде болор. «Чындык улус јерди энчиркенип, чактыҥ-чакка ондо јадар» деп Агару Бичикте айдылат (Сарын 37:29).

Иов 14:14, 15; Лука 7:11—17; Апостолдордыҥ иштери 24:15 база кӧр.

НЕНИҤ УЧУН МЫНДЫЙ СУРАК ТУРАТ: Кӧп саба кудайлык јаҥдарда улус мӱргӱп јат. Је кӧп тоолу улус мӱргӱӱлине кару албай јадылар.

КУДАЙДЫҤ СӦЗИ НЕНИ АЙДАТ: Эске ӱренип алган сӧстӧрди мӱргӱӱлде такып-такып айтпазын деп Иисус ӱреткен. «Качан мӱргӱп турзар бир ле немени такып-такып эске алынбагар» деп ол айткан (Матфей 6:7). Бистиҥ мӱргӱӱлисти Кудай уксын деп кӱӱнзеп турган болзос, оныҥ кӱӱн-табыла мӱргӱӱр керек. Оныҥ учун Кудайдыҥ кӱӱн-табын билип алала, ого келиштире мӱргӱӱр керек. 1 Иоанныҥ 5:14 «оныҥ кӱӱн-табына келиштирип нени ле суразас ол бисти угуп јат» деп јарталат.

Сарын 65:2; Иоанн 14:6, 14; 1 Иоанныҥ 3:22 база кӧр.

НЕНИҤ УЧУН МЫНДЫЙ СУРАК ТУРАТ: Ырысту болорго акча-јӧӧжӧлӱ, јарлу, эмезе тыш-кебери јараш болор керек деп кӧп улус сананат. Олор бар-јок кӱчиле бу немелерге албаданып, чырмайгылап јат, је ӧй ӧткӧн кийнинде акча-јӧӧжӧ, јарлу ла јараш болоры ырыс экелбей турганын оҥдогылап јадылар.

КУДАЙДЫҤ СӦЗИ НЕНИ АЙДАТ: Иисус ырысты канайып табарын јартаган: «Бойыныҥ Кудайдаҥ камандузын оҥдоп тургандар — ырысту» (Матфей 5:3). Бис Кудай керегинде чындыкты ла ол нениҥ учун бисти јайаган деп эҥ ле учурлу керексиништи јеткиледезес, чындык ырысты таап аларыс. Бу чындык Кудайдыҥ Сӧзинде бичилген. Бу чындык керегинде билгир јӱрӱмде не учурлу ла не учурлу эмезин оҥдоорго болужар. Бис эдип турган керектеристе Кудайдыҥ Сӧзиле башкарынзас бойыстыҥ јӱрӱмистиҥ ырызын кӧптӧдип аларыс (Лука 11:28).

Ука сӧстӧр 3:5, 6, 13—18; 1 Тимофейге 6:9, 10 база кӧр.

 Бис Агару Бичимелдеҥ алты ла суракка кыскарта карууларды кӧрдис. Кӧпти билерге кӱӱнзейдер бе? Слер байла мындый сурактарды сураганар: «Кудай бисти кичееп турган болзо, ол бастыра кижиликтиҥ тӱӱкизинде ондый кӧп јаманды ла кыйын-шыраны нениҥ учун токтотпогон? Мен бойымныҥ билемниҥ јӱрӱмин канайып ырысту эдер аргалу?» мынаҥ да ӧскӧ кӧп сурактарга Кудайдыҥ Сӧзи толо ло бӱдӱмјилӱ каруулар берет.

Је бӱгӱн кӧп улус Агару Бичикти кычырарга кӱӱнзебей јат. Бу бичик јаан, оны оҥдорго кӱч деп олор сананат. Кудайдыҥ Сӧзинеҥ сурактардыҥ карууларын аларга болуш кӱӱнзейдер бе? Иегованыҥ Керечилери слерге болужын јетирер аргалу.

Мындый эп-аргалардыҥ бирӱзи — Агару Бичимелди акча тӧлӧбӧзинеҥ айылда ӱренери. Слердеҥ ыраак јок јадып турган Иегованыҥ Керечилери кажы ла неделеде, эмезе слерге эптӱ ӧйдӧ келип, бир эмештеҥ Кудайдыҥ Сӧзин слерле јартажар аргалу. Бу эп-арганыҥ болужыла бастыра јердиҥ ӱстинде миллион тоолу улус тузазын алдылар. Олордыҥ кӧбизи «Мен чындыкты таап алдым!» деп алаҥзу јогынаҥ айдар аргалу.

Мынаҥ бийик байлык јок. Кудайдыҥ Сӧзиниҥ чындыгы јӱзӱн-базын немеге (суеверие) бӱдерине, алаҥзып турарына ла божоп калган улустыҥ, эмезе база не-неменеҥ коркырынаҥ јайымдап јат. Ол бистиҥ јӱрӱмисти ижемјилӱ, учурлу ла сӱӱнчилӱ эдет. «Чынды билип аларыгар, чынныҥ бойы слерди јайымдаар» — деп, Иисус айткан (Иоанн 8:32).