1. Кижиге барарга турган эје-сыйындарга кандый сурактарды шӱӱп сананар керек?

ОНЧО христиандар толо кемдӱ Христоско багынып јат. Је христиан ӱй улуска кижиге барган кийнинде толо кемдӱ эмес ӧбӧӧнине багынарга келижип јат. Мынайып багынарга кезикте јеҥил эмес. Оныҥ учун кижиге барарга турган эје-сыйындарга эш-нӧкӧри болотон ака керегинде мындый сурактар сананып ийер керек: «Оныҥ биледе јакшы баш болоры недеҥ кӧрӱнет? Ол кӧгӱс керектерди баштапкы јерге тургузат па? Јок болзо, бис алыжып алзаас, ол билегистиҥ кӧгӱс јанын апарып болор бо?» Је анайда ок эјеге бойы керегинде база сананып ийер керек: «Биле ырысту болзын деп јӧмӧжӧргӧ менде кандый кылык-јаҥдар бар? Мен чыдамкай ба? Кысканбас па? Мениҥ Иеговала колбуларым бек пе?» (Эккл. 4:9, 12). Эјениҥ кижиге барардаҥ озо кандый јӱрӱм јӱрӱп турганынаҥ билелӱ болгон кийнинеҥ ырысту болор бо, јок по деп кӧрӱнип јат.

2. Бу јӧрмӧлдӧ нени кӧрӧрис?

² Бистиҥ канча миллион эје-сыйындар ӧбӧӧндӧрине багынып турганыла сӱрекей јакшы тем кӧргӱскилейт. Андый эје-сыйындарла Иеговага кожо иштеерге сӱӱнип јадыс! Бу јӧрмӧлдӧ мындый сурактар кӧрӧрис: 1) эш-нӧкӧрлӱ эјелерде кандый кӱчтер болот? 2) Олор нениҥ учун ӧбӧӧндӧрине багынар учурлу? 3) Эје-сыйындар Иисустаҥ, Авигеянаҥ, Иисустыҥ энезинеҥ Мариянаҥ неге ӱренер аргалу?

3. Биле тӧзӧгӧн улуста нениҥ учун кӱчтер болот?

³ Кудай улуска билелӱ болотон сӱрекей јакшы сый берген. Је улустыҥ кемизи де толо кемдӱ эмес (1 Иоанн 1:8). Оныҥ учун Агару Бичикте айдылганыла, биле тӧзӧгӧн  улуста «јадын-јӱрӱмниҥ уур-кӱчтери болор» (1 Кор. 7:28). Айдарда эш-нӧкӧрлӧрлӱ эјелердиҥ кезик кӱчтерин кӧрӱп ийектер.

4. Ӱй улуска ӧбӧӧнине багынарга кезикте недеҥ улам кӱч болот?

⁴ Кезик улустыҥ чыдаган-ӧскӧн јеринде улус мындый кӧрӱм-санаалу болот: «Ӱй кижи ӧбӧӧниниҥ кажы ла сӧзине багынбас учурлу. Керек болзо, ӱй кижи бойы да баш билинип ийер аргалу». Бу јанынаҥ США-да јадып турган Марисоль деп эје мындый сӧстӧр айдып јат: «Мениҥ чыккан-ӧскӧн јеримде улус ӱй кижи эр кижинеҥ артпай турар керек деп сананат. Ол бойы да башкарып ийер аргалу. Је Кудайдыҥ сӧзиндеги принциптерге бу чек келишпей јат деп мен оҥдоп јадым. Иегова јӱк эр улусты башкарар јаҥду эдип тургускан. А ӱй улус јобош болуп ӧбӧӧнине багынар учурлу. Андый да болзо, Иегова ӱй улусты эр улустаҥ јабыс кӧрбӧй јат. Је кезикте меге тӱҥей ле ӧбӧӧниме багынарга кӱч болот».

5. Кезик эр улус ӱйлерине канайып баштанат?

