Је он ӱч јаш киреде, Иегованаҥ ыраап баштагам. Кожо ӱренип турган балдар јайым јӱрӱп, нени ле эдер аргалу деп меге билдирген. Мен база анай јӱрерге кӱӱнзей бергем. Ада-энемниҥ ӱреткенин ле христиан нормаларды ӧткӱре кату деп бодогом, оныҥ учун Иеговага иштеери меге уур јӱк боло берген. Иегова — чын Кудай деп, мен качан да алаҥзыбагам, је бойымды ого јуук деп сеспей баргам.

Андый да болзо, мен чек јарлабай барган эмезим, кезикте де болзо, јарлап туратам. Је јарлаар ишке белетенбейтем. Оныҥ учун меге куучындажарга кӱч болгон. Мынаҥ улам менде такып барар улус та, ӱредӱлер де јок болгон. Анайып, сӱӱнчим јылыйып, јарлаар ишке туружар кӱӱним ӧчӧ берген. Оноҥ мен санандым: «Јарлаар иш андый кӱч болордо, оноҥ ары канайып јарлайтан?»

17 јажым толо берерде, мен јайым јӱрерге тыҥ кӱӱнзей бергем. Оныҥ учун мен кийим-тудумымды јууп, Австралиядӧӧн кӧчӧ бергем. Ада-энемге айылымнаҥ јӱрӱп јатканымды кӧрӧргӧ коркышту кӱч болгон. Олор меге тыҥ санааркаган, је андый да болзо, мени јаҥы  јерде чындыкты артыргыспай, Кудайга оноҥ ло ары иштеер деп иженгилеген.

Австралияда мениҥ кӧгӱзим оноҥ тыҥ уйадаган. Мынаҥ улам јуундар божодып баштагам ла јуунда эки јӱрӱмле јӱрӱп турган јииттерле најылашкам. Бӱгӱн эҥирде бис јуунда, а эртезинде аракы ичип, бијелеп аларга, ночной клуб баратаныс. Эмди кайра кӧрӱп, оҥдоп јадым, мен бир будымла — чындыкта болгом, база бирӱзиле телекейде болгом. Је меге кайда да јакшы болбогон.

Эки јыл кире ӧдӧ берерде, мен бир эјеле танышкам. Ол мениҥ јӱрӱмимге сӱреен јаан камаанын јетирген. Мен бир турада тӧрт сыйынла кожо јаткам. Бир катап бис аймак кӧрӧӧчини ӱйиле кожо, бисте бир неделеге јатсын деп, кычырганыс. Ака јуунныҥ керектериле јӱре берзе, оныҥ ӱйи, Тамара, бисле кожо кӧп ӧй ӧткӱрип туратан. Тамара эје сӱӱнчилӱ кижи. Оныла куучындажарга јеҥил болгон. Оныҥ учун меге ол тыҥ јараган. Ол тушта кӧгӱзи тереҥ кижи база сӱӱнчилӱ болуп турганын кайкап кӧргӧм.

Тамара эјениҥ јӱреги Кудайга иштееринде јалбыштанып кӱйетен. Оныҥ чындыкка ла јарлаар ишке сӱӱжин кӧрӱп, оноҥ тем алар кӱӱниҥ келер. Ол Иеговага эҥ артыгын берген, је мен бастыра бойымды бербегеним учун, менде сӱӱнчи јок болгон. Оныҥ јакшы кӱӱн-санаазы ла сӱӱнчизи мениҥ јӱрегиме тыҥ тийген. Тамара эјениҥ теми меге јаан учурлу чындыкты оҥдоорго болушкан: Иегова бисти ончобысты ого сӱӱнип иштезин деп кӱӱнзейт (Сар. 100:2).

Мениҥ јӱрӱмим Тамара эјениҥ јӱрӱминдий болзын деп кӱӱнзегем. Је анай јӱрерге, кӧп немени солыыр керек. Бого кӧп ӧй керек болгон. Мен амадуумга јединерге, араайынаҥ алтамдар эткем. Озо баштап, мен јарлаар ишке белетенип баштагам. Оноҥ каа-јаада подсобный пионер болуп иштегем. Бу меге алаҥзыбаска ла бӱдӱмјилӱ куучындаарга болушкан. Јарлаар иште мен јаантайын Агару Бичикти тузаланып баштаарымда, јарлаарга меге  оноҥ тыҥ јарап баштаган. Јаан удабай мен кажы ла айга подсобный пионердиҥ ижин алгам.

Мен Иегованы тыҥ сӱӱп турган јаан да, јиит те ака-эјелерле најылажып баштагам. Олордыҥ теми меге баштапкы јерге нени тургузарын оҥдоорго болушкан. Анайып, мен Агару Бичикти кӱнӱҥ ле кычырып баштагам. Јарлаар иштеҥ јаан сӱӱнчи алып, учы-учында текши пионер болуп калдым. Канча јылдардыҥ туркунына мен баштапкы ла катап чыннаҥ ла ырысту болгом. А јуунда мен бойымды айлымда деп сескем.

Бир јылдаҥ мен Иегованы ла јарлаар ишти тыҥ сӱӱп турган јалакай ла ачык-јарык Алекс деп акала танышкам. Ол тушта Алекс болушчы ишчи ле алты јылга текши пионер болуп иштеген. Анайда ок ол канча да айга јарчылар јетпей турган јерде, Малавиде, јарлаарга болушкан. Анда јарлаган миссионерлер ого јакшы тем болгон. Олор Алексти баштапкы јерге јаантайын Каандыктыҥ керектерин тургузарга кӱӱнзеткен.

