1. Биске ончобыска нени эдер керек?

СЛЕР оорып турзагар эмезе ийде-кӱчигер јетпес деп билип турзагар, јеҥил эмес јӱгӱришке туружарга јӧпсинер эдеер бе? Јок болбой. Је апостол Павелдиҥ айтканыла, чындык христиандардыҥ ончозы христиан јӱрӱмниҥ јолыла јӱгӱрип јат (Евр. 12:1). Бис Иегованыҥ кайралын аларга турган болзоос, ончобыска — јиит те, карган да болзоос, ийде-кӱчис ас та, кӧп тӧ болзын — учына јетире јӱгӱрер керек (Матф. 24:13).

2. 2 Тимофейге 4:7, 8-ле болзо, Павел јӱрӱм учун јӱгӱриште туружары керегинде нениҥ учун ару уйатту айдар аргалу болгон?

² Павел христиандарга јӱрӱм учун јӱгӱриште туружары керегинде ару уйатту айдар аргалу болгон, нениҥ учун дезе ол бойы да «јарышты тӱгес[кен]» ол эмезе учына јетире јӱгӱрген. (2 Тимофейге 4:7, 8 кычырыгар.) Је оныҥ бу сӧстӧри нени темдектейт?

3. Павел кандый јӱгӱриш керегинде айткан?

³ Павел христиандарга ӱредӱ болзын деп, Јебрен Грецияда ойындар канайып ӧткӱрилгени керегинде айткан (1 Кор. 9:25—27; 2 Тим. 2:5). Ол христиан кижиниҥ јӱрӱмин јӱгӱриштиҥ маргаандарыла тӱҥдештирген (1 Кор. 9:24). Анайып, Иеговага јӱрӱмин учурлап, сууга чӧҥӱрилгени — «јӱгӱришке» туружып баштаганы болот. А финишке једип келгени — ӱргӱлји јӱрӱмди кайрал эдип алары болот (Матф. 25:31—34, 46; 2 Тим. 4:8; 1 Петр 3:21).

4. Бу јӧрмӧлдӧ нени шӱӱжерис?

⁴ Узун дистанцияга јӱгӱрериниҥ ле христиан јӱрӱмниҥ нези тӱҥей? Тӱҥей немелери кӧп, је бис јӱк ӱчӱзин кӧрӧрис.  Баштапкызы, биске чын јол талдап алар керек; экинчизи, алатан кайралысты ундыбас керек; ӱчинчизи, кӱчтер де болуп турза, оноҥ ло ары јӱгӱрер керек.

5. Биске кандый јолло барар керек, нениҥ учун?

⁵ Јӱгӱриште туружып, кайрал аларга турган улус, организаторлордыҥ тургускан маршрудыла јӱгӱрер учурлу. Анайып ла бис те ӱргӱлји јӱрӱмди аларга турган болзоос, христиан јолло барар учурлу (Ап. ижи 20:24; 1 Петр 2:21). Је Сатана ла оноҥ тем алып тургандар бисти ӧскӧ јол талдап, олорло кожо јӱгӱрзин деп кӱӱнзеп јат (1 Петр 4:4). Бого коштой олор бистиҥ јӱрӱмиске каткырыжып, бойлорыныҥ талдап алган јолын, бистиҥ јолдоҥ артык ла јайымга апарат деп айдыжат. Бу коркышту јаан тӧгӱн! (2 Петр 2:19).

6. Брайанныҥ теми слерди неге ӱредет?