⁵ Кезик эр улус ӱй улусты экинчи сорт улус деп кӧрӧт. Андый эр кижиге барган ӱй кижиге ӧбӧӧнине багынарга кӱч болот. Тӱштӱк Америкада јадып турган Ивон деп эје мынайып айдат: «Бисте озо эр улус ажанып јат. А ӱй улус олордыҥ кийнинеҥ ажанат. Айылдыҥ ижин ӱзе кыс балдар эдер учурлу, уул балдарга нени де эттиртпей јат. Олор јайзаҥдар чылап отурар аргалу. Олорго энези, эје-сыйындары јалчы болуп јат». Эмди Азияда јадып турган Инлин деген эјениҥ сӧстӧрин кӧрӱп ийектер. Ол айдат: «Бистиҥ јерде улус мынайып сананат: ӱй кижиге айылдыҥ ижин ле эдип јӱрзе болотон. Ого сагыш не керек? Ол бойыныҥ кӧрӱмин, санаазын чыгара айтпас учурлу». Мындый кӧрӱмдӱ эр улус Агару Бичиктиҥ принциптерин бӱдӱрбей јат. Андый эр улус ӱйлерине кулдарга чылап баштанат. Олор Иисустаҥ да тем албай јат, Иегованы да сӱӱндирбей јат (Еф. 5:28, 29; 1 Петр 3:7).

6. Билелӱ ӱй улуска Иеговала колбуларын тыҥыдарга нени эдер керек?

⁶ Ӧткӧн јӧрмӧлдӧ кӧргӧнисле эр кижи бойыныҥ билезин кӧгӱс јанынаҥ, эмоциональный ла эт-кан јанынаҥ кичеер учурлу (1 Тим. 5:8). Је андый да болзо, билелӱ ӱй улуска Агару Бичикти кычырып, тереҥжиде шӱӱп сананып, мӱргӱп турарга ӧй табып турар керек. Кезикте олорго бу некелтени бӱдӱрерге јеҥил эмес. Нениҥ учун дезе билелӱ ӱй улустыҥ ижи-тожы толтыра. Мынаҥ улам олор бойын кӧгӱс јанынаҥ азыраарга ӧй дӧ, кӱч те јок деп сананар болор. Је Иегова кажы ла кижи бойы оныла колбуларын тыҥытсын деп кӱӱнзейт (Ап. ижи 17:27).

7. Билелӱ ӱй кижиге нени оҥдоп турза, бойыныҥ молјузын бӱдӱрерге јеҥил болор?

⁷ Билелӱ ӱй кижиге толо кеминде эмес ӧбӧӧнине багынарга коркышту кӧп албаданар керек. Је Иегова ӱй улусты нениҥ учун багынар јаҥду эдип јайаганын оҥдоп јӧпсинип турза, олорго бойыныҥ молјузын бӱдӱрерге јеҥил болор.

8. Ефестегилерге 5:22—24-лӧ болзо, христиан ӱй кижиге нениҥ учун ӧбӧӧнине багынар керек?

⁸ Ӱй кижини ӧбӧӧнине багынзын деп, Иегова јакыган. (Ефестегилерге 5:22—24 кычырыгар.) Оныҥ учун христиан ӱй кижи, теҥеридеги Иегова Адазы мындый јакылтаны сӱӱжинеҥ улам берген ле оныҥ јакылталары качан да каршу јетирбес деп оҥдоп јат (Јаҥ. т. 6:24; 1 Иоанн 5:3).

9. Ӱй кижи ӧбӧӧнине багынып турза, кандый туза болот?

 ⁹ Бӱгӱнги кӱнде ӧбӧӧнине багынып турган ӱй кижини уйан, удура неме де айдып болбос деп бодогылап јат. Бу телекей сӱӱштӱ Иегова Кудайды билбес, оныҥ учун анайып сананат. Је Иегова бойыныҥ кару кыстарына улуска уйан кӧрдӱретен јакылта качан да бербес эди. Карын ӱй кижи ӧбӧӧнине багынып турза, олордыҥ билезинде амыр-энчӱ болот (Сар. 119:165). Бу дезе ого бойына да, ӧбӧӧнине де, балдарына да туза экелет.

10. Карол деп эјениҥ сӧстӧринеҥ неге ӱренерге јараар?

