1. Иерусалимде јуулган улуска Петр нени айткан?

ИЕРУСАЛИМДЕ башка-башка ороондордоҥ келген кандый ла тилдӱ албатылар јуулышкан. Бу ӧйдӧ сӱреен кайкамчылу неме болгон. Ӱредӱ эш јок, тегин ле иудейлер, келген улустыҥ тилдерине куучындай бердилер! Је эҥ кайкамчылузы олордыҥ башка-башка тилдерге куучындап турганы эмес, је улуска нени куучындап турганы болды. Апостол Петр андагы јуулган улуска Иисус Христоско бӱткен кижи аргадалар деп айткан. Мыны уккан улустыҥ јӱреги томулып: «Бис канайдактар?» — деп сураарда, Петр олорго: «Кажыгар ла креске тӱшсин [сууга чӧҥӱрилзин]» — деп айткан (Ап. ижи 2:37, 38).

2. Бу јӧрмӧлдӧҥ нени билип аларыс? (Кадарындагы јурукты кӧрӱгер.)

² Анайып бу ла кӱнде Иисустыҥ ӱренчиги болорго, 3 000 кире кижи сууга чӧҥӱрилген. Мынаҥ ла ала ӱренчиктер белетейтен иш башталган. Бу иш бӱгӱнги кӱнге јетире эдилип јат. Је јаҥыс эмдиги ӧйдӧ тоолу ла сааттаҥ кижи сууга чӧҥӱрилерге белен боло бербей јат. Чӧҥӱрилерге, улус канча айлар эмезе јылдар ӱренип јат. Улусты сууга чӧҥӱрилерге белетеерге коркышту кӧп ийде-кӱч керек болуп турган деп, анчада ла ӱредӱлер ӧткӱрип турган јарчылар јакшы оҥдоп јат. Бу јӧрмӧлдӧҥ Агару Бичикти ӱренип турган улуска сууга чӧҥӱрилзин деп, канайып болужатанын билип аларыс.

3. Матфей 28:19, 20-ле болзо, ӱренип турган кижи сууга чӧҥӱрилердеҥ озо, нени эдер учурлу?

³ Сууга чӧҥӱрилерге турган кижи Агару Бичиктеги ӱредӱлерди тузаланып турган болор учурлу. (Матфей 28:19, 20 кычырыгар.) Јӱк ле ол тушта андый кижи Иисустыҥ  ӱреткениле «тереҥжиде казып, тураныҥ тӧзин ташка салган» керсӱ кижиге тӱҥей болор (Лука 6:47, 48; Матф. 7:24, 25). Је бистерге, улуска билип алганын тузаланзын деп болужарга нени эдер керек? Ӱч эп-арга кӧрӱп ийектер.

4. Бис ӱренип турган кижиге сууга чӧҥӱрилетен амадузына једерге канайып болужар аргалу? (« Ӱренип турган кижиге амадулар тургузарга ла амадуларына једерге болужыгар» деген рамканы кӧрӱгер.)

⁴ Амадулар тургузарга болужыгар. Нениҥ учун анай эдер керек? Бир тем кӧрӱп ийектер. Темдектезе, слер јол-јорыкка јазанып јаткан болзоор, јаҥыс ла кайда јетире баратанаарды эмес, је јолой база да ӧскӧ јараш јерлерди кӧрӱп ийер керек деп сананып јадыгар. Нениҥ учун дезе анайып, узун јол-јорыгар кӱч ле узак деп билдирбес. Анайып ла ок ӱренип турган кижиге чӧҥӱрилетен јаан амадузына једерге, кичинек амадулар тургузарга болужар керек. Ол тушта кижиге чӧҥӱрилетен амадузына једерге кӱч болбос. «Јажын-чакка ырысту јӱригер!» деген бичикте «Амаду тургузыгар» деген рамка бар. Бу рамкада бичилген амаду ӱренип турган кижиге уроктоҥ билип алганын тузаланарга канайып болужарын шӱӱжип ийигер. Ол эмезе слер кижиге база да ӧскӧ амадулар тургузып берерге турган болзоор, «Ӧскӧ амадулар» деген јерге бичип саларга јараар. Анайып кижи јаан да, кичинек те амадулар тургузарга ла амадуларына једерге ӱренер.