⁶ Сатананыҥ телекейиниҥ кӧрӱмиле јӱрген улусла јӱгӱрип баштаган кижи, талдап алган јолы јайымга эмес, је кулданышка экелет деп, тӱҥей ле оҥдоп ийет (Рим. 6:16). Брайан аканыҥ темин кӧрӱп ийектер. Оны ада-энези христиан јолды талдап алзын деп кӱӱнзеткен. Је јиит тужында Брайан бойын христиан јолдо ырысту болбос деп сананган. Оныҥ учун ол Сатананыҥ телекейиниҥ нормаларыла јӱрӱп тургандарла кожо јӱгӱрип баштаган. Брайан куучындайт: «Мен јайым јӱрерге кӱӱнзегем. Је ол тушта улустыҥ мактулу јайымынаҥ улам јаман керектердиҥ кулы болуп каларым деп билбегем де. Наркотиктер тузалангам, аракыдагам ла балыр јӱрӱм јӱргем. База эмеш ӧйдӧҥ оноҥ тыҥ наркотиктер тузаланып баштайла, олордыҥ кӧбизи јогынаҥ јӱрӱп болбой баргам. Бого коркышту кӧп акча керек болгон, оныҥ учун наркотиктер садып баштагам». Учы-учында Брайан Иегованыҥ нормаларыла јӱрерге бек сананып алган. Анайып ол Кудайдыҥ јолына туруп, 2001 јылда сууга чӧҥӱрилген. Эмди, ол бу јолды талдап алганына тыҥ сӱӱнип јат *.

7. Матфей 7:13, 14-тӧ кандый эки јол керегинде айдылган?

⁷ Чын јол талдап алары сӱреен керектӱ! Сатана бистерди «јӱрӱмге кирер» чичке јолдоҥ чыгып, бу телекейдиҥ кӧп саба улузы талдап турган јалбак јолло јӱгӱрзин деп кӱӱнзейт. Бу јол, чичке јолго кӧрӧ, јеҥил де болзо, ӧлӱмге апарат. (Матфей 7:13, 14 кычырыгар.) Айдарда, биске чын јолдоҥ чыга бербеске, Иеговага иженип, оныҥ сӧзин угар керек.

8. Јӱгӱреечи бӱдӱриле берзе, нени эдет?

⁸ Узун дистанцияга јӱгӱрген улус бӱдӱрилбеске, алдында јолына кӧрӱп јат. Је андый да болзо, олорды ӧскӧ јӱгӱреечилер билбей калала табарып ийердеҥ эмезе олор бойы ойдыкка бӱдӱрилердеҥ айабас. Олор јыгыла да берзе, ойто туруп, оноҥ ары јӱгӱрет. Нениҥ учун дезе олор недеҥ улам бӱдӱрилгенин эмес, је финишке канайып једип аларын ла кайрал аларын сананат.

9. Бӱдӱрилип калган болзоос, биске нени эдер керек?

⁹ Бис христиан јолыста айткан сӧстӧристе ле эткен керектеристе кӧп катап бӱдӱрилердеҥ айабазыс. Эмезе бистиҥ јаныста јӱгӱрип јаткан кижи кандый бир јастыра эдип, бисти ачындырар болор. Је бис бого кайкабас учурлу, нениҥ учун дезе бис ончобыс толо кемдӱ улус эмезис ле ончобыс јӱрӱмге апаратан бир ле чичке јолло јӱгӱрип јадыс. Оныҥ да учун ачыныштар јогынаҥ неме болбос. Кезикте бис бой-бойыска комыдажып турарыс деп, Павел де оҥдоп туратан (Кол. 3:13). Је ачынардыҥ ордына, бисти сакып јаткан кайралды сананып турактар. Бистер кемнеҥ-кемнеҥ улам бӱдӱриле берген болзоос, ойто туруп, оноҥ ло ары јӱгӱректер. Ачынып калала, Иеговага иштебей барзаас, финишке де јетпезис, кайрал да албазыс. Бого ло коштой, бис ле чилеп јӱрӱмге апарар чичке јолло јӱгӱрерге албаданып турган ака-эјелерди де бӱдӱрилтердеҥ айабазыс.

10. Улусты бӱдӱрилтпеске биске не болужар?

