23 ӰРЕНЕТЕН ЈӦРМӦЛ
«Адыҥ Сениҥ агарулалзын»
«О-о Иегова, сениҥ адыҥ јажын-чакка» (САР. 135:13).
10 КОЖОҤ Кудайысты, Иегованы, мактагар!
БУ ЈӦРМӦЛДӦ *
1, 2. Иегованыҥ Керечилерине не керегинде куучындажарга јарап јат?
ИЕГОВАНЫҤ Керечилерине, јӱк ле Иегова бистиҥ башкараачы болор јаҥду деп ле Кудайдыҥ адын агарулаар керек деп куучындажарга јарап јат. Је бу эки суракта кандый да колбу јок деп сананбас керек.
2 Бис, Кудайдыҥ ады јабардаҥ аруталар керек ле Иегованыҥ башкарузы эҥ артык деп кӧргӱзилер керек деп оҥдоп јадыс. Бу эки суракка бис јаан ајару эдер учурлу.
3. Кудайдыҥ адыла не колбулу?
3 Кудайдыҥ адына, Иеговала колбулу ончо неме, ол тоодо оныҥ башкарузы да кирет. Оныҥ учун Кудайдыҥ адын јабардаҥ арутаары ла Иегованыҥ башкарузын эҥ артык деп кӧргӱзери јуук колбулу. (« Кудайдыҥ адын агарулаарыла колбулу сурактар» деген рамканы кӧрӱгер.)
4. Сарын 135:13-те Кудайдыҥ ады керегинде не айдылат? Бу јӧрмӧлдӧ кандый сурактар кӧрӱлер?
4 Иегованыҥ ады аҥылу. (Сарын 135:13 кычырыгар *.) Бу ат нениҥ учун јаан учурлу? Бу ат баштапкы катап качан јабарлалган? Кудай бойыныҥ адын агарулаарга нени эдет? Бис Кудайдыҥ адын корулаарга нени эдер аргалу? Бу сурактардыҥ карууларын билип алактар.
ЈААН УЧУРЛУ АТ
5. Кудайдыҥ адын агарулаарыла колбулу кандый сурак чыгар болор?
5 Иисустыҥ кӧргӱзӱ мӱргӱӱли, бис озо ло баштап не керегинде мӱргӱӱр учурлу деп кӧргӱзет. Ол мынайып айткан: «Мынайып мӱргигер: „Теҥеридеги Адабыс! Адыҥ Сениҥ агарулалзын“» (Матф. 6:9). Бу сӧстӧр нени темдектейт? «Агарулаары» дегени — та нени де ару эмезе агару эдери дегени. Је кем де: «Тегин де агару атты нениҥ учун агарулаар керек?» — деп сураар болор. Бу сурактыҥ каруузын билерге, ат-јол деген сӧсти канайып оҥдоор керек деп билип алактар.
6. Нениҥ учун ат-јол сӱреен јаан учурлу болот?
6 Ат-јол — ол јӱк ле табыштардаҥ эмезе буквалардаҥ турган сӧс эмес. Агару Бичикте мындый сӧстӧр бар: «Јакшы ат-јол баалу јӧӧжӧнӧҥ дӧ артык» (Укаа 22:1; Эккл. 7:1). Нениҥ учун мынайып айдылат? Нениҥ учун дезе бу ӱлгердеги ат-јол деген сӧс кижиниҥ репутациязын темдектейт. Оныҥ учун ат-јолдыҥ канайып бичилип эмезе айдылып турганы эмес, је улус бу ат-јолды угала, нени сананып турганы артык болот.
7. Улус Кудайдыҥ адын канайып јабарлайт?
7 Улус Иегова керегинде тӧгӱн неме айдып турза, Кудайдыҥ репутациязы ӱрелет. А Кудайдыҥ репутациязы ӱрелзе, оныҥ ады јабарлалат. Мындый неме баштапкы катап Эдем садта болгон. Бу учуралдаҥ бис неге ӱренер аргалу деп кӧрӱп ийектер.