5. Марк 10:17—22-де Иисус бай кижиге нени айткан, нениҥ учун?

⁵ Солынталар эдип турарга болужыгар. (Марк 10:17—22 кычырыгар.) Иисус бай эр кижини бар-јок јӧӧжӧзин садып ийеле, акчазын јоктуларга ӱлеп берзин деп айткан (Марк 10:23). Ол бу эр кижиге солынарга кӱч болор деп билген  де болзо, је солынзын деп кӧндӱрезинеҥ айткан. Иисус нениҥ учун мынайып айткан? Нениҥ учун дезе Иисус оны сӱӱген. Кезикте бис улусты кандый бир солынталар этсин деп айтпай турган болорыс, нениҥ учун дезе бистиҥ санаабысла болзо, олор солынарга белен эмес. Чын, кижиге солынарга кӧп ӧй керек болот (Кол. 3:9, 10). Је бу суракты канча ла кире эртеде шӱӱжип салзаас, ӱренип турган кижи ончо ло кире тӱрген солынып баштаар. Мынайып бис ого сӱӱжисти кӧргӱзедис (Сар. 141:5; Укаа 27:17).

6. Нениҥ учун кижиниҥ кӧрӱм-санаазын билип алатан сурактар сураар керек?

⁶ Кижиниҥ кӧрӱм-санаазын билип алатан сурактар берип туругар. Мындый сурактар кижи нени оҥдоп алганын, неге бӱдӱп турганын билип ийерге болужып јат. Јаантайын мынайып эдип турзагар, кийнинде деликатный да сурактарды шӱӱжип ийерге јеҥил болор. Кижиниҥ кӧрӱм-санаазын билип аларга болужатан сурактар «Јажын-чакка ырысту јӱригер!» деген бичикте кӧп. Темдектезе, 4-чи урокто мындый сурак бар «Бис Кудайга адыла баштанзаас, ол нени сезет?», 9-чы урокто дезе мындый сурак бар «Слер не керегинде мӱргӱӱр эдеер?». Озо баштап кижиге мындый сурактарга каруу берерге кӱч болордоҥ айабас. Оныҥ учун кижиге ӱлгерлер ле сурактар уроктыҥ темазыла кандый колбулу болгонын кӧрӧргӧ болужыгар.

7. Ӱренип турган кижиге улустыҥ јӱрӱминеҥ алынган темдер канайып болужар?

⁷ Ӱренип турган кижини солынзын деп кӱӱнзедерге, улустыҥ јӱрӱминеҥ алынган темдер куучындагар. Темдектезе, ӱренип турган кижиге јуунныҥ туштажуларын бирӱзин де божотпоско кӱч болуп турган болзо, бу бичиктиҥ 14-чи урогында «Шиҥдейтен материал» деген јерде «Иегова мени кичееген» деп видеоны кӧргӱзип ийигер. Андый видеолор бу бичиктиҥ «Тереҥжиде кӧрӱгер» эмезе «Шиҥдейтен материал» деген јерлеринде бар *. Је кижини видеодогы кижиле тӱҥдештирип: «Ол кижи болуп ийген де, сен де болуп ийериҥ» — деп, бир де айтпагар. Андый шӱӱлтеге ӱренип турган кижи бойы келзин. Је бойы келзин деп, видеоныҥ тӧс шӱӱлтелерине ајару эдигер. Темдектезе, кандый бир ӱлгерге, анайда ок видеодогы кижиге билгирлерин тузаланарга не болушканына ол эмезе Иегова ого канайып болушканына ајару эдигер.

