1. Давид Иегованыҥ јобожы керегинде нени айткан?

ИЕГОВАНЫ јобош Кудай деп айдарга јараар ба? Эйе. Давид бир катап мындый сӧстӧр айткан: «Сен меге аргаданыштыҥ куйагын берериҥ. Сениҥ јобожыҥ мени кӧдӱрип јат» (2 Сам. 22:36; Сар. 18:35). Бу сӧстӧрди айдып, Давид оныҥ адазыныҥ айылына судурчы Самуилдиҥ келгенин сананган болор. Кудай Самуилга Израильдиҥ кааны болотон кижини майлап салзын деп јакару берген. Давид сегис уулдыҥ огожы болгон. Је Иегова шак ла оны Саулдыҥ ордына каан болор деп талдап алган (1 Сам. 16:1, 10—13).

2. Бис бу јӧрмӧлдӧ нени шӱӱжерис?

² Давид сарнаачылардыҥ бирӱзиниҥ Иегова керегинде айткан мындый сӧстӧриле јӧпсинер эди: «Ол јер ле теҥерини кӧрӧргӧ, эҥчейип јат. Јокту-јойуны атту-чуулу улустыҥ јанына отургызарга, оны тобрактаҥ кӧдӱрип јат» (Сар. 113:6—8). Бу јӧрмӧлди шӱӱжип, Иегова јобожын канайып кӧргӱскен ле бис оноҥ неге ӱренип алар аргалу деп билип аларыс. Анайда ок Саул каанныҥ, Даниил судурчыныҥ ла Иисус Христостыҥ јӱрӱми кемзинчек болоры јанынаҥ бисти неге ӱредер аргалу деп сананып ийерис.

3. Иегова биске канайып баштанат ла бу нени кӧргӱзет?

³ Иегованыҥ јобожы бойыныҥ толо кемдӱ эмес ишчилерине канайып баштанып турганынаҥ кӧрӱнет. Кудай бистиҥ јӱк ле бажыруны јарадып турган эмес. Ол бисти бойыныҥ најылары деп кӧрӱп, оныла јуук колбуларлу болзын деп кӱӱнзейт  (Сар. 25:14). Оныҥ учун ол бойы биске баштапкы алтам эткен. Бистиҥ кинчектерис учун бойыныҥ Уулын тайылгага берген. Иегова сӱреен килеҥкей ле буурзак Кудай.

4. Иегова биске нени берген ле нениҥ учун?

⁴ Иегованыҥ јобожын кӧргӱзип турган база бир тем кӧрӱп ийектер. Кудай кижини јайап, ого јайым кӱӱнди бербес те аргалу болгон. Је Иегова анайып этпеген. Ол бисти бойына тӱҥей эдип јайап, биске канайып јӱретенин бойыска талдайтан арга берген. Иеговага кӧрӧ, бис неге де турбас да болзоос, је бис кандый јӧптӧр чыгарып турганыска ол јаан ајару эдет. Иегова бисти ого сӱӱштеҥ улам иштезин ле ого сӧсуккур болгоныс јаантайын туза экелип турганын оҥдозын деп кӱӱнзейт (Јаҥ. т. 10:12; Иса. 48:17, 18). Бис Иеговага мындый јобожы учун јаан быйанду!

5. Иегова бисти јобош болорына канайып ӱредет?

⁵ Иегова бисти јобош болорына бойыныҥ теми ажыра ӱредет. Кудайдаҥ ойгор кем де јок. Је андый да болзо, ол бойыныҥ јайаандарыла кожо кӱӱнзеп иштеп јат ла олордыҥ санаа-шӱӱлтелерин ајаруга алат. Анайып, Иегова бойыныҥ Уулына Јер-Телекейди јайаарга болужатан арга берген (Укаа 8:27—30; Кол. 1:15, 16). Иегова Кӱчтӱдеҥ Кӱчтӱ те болзо, је бойыныҥ эдетен кезик иштерин бойыныҥ јайаандарына берип јат. Темдектезе, ол Иисусты теҥеридеги Каандыктыҥ Кааны эдип тургускан ла 144 000 эр ле ӱй улуска оныла кожо башкаратан јаҥ берген (Лука 12:32). Иегова Иисусты Каан ла Абыс эдип иштеерине белетеп салган (Евр. 5:8, 9). Анайда ок Иисусла кожо башкаратан улусты ӱредет, је бу улустыҥ кажы ла алтамын Кудай шиҥжӱлебей јат. Олор оныҥ ӱреткени  аайынча эдип саларына Иегова бир де алаҥзыбай јат (Ачыл. 5:10).

