Кудайга јараар јӱрӱм јӱрери канайып ырыс экелет
13-чи бажалык
Кудайга јараар јӱрӱм јӱрери канайып ырыс экелет
1. Нениҥ учун бис Иегованыҥ јолыла барып јада, ырыс табарыс деп айдар аргалу?
ИЕГОВА — «ырысту Кудай», ол сени јӱрӱмле сӱӱнип јӱрзин деп кӱӱнзейт (1 Тимофейге 1:11, ЈТ). Сен оныҥ јолына туруп алзаҥ, тӱгенбес тереҥ суудый узак болуп турган јакшыны ла амыр-энчӱни табар аргалу болорыҥ. Кудайдыҥ јолыла барып јада, сен ‘талайдыҥ толкуларындый’ токунабас, чындык јакшы керектерди такып-такып эдерине оморкодулу болорыҥ. А бу чындык ырысла толтырылып јат (Исаия 48:17, 18).
2. Нениҥ учун христиандарды кезикте јаман да кӧрӱп турза, олор ырысту болор аргалу?
2 Кезикте улус јакшы да керектер учун шыралап турган деп кезиктери јӧпсинбестеҥ айабас. Бу чын, Иисустыҥ да апостолдорыла мынайып болгон. Апостолдорды истешкилеп те турган болзо, олор тӱҥей ле сӱӱнгилеп, анаҥ ары «Иисус Христос керегинде јарлап» јӱргендер (Деяниелер 5:40—42). Бис бу мынаҥ јаан учурлу темдер алар аргалу. Олордыҥ бирӱзи — бистиҥ Кудайга јараар јӱрӱмис биске јаантайын јакшы баштанарына ижендирӱ бербей јат. «Андый болордо Христос Иисус алдына чындык јӱрӱм јӱрерге тургандар, ончозы сӱрдӱрӱде болор» — деп, апостол Павел бичиген (2 Тимофейге 3:12). Бу нениҥ учун мындый дезе, Эрлик ле оныҥ телекейи Кудайга јараар јӱрӱм јӱрӱп тургандарга удура тургулайт (Иоаннаҥ 15:18, 19; 1 Пётрдыҥ 5:8). Је чындык ырыс айландыра айалгалардаҥ камаанду эмес. Ол дезе, бис чын эдип турганыс ла Кудай бисти бу учун јарадып турганына бӱдӱмјилӱ болгоныс ла келет (Матфейдеҥ 5:10—12; Иаковтыҥ 1:2, 3; 1 Петрдыҥ 4:13, 14).
3. Иеговага бажырары кижиниҥ јӱрӱмине канайып салтарын јетирер учурлу?
3 Кудайдыҥ јарадарын иштеп аларга јӱк ле каа-јаада ого берингенин кӧргӱзип, арткан ӧйдӧ Кудай керегинде ундып та саларга јараар деп, сананып турган улустар бар. Је Иегова Кудайга чындык бажырары мындый эмес. Ол кижиниҥ кылык-јаҥына ончо уйуктабай сергек болотон ӧйинде, кӱннеҥ кӱнге, јылдаҥ јылга салтарын јетирет. Оныҥ учун мындый бажырыш, анайдала ок «јол» деп адалып јат (Деяниелер 19:9; Исаия 30:21). Чокумдап айтса, Кудайга јараар јӱрӱм бисти Кудайдыҥ Сӧзи аайынча куучындап ла этсин деп молју берет.
4. Кудайдыҥ јолдорыла келиштире јӱрерге, нениҥ учун солунталар эдери тузалу?
4 Качан баштап турган Библияныҥ шиҥдеечилери Иегова олордоҥ кандый бир солунталар сакып турганын кӧрӱп, ‘Кудайга јараар јӱрӱмле јӱрери чын ла јолду ба? — деп, олор бойлорына сурак берер аргалу. Алаҥзу јогынаҥ јараар. Нениҥ учун? Нениҥ учун дезе «Кудай ол сӱӱш», оныҥ јолдоры биске туза јетирет (1 Иоанныҥ 4:8). Анайда ок Кудай ойгор, биске не јакшы болорын ол билер. Иегова Бастыраны эдип ийер Кудай болгонынаҥ улам, бис јаман кылыктарысты таштап, солунарга турумкай болорына ол биске болужар аргалу (Филиппийецтерге 4:13). Кудайга јараар јӱрӱмле колбулу кезик принциптерди шиҥдеп, олорды тузаланганы канайып ырыс экелип турганын кӧрӧк.