8. Кижиге Иегованы сӱӱрге канайып болужарыс?

⁸ Иегованы сӱӱрге болужыгар. Ӱредӱниҥ ӧйинде јаантайын Иегованыҥ кылык-јаҥына ајару эдип туругар. Темдектезе, Иегова — ырысту Кудай, ол оны сӱӱп турган улуска болужып јат деп кӧргӱзигер (1 Тим. 1:11; Евр. 11:6). Анайда ок ӱренип турган кижи алган билгирлерин тузаланып турза, бойына ла јакшы болот деп јартап беригер. Анайып ол Кудайдыҥ сӱӱжин кӧрӧр (Иса. 48:17, 18). Кижи Иегованы канча ла кире тыҥ сӱӱзе, ончо ло кире тӱрген солынар (1 Иоанн 5:3).

9. Марк 10:29, 30-тагы сӧстӧр ӱренип турган кижиге сууга чӧҥӱрилерге буудактап турган немелерди коркыбай ла артыргызарга канайып болужар?

⁹ Ӱренип турган кижиге сууга чӧҥӱрилерге буудак болгодый немелерди артыргызарга белен болор керек. Ӧрӧги айдылган бай эр кижиге чилеп, ӱренип  турган улустыҥ кезигине Иисустыҥ кийнинеҥ баратан ба, эмезе акча-јӧӧжӧзиле артатан ба деп талдаш эдерге келижет. Темдектезе, кемге де библиялык принциптерге келишпей турган ижин солыыр керек болор. Кемге де Иегованы сӱӱбей турган најыларын артыргызарга келижер ол эмезе Кудайдыҥ Керечилерин сӱӱбей турган тӧрӧӧндӧриниҥ удурлажузын ӧдӧргӧ келижер болор. Иисус оҥдоп јат, кезик улуска мынайып солынарга јеҥил эмес болор деп. Је Агару Бичикте айдылганыла, Иисуска болуп солынталар эткен улус кайрал јок артпас. Нениҥ учун дезе олорго кайрал эдип кӧгӱс биле берилер. (Марк 10:29, 30 кычырыгар.) Бис бу улуска болужарга бойыстыҥ јаныстаҥ нени эдер аргалу?

10. Мануэльдиҥ сӧстӧринеҥ бис неге ӱренедис?

¹⁰ Ӱренип турган кижиге најы болугар. Ӱренип турган кижи слердиҥ болужарга турганаарды кӧрӱп турзын. Мексикада јадып турган Мануэль деп ака мынайып куучындаган: «Мени ӱреткен ака кажы ла ӱредӱниҥ алдында керектерим кандый деп сурап угуп туратан. Бу меге кандый ла теманы эбијоксынбай ачык куучындажарга болушкан. Ол аканыҥ чыннаҥ ла меге акту јӱрегинеҥ болужарга турганы кӧрӱнип туратан».

11. Ӱренип турган улусла ӱредӱлердеҥ ӧскӧ ӧйдӧ кӧрӱшкенистеҥ кандый туза болот?

¹¹ Иисус ӱренчиктериле кожо болуп туратан, анайып ла биске ӱренип турган улусла ӱредӱлердеҥ башка ӧйдӧ база кӧрӱжип турар керек (Иоанн 3:22). Кижи кӧгӱс алтамдар эдип турза, оны айылыска кычырып, чайлап-эштеп, JW Broadcasting^®-ти де кожо не кӧрӱп ийбес? Оны анчада ла байрамдардыҥ ӧйинде айылында јаҥысканзырабазын деп кычырза јакшы болор. Эмди Уганданаҥ Казибве деп аканыҥ сӧстӧри: «Мени ӱреткен акала ӱредӱлердеҥ башка ӧйдӧ кӧп кӧрӱжип турганыстаҥ улам мен ӱредӱлердеҥ ле чилеп Иегова керегинде кӧп неме билип алгам. Мынайып Иегова бойыныҥ албатызын канайып кичееп турганын, анайда ок  оныҥ Керечилери сӱрекей ырысту улус деп кӧргӧм. Меге мындый ла јӱрӱм керек болгон!»