6, 7. Иегованыҥ теми бойыстыҥ молјуларысты улуска берип турарга канайып ӱредет?

⁶ Кемниҥ де болужын керексинбей турган теҥеридеги бистиҥ Адабыс бойыныҥ эдетен иштерин јайаандарына берип турарда, биске де анайып эдер керек. Темдектезе, аксагалдар ла билениҥ бажы болуп турган улус бойыныҥ молјуларын ӧскӧ улуска берип, олордыҥ кажы ла алтамын шиҥжӱлебей турза, Иегованаҥ тем алат. Мынаҥ улам бис јӱк ле бастыра керектерди эдип салар эмезис, је улусты јаҥы та неге де ӱредип, олорго бу ишти коркыбай эдерге болужарыс (Иса. 41:10). Јаҥ берилген улус Иегованыҥ теминеҥ база неге ӱренер аргалу?

⁷ Иегова уулдарыныҥ, ангелдериниҥ, санаа-шӱӱлтезин билерге турган деп, Агару Бичик кӧргӱзет (1 Каан. 22:19—22). Ада-энелер, слер Иегованаҥ кандый тем алар аргалу? Келишкедий ӧйдӧ, балдараардаҥ олордыҥ санаазыла болзо, кандый бир ишти канайып бӱдӱрзе јакшы болор деп сурап туругар. Олор јакшы арга айдып берзе, оны тузаланыгар.

8. Иегова Авраам ла Саррага чыдамкайын канайып кӧргӱскен?

⁸ Иегованыҥ јобош болгоны оныҥ чыдамкайынаҥ база кӧрӱнет. Темдектезе, Иегованыҥ ишчилери оныҥ јӧптӧрине алаҥзып турганын тоомјылу айдып турза, ол чыдамкай болот. Авраам Иегованыҥ Содом ло Гоморраны јоголтор деп чыгарган јӧбине санааркап турарда, Кудай оны лаптап уккан (Баш. 18:22—33). Анайда ок Авраамныҥ ӱйине Саррага Иегованыҥ канайып баштанганын сананып ийзеер де. Ол карыыр јӧбинде уул бала табар деп, Иегованыҥ берген сӧзин угала каткырган, је Иегова Саррага ачынбаган (Баш. 18:10—14). Карын ого тоомјылу баштанган.

9. Аксагалдар ла ада-энелер Иегованыҥ теминеҥ неге ӱренет?

⁹ Ада-энелер ле аксагалдар, слерди Иегованыҥ теми неге ӱредет? Слердиҥ балдараар эмезе јуундагы ака-эјелер чыгарган јӧбигерле јӧпсинбей турза, слер канайып баштанадыгар? Слер олорды капшай ла тӱзедерге турадаар ба эмезе олордыҥ кӧрӱмин оҥдоорго албаданадаар ба? Јаҥ берилген улус Иегованаҥ тем алып турза, билелер де, бастыра јуундар да туза алат. Айдарда, Иегованыҥ теми јобош болорына бисти канайып ӱредип турганын шӱӱжип ийдис. А эмди Кудайдыҥ Сӧзиндеги ӧскӧ дӧ темдер бисти кемзинчек болоры јанынаҥ неге ӱредер аргалу деп сананып ийектер.

10. Иегова бисти ӧскӧ улустыҥ темдериле канайып ӱредет?

¹⁰ Иегова бистиҥ «Улу Ӱредӱчибис» бисти оныҥ Сӧзинде бичилген ӧскӧ дӧ темдерле ӱредет (Иса. 30:20, 21). Агару Бичиктеги Кудайга јарайтан кылык-јаҥдар кӧргӱскен, ол тоодо кемзинчек болгон улустыҥ темдеринеҥ бис кӧп немеге ӱренер аргалу. Анайда ок бу кылык-јаҥдар јетпей турган улустыҥ темдери биске база тузалу болот (Сар. 37:37; 1 Кор. 10:11).

11. Бис Саулдыҥ теминеҥ неге ӱренедис?