¹⁰ Бисле кожо јӱгӱрип јаткан улусты бӱдӱрилтпеске, биске база не болужар? Бойыстыйын некеердиҥ ордына, арга бар болзо, улустыҥ кӱӱни аайынча этсе торт болор (Рим. 14:13, 19—21; 1 Кор. 8:9, 13). Бу јанынаҥ бис чыннаҥ ӧткӱрилип јаткан маргаанныҥ туружаачыларынаҥ башка болодыс. Олор бой-бойыла маргыжып, бастыра кӱчинеҥ јеҥип аларга албаданат. Олор озо ло баштап бойы керегинде сананадылар. Оныҥ учун озолоп јӱгӱрерге, ӧскӧ јӱгӱреечилерди ийде салардаҥ айабас. Је бис, олорго кӧрӧ, бой-бойысла маргышпай јадыс (Гал. 5:26; 6:4). Бистиҥ амадубыс — бисле кожо кӧп улус финишке једип, ӱргӱлји јӱрӱм алзын деп болужары. Оныҥ  учун бис Кудайдыҥ агару тыныла айдылган апостол Павелдиҥ јӧбиле јӱрерге албаданадыс. Ол: «Кажыгар ла бойындыйын эмес, је кажыгар ла ӧскӧ дӧ улустыйын сананзын» — деп айткан (Флп. 2:4).

11. Јӱгӱреечи санаазында нени кӧрӱп јат, нениҥ учун?

¹¹ Јӱгӱреечилер јӱк алдында јолын кӧрӱп турган эмес, је санаазында финишти кӧрӱп јадылар. Олор финишке јеткелек те болзо, санаазында јеҥӱ алып јатканын кӧрӧт. Мындый санаа олорго учына јетире јӱгӱрерге болужат.

12. Иегова биске нени берерге турган?

¹² Иегова финишке једетен ишчилерине ӱргӱлјиге теҥериде эмезе јерде јӱретен кайралды кыйалта јогынаҥ берер деп сӧзин берет. Бу кайрал керегинде Агару Бичикте айдылып јат. Бис бу бичиктиҥ болужыла, сӱрекей јакшы ӱргӱлји јӱрӱм кандый болорын санаабыста кӧрӱп турар аргалу. Айдарда, Кудайдыҥ бистерге келер ӧйдӧ берерге турган јӱрӱми керегинде шӱӱп сананып турзаас, финишке једерге, биске не де чаптыгын јетирип болбос.

13. Бис јӱгӱреечилерге кӧрӧ, неге иженип јадыс?

¹³ Јебрен Грециядагы ойындарда јӱгӱреечилерде башка-башка кӱчтер болгон. Темдектезе, олорго арып-чылап калганы ла эди-каныныҥ ооруп турганы чаптыгын јетиретен. Олордыҥ иженгени — јӱк ле тренировкалар ла бойыныҥ ийде-кӱчи болгон. Анайып ла бис те јӱгӱреечилер чилеп, јолды учына јетире јӱгӱрерине ӱренип јадыс. Је бистиҥ иженгенис — качан да божобойтон ийде-кӱч болот. Бис Иеговага иженип турзаас, Ол бисти јӱк ле ӱредип койор эмес, је «кӱчтӱ» эдип салар деп, сӧзин берет! (1 Петр 5:10).

14. 2 Коринфтегилерге 12:9, 10-до бичилген Павелдиҥ сӧстӧри биске кӱчтердиҥ ӧйинде канайып болужат?

¹⁴ Павел коркышту кӧп кӱчтер ӧткӧн. Темдектезе, улус оны јамандап ла истежип туратандар. Бого коштой, ол бойын ийде-кӱч јок деп сескен ле эди-канындагы «тегенекле» тартышкан (2 Кор. 12:7). Је Павел бир де чӧкӧбӧгӧн, карын мындый айалганы Иеговага иженетен арга деп кӧргӧн. (2 Коринфтегилерге 12:9, 10 кычырыгар.) Оныҥ учун Иегова ого ончо ченелтелеринде болушкан.