12. Ӱредӱге нениҥ учун башка-башка јарчыларды кычырар керек?

¹² Ӱредӱге башка-башка јарчыларды кычырыгар. Кезикте ӱредӱни јаҥыскан ла эмезе ӱренишкен ле јарчыларла ӧткӱрзе јакшы болор деп билдирердеҥ айабас. Је ӱредӱге башка-башка ака-эјелерди кычырып турзаас, тузазы јаан болор. Бу чын ла андый деп, Молдовада јадып турган Дмитрий аканыҥ сӧстӧринеҥ кӧрӱнет: «Мениле ӱренген ака ӱредӱге кандый ла ака-эјелер кычырып туратан. Олордыҥ кажызыныҥ ла теманы јартаарга куучындаган темдери меге јарт ла јуук болгон. Олор меге суракты башка-башка јанынаҥ кӧрӧргӧ болушкан. Кийнинде јуунныҥ туштажузына да баштапкы катап барарга тыҥ коркыбагам, нениҥ учун дезе анда таныш улус кӧп болгон».

13. Кижини нениҥ учун јуунныҥ туштажуларына јӱрзин деп кӱӱнзедер керек?

¹³ Кижини јуунныҥ туштажузына јӱрзин деп кӱӱнзедигер. Нениҥ учун кӱӱнзедер керек? Нениҥ учун дезе бу Иегованыҥ јакарузы. Јуунныҥ туштажулары — Иеговага бажырарына кирет (Евр. 10:24, 25). Јуундагы ака-эјелер тӧрӧӧндӧристий јуук болуп калат. Бис туштажуларда болзоос, кӧгӱс билегисле столды айландыра јуулыжып алганына тӱҥей болодыс. Ӱренип турган кижиниҥ јуунныҥ туштажуларына јӱргени сууга чӧҥӱрилерге болужатан јаан алтам. Је кезик улуска бу алтамды эдерге јеҥил эмес болот. Андый улуска «Јажын-чакка ырысту јӱригер!» деген бичикле канайып болужарыс?

14. Кижини јуунныҥ туштажуларына јӱрзин деп канайып кӱӱнзедер?

¹⁴ Јуунныҥ туштажуларына јӱрери кӧгӱс јанынаҥ ӧзӧргӧ болужатан јаан керектӱ алтам деп, 10-чы урокто јарталат. Бу бичик, чыгарылардаҥ озо, ченемелдӱ јарчыларга тузаланып кӧрзин деп берилген болгон. Олор бу бичикти тузаланып кӧрӧлӧ, кижини јуунныҥ туштажуларына јӱрзин деп кӱӱнзедерге болужатан сӱреен јакшы бичик деп айдышкан. Эмди не, кижи 10-чы урокты ӧтпӧгончӧ оны јуунныҥ туштажузына кычырбазыс па? Јок эмей. Кижини канча ла кире эрте кычырзаас јакшы болор. Је кезик улуста јуунныҥ туштажуларына јӱрерге кандый бир буудактар болуп јат. Оныҥ учун јуунныҥ туштажуларына јӱрбей турганыныҥ шылтагын оҥдоп алала, кижиге канайып болужатанын сананып кӧрӱгер. Је кижи јуунга тӱҥей ле јӱрбей турза, чӧкӧбӧй, оны оноҥ ло ары кычырып туругар.

15. Ӱренип турган улус недеҥ коркып турган болор?