АК-ЧЕК ЈӰРӰМ ЫРЫС ЭКЕЛЕТ
5. Библияда тӧгӱндеш ле уурданыш керегинде не айдылат?
5 Иегова — «Чындыктыҥ Кудайы» (Псалом 30:6). Сен оныҥ темине тӱҥейлежип, чындык улустардыҥ тоозына кирер кӱӱндӱ болорыҥ. Ак-чек болоры бойын тооп турарын ла амырыныҥ сезимин экелет. Је бу кинчектӱ телекейде ак-чек јогы ондый тыҥ таркадылган болордо: «Кажыгарла бойыгардыҥ јуугындагы кижиге чындыкты айдыгар... Кем уурданган, эмдигештеҥ ала база уурданбай артыгынча иштензеҥ, немеге јединбей јӱргендерге бар немелериҥнеҥ ӱлештирип берерге... » — деп, эске алындырары христиандарга керек болгон (Ефесяндарга 4:25, 28). Христиандар кӱнӱҥ сайын эдип турган ижин ак-чек бӱдӱргилеп јат. Иш берип турган кижиниҥ не-немелерин олор сурак јок алгылабай јат. Ол иште болзын, школдо эмезе айылда, Иегованыҥ бажыраачызы «ончо немеде... бойын ак-чек тудуп јӱрер» учурлу (Еврейлерге 13:18). А кем тӧгӱндеп эмезе уурданып баштап турган, Кудайдыҥ јарадарына иженер арга ондо јок (Второзаконие 5:19; Откровение 21:8).
6. Кудайга јараар ак-чек кижи канайып Иеговага мак экелип јат?
6 Ак-чек болоры кӧп алкыштар экелет. Африканаҥ Селина деп јокту тул ӱй кижи, Иегова Кудайды ла оныҥ чындык принциптерин сӱӱп турган. Бир катап ол чемодан таап алган, ондо акча чеберлериниҥ бичиги ле кӧп акча болгон. Телефонныҥ кӧргӱзӱлериле ол ээзин таап алды, ол кижи тонотырып ийген магазинниҥ ээзи болуп калды. Качан Селина оору да ӱй кижи болгон болзо, ончо бӱдӱнге кичеелген акчаны ого кайра экелип берерде, эр кижи бойыныҥ кӧстӧрине бӱтпей турды. «Мындый ак-чекти кайралдаар керек» — деп ол айдала, бир канча акчаны ого берди. Је эҥ ле учурлузы, бу эр кижи Селинаныҥ Кудай јаҥы керегинде мактулу сӧстӧр айтты. Эйе чын, ак-чек болоры библиялык ӱредӱни јарандырып, Иегова Кудайды мактап, оныҥ ак-чек бажырачыларына ырыс экелет (Титке 2:10; 1 Пётрдыҥ 2:12).
КЫСКАНБАЗЫ ЫРЫС ЭКЕЛЕТ
7. Каныгып ойноор ойындарда не јаманы бар?
7 «Ач кӧстӧр», эмезе ач улустар «Кудайдыҥ Каандыгын энчиркенбес» болгондо, кысканбас кижи ырысту болот (1 Коринфяндарга 6:10). Ач болорыныҥ текши таркадылганы — бу ӧскӧ улустыҥ ойнотырып ийгенинеҥ туза аларга кааныгып ойноор ойындарга (азартный) тартылары. Иегова «ачап» улустарды јаратпай јат (1 Тимофейге 3:8). Керек дезе, кааныгып ойноор ойындарды јасак аайынча јарадып та салган јерлерде болзын, кижи тегин ле соот эдип ойноп тура, бойында кӱӱни сӱреен тартыларын ӧскӱрип, кӧп јӱрӱмдерди кородып турган керектерге јӧмӧжӧринеҥ айабас. Кааныгып ойноор ойындар ойноочыныҥ билезинде, эҥ ле керектӱ — кийимге ле курсакка акча јок болуп калары ла, ас эмес кӱчтерди јаантайын јетирет (1 Тимофейге 6:10).
8. Иисус кысканбазыныҥ кандый сӱреен јакшы тем берген ле бис канайып кысканбас болор аргалу?