15. Бис Павелдеҥ тем алып турзаас, бисте кандый арга болор?

¹⁵ Кудайга бӱдӱп турганыс учун улус бисти база јамандап, истежер болор. Анайда ок бистиҥ су-кадыгыс уйадаардаҥ айабас эмезе бис арып-чылап турардаҥ айабазыс. Је Павелдеҥ тем алып турзаас, кандый ла кӱчтерде Иегованыҥ сӱӱжин ле болужын кӧрӧтӧн арга болор.

16. Слердиҥ су-кадыгар уйан болзо, слер нени эдер аргалу?

¹⁶ Слер орыннаҥ турбай турганаар эмезе инвалидтердиҥ креслозына отурып турган болзогор, канайдараар? Ол эмезе слерге базарга кӱч болуп турган, эмезе кӧзигер уйан болзо, слер јиит ле су-кадык ака-эјелерле кожо јӱгӱрип болороор бо? Эйе! Јӱрӱмге апарар јолдо јажы јаан ла су-кадыгы уйан кӧп ака-эјелер јӱгӱрип јат. Олор христиан туштажуларды телефон ажыра угуп, эмезе видео ажыра кӧрӱп, бойыныҥ ийде-кӱчине эмес, је Иегованыҥ ийде-кӱчине иженип јадылар. Анайда ок олор врачтарга, медсестраларга ла тӧрӧӧндӧрине јарлап, ӱренчиктер белетеер ишке туружат.

17. Ийде-кӱчи ас улуска Иегованыҥ кӧрӱми кандый?

¹⁷ Уйан су-кадыгардаҥ улам слер ӱргӱлји јӱрӱмге апарып јаткан јолло јӱгӱрип болбозыгар деп, јаман санааларга качан да бастыртпагар. Иегова слерди Ого бӱдӱп  турганаар учун ла Ого кӧп јылдардыҥ туркунына јана баспай иштеп турганаар учун сӱӱп јат. Слерге эмди Кудайдыҥ болужы алдындагызына кӧрӧ оноҥ кӧп керек болот. Ол слерди качан да артыргыспас (Сар. 9:10). Карын слерге оноҥ јуук болуп калар. Оорый берген бир эје мынайып куучындаган: «Мениҥ су-кадыгым там ла уйадап јат, оныҥ учун улуска чындыкты куучындаар аргам там ла астай берген. Је мениҥ бир эмеш те эткеним Иегованыҥ јӱрегин сӱӱндирет. Мынайып, мен бойым да сӱӱнчи аладым». Кунугып турзагар, слер јаҥыскан эмезигер, јаныгарда Иегова бар деп ундыбай туругар. Павелдиҥ темин сананып, оныҥ: «Чине јок тужымда... [сӱӱнип јадым]. Нениҥ учун дезе чине јок тужымда мен кӱчтӱ» — деп, айткан кӧдӱриҥилӱ сӧстӧрин эске алыгар (2 Кор. 12:10).

18. Кезик христиандарда кандый кӱчтер болот?

¹⁸ Јӱрӱмге апарар јолдо јӱгӱрип јаткан кезик христиандар ӧскӧ дӧ кӱчтерге туштап јат. Олордыҥ тартыжып турган кӱчтерин ӧскӧ улус билбестеҥ де айабас. Темдектезе, олордыҥ кезигинде депрессия эмезе тыҥ санааркаштар болот. Нениҥ учун анчада ла андый кару ака-эјелериске кӱч болуп јат? Нениҥ учун дезе колы сынган эмезе инвалидный креслого отурган улусты, улус ајаруга алып, капшай ла болужарга албаданат. Је эмоциональный эмезе психический оорулар кӧскӧ кӧрӱнбестеҥ айабас. Андый улустыҥ оорузы колы-буды сынган улустыҥ оорузындый ла ок болот. Је улус олорго коркышту кӱч болуп турганын кӧрбӧй турганынаҥ улам, болушпай турган болор.