КУДАЙДЫҤ АДЫ БАШТАПКЫ КАТАП КАНАЙЫП ЈАБАРЛАЛГАН?
8. Адам ла Ева нени билген? Мыныла колбой кандый сурактар чыгат?
8 Адам ла Ева Кудайдыҥ адын Иегова деп билер болгон. Олор Кудай керегинде тӧс чындыктарды да билетен. Темдектезе, Кудай — ол Јайаачы. Ол улуска јӱрӱм, толо кемдӱ эт-кан, сӱрекей јараш рай ла толо кемдӱ эш-нӧкӧр сыйлаган деп база билген (Баш. 1:26—28; 2:18). Је Адам ла Ева Иегованыҥ ончо бу сыйларын баалаган ба? Олор Иегованы акту јӱрегинеҥ сӱӱп, ого быйанду болгон бо? Бу сурактардыҥ каруулары, олорло Кудайдыҥ ӧштӱзи куучындажарда кӧрӱне берген.
9. Башталганы 2:16, 17-ле, 3:1—5-ле болзо, Иегова Адам ла Евага нени айткан? Је Сатана оныҥ сӧстӧрин канайып алаҥзуга тургускан?
9 Башталганы 2:16, 17; 3:1—5 кычырыгар. Сатана јылан ажыра Еванаҥ мынайып сураган: «Садтагы агаштардыҥ бирӱзиниҥ де јиилегин Кудай слерге јидиртпей турганы чын эмеш пе?» Бу суракта кижиниҥ санаазын корондоп салгадый тӧгӱн болгон. Је чынынча болзо, Кудай Адам ла Евага јӱк ле бир агаштыҥ јиилегинеҥ јибезин деп айткан, је ӧскӧ агаштардыҥ јиилегин бастыразын јиирге јараар деген. Райда дезе, јӱзӱн-башка агаштар ӧскӧн! (Баш. 2:9). Иегова Адам ла Евага сӱреен кӧп сыйлар берген. Ол јӱк ле бир агаштаҥ јибезин деп јакарган. Оныҥ учун Сатана бойыныҥ сурагыла улусты алаҥзыдып, Кудай улустаҥ та нени де јажырып турган деп тӧгӱндеген. Мынаҥ улам Ева: «Јыланныҥ сӧстӧри чын эмеш пе?» — деп сананган болор.
10. Сатана Кудайдыҥ адын канайып ачыгынча јабарлаган? Мынаҥ улам не болгон?
10 Ол ӧйдӧ Ева, јаманды ла јакшыны јӱк ле Иегова айдып берер јаҥду деп, алаҥзыбай турган болгон. Оныҥ учун Ева Сатанага Кудайдыҥ јарт јакарузын айдып берген. Анайда ок ого ла Адамга јакшыны ла јаманды билип алар агашты тударга да јарабас, нениҥ учун дезе сӧс укпаза, олор божоп калар эди деп айткан. Мындый јакаруны Кудай олорго бойы берген. Је Сатана: «Ӧлбӧзигер» — деп айткан (Баш. 3:2—4). Мынаҥ ала Сатана, Кудай Еваны тӧгӱндеп салган деп, ачыгынча јабарлап баштаган. Анайып Сатана Дьявол, ӧскӧртӧ айтса јабарлаачы болуп калган. Ева Иеговага эмес, је Сатанага бӱткӱлинче бӱде берген (1 Тим. 2:14). Мынаҥ улам эҥ ле јаман шӱӱлтеге келген: Ева Адазыныҥ јакарузын бузып, Иегованыҥ јиирге јаратпаган агажынаҥ јип, Адамга да берген (Баш. 3:6).
11. Адам ла Евага нени эдер керек болгон?