8 Кысканбастаҥ ла тооло сӱӱштӱ болгонынаҥ улам, христиандар анчадала немеге јединбей јӱрген бойыныҥ Кудай јаҥыныҥ ага-ийнилерине ле эје-сыйныларына болужып, сӱӱнип јӱргилейт (Иаковтыҥ 2:15, 16). Иисус јерге келердеҥ озо, Кудай улуска кысканбазын канайып јетирип турганын ол ајарып кӧргӧн (Деяниелер 14:16, 17). Иисус јаҥыс ла бойыныҥ ӧйиле јайалталарыла эмес, је керек дезе кижилик учун јӱрӱмин тайылгага берген. Оныҥ учун ол: «Аларынаҥ бергени ырысту» — деп, бӱдӱмјилӱ айдар аргалу болгон (Деяниелер 20:35). Анайда ок Иисус, јокту тул келин акту јӱрегинеҥ ӧргӧӧниҥ алтын-мӧҥӱн ле акча салып турган јерине эки јес акча салганы керегинде јылу сӧстӧр айтты, нениҥ учун дезе «бастыра бойыныҥ курсак-тамак алатанын» берип ийген болгон (Марктаҥ 12:41—44). Јебрен израильтяндар ла баштапкы чактыҥ христиандары, јуунныҥ ла Каандыктыҥ керегине кысканбай ла сӱӱнчилӱ болужып јӧмӧжӧриниҥ — темдектери (1 Паралипоменон 29:9; 2 Коринфяндарга 9:11—14). Бӱгӱнги христиандар Кудайды јаҥыс ла акча-јӧӧжӧлӧ эмес, је бойыныҥ јӱрӱмин ого иштеерге учурлап, сӱӱнчилӱ мактагылайт (Римляндарга 12:1; Еврейлерге 13:15). Олор бойыныҥ ӧйин, ийде-кӱчин бергилейт. Онойдо ок чындык бажырышка ла Каандык керегинде јакшылыкту јетирӱни бастырателекейлик јарлаарына јӧмӧжӧргӧ олор бойлорыныҥ ӧйин, ийде-кӱчин ле ӧскӧ дӧ эп-аргаларла, ол тоодо акчала болужын јетиргилейт, бу учун Иегова олорды алкап јат (Притчалар 3:9, 10).
ЫРЫСТЫ БАЗА НЕ СЫЙЛАЙТ
9. Аракыларды кӧп ичкенинде не јаман?
9 Ырысту болорго христиандар, «санаа-шӱӱлтелӱ болор» учурлу (Притчалар 5:1, 2). Бу тушта олорго Кудайдыҥ Сӧзин ле библиялык тузалу бичиктерди кычырып, ол керегинде шӱӱп-сананар керек. Је недеҥ де кыйар керек. Темдектезе, ӧйи-кеми јок аракы ичери, кижи бойыныҥ санааларыла тузаланбазына экелердеҥ айабас. Бу мындый айалгада кӧп улустар јӧй-балыр болгылап, базыныш эткилейт, керек дезе кемниҥ-кемниҥ ӧлӱмине бурулу болуп калат. Анайдарда, нениҥ учун Библия Кудайдыҥ Каандыгын аракызактар энчиркенбес деп айтканы јарт! (1 Коринфяндарга 6:10). «Ойгор сагышту» болорго чындык христиандар аракыдаштаҥ кыйыжат, бу олордыҥ ортозында ырыска экелет (Титке 2:2—6).
10. а) Нениҥ учун христиандар таҥкы тартпай јат? б) Јаман кылык-јаҥды таштайла, кандый туза алар арга бар?
10 Эт-канныҥ арузы ырыстыҥ јӧмӧлтӧзи болот. Је андый да болзо, кӧп улустарда каршулу немелерге тартылары ӧзӱм алынат. Темдек эдип таҥкыны алактар. Бастырателекейлик су-кадык кичеериниҥ биригӱзи, таҥкылаары «јыл сайын ӱч миллион кижиниҥ јӱрӱмин апарат» деп јетирет. Бу темиккен јаман кылыктаҥ айрыларга байла кӱч, не дезе таҥкыны таштап турза база тартар кӱӱни келип турганынаҥ улам. Је ондый да болзо озодо таҥкычы болгон улус су-кадыгы оҥдоло бергени ле билезине кӧп акча артып турганын кӧргӱлейт. Эйе, таҥкыга темиккенинеҥ айрылып, эмезе ӧскӧ дӧ каршулу немелердеҥ айрылып чыгала, сен бойыҥныҥ эди-каныҥды арутап аларыҥ, уйадыҥды токунадып, чындык ырысты кӧптӧдӧриҥ (2 Коринфяндарга 7:1).