2003 јылда бис Алексле кожо биле тӧзӧгӧнис. Оноҥ бери ӧйисти толо берип, иштеп јадыс. Бу јылдардыҥ туркунына бис кӧп немеге ӱренип алганыс, Иегова биске сӱреен кӧп алкыштар берген.

2009 јылда бисти Кӱнчыгыш Тиморго, Малайский архипелагтыҥ ортолыктарында турган јаан эмес ороонго, миссионерлер болуп иштезин деп кычырган. Бис мыны угала сӱӱнгенис, кайкаганыс, је бу ок ӧйдӧ билбес ороонго барарынаҥ коркыганыс. Беш айдаҥ бу ороонныҥ Дили деп, тӧс калазына једип келгенис.

Кӱнчыгыш Тимор — бу чек башка ороон. Биске оныҥ культуразына, тилине, курсак-тамагына ла јадын-јӱрӱмине ӱренер керек болгон. Јарлаар иште бис јаантайын јокту,  бичик-билик билбес, базынчыктаҥ шыралап калган улуска туштайтаныс. Анайда ок јуу-согуштардыҥ ӧйинде кӧп улус инвалид ле эмоциональный јанынаҥ шыралап калган болгон *.

Кӱнчыгыш Тимордо јарлаар иш сӱреен кайкамчылу болгон. Темдектезе, бир катап мен кунугып калган 13 јашту Мария * деп кызычакка јолуккам. Оныҥ энези канча јыл кайра божоп калган. Адазыла ол каа-јаада кӧрӱжетен. Мария јӱрӱминде нени эдерин оҥдобой турган болгон. Бир катап ол ыйлап, меге ончо бойыныҥ сезимдерин куучындаган, је мен оныҥ тилин оҥдобогом. Оныҥ учун оны канай токынадарын билбей турала, Иеговага мӱргӱп, болуш сурагам. Оноҥ ого Агару Бичиктеҥ токынал берип турган ӱлгерлер кычыргам. Канча јылдардыҥ туркунына Марияныҥ кылык-јаҥын, тыш-бӱдӱмин ле јӱрӱмин чындык канайып солыганын мен кӧргӧм. Ол сууга чӧҥӱрилип, Агару Бичикле бойы ӱредӱ ӧткӱрет. Эмди Марияда оны сӱреен тыҥ сӱӱп турган јаан кӧгӱс биле бар.

Иегова Кӱнчыгыш Тимордогы јарлаар ишке алкыжын јетирип јат. Ондогы јарчылардыҥ кӧп сабазы бу калганчы он јылдыҥ туркунына да чӧҥӱрилген болзо, эмди олордыҥ кӧбизи пионерлер, болушчы ишчилер, аксагалдар болот. Кемизи де кӧчӱрер офисте иштеп, јербойыныҥ тилине кӧгӱс курсакты белетеерге болужат. Мен туштажуларда олордыҥ кожоҥдоп турганын угарга, јӱстеринде каткызын ла кӧгӱс ӧзӱмин кӧрӧргӧ сӱреен тыҥ сӱӱнедим.

Кӱнчыгыш Тимордогы јарлаар иш Австралияда јарлаар иштеҥ чек башка болгон. Је андый да болзо, мындый ырысту јӱрӱмди мен сананбагам да. Кезикте бис кичинек автобусла јоруктайтаныс. Сананзаҥ ого улус та батпас ошкош, је олор бу автобусла кургадып салган балык ла рыноктоҥ аш-курсак та тартатан. Кезикте бис кичинек, изӱ ле чыкту турада ӱредӱлер ӧткӱретенис. А бу ок ӧйдӧ тураныҥ ичинде такалар јӱгӱрижип туратан. Мындый кӱчтерге де кӧрбӧй, мен јаантайын: «Мында кандый јакшы!» — деп сананатам.

Ада-энемге Иегованыҥ јасактарына мени ӱредип салганына ла олордыҥ меге, Кудайла колбуларым уйадап турарда, болушканы учун быйанду болодым. Укаа сӧстӧр 22:6-дагы сӧстӧрдиҥ чын болгонына мен бойым бӱдӱмјилендим. Ада-энем Алексле, менле оморкоп, Иеговага иштеп турганыска сӱӱнип јат. 2016 јылдаҥ ала бис Австралазийский филиалга кирип турган јерлерде јорыкчы кӧрӧӧчиниҥ ижин бӱдӱредис.

Качан да јарлаар иш меге уур јӱк болгон деп, бӱтпей јадым. Је эмди бу иш меге сӱреен јарап јат! Јӱрӱмде кандый да кӱчтер болзо, Кудайга акту јӱрегиҥнеҥ иштезеҥ, чыннаҥ ла ырысту болорыҥ. Алексле кожо калганчы 18 јылга Иеговага иштегенис јӱрӱмниҥ эҥ ырысту јылдары болуп јат. Давид бойыныҥ сарындарыныҥ бирӱзинде Иегова керегинде: «Сенеҥ кору бедиреп тургандар ончозы ырысту јӱрер, олор јажын-чакка сӱӱнгилеер. ...Сениҥ адыҥды сӱӱп тургандар сениҥ алдыҥда сӱӱнип јӱрер» — деп, нениҥ учун бичигенин эмди оҥдоп јадым (Сар. 5:11).