¹⁰ Ӱй кижи толо кеминде эмес ӧбӧӧнине багынып турза, баш болотон принципти тургускан Иегова Кудайга сӱӱжин ле тоомјызын кӧргӱзип јат. Тӱштӱк Америкада јадып турган Карол деп эје айдат: «Мен ӧбӧӧнимниҥ јастыраларын кӧрӱп јадым, је оныҥ јастыраларын тоолобой турзам, Иеговала колбуларымды баалап турганымды кӧргӱзедим. Оныҥ учун мен ӧбӧӧниме багынарга албаданадым. Анайып теҥеридеги Адамды сӱӱндирип јадым».

11. Анис деп эјеге ӧбӧӧниниҥ јаманын таштаарга не болужат? Бис оноҥ неге ӱренедис?

¹¹ Анайда ок ӧбӧӧни ӱйиниҥ сезимдерин, санааркаштарын ајаруга албай турза, ӱйине ого багынарга кӱч болот. Мындый айалгада болуп турган Анис деп эјениҥ сӧстӧрин кӧрӱп ийектер: «Мен ӧбӧӧниме ачынбаска албаданадым. Ӱзе улус јастырып јат деп оҥдоп јадым. Оныҥ учун Иегова чылап улустыҥ јастыразын акту јӱрегимнеҥ таштаарга белен болодым. Анайып бойымныҥ ла санаам амыр болот» (Сар. 86:5). Ӧбӧӧниниҥ јастыразын таштап турган ӱй кижиге ого багынарга јеҥил болот.

12. Агару Бичикте кандый улустыҥ темдери бар?

¹² Кезик улус улуска багынып турган кижини уйан деп кӧрӧт. Је Агару Бичикле болзо, андый кӧрӱм чек јастыра. Нениҥ учун дезе Агару Бичикте баш болотон принципле башкарынган улустыҥ темдери бар. Олор карын да јалтанбас, бойын тудунып билер, сагышту улус. Темдектезе, Иисус, Авигея ла Мария.

13. Иисус Иеговага нениҥ учун багынып јат? Јартап беригер.

 ¹³ Иисус Иеговага багынып јат. Је бу дезе Иисусты неме эдип билбес, неме оҥдобос, уйан деп кӧргӱспей јат. Карын Иисус јердиҥ ӱстинде эҥ ле улу Ӱредӱчи болгон эмей. Ол немени андый јеҥил, андый јарт јартап туратан (Иоанн 7:45, 46). Оныҥ сагыжы уйан болгон болзо, ол анайып ӱредип болор беди? Анайда ок Иегова оныла кожо бастыра немени де јайаган (Укаа 8:30; Евр. 1:2—4). А Иисус тирилерде, Иегова ого «теҥери ле јерде ончо јаҥды» берген (Матф. 28:18). Андый да болзо, Иисус Иеговага багынып, оныҥ башкартуларыла јӱрет, нениҥ учун дезе ол Адазын сӱӱп турган (Иоанн 14:31).

14. Эр кижи неге ӱренер аргалу: а) Иегова ӱй улуска канайып баштанып турганынаҥ? б) Укаа сӧстӧрдиҥ 31-чи бажалыгында бичилген сӧстӧрдӧҥ?

¹⁴ Эр улус неге ӱренер аргалу? Иегова ӱй улусты эр улустаҥ јабыс кӧрӱп турганы учун ӧбӧӧндӧрине багынзын деп айтпай јат. Бу недеҥ кӧрӱнет? Теҥериде Иисусла кожо башкаратан майлаткандардыҥ ортозында ӱй де улус бар (Гал. 3:26—29). Иегова Иисуска башкарар јаҥ берип салган. Анайып ла эр улус бойыныҥ башкарар јаҥыла ӱйиле ӱлежер аргалу. Агару Бичикте иштеҥкей ӱй кижи кӧп ишти башкарыжар аргалу деп кӧрӱнип јат. Темдектезе, айылдыҥ ижин башкарар аргалу, јер садып алар эмезе оны садып ийер аргалу эмезе кандый бир бизнести башкарар аргалу. (Укаа сӧстӧр 31:15, 16, 18 кычырыгар.) Эр кижи ӱйине јалчызына чылап баштанбай јат. Карын оныҥ кӧрӱм-санаазын угат. Ол немени ӱзе јакшы эдип салар деп, ӱйине бӱдӱп јат. (Укаа сӧстӧр 31:11, 26, 27 кычырыгар.) Ол тушта ӱйине ӧбӧӧнине багынарга јеҥил болор.