АЛЫЖАРЫНДА ЫРЫС
11. Алышканы бек, чындык ла јасак аайынча болзын деп не керек?
11 Кожо јадып турган эр ле ӱй кижи, олордыҥ алышканын гражданлык јаҥдарла јасак аайынча бичидерине кичеенери учурлу (Марктаҥ 12:17). Анайда ок олор алыжарына сӱреен каруулу болор учурлу. Кезикте ӱйи эмезе ӧбӧгӧни билезине болужарын кичеенбей јектеп турза эмезе ӧйинеҥ ӧткӱре кату-калју эмезе ич-кӧгӱстиктиҥ су-кадыгына чын кезедӱ болзо олорго башка јадарга јараары чын (1 Тимофейге 5:8; Галаттарга 5:19—21). Је 1 Коринфяндарга 7:10—17-де апостол Павелдиҥ сӧстӧри ӧбӧгӧнин ле ӱйин кожо артсын деп оморкодот. Чындык ырыска олор бой-бойлорына чындык болор учурлузы јарт. «Алыжары ончогордо чындык ла тӧжӧгӧр ак-чек болзын; балыр кей јӱрӱмдӱ ле ӧбӧгӧни ле ӱйи ортодо чындыгы јок улустарды Кудай јаргылап јат» (Еврейлерге 13:4). «Тӧжӧк» деген сӧс, алыжып јасак аайынча бичидип салган эр ле ӱй кижиниҥ ортодогы јуук колбуларды темдектейт. Ӧскӧ кандый да јуук колбулар, темдектезе, алыжарында эки эмезе кӧп ӱй улустарла јатканы «чындык» деп тоого алынбас. Онойдо ок, Библия алыжарынаҥ озо конгонын ла эки эр кижи эмезе эки ӱй кижи кожо јадып јуук колбуларлу болгондорды јаргылап јаратпай јат (Римляндарга 1:26, 27; 1 Коринфяндарга 6:18).
12. Кей-јӱрӱм кандый ачынчылу учы-тӱбине экелип јат?
12 Кей јӱрӱм бир ле кичинек ӧйгӧ эт-каныҥа јакшызынарын берет, је ол чындык ырысты экелбей јат. Ол Кудайдыҥ јаратпай турганына экелет, кийнинде кижиниҥ уйадын ал-сагышка тӱжӱрип кыйнаар аргалу (1 Фессалоникийецтерге 4:3—5). Алышканынаҥ башка јуук колбуларлу болгоны, СПИД ле јуук колбулар ажыра југужып турганын ӧскӧ дӧ ооруларга ла кунукчылду учы-тӱбине экелер аргалу. Бир эмчилик јетирӱде: «бастыра телекейде кажы ла јыл гонорея деген оорула 250 миллионноҥ ажыра, сифилис деген оорула 50 миллионго шыдар кижи југужып јат» — деп айдылат. Анайда ок керексибеген бала табынарыныҥ уур-кӱчтери табылат. Албаты ортодогы балдар табарыныҥ аайын кӧрӧтӧниниҥ федерациязы, телекейде кажы ла јыл 15 миллионноҥ ажыра 15-теҥ ала 19 јашка јетире кыстар бала табынгылайт, олордыҥ ӱчинчи бӧлӱги ээндеш (аборт) эткилейт деп јетирет. Бир африканыҥ ороонында шиҥдегени ле болзо, толо јажы јетпеген ӧлӱп турган ончо кыстардыҥ 72 проценти ээндештеҥ улам ооруп божогылайт. Бастыра ла балыр кей јӱрӱмдӱ улустар оорыгылап, эмезе бала табынгылап турган эмес, је олорго ал-санаага тӱжӱп кунугатанынаҥ кыйар арга јок. Олордыҥ кӧӧбизи бойын тооп турарыныҥ сезимин јылыйтып јат, керек дезе бойын кӧрӧр кӱӱни де јок болгылайт.
13. Эр кижи ле ӱй кижиниҥ ортодогы чындык јогы кандый уур-кӱчтерге экелет ле кем кей-јӱрӱмдӱ эмезе эр ле ӱй кижи ортодо чындык јок болзо олорды не сакып јат?