¹⁵ Слер бойоор Агару Бичикти јаҥы ла ӱренип баштап турараарда недеҥ коркыганаар? Слер айылдар сайын јарлаарга коркыган болороор, ол эмезе тӧрӧӧндӧрӧӧр ле најылараар слерге удурлажар деп коркыганаар. Андый болзо, слер ӱренип турган кижиниҥ сезимдерин айлап ийереер. Иисус билер болгон, кезик оныҥ ӱренчиктерине коркымчылу болор деп, је андый да болзо, ол улусты ӧйинеҥ ӧткӱре коркыбазын деп кӱӱнзеткен, оноҥ башка, олор Иеговага иштебей барар эди (Матф. 10:16, 17, 27, 28). Айдарда Иисус улуска коркыбаска канайып болушкан? Бис оноҥ кандый тем алар аргалу?

16. Ӱренип турган кижини јарлаарга канайып ӱредер керек?

¹⁶ Ӱренип турган кижини јарлаарга ӱредигер. Иисус бойыныҥ ӱренчиктерин јарлаарга ийерде, олор ӧкпӧрип, коркыгылап турган болор. Је коркыбаска олорго не болушкан? Иисус олорго  кайда јарлайтанын ла нени айдатанын айдып берген (Матф. 10:5—7). Бис Иисустаҥ кандый тем аларыс? Ӱренип турган кижиге кайда јарлаар керек деп айдып берер керек. Айдып берерге, кандый бир теманы шӱӱжип ийеле, бу тема оныҥ најыларыныҥ кажызына јилбилӱ болор эди деп сурагар. Оноҥ канайып јарлайтанын кӧргӱзип берерге, шӱӱшкен теманы бойоордыҥ сӧстӧрӧӧрлӧ јартап беригер. Кожо репетировать эдип ийерге де јараар. Мында «Јажын-чакка ырысту јӱригер!» деген бичиктиҥ «Кезик улус мынайып айдат» деген рамказы болуш болор. Улуска чындыкты куучындап тура, Агару Бичикти тузаланзын деп кӱӱнзедигер, анайда ок улуска чындыкты тоомјылу ла јеҥил јартазын деп ӱредигер.

17. Ӱренип турган кижини Иеговага ижензин деп канайып ӱредер? (Матфей 10:19, 20, 29—31).

¹⁷ Ӱренип турган кижини Иеговага иженерге ӱредигер. Иисус ӱренчиктерине Иегова олорды сӱӱп турган, олорды качан да артыргыспас деп кӧп катап айдып туратан. (Матфей 10:19, 20, 29—31 кычырыгар.) Оныҥ учун биске де ӱренип турган улуска Иегова слерге болужар, ол слерди качан да артыргыспас деп айдып турар керек. Кижиле кожо мӱргӱген ӧйдӧ оныҥ амадуларын айдып туругар. Ол тушта ого Иеговага иженерге јеҥил болор. Польшада јадып турган Францишек деп ака айдат: «Мени ӱреткен ака мениҥ амадуларым керегинде јаантайын мӱргӱп туратан. Иегова оныҥ мӱргӱӱлдерин угуп турган деп кӧрӧлӧ, мен бойым да мӱргӱп баштагам. Јуунныҥ туштажуларына эмезе курултайларга барарга иштеҥ суранзам мени божодып ийетен. Мында Иегованыҥ болужы болгон эмей деп оҥдоп туратам».

18. Иегова ӱренчиктер белетеп турган ишчилериниҥ ижин кӧрӱп, нени сезет?

¹⁸ Иегова Агару Бичикти ӱренип турган улуска болужып јат. Анайда ок Иегова бу улуска болужарга сӱреен јаан иш эдип турган бойыныҥ ишчилерин баалайт. Ол иштеҥкей ишчилерин тыҥ сӱӱп јат (Иса. 52:7). Бу јӧрмӧлдӧги шӱӱлтелерди Агару Бичикле ӱредӱлерлӱ де, ӱредӱлер јок то јарчылар ончобыс тузаланактар. Анайып, ӱренип турган улуска сууга чӧҥӱрилерге болужарыс.