11 Ева Сатанага мындый каруу берген деп, сананып ийзеер: «Мен сени билбезим, је бойымныҥ Иегова Адамды јакшы билерим. Оны сӱӱп јадым ла ого бӱдӱп јадым. Ол Адам ла меге ӱзе немени берген. Оныҥ учун Иегова керегинде јаман неме айдарга, сен кем андый? Јӱр ары!» Иеговага сӱӱген кызынаҥ мындый сӧстӧр угарга, кандый јакшы болор эди! (Укаа 27:11). Је Ева Иегованы сӱӱбеген де, ого чындык артпаган да. Адам да андый ла болгон. Олор Иегованыҥ јакшы адын корулаарга, јабарлаачыга удура бир де сӧс айтпаган.
12. Сатана Еваны канайып алаҥзыдып ийген? Адам ла Ева нени этпеген?
12 Сатана озо ло баштап Евага алаҥзый беретен санаалар берген. Ол, Иегованы јаман Ада деп тӧгӱндеп турарда, Адам ла Ева Кудайдыҥ адын корулабаган. Оноҥ улам олор Сатананыҥ сӧзине капшай кире береле, бойлорыныҥ Адазына удура тура берген. Бӱгӱнги кӱнде Сатана бу ла эп-аргазын тузаланып, Кудайдыҥ јакшы адын јабарлап јат. Бу тӧгӱнге бӱдӱп турган улус, Иегованы бойыныҥ башкараачызы деп сананбай јат, оныҥ учун оныҥ чындык нормаларын капшай јектеп ийет.
ИЕГОВА БОЙЫНЫҤ АДЫН АГАРУЛАЙТ
13. Иезекииль 36:23-теги сӧстӧрлӧ болзо, Агару Бичиктиҥ тӧс темазы кандый?
13 Иегова Сатананыҥ јабарлажына удура нени де этпей турган ба? Јок эмей! Бӱдӱн Агару Бичикте, Иегова Эдем садта айдылган јабардаҥ бойыныҥ адын арутаарга нени эдип турганы керегинде айдылат (Баш. 3:15). Агару Бичиктиҥ тӧс темазын мынайып айдарга јараар: Иегова Каандыктыҥ болужыла бойыныҥ адын агарулап, јердиҥ ӱстине амыр-энчӱ ле справедливость јайап јат. Бу Каандыкта Иисус Христос каан болот. Агару Бичиктеҥ, Иегова бойыныҥ адын агарулаарга нени эдип турганын билип аладыс. (Иезекииль 36:23 кычырыгар *.)
14. Иегова, Эдем садта кӧдӱрилген тӱймеенге каруу берерге эткен керектериле бойыныҥ адын канайып агарулайт?
14 Сатана Иегованыҥ табы бӱтпезин деп, канайып та албаданып турза, ого не де келишпей јат. Бу керегинде, Иегова бойыныҥ табын бӱдӱрерге нени эдип турганын Агару Бичиктеҥ билип јадыс. Оныҥ эткен керектери, Иегова сӱӱштӱ Ада ла эҥ јакшы башкараачы деп, јарт кӧргӱзип јат. Иеговага Сатананыҥ ла ого кожулган јайаандардыҥ тӱймеенин кӧрӧргӧ коркышту ачу болгон (Сар. 78:40). Је Кудай бойыныҥ адын агарулаарга, сӱрекей ойгор болгонын ла чыдамкай ла справедливый болгонын кӧргӱзет. Анайда ок ол јаан ийде-кӱчин де кӧп катап кӧргӱскен. Је эҥ керектӱзи — Иегованыҥ ончо керектеринеҥ оныҥ сӱӱжи кӧрӱнет (1 Иоанн 4:8). Айдарда, Иегова бойыныҥ адын агарулаарга, кӧп иш эдет.
Сатана Евала куучындажып тура, Иегованы јабарлап салган. Ол Кудайдыҥ адын бӱгӱнги де кӱнде јабарлап јат (9, 10, 15 абзацтарды кӧрӱгер.) *
15. Сатана бӱгӱнги кӱнде Кудайдыҥ адын канайып јабарлайт? Ол неге јединген?