13 Эр ле ӱй кижиниҥ ортодогы чындык јогыныныҥ јаманын таштап ийерге јараар да болзо, бурулу эмес кижи Библияга тӧзӧлӧнгӧн јаҥла айрылыжарына берип ийер аргалу (Матфейдеҥ 5:32; Осия 3:1—5 тӱҥейлештир). Бу мындый балыр јӱрӱмнеҥ улам алышкан биле јайрадылза, бурулу эмес ээжиниҥ ле балдарыныҥ јӱрегине тереҥ шырка артып јат. Кей јӱрӱмдӱ ле ӧбӧгӧни ле эмегени ортодо чындыгы јок улустарга кату јаргы чыгарарын Кудайдыҥ Сӧзи билелер керегинде кичеенип кӧргӱзет. Анайда ок, јуук колбулар јанынаҥ балыр улустар «Кудайдыҥ Каандыгын энчиркенбес» деп, Библия јарт кӧргӱзет (Галаттарга 5:19, 21).
«ТЕЛЕКЕЙДЕҤ ЭМЕС»
14. а) Кудайдаҥ јалтанып турган кижи тууралайтан чалуларга бажырарыныҥ кандый бӱдӱмдери бар? б) Бистерге Иоаннаҥ 17:14-тӧ лӧ Исаияда 2:4-тӧ кандый башкару берилип јат?
14 Иеговага јараарга ла Каандыктыҥ алкыштарыла тузаланарга кӱӱнзеген улус, јӱзӱн ле башка бӱдӱм чалуларга бажырарынаҥ кыйып јат. Библия сӱрлер эдип, ол тоодо Христостыҥ эмезе Иисустыҥ энезиниҥ, Марияныҥ, сӱрине бажырарын јастыра деп кӧргӱзет (Исход 20:4, 5; 1 Иоанныҥ 5:21). Оныҥ учун чындык христиандар сӱрлерге, кресттерге ле чалуларга бажыргылабай јат. Онойдо ок олор јажыт бӱдӱмдӱ чалуларга — мааныларды тереҥ тооры ла кандый бир албатыны мактап кожоҥдоорынаҥ кыйып јат. Качан олорды мындый ок немелерге албадап тургулаза, олор Иисустыҥ Эрликке айткан: «Сениҥ Кайракан Кудайыҥга бажырып, јаҥыс ла Ого иште» деген сӧстӧрин эске алынгылайт (Матфейдеҥ 4:8—10). Иисус оныҥ ӱренчиктери «телекейдеҥ эмес» деп айткан (Иоаннаҥ 17:14). Анайдарда, олор политикалык керектерге киришпей јадылар. Исаияда 2:4-тӧ: «Ол [Иегова Кудай] албатыларды јаргылаар ла, кӧп ук албатыларды илезине чыгарар; бойлорыныҥ кылыштарын салдага ла, јыдаларын — аш кезер бычакка солып согып эткилеер, албаты албатыга ӱлдӱ, кылыш кӧдӱрбес ле јуулажарга база ӱренбес» — деген бичиктеги сӧстӧрди олор тузаланып амыр-энчӱ јаткылайт.
15. Улу Вавилон дегени ол не ле Библияны шиҥдеп баштап турган улустардыҥ кӧп сабалары оноҥ чыгарга нени эткилеп јат?
15 Анайда ок «телекейдеҥ эмес» дегени — «улу Вавилонло», тӧгӱн кудайлык јаҥныҥ телекейлик державазыла, бастыра колбуларды ӱзерин темдектейт. Ару эмес бажырыш јебрен Вавилонноҥ башталып, бастыра јердиҥ улузы оныҥ каршулу ич-кӧгӱстик (духовный) јаҥына бастыртпаганча таркадылган. Ӱредӱзи ле эткен керектери Кудай керегинде билгирдеҥ чек башка барып јаткан ончо кудайлык јаҥдар «Улу Вавилонго» кирет (Откровение 17:1, 5, 15). Иегованыҥ бир де чындык ишчизи кандый бир уламјыларлу (экуменический) кыймыгуларга ла јӱзӱн-башка кудайлык јаҥдарга бажырарына бирикпес, эмезе улу Вавилонныҥ кандый бир бӧлӱгиле најылажарын јӧмӧшпӧс (Числа 25:1—9; 2 Коринфяндарга 6:14). Бу мыныҥ шылтагынаҥ улам, Библияны шиҥдеп баштап јаткан улустардыҥ кӧп сабалары алдындагы болгон кудайлык јаҥдардыҥ бирӱгилеринеҥ чыгары керегинде угузу бичимел бичигилейт. Бу, олорды сӧзин берген чындык Кудайла јуукташтырат: «Олордыҥ јеринеҥ чыгыгар ла айрылыгар, ару эмес немелерге тийбегер, ол тушта Мен слерди аларым деп Кайракан айдат» (2 Коринфяндарга 6:17; Откровение 18:4, 5). Сен бистиҥ теҥеридеги Адабыска јараарга бастыра јӱрегиҥле кӱӱнзебейдиҥ бе?