¹¹ Саул каанла не болгонын сананып ийектер. Јиит тужында ол кемзинчек кижи болгон. Ол бойыныҥ аргазын оҥдоп, бойына јаан молјулар да аларынаҥ коркып туратан (1 Сам. 9:21; 10:20—22). Је бир канча ӧйдӧҥ Саул бийиркенип баштаган. Оныҥ мындый јаман кылык-јаҥы каан болуп отурган кийнинде кӧрӱне берген. Ол  бир катап судурчы Самуилдиҥ келерин чыдажып сакып болбогон. Саулга кемзинчек болуп, Иегова бойыныҥ албатызы учун туруп чыгар деп, бӱдер керек болгон. Је мыныҥ ордына ол тайылга экелген. А мындый јаҥ ондо болбогон. Анайып Саул Иегованыҥ јарадузын ла каан болотон јаҥын јылыйтып салган (1 Сам. 13:8—14). Бу тем бистерди бийиркенбеске ӱредет.

12. Даниилдиҥ кемзинчек болгоны недеҥ кӧрӱнген?

¹² Саулга кӧрӧ, судурчы Даниил биске јакшы тем кӧргӱскен. Ол бастыра јӱрӱмине Иегованыҥ кемзинчек ле јобош ишчизи болуп, Кудайдаҥ јаантайын јӧптӧр сурап туратан. Бир катап Иегова Даниилге Навуходоносордыҥ тӱжин јартаарга болушкан. Је кемзинчек судурчы макты бойына алынбаган. Ол бу учун макты Иеговага јетирген (Дан. 2:26—28). Бу бисти неге ӱредет? Ака-эјелерге бистиҥ куучын-эрмектерис јарап турза эмезе бисте јарлаар иштиҥ јилбилӱ кӧп учуралдары бар болзо, бу ончо једимдер Иегованыҥ деп, биске ундыбас керек. Бис кемзинчек болзоос, Иегованыҥ болужы јогынаҥ нени де эдип болбозыс деп оҥдоп турарыс (2 Кор. 4:7). Мынайып эдип тура, бис Иисустыҥ да сӱреен јакшы темине тӱҥейлежип јадыс.

13. Иоанн 5:19, 30-та бичилген Иисустыҥ сӧстӧринеҥ бис неге ӱренедис?

¹³ Иисус Иегованыҥ толо кемдӱ Уулы да болгон болзо, јаантайын ла Адазына иженген. (Иоанн 5:19, 30 кычырыгар.) Ол Иегованыҥ јаҥын аларга качан да албаданбаган. Иоанн 6:38-те Иисус мынайып айткан: «Бойымныҥ табымла эдип јӱрейин деп, теҥеридеҥ тӱшкен эмезим, Мени ийген Аданыҥ табыла эдип јӱрейин деп, теҥеридеҥ тӱшкем». Иисус Адазыныҥ сӧсуккур Уулы болгон. Ол бойыныҥ аргазын оҥдоп, Адазыныҥ јаҥын тооп туратан.

14. Иисустаҥ јаҥы јок немени сураарда, ол кандый каруу берген?

¹⁴ Иаков ло Иоанн бойыныҥ энезиле кожо Иисустаҥ эдетен јаҥы јок немени сураарда, Иисус кандый каруу бергенин сананып ийектер. Иисус теҥеридеги Каандыкта кем оныҥ сол јанына, а кем оҥ јанына отуратанын јӱк оныҥ Адазы билер деп алаҥзу јогынаҥ айткан (Матф. 20:20—23). Мынайып Иисус Иегованыҥ јаҥы оныҥ јаҥынаҥ бийик деп кӧргӱскен. Ол кемзинчек болгон ло Иегованыҥ эдерге јаҥ бербеген немезин  качан да этпеген. Бис Иисустаҥ кандый тем алар аргалу?

15, 16. 1 Коринфтегилерге 4:6-да бичилген сӧстӧрди канайып тузаланарыс?