15. Ӱй кижи Иисустыҥ теминеҥ неге ӱренер аргалу?

¹⁵ Ӱй улус неге ӱренер аргалу? Ӧрӧги айдылганыла, Иисустыҥ Иеговага багынганы оны неме оҥдобос, неме билбес, уйан деп кӧргӱспеген (1 Кор. 15:28; Флп. 2:5, 6). Анайып ла ӱй кижи ӧбӧӧнине багынып турза, ол оны уйан, эш-кереги јок деп кӧргӱспей јат. Карын багынганыла јӱк ле ӧбӧӧнин сӱӱп турганын эмес, је Иегова Кудайды сӱӱп ле тооп турганын кӧргӱзет.

16. 1 Самуил 25:3, 23—28-ле болзо, Авигея кандый јеҥил эмес айалгага кирген? (Кадарындагы јурукты кӧрӱгер.)

¹⁶ Авигея Навал деп кижиниҥ ӱйи болгон. Навал дезе бийиркек, јаҥыс бойын сананар ла быйаны јок кижи болгон. Оныҥ учун Авигеяга јеҥил эмес болгон болор. Је ол тӱҥей ле бойыныҥ айлы-јуртын кичееп аларга албаданган. Бу дезе Авигеяныҥ Навалды ла айылдагы улузын ӧлӱмнеҥ корулап аларга, Давидке ле оныҥ 400 јуучылына удура барганынаҥ кӧрӱнет. Авигея јалтанбас ӱй кижи болгон. Ол Давидке дезе айалганы тоомјылу јартап берген. Бого ло коштой ӧбӧӧниниҥ јастыразын таштазын деп сураган. (1 Самуил 25:3, 23—28 кычырыгар.) Давид мыны кӧрӱп, Иегова оны јаан кинчек этпезин деп корулаарга, бу ӱй кижи ажыра јӧп берип јатканын оҥдоп ийген.

17. Эр улус Давид ле Авигеянаҥ неге ӱренер аргалу?

¹⁷ Эр улус неге ӱренер аргалу? Авигея ойгор ӱй кижи болгон. Карын Давид оныҥ јӧбин уккан. Укпаган болзо, канча улустыҥ каны тӧгӱлгенинде бурулу болуп калар эди. Оныҥ учун эр кижиге ӱйиниҥ кӧрӱм-санаазын угуп, оныла јӧптӧжип турза јакшы. Бу дезе ого кандый-бир јастыра неме эдип салбаска болужар.

18. Ӱй улус Авигеяныҥ теминеҥ неге ӱренер аргалу?

 ¹⁸ Ӱй улус неге ӱренер аргалу? Иегованы сӱӱп ле тооп турган ӱй кижи билезине јаан туза экелет. Керек дезе оныҥ ӧбӧӧни Иегованыҥ Керечизи эмес те болзо, ол эмезе кӧгӱс јанынаҥ уйадап та калган болзо, туза болот. Андый ӱй кижи Агару Бичиктиҥ принциптерине келишпей турган аргаларла айрылыжарга албаданбас, карын кӱчтер де болуп турган болзо, јуртын кичееп аларга албаданар. Ӧбӧӧни ӱйиниҥ јобожын, ого багынып турганын кӧрӱп, Иеговага јууктаарга кӱӱнзеер болор (1 Петр 3:1, 2). Је кӱӱнзебезе де ӧбӧӧнине багынарга албаданып турган ӱй кижини Иегова баалап јат.

19. Ӱй кижи кандый учуралда ӧбӧӧниниҥ сӧзин укпас аргалу?