КАЖЫ ЛА ЈЫЛДЫҤ БАЙРАМДАРЫНА КАНАЙЫП КӦРӦР
16. Нениҥ учун чындык христиандар Рождествоны байрамдабай турган?
16 Кудайга јараар јӱрӱм бисти кӧп учуралдарда чаптыгы јаан телекейдиҥ байрамдарынаҥ јайымдайт. Темдектезе, Библия Иисустыҥ чыккан кӱнин чике айтпай јат. «Иисус јаҥар айдыҥ 25-чи кӱнинде чыккан деп мен санангам!» — деп, кезиктери кыйгырып ийердеҥ айабас. Бу мындый болор аргазы јок, нениҥ учун дезе качан ого одус ӱч јарым јаш болордо, ол б. э. 33 јылында, јаскыда божогон. Анайда ок, оныҥ чыккан ӧйинде «јалаҥда кӱдӱчилер ӱӱрлӱ койын коно каруулдап тургандар» (Луканаҥ 2:8 ТК). Израильде јаҥар айдыҥ учы — бу соок, јаашту јылдыҥ ӧйи, качан јаҥжыккан айынча койлорын кышкы јут кӱндердеҥ коруларга олорды тӱнде чедендерде кондырат. Је чын аайынча јаҥар айдыҥ 25-чи кӱнинде римляндар Кӱнниҥ кудайыныҥ байрамын темдектегилеп турган болгон. Иисус јерде јатканынаҥ ала јӱсјылдар ӧтти, туура барган христиандар бу ӧйди Христостыҥ чыккан кӱни деп алынгандар. Анайдарда, чындык христиандар Рождество, эмезе тӧгӱн кудайлык јаҥныҥ кӧрӱмине тӧзӧлӧнгӧн ӧскӧ байрамдарды темдектебей јат. Олор јаҥыс ла Иеговага чындык болгонынаҥ улам, бийик кеминде эмес улустарды эмезе албатыларды Кудайга тӱҥейлеп кӧдӱрип турган байрамдарды темдектебей јат.
17. Кудайдаҥ јалтанып турган улус нениҥ учун чыккан кӱнди байрамдабай турган ла, нениҥ учун олордыҥ балдары тӱҥей ле ырысту?
17 Библияныҥ бойында чыккан кӱн керегинде јӱк ле эки учурал туштап јат, бу эки учуралда Кудайга иштебей турган улустар байрамда турушкылаган (Бытие 40:20—22; Матфейдеҥ 14:6—11). Библия бийик кеминдеги кижиниҥ Иисус Христостыҥ чыккан кӱнин кӧргӱспей турганда, бийик кеминде эмес улустардыҥ чыккан кӱндерине аҥылу ајару эдери керек болор бо? (Екклесиаст 7:1). Кудайдаҥ јалтанып турган ада-энелер бойлорыныҥ балдарына сӱӱш јетирерге аҥылу учурал сакыбай турганы јарт. Он ӱч јашту христиан кызычак айтты: «Бистиҥ биледе сӱреен сӱӱнчилӱ... менде ада-энемле сӱреен јуук колбулар, качан ӧскӧ балдар нениҥ учун јӱзӱн-башка байрамдар темдектебей турганымды сурагылап турза, менде кажы ла кӱн байрам деп айдадым». «Бистиҥ биледе сыйларды јыл туркунына сыйлап турган» — деп, он јети јашту христиан уул айтты. Сакыбаган сыйлар канча кире кӧп ырыс экелип јат.
18. Иисус бойыныҥ ӱренчиктерине кандый байрамды кажы ла јыл темдектезин деп јакарган, бу байрам биске нени эске алындырып јат?