19. Мемфивосфейдиҥ теминеҥ бис неге ӱренедис?

¹⁹ Слер кандый бир кӱчтердеҥ улам, Иеговага кӧп иштеп болбой турган болзогор эмезе улус слердиҥ айалганы оҥдобой турган деп сананып турган болзогор, слерге Мемфивосфейдиҥ теми болужар (2 Сам. 4:4). Ол кенек (инвалид) кижи болгон. Анайда ок Давид каан ол керегинде јастыра сананып, ого јаман баштанган. Бу айалгада Мемфивосфейдиҥ бурузы болбогон. Је ол јаман санааларга бир де алдыртпаган ла јӱрӱминде болгон ончо јакшыны тыҥ баалаган. Анайып, Давидтиҥ ого јалакай баштанганына быйанду болгон (2 Сам. 9:6—10). Оныҥ учун Давид ого јаман баштанарда, Мемфивосфей бого ајару этпей, айалганы ээлбеде кӧрӧргӧ албаданган. Давидтиҥ јастыразынаҥ улам оныҥ јӱреги катуланбаган. Анайда ок бу айалгада Иегованы бурулабаган, карын Иегованыҥ тургускан каанына канайып јӧмӧжӧрин сананган (2 Сам. 16:1—4; 19:24—30). Иегова бисти Мемфивосфей деп чындык ишчизиниҥ сӱреен јакшы теминеҥ ӱредӱ алзын деп, оныҥ  учуралын бойыныҥ Сӧзине бичидип салган (Рим. 15:4).

20. Кезик улуста тыҥ санааркап турганынаҥ улам кандый кӱчтер болот? Је олор неде алаҥзыбас аргалу?

²⁰ Тыҥ санааркап турган кезик ака-эјелер кажы ла немеге ӧйинеҥ ӧткӱре санааркап јадылар ла улустыҥ ортозында эбијоксынып јат. Олорго кӧп улусту јерлерде болорго кӱч те болзо, олор јуунныҥ туштажуларын ла курултайларды бир де божотпойдылар. Анайда ок таныш эмес улусла куучындажарга коркышту кӱч болуп та турза, олор јарлаар ишке тӱҥей ле туружып јат. Слерде де мындый кӱчтер болуп турган болзо, Иегова слерле кожо деп ундыбагар. Мындый кӱчтер кӧп ака-эјелерде болот. Иегова слердиҥ акту кӱӱнигердеҥ албаданып турганаарды тыҥ баалап јат деп алаҥзыбагар. Слердиҥ эмдиге ле јетире тартыжып турганаардаҥ да, Иегова слерге алкыжын ла ийде-кӱчин берип турганы кӧрӱнет (Флп. 4:6, 7; 1 Петр 5:7) *. Слер физический ле эмоциональный оорулараарга тыҥ санааркабай, Иеговага оноҥ ло ары иштеп турзаар, оны сӱӱндиредигер деп, бир де алаҥзыбагар.

21. Бистиҥ ончобыс Иегованыҥ болужыла нени эдер аргалу?

²¹ Павелдиҥ бичиген јӱрӱм учун јӱгӱрер маргаанда ла чыннаҥ ла ӧткӱрилип турган маргаандарда карын јаан башказы бар. Библиялык ӧйлӧрдиҥ маргаандарында кайралды јӱк ле бир кижи алатан. Је христиан јолдо кайралды — ӱргӱлји јӱрӱмди — финишке јеткен кажы ла кижи алар (Иоанн 3:16). Јӱгӱриштиҥ маргаандарыныҥ туружаачылары јакшы белетенер учурлу болгон, оноҥ башка олор јеҥӱни алып болбос эди. Олорго кӧрӧ, бистиҥ кезигистиҥ су-кадыгыс уйан, је бис тӱҥей ле турумкай јӱгӱрип јадыс (2 Кор. 4:16). Иегованыҥ болужыла бис финишке једип барарыс!