¹⁵ Бис Агару Бичиктеги «бичилгенге ӱзеери нени де этпе[гер]» деген јӧплӧ јӱрзебис, Иисустыҥ кемзинчек болгонынаҥ тем аладыс (1 Кор. 4:6). Оныҥ учун бистеҥ кем-кем јӧп сурап турза, бойыстыҥ санаа-шӱӱлтебисти албадабазыс эмезе јазап сананбай туруп неме айтпазыс. Оныҥ ордына биске ајаруны Агару Бичиктиҥ јӧптӧрине ле ого тӧзӧлӧнгӧн бичиктерге эдер керек. Анайып кемзинчек болгонысты, кажы ла сурактыҥ каруузын билер аргабыс јок болгонысты ла Кӱчтӱдеҥ Кӱчтӱ Кудайдыҥ јӧптӧри эҥ артык деп кӧргӱзерис (Ачыл. 15:3, 4).

¹⁶ Бистиҥ кемзинчек болгоныс Иегованы макка чыгарат. Је кемзинчек болотоныныҥ ӧскӧ дӧ шылтактары бар. Эмди јобош ло кемзинчек болоры канайып биске сӱӱнчи экелет ле биске улусла эптӱ-јӧптӱ јӱрерге канайып болужып турганын кӧрӱп ийектер.

17. Јобош ло кемзинчек болзоос, бис нениҥ учун сӱӱнчи аладыс?

¹⁷ Бис јобош ло кемзинчек болзоос, сӱӱнчи аладыс. Нениҥ учун? Бис бойыстыҥ аргабысты ла кемибисти оҥдоп турзаас, улустыҥ кандый ла болужы учун быйанду болорыс. Темдектезе, Иисус капкаш балулу он кижини јазып ийерде, не болгонын эске алып ийектер. Бу он кижиниҥ јӱк ле бирӱзи бойыныҥ коркышту јаман оорузынаҥ бойы качан да јазылып болбозын оҥдоп, Иисуска быйанын айдарга кайра келген. Ол јобош ло кемзинчек кижи ого эдилген болуш учун быйанду болуп, Кудайды мактаган (Лука 17:11—19).

18. Јобош ло кемзинчек болоры улусла эптӱ-јӧптӱ јӱрерге канайып болужат?

 ¹⁸ Јобош ло кемзинчек улус айландыра улусла эптӱ-јӧптӱ јӱрет ле јуук најыларлу болот. Нениҥ учун дезе олор улустыҥ јакшы кылык-јаҥын кӧрӱп јат ла олорго бӱдӱп јат. Анайда ок ака-эјелердиҥ јарлаар иштеги једимдерине сӱӱнип, олорды акту кӱӱнинеҥ мактап, олорго тоомјылу баштанат. (Римдегилерге 12:10 кычырыгар.)

19. Биске нениҥ учун бийиркенишле тартыжар керек?

¹⁹ Бийиркек кижиге улусты мактаарга кӱч болуп јат. Нениҥ учун дезе андый кижи улус оны мактазын деп кӱӱнзеп јат. Ол кӧп сабада бойын ӧскӧ улусла тӱҥдештирип, олордоҥ артык болорго албаданат. Анайда ок улусты ӱредип, бойыныҥ кезик молјуларын олорго берердиҥ ордына, ол мынайып сананардаҥ айабас: «Ӱзе немени јакшы эдерге турган болзоҥ, оны бойыҥ эт». Бийиркек кижи улуркак ла кӱйӱнчек болот (Гал. 5:26). Мындый кижиле улус узак најылашпай јат. Бисте улуркайтан кылык бар деп кӧрӱп ийзеес, Иеговага санаабысты јаҥыртарга болушсын деп тыҥыда мӱргӱӱр керек. Ол тушта бу кылык-јаҥ бисте тазылданбас (Рим. 12:2).

20. Биске нениҥ учун јобош ло кемзинчек болор керек?

²⁰ Бис Иеговага оныҥ теми учун јаан быйанду болодыс! Ол бойыныҥ ишчилерине јобош баштанып турган деп кӧрӱп, бис оноҥ тем аларга кӱӱнзейдис. Анайда ок библиялык ӧйлӧрдӧ Иеговага јобош иштеп јӱрген улустаҥ база тем аларга кӱӱнзеп јадыс. Айдарда, бистиҥ Кудайыска мак ла кӱндӱни јаантайын јетирип турактар. Ол мыны аларга јарамык (Ачыл. 4:11). Ол тушта бис ӱргӱлјиге оныҥ најылары болорыс, нениҥ учун дезе Иегова кемзинчек ле јобош улусты сӱӱп јат.