18 Кудайга јараар јӱрӱм јӱрӱп турган улустарда, јылдыҥ ла темдектейтен бир кӱн бар. Бу Кайраканныҥ Эҥири, анайда ок Христостыҥ ӧлгӧнин эске алынатан Эҥир деп адалып јат. Бу байрамды кийдирип јада, «Мени эске алынып, анайда эдип јӱрӱгер» — деп, Иисус бойыныҥ ӱренчиктерине јакарган (Луканаҥ 22:19, 20, ТК; 1 Коринфяндарга 11:23—25). Качан Иисус б. э. 33 јылында 14 нисанныҥ тӱнинде бу Эҥирди тургузып саларда, ол оныҥ кинчек јок кижилик эт-сӧӧгин темдектеп турган тус јок калаш ла бийик кеминдеги канын темдектеп турган кызыл аракы тузаланган (Матфейдеҥ 26:26—29). Бу темдектерди (символы) Кудайдыҥ агару тыныла майлалган христиандар амзагылап јат. Олор јаҥы јӧптӧжӱге ле Каандыктыҥ јӧптӧжӱзине киргилеп турганынаҥ улам, олор — теҥериге барар ижемјилӱ (Луканаҥ 12:32; 22:20, 28—30; Римляндарга 8:16, 17; Откровение 14:1—5). Андый да болзо бу јебрен еврей календарьла 14 нисанла келижип турган эҥирдеги тузаны ончо улустар алып јат. Бу кӱн кинчек учун актап алган тайылгада кӧргӱзилген Иегова Кудайдыҥ ла Иисус Христостыҥ сӱӱжин эске алындырып јат. Бу тайылга, Кудай буурзагын јетирип турган улустарга ӱргӱлјиге јадар арга берип јат (Матфейдеҥ 20:28; Иоаннаҥ 3:16).
ИШ ЛЕ СООТ-ЈЫРГАЛДАР
19. Христиандар јӱрӱмине иштеп аларга кандый кӱч айалгаларга туштагылайт?
19 Чындык христиандар ак-чек иштеп ле бойлорын јеткилдеер учурлу. Бу билениҥ башчызына јарык кӱӱн-санаа экелет (1 Фессалоникийецтерге 4:11, 12). Анайткажын, христианныҥ ижи Библияга удурлажып турган болзо, ол ырысту болор аргазы јок. Је кезикте христиан кижиге библиялык ээжилерге келижип турган иш табары јеҥил эмес болот. Темдектезе, кезик ишчилердеҥ олор улустарды тӧгӱндеп турзын деп некелет. Бу ла ок ӧйдӧ кезик иш береечилер, чындык ишчиниҥ уйадын тоого алып, ижемјилӱ ишчизин јылыйтпаска олорло јӧпсингилейт. Кандый да болгон болзо, сен ару уйатту болор иш таап аларга албаданзаҥ, Кудай алкыш-быйанын јетирерине сен бӱдӱмјилӱ болор аргалу (2 Коринфяндарга 4:2).
20. Качан куучын-эрмек соот-јыргал керегинде болзо, нениҥ учун бис талдашту болор учурлу?
20 Кудай ишчилерин ырысту болзын деп кӱӱнзеп турганда, бистер уур ишти амыраш ла соот-јыргалла солыштырып турар учурлу (Марктаҥ 6:31; Екклесиаст 3:12, 13). Эрликтиҥ телекейи Кудайга јарабай турган соот-јыргалды кайралдайт. Је Иеговага јараарга бис бичиктерге, радиоберилтелерге, кӱӱлерге, анайда ок концерттерге, фильмдерге, пьесаларга, телеберилтелерге ле видеофильмдерге талдашту болор учурлу. Бистиҥ алдындагы талдап алган соот-јыргалыс Второзакониеде 18:10—12-де, Псаломдо 10: 5-те ле Ефесяндарга 5:3—5-те бичилген ээжилерге удурлажып турганда бис солунталар этсес, ол тушта бис Иеговага јараарыс, бойлорыс ырысту болорыс.
ЈӰРӰМДИ ЛЕ КАНДЫ ТООГОНЫ
21. Јӱрӱмди тоогоны ээндегенине, анайда ок кылык-јаҥга ла эткен керектерге бистиҥ кӧрӱмиске кандый салтарын јетирер учурлу?
