Мындый учуралды сананып кӧр: Андрей школго барарга кӱӱнзебей јат. Бӱгӱн де. Эртен де. Качан да. Мындый айалга ӱч ай кайра, кожо ӱренип турган балдар тӧгӱн коп јайып ийерде башталган. Оноҥ оны не ле деп айткылап баштагандар. Кезикте колында бичиктерин ычкынып ийзин деп табарып, ӧнӧтийин этпеген улус болгылайт, эмезе ийде салып ийзе, Андрей айланып келеле, кем ийде салганын оҥдобой турат. Кече ӧскӧ эдип базынгылап баштагандар: Андрей интернет ажыра коркымчылу самара алган...

Сен Андрейдиҥ ордына болгон болзоҥ, бойыҥды канайып тудунар эдиҥ?

Нени де эдер аргам јок деп сананба! Сен базынып турган балдарга јудурук јогынаҥ удура турар аргалу. Канайып?

•   АЈАРУ ЭТПЕ. Агару Бичикте: «Тенек кижи бойыныҥ ачузын чыгарат, је ойгор кижи бойын тудунат» — деп айдылат (Укаа сӧстӧр 29:11). Ичи-буурыҥныҥ аҥданып турганын кӧргӱспеске албаданып турзаҥ, балдар сени базынбай барардаҥ айабас.

• ӦЧ АЛБА. «Кемге де јаман учун јаманды бербегер» — деп, Агару Бичикте айдылат (Римдегилерге 12:17). Ӧштӧшкӧни туза экелбес, карын айалганы там катуландырар.

• ӦТКӰН БОЛ. Агару Бичикте: «Керсӱ кижи јеткерди кӧрӱп, јажынат» — деп айдылат (Укаа сӧстӧр 22:3). Канча кире аргаҥ бар, јаман балдардаҥ ла јеткерлӱ айалгалардаҥ ыраагында јӱр.

• САКЫБАГАН КАРУУ БЕРИП КӦР. Агару Бичикте: «Јымжак каруу чугулданышты токтодот» — деп айдылат (Укаа сӧстӧр 15:1). Јамандагылап турганын, керек дезе кокыр-каткыла да ӧткӱрип ийерге јараар. Темдектезе, сени семис деп айткылап турза, кӱлӱмзиренип ийеле, мынайып айдарга јараар: «Мен карын да арыктап калдым!»

• ЈӰРЕ БЕР. «Бойын тудунып билери, сени санаа-укаалу ла базынып тургандардаҥ кӱчтӱ болгоныҥды кӧргӱзет — деп, 19 јашту Нора айдат.— Мындый учуралда сен бойыҥды тудунып билериҥди кӧргӱзедиҥ, је сени базынып турган кижи бойын тудунып билбезин кӧргӱзет» (2 Тимофейге 2:24).

• БОЙЫҤА АЛАҤЗЫБАСКА ӰРЕН. Базынып турган балдар бойын уйан кӧрӱп тургандарды ла удура туруп болбос улусты кӧп сабада билип ийедилер. Олор базындырбай турганыҥды кӧрӱп ийзе, сеге тийбей барар болор.

• БУ КЕРЕГИНДЕ КЕМГЕ-КЕМГЕ АЙДЫП САЛ. Ӱредӱчи болгон кижи мынайып айдат: «Мындый базыныштарга табартып тургандардыҥ ончозына, бойыныҥ мындый шыразы керегинде айдар керек деп, јӧп бередим. Мынайып этсе чын болор, анайда ок ӧскӧ дӧ улусты базыныштаҥ корулап алар арга болор».