¹⁹ Иегованыҥ Керечизи эмес ӧбӧӧни ӱйин Кудайдыҥ кандый бир принцибин эмезе јасагын бузып ийгедий керек эдип ийзин деп сураза, ӱйи ого багынбай јат. Темдектезе, ӧбӧӧни ӱйин уурданып ийзин, тӧгӱн неме айдып ийзин ол эмезе Иеговага јарабай турган кандый бир ӧскӧ керек эдип ийзин деп сураза, ӱй кижи ӧбӧӧниниҥ сӧзин укпас. Нениҥ учун дезе ол озо ло баштап Кудайдаҥ айап јат. Оныҥ учун ӱй кижи ӧбӧӧниниҥ сураганын нениҥ учун этпеске турганын јымжак, тоомјылу јартап берер (Ап. ижи 5:29).

20. Марияныҥ Иеговала колбулары бек болгоны недеҥ кӧрӱнет?

²⁰ Марияныҥ Иеговала колбулары бек болгон. Ол Агару Бичимелди сӱрекей јакшы билген. Бу дезе Крестеечи Иоанныҥ энезиле, Елизаветала, куучындашканынаҥ кӧрӱнет. Ол тушта Мария Агару Бичиктеҥ 20-неҥ кӧп јерин цитировать эткен (Лука 1:46—55). Марияныҥ Иеговала колбулары бек болгоны, ангел Марияны Кудайдыҥ агару тыныла уул бала табар деп айтканынаҥ база кӧрӱнет. Бу ӧйдӧ ол Иосиф деп кижиле кол алыштырылып калган да болзо, ангел бу солунды озо баштап Марияга бойына айткан (Лука 1:26—33). Айдарда, Иегова Мария баланы јакшы чыдадып салар  деп бӱткен. Иисус божоп калала, теҥериге јӱрӱп те каларда Марияныҥ Иеговала колбулары бек болгон (Ап. ижи 1:14).

21. Эр улус Марияныҥ теминеҥ неге ӱренер аргалу?

²¹ Эр улус неге ӱренер аргалу? Ойгор эр кижи ӱйи Агару Бичикти јакшы билер болзо, ого бир де кӱйӱнбей јат. Ӱйи оныҥ баш болотон јаҥына кирижип туру деп чочыбай јат. Карын оныҥ ӱйи Агару Бичиктиҥ принциптерин тереҥ билгенинеҥ билеге јаан туза болот деп оҥдоп јат. Ӱйи ӧбӧӧнине кӧрӧ Агару Бичикти јакшы билер де болзо, је ӧбӧӧни тӱҥейле билелик бажырышты ӧткӱрер учурлу, анайда ок ӧскӧ дӧ кӧгӱс керектерди баштап апарар учурлу (Еф. 6:4).

22. Ӱй кижи Мариянаҥ неге ӱренет?

²² Ӱй улус неге ӱренер аргалу? Билениҥ ич кӧгӱзин эр кижи апарып турган да болзо, ӱй кижиге бойыныҥ кӧгӱс јанын база тыҥыдар керек (Гал. 6:5). Оныҥ учун Агару Бичикти кычырып, оны тереҥжиде шӱӱп сананарга ӧй табып турар керек. Анайып ол Иегованы оноҥ тыҥ сӱӱп баштаар. А Кудайды сӱӱзе, ого ӧбӧӧнине багынарга јеҥил болор. Бу ӱзе неме ого сӱӱнчи экелер.

23. Ӱй кижи баш болотон принципле јӱрзе, ого бойына да, билезине де, јуунга да кандый туза болот?

²³ Айдарда, Иегованы сӱӱп, ӧбӧӧнине багынып турган ӱй кижи баш болотон принципти тузаланарга кӱӱнзебей турган улуска кӧрӧ, јаан сӱӱнчи алат. Анайда ок олор јуундагы јииттерге тем кӧргӱзет. Бого коштой олор јуунныҥ улузына билезине ле чилеп кару болот (Тит. 2:3—5). Иегованыҥ организациязы кӧп сабада ӱй улустаҥ турат (Сар. 68:11). Је андый да болзо, эр де, ӱй де кижиге Иегова јуунда кажызына ла бойыныҥ молјузын берген. Кудай эр де, ӱй де кижиниҥ ижин баалап јат. Келер јӧрмӧлдӧ бистиҥ кажыбыс ла бойыстыҥ молјубысты канайып бӱдӱрер аргалу деп кӧрӧрис.