15 Сатана Кудайдыҥ адын оноҥ ло ары јабарлап јат. Бӱгӱнги кӱнде Сатана улусты, Кудай кӱчтӱдеҥ кӱчтӱ, ойгор, справедливый ла улусты сӱӱп турган деп алаҥзыдып јат. Темдектезе ол улусты, ӱзе неме Кудай јогынаҥ бӱткен деп, тӧгӱндеерге албаданат. А Кудайга бӱдӱп турган улусты, Кудайдыҥ нормалары ӧйинеҥ ӧткӱре кату ла справедливый эмес деп санандырарга албаданат. Оныҥ ӱредӱзиле болзо, Иегова улусты адта кыйнап турган јӱрек јок калју Кудай. Улус бу тӧгӱнге бӱделе, Иегованаҥ чек туура јӱрӱп калат. Сатана учына јетире Кудайды јабарлап, улусты, ол тоодо слерди де, Кудайдаҥ туураладарга албаданар. Је ол амадузына јединип болор бо?
БИС КУДАЙДЫҤ АДЫН КАНАЙЫП АГАРУЛААР АРГАЛУ?
16. Адам ла Евага кӧрӧ слер нени эдер аргалу?
16 Иегова толо кемдӱ эмес улуска оныҥ адын агарулаар арга берген. Бӱгӱнги кӱнде улус Кудайдыҥ адын јабарлап та турган болзо, бис Адам ла Евага кӧрӧ, Иегова керегинде чынды куучындап, оныҥ адын корулаар аргалу. Темдектезе Иегова агару, чындык, јалакай ла сӱӱштӱ Кудай деп куучындап јадыс (Иса. 29:23). Анайда ок бис Иегованы башкараачы эдип талдап алар аргалу. Анайып улуска Кудайдыҥ башкарузы — эҥ јакшы башкару деп кӧргӱзедис ле јӱк бу башкару амыр-энчӱни ле ырысты экелер деп оҥдоорго болужадыс (Сар. 37:9, 37; 146:5, 6, 10).
17. Иисус улуска Кудайдыҥ адын ачарга нени эткен?
17 Бис Кудайдыҥ адын корулап турзаас, Иисус Христостоҥ тем алып јадыс (Иоанн 17:26). Иисус улуска Адазыныҥ адын ачарга, јаҥыс ла оныҥ адын тузаланган эмес, је оныҥ репутациязын да корулаган. Фарисейлердиҥ ӱреткениле болзо, Иегова кату, соок, кӧп некелтелер тургузып турган килемји јок Кудай. Је Иисустыҥ ӱреткениле болзо, оныҥ Адазы улусты оҥдоп, сӱӱп турган чыдамкай ла буурзак Кудай. Анайда ок Иисустыҥ јӱрӱминеҥ Адазыныҥ кылык-јаҥы сӱрекей јакшы кӧрӱнген. Мынайып, улуска Иегова керегинде билип алатан јакшы арга ачылган (Иоанн 14:9).
18. Бис Кудайдыҥ адын тӧгӱннеҥ ле јабардаҥ канайып арутайдыс?
18 Бис улуска Кудай сӱӱштӱ ле јалакай деп, Иисус ла чылап куучындаар аргалу. Анайып Кудайдыҥ адын тӧгӱннеҥ ле јабардаҥ арутайдыс. Анайда ок бис улуска Кудайдыҥ адына тоомјылу баштанзын деп болужып турганысла оныҥ адын агарулап јадыс. Бого ло коштой, Иегованаҥ тем алып, оныҥ кылык-јаҥыла јӱредис. Бис мыны толо кемдӱ эмес те болзоос эдер аргалу (Еф. 5:1, 2). Улус бистиҥ сӧстӧристеҥ ле керектеристеҥ, Иегова чынынча кандый Кудай деп кӧрӱп јат. Анайып бис оныҥ адын агарулаарында туружадыс. Бис улуска Кудай керегинде тӧгӱн санаалардаҥ айрыларга болужып турзаас, оныҥ адын корулап јадыс *. Анайда ок бойыстыҥ темисле кинчектӱ де кижи Кудайга чындык артар аргалу деп керелейдис (Иов 27:5).