21 Чындык ырысла сӱӱнип јакшызынарга, бис Иегова чылап кижиниҥ јӱрӱмин бийик баалап, ого агару кӧрӧр учурлу. Оныҥ Сӧзи ӧлтӱрерин токтодып јат (Матфейдеҥ 19:16—18). Тӧс учурыла Израильге берилген Јасак, керек дезе эненеҥ чыкпаган баланыҥ јӱрӱми Кудайдыҥ кӧзине јаан баалу ла оны ӧлтӱрерге јарабас деп кӧргӱзет (Исход 21:22, 23). Бу шылтактаҥ улам бис бойыстыҥ эт-канысты таҥкыла, наркотиктерле, аракыла корондоп, эмезе тегинеле јеткердиҥ кырына болып, јӱрӱмди неме кире бодобос эдип кӧрбӧс учурлу. Анайда ок бистиҥ јӱрӱмиске јеткерлӱ болотон керектерге бис киришпес учурлу эмезе јеткер јогыныҥ ээжилерин керексинбес болзос, бис кан тӧгӱлгенине бурулу болуп каларыстаҥ айабас (Второзаконие 22:8).
22. а) Кан ла оныҥ тузаланарына Кудайга јараар кӧрӱм неде кӧрӱнет? б) Кемниҥ каны чыннаҥ ла јӱрӱмди аргадап јат?
22 Иегова Нойго ло оныҥ билезине, кан сӱнени ол эмезе јӱрӱмди темдектеп турган деп айткан. Оныҥ учун Кудай олорго нениҥ де болзо канын курсак эдип јиирге јаратпаган (Бытие 9:3, 4). Бис олордыҥ угы-тӧзиниҥ калыгы учун, бу јасак бистерге де кыйалта јок тӧс учурлу. Иегова израильтяндарды канды бойлорыныҥ амадуларына тузаланбай јерге тӧксин деп јакарган (Второзаконие 12:15, 16). Баштапкы чактыҥ христиандарына «каннаҥ... токтодыныгар» — деп айдылган тушта кан керегинде Кудайдыҥ јасагы такып айдылган болгон (Деяниелер 15:28, 29). Кудайдаҥ јалтанып турган улустар јӱрӱмниҥ агарузын тооп турганынаҥ улам, кан урдырарына, керек дезе ӧскӧлӧри бу олордыҥ јӱрӱмин аргадап алар деп бӱдӱмјилеп те турган болзо, јӧпсинбейдилер. Иегованыҥ Керечилерине јараар эмденетен эп-сӱмелер сӱреен јакшы болужын јетирет, ондый эп сӱмелер кижиниҥ јӱрӱмине кан урдурганда табылып турган јеткерлерге экелбейт. Јӱк ле Иисустыҥ тӧккӧн каны чыннаҥ аргадап аларын христиандар билер. Ого бӱткени, кинчектиҥ јаманын таштаарына ла ӱргӱлјиге јӱрерге ижемји берет (Ефесяндарга 1:7).
23. Кудайга јараар јӱрӱм јӱрериниҥ кезик кайралдары кандый?
23 Кудайга јараар јӱрӱм јӱретенине, албаданыш керектӱ болоры јарт. Мындый јӱрӱм јӱргени таныштарыҥа ла тӧрӧӧндӧриҥе каткымчылу болордоҥ айабас (Матфейдеҥ 10:32—39; 1 Пётрдыҥ 4:4). Је кайралдар јӱзӱн-јӱӱр ченелтелердеҥ, канча киреге кӧп. Кудайга јараар јӱрӱм јӱргени, ару уйат ла Иегованыҥ ӧскӧ бажырачыларыла јакшы тузалу билижерин берип јат (Матфейдеҥ 19:27, 29). Анайда ок Кудайдыҥ чындык јаҥы телекейиндеги ӱргӱлји јӱрӱмди бойыҥа сананып ийзеҥ (Исаия 65:17, 18). А Библияныҥ јӧптӧрин тузаланарга ла Иегованыҥ јӱрегин мыныла сӱӱндирерге кандый јакшы! (Притчалар 27:11). Кудайга јараар јӱрӱм јӱргени — ырыс экелип турганда кайкамчылу неме јок! (Псалом 127:1, 2).
БОЙЫҤНЫҤ БИЛГИРЛЕРИҤДИ ШИҤДЕП КӦР
Кандый шылтактардаҥ улам Кудайга јараар јӱрӱм јӱргени ырыс экелет?
Кудайга јараар јӱрӱм јӱргени кандый солунталар эдерин некеер аргалу?
Нениҥ учун сен Кудайга јараар јӱрӱм јӱрер кӱӱндӱ?
[Ӱренериниҥ сурактары]
[124, 125 бӱктердеги јурук]
Кудайга јараар јӱрӱм јӱрӱп турган улуска ич-кӧгӱстиктиҥ керектерин амыраарыла солып турза, ол ырыс экелип јат.
