ИЕГОВА «калганчы кӱндерде» бойыныҥ албатызына кӧгӱс јанынаҥ башкартулар берип, болужып јат деп, бис ончобыс алаҥзыбай јадыс (2 Тим. 3:1). Је биске кажыбыска ла ого сӧсуккур болор керек. Бистиҥ айалга израильтяндардыҥ айалгазына тӱҥей болот. Олорго чӧлдӧ јӱрген ӧйинде, амыргыныҥ табыжын угуп турар керек болгон.

Иегова Моисейди эки мӧҥӱн амыргы этсин деп јакарала, мынайда айткан: «Олорды сен албатыны јуурга ла лагерьлерди јолго атанзын деп јакарарга тузаланарыҥ» (Тоол. 10:2). Абыстар башка-башка табыштардыҥ болужыла, албатыга нени эдерин айдып туратан (Тоол. 10:3—8). Бӱгӱнги кӱнде Кудайдыҥ албатызы база кандый ла башкартулар алып јат. Темдектезе, теократический јаан туштажулар ӧткӱрилзе, аксагалдардыҥ аҥылу ӱредӱзи болзо ло јуундарга јаҥы башкартулар келзе. Мындый башкартулар јебрен Израильде канайып берилгенин кӧрӱп ийектер.

Иегова «бастыра албатыны» агару байканныҥ кӱнчыгыш јанында јуурга турза, абыстар эки амыргыла амыргылап туратан (Тоол. 10:3). Бу табышты тӧрт бӧлӱкке бӧлӱлген, байканды айландыра јаткан ончо ӱйелер угуп туратан. Байканныҥ эжигине јуук јаткан ӱйелер тоолу ла минутка јуулып келетен. А эжиктеҥ ыраак јаткан ӱйелерге, јуулыжатан јерге једип келерге, кӧп ӧй лӧ ийде-кӱч керек болгон. Је кандый да болзо, Иегова ончо израильтяндарды јуулып, оныҥ башкартуларын уксын деп кӱӱнзеген.

Бӱгӱнги кӱнде бис агару байканныҥ јанында јуулышпай јадыс. Је Кудайдыҥ албатызыныҥ туштажуларына, региональный курултайларга, ӧскӧ дӧ аҥылу туштажуларга кычырыладыс. Бу туштажуларда бис керектӱ јетирӱлер ле башкартулар аладыс. Мындый туштажулардыҥ программазы бастыра ороондордо тӱҥей. Бу туштажуларга келип турган улустыҥ ончозы, Иегованыҥ сӱрекей кӧп ырысту ишчилериниҥ ортозында болорго тыҥ сӱӱнип јат. Кезик улуска андый туштажуларга келерге, кӧп ӧй керек болот. Је андый да болзо, бу улус бойыныҥ албаданганын калас эмес деп сананат.

Је јаан јуундарлу јерлердеҥ ыраак јадып турган кичинек бӧлӱктер башкартуларды канайып алат? Эмдиги ӧйдиҥ технологияларыныҥ болужыла олордыҥ кӧбизи андый туштажулардыҥ программаларын кӧрӧр аргалу ла бойлорын јаан туштажуда болгондый сезер аргалу. Темдектезе, Бенин деп јерге тӧс башкаруныҥ чыгартулу кижизи келерде, јербойыныҥ филиалы шахтерлордыҥ Арли деп калазына программаныҥ видеотрансляциязын эткен. Бу кала Сахара деп чӧл јерде, Нигер ороондо турат. Трансляцияны 21 кижи кӧргӧн.  Олордыҥ 5-ӱзи бистиҥ ака эјелер, 16-тузы јилбиркеп турган улус болгон. Олор коркышту ыраак та јаткан болзо, бойлорын мындый јаан туштажуда болгон деп сескен. Бу туштажуда 44131 кижи јуулган. Бир ака мынайып бичиген: «Бу трансляция учун акту јӱрегистеҥ быйаныс айдадыс. Бис слердиҥ сӱӱжигерди ойто ло катап кӧрдис».

Бир амыргы амыргылаза, јуунныҥ байканына јӱк ле «муҥдар тоолу улустыҥ башчылары» јуулар учурлу болгон (Тоол. 10:4). Моисей олорды ӱреткен ле олорго јаҥы башкартулар берип туратан. Бу дезе, башчыларга бойыныҥ молјуларын бӱдӱрерге болушкан. Слер ол башчылардыҥ бирӱзи болгон болзоор, бу туштажуга келип, Моисейди лаптап угарга бастыра ийде-кӱчеердеҥ албаданаар эмес бедеер?