Агару Бичикти ӱренип турган улус Иегованыҥ сӱӱжин ле јалакайын кӧрзин деп кӱӱнзеп јадыс (18, 19 абзацтарды кӧрӱгер.) *
19. Исаия 63:7-деги сӧстӧрлӧ болзо, улусты Агару Бичиктиҥ чындыктарына ӱредип турзаас, бисте кандый амаду болор учурлу?
19 Бис Кудайдыҥ адын база канайып агарулаар аргалу? Улусты Агару Бичиктиҥ чындыктарына ӱредип турзаас, Кудайдыҥ башкарар јаҥына ајару эдип јадыс, ӧскӧртӧ айтса Јер-телекейде јӱк ле Иегова јасактар тургузар аргалу деп кӧргӱзедис. Эйе, улуска Иегованыҥ јасактарын билип алар да керек болзо, је бистиҥ тӧс амаду — олорго Иегованы сӱӱп турарга ла ого чындык болорго ӱредип салары. Је мынайып ӱредерге, биске Иегова деп атты аданып турган Кудайга ла оныҥ сӱрекей јакшы кылык-јаҥдарына ајару эдип турар керек. (Исаия 63:7 кычырыгар *.) Анайып болушканыстаҥ, улус Иегованы сӱӱр ле оныҥ сӧзин угарга кӱӱнзеер.
20. Келер јӧрмӧлдӧ кандый сурак шӱӱжилер?
20 Је эткен керектерис, анайда ок улусты канайып ӱредип турганыс Иегованыҥ адын мактайт ла улуска оны сӱӱрге болужат деп бӱдӱмјиленерге, нени эдер керек? Бу сурак келер јӧрмӧлдӧ шӱӱжилер.
2 КОЖОҤ Сениҥ адыҥ — Иегова
^ 5 абз. Улустыҥ ла ангелдердиҥ алдында ачык кандый сурак турат? Бу суракка нениҥ учун јаан ајару эдер керек? Бис бу суракка канайып туружадыс? Бу теманы оҥдоп турзаас, Иеговала колбуларыс бек болор.
^ 4 абз. Сарын 135:13: «О-о Иегова, сениҥ адыҥ јажын-чакка. О-о Иегова, сен ӱйедеҥ уйеге ундылбазыҥ».
^ 13 абз. Иезекииль 36:23: «Мен албатыларда ла слердиҥ ортогордо быјарсыдылып турган улу адымды агарулаарым. Ол тушта Мен слердиҥ ортогордо, олордыҥ кӧзинче агару болуп калзам, албатылар мени Иегова деп билгилеп ийер — деп, Кайракан Бий Иегова айдат».
^ 18 абз. Алдында бистиҥ бичиктерде Кудайдыҥ адын корулаар керек деп айдылбай туратан, нениҥ учун дезе бу атты Кудайдаҥ ӧскӧ кем-кем аданар аргалу ба деп сурак турбаган. Је 2017 јылда, кажы ла јыл болуп турган јуунда (ежегодное собрание), бу суракка бистиҥ оҥдомолыс солынып калган деп јарталган. Программаны ӧткӱрген кижи мынайып айткан: «Бис Иегованыҥ ады корулалзын (ол эмезе јабардаҥ аруталзын) деп мӱргӱп турзаас, јастыра болбос. Нениҥ учун дезе оныҥ репутациязы аруталар учурлу». (jw.org® сайтта 2018 јылдыҥ чаган айыныҥ программазын кӧрӱгер: БИБЛИОТЕКА > JW BROADCASTING®.)
^ 19 абз. Исаия 63:7: «Мен Иегованыҥ беринген сӱӱжин айдарым, Иегованыҥ бистерге эткен ончо јакшызы учун оны мактаарым, Израильдиҥ айылына буурзаганынаҥ ла беринген сӱӱжинеҥ улам эткен улу јакшылыгы керегинде айдарым».