Бис христиан јуундардыҥ аксагалдарын «башчылар» деп адабай јадыс. Олор Кудайдыҥ ӱӱрин мензинбей јат (1 Пет. 5:1—3). Карын олор бастыра ийде-кӱчин берип, Иегованыҥ койлорын кичееп јадылар. Оныҥ учун олор кандый бир ӱредӱге кычырылза, темдектезе Агару иштиҥ сургалына, олор сӱӱнип ӱренедилер. Андый ӱредӱде аксагалдар јуундагы бойыныҥ молјуларын оноҥ јакшы бӱдӱрерге ӱренет. Мындый ӱредӱ аксагалдарга да, јуунныҥ јарчыларына да Иеговала колбуларын тыҥыдарга болужат. Айдарда, слер андый сургалдыҥ тузазын, анда ӱренбеген де болзоор, алар аргалу.

Кезикте Израильдиҥ абыстары ӱзӱктеп амыргылап туратан. Андый табыш Иегованыҥ бастыра албатыга јолго атанар керек деп јакарып турганын кӧргӱскен (Тоол. 10:5, 6). Израиль албатыныҥ кӧчӱжи сӱрекей аайлу-башту ӧдӧтӧн, нениҥ учун дезе кажы ла кижи башкартуларды бӱдӱрерге албаданган. Је кезик улуска бу башкартуларды бӱдӱрерге јеҥил эмес болгон болор. Нениҥ учун?

Олордыҥ кезиги амыргыныҥ табыжы угулган ла сайын кӧчӧргӧ кӱчсинип туратан болор. Агару Бичикте айдылганыла: «Израиль албаты агару байканныҥ ӱстиндеги булут кӧдӱриле берзе, јолго атанып туратан». Бу булут канча кире ӧйдӧҥ кӧдӱрилип туратан? «Кезикте булут байканныҥ ӱстинде јӱк ле эҥирдеҥ ала таҥ атканча туратан», а кезикте «эки кӱн, бир ай эмезе оноҥ до кӧп ӧйгӧ» туратан (Тоол. 9:21, 22). Мынайып Израиль албаты канча катап кӧчкӧн? Тоолор деп бичиктиҥ 33-чи бажалыгында 40 кире катап деп айдылат.

Кем-кем «улу ла коркынчылу чӧл јерде» бойыныҥ байканын тургузатан кӧлӧткӧлӱ јер таап алза, тыҥ сӱӱнип туратан болор (Јаҥ. т. 1:19). Оныҥ учун олор кӧчӱп јатса, база андый јер табылбас болбой деп сананатан.

12 ӱйе јолго атанып јатса, кезик ӱйелерге бойыныҥ баратан ӧйин сакыырга кӱч болгон болор. Амыргыныҥ ӱзӱктеп угулганын ончозы да уккан болзо, је бастыра ӱйелер бир уунда атанбай туратан. Баштапкы ӱзӱктеп угулган табыш Кӱнчыгыш јанында турган Иуданыҥ, Иссахардыҥ ла Завулонныҥ ӱйелерине болгон (Тоол. 2:3—7; 10:5, 6). Бу ӱч ӱйе јӱре берген кийнинде, абыстар экинчи катап ӱзӱктеп амыргылап ийзе, тӱштӱк јанында турган ӱч ӱйе јолго атанатан. Анайып бастыра 12 ӱйе јӱре бербегенче амыргы угулар болгон.

Слерге кезик јаҥы башкартуларды алынарга кӱч болуп турган болор. Темдектезе, солынталар ӧйинеҥ ӧткӱре кӧп болуп турган деп сананып турган болороор. Эмезе тегин де ӱзе јакшы, солынтаны этпеске де јараар деген санаалар келердеҥ айабас. Је кандый да болзо, кезикте солынталарды алынарга јеҥил эмес болот, нениҥ учун дезе јаҥы немеге ӱренижерге ӧй керек. Је бис јаҥы айалгаларга тӱҥей ле эптежип алзаас, солынтаныҥ тузазын кӧрӱп ийерис ле Иегованы сӱӱндирерис.

Иегова Моисейдиҥ ӧйинде миллиондор тоолу улуска чӧлди ӧдӧргӧ болушкан. Кудайдыҥ болужы ла башкартузы јогынаҥ олор божоп калар эди. А бӱгӱнги кӱнде Иегова биске бӱдӱмјибис бек болзын деп болужат. Кудайдыҥ болужыла бис кӧгӱс јанынаҥ чечектеп јадыс. Айдарда, Иегованыҥ сӧзин јаантайын угуп јӱректер ле чындык израильтяндардаҥ тем алып, амыргыныҥ ӱнин тургуза ла угуп турактар!