1. Биске чындыкка келгенисти куучындаарга нениҥ учун јарап јат?

 «СЕН чындыкка канай келгеҥ?» Ака-эјелерле таныжып тура, бу суракка кӧп катап каруузын берген болорыҥ. Биске ака-эјелер канайып чындыкка келгенин ле Иегованы сӱӱп баштаганы керегинде куучындап турганын угарга јарап јат. Анайда ок биске бойыска да чындыкка канайып келгенисти куучындаарга јарап јат (Рим. 1:11). Андый куучындар биске баштапкы болгон сезимдерди эске алындырат ла чындыкты баалап турганысты ундыбаска болужат. Мынаҥ улам чындыктыҥ јолыла оноҥ ло ары барар кӱӱнис кӧдӱрилет. Бу јӱрӱмниҥ јолында бисти Иегованыҥ јарадузы ла кайралы сакып јат (3 Иоанн 4).

2. Бу јӧрмӧлдӧ бис нени шӱӱжип кӧрӧрис?

² Озо ло баштап бис чындыкты нениҥ учун сӱӱп турганыстыҥ бир канча шылтактарын кӧрӱп ийектер. Мыныҥ кийнинде бу баалу сыйды баалап турганысты керектерисле канайып кӧргӱзеристи шӱӱжерис. Мынайып шӱӱшкенис Иегованыҥ бисти чындыкка экелгени учун быйанысты оноҥ тыҥ тыҥыдарга кӱӱнзедер (Иоанн 6:44). Анайда ок сӱӱнчилӱ јарды улуска куучындаарга оноҥ тыҥ албаданарыс.

3. Чындыкты сӱӱп турганыстыҥ эҥ јаан шылтагы кандый?

³ Бисте Иегова Кудайысты сӱӱйтен шылтактар кӧп. Эҥ јаан шылтак — чындыкты ачкан Кудайысты сӱӱп јадыс. Оныҥ Сӧзин ӱренип тура, бис Иегованы јӱк јерди ле теҥерини јайаган Кӱчтӱдеҥ Кӱчтӱ Јайаачы деп эмес, је анайда ок бисти сӱӱп турган ла кичееп турган теҥеридеги Адабыс деп билип алганыс (1 Пётр 5:7). Агару Бичикте «Иегова, килеҥкей ле буурзак Кудай. Ол чугулданарга  меҥдебей јат, чындык сӱӱшле, чындыкла толо» деп айдылат (Чыг. 34:6). Иегова чындыкты сӱӱп јат (Иса. 61:8). Ого бистиҥ кыйын-шырабысты кӧрӧргӧ коркышту ачу. Оныҥ учун Иегова темдектеп салган ӧйдӧ бастыра улустыҥ кыйын-шыразын јоголтып саларга белен (Иер. 29:11). Бис ол ӧйди энчикпей сакыйдыс! Бот нениҥ учун бис Иегова Кудайысты тыҥ сӱӱп јадыс.

4, 5. Нениҥ учун апостол Павел бистиҥ ижемјини якорьло тӱҥдештирген?

⁴ Бис чындыкты база нениҥ учун сӱӱп турганыс? Чындыктаҥ улам бистиҥ јӱрӱмисте кӧп јакшы немелер бар. Бир ле тем кӧрӱп ийектер. Библиялык чындык биске келер ӧйгӧ ижемји берет. Бу ижемјиниҥ јаан учурлу болгонын кӧргӱзерге, апостол Павел мындый сӧстӧр бичиген: «Бу ижемји јӱрӱмге быжу ла бек якорьдый» (Евр. 6:19). Якорь керепке аҥдана бербеске ле кайа-таштарга барып оодылбаска болужат. Анайып ла Агару Бичикте бичилген ижемји јӱрӱмисте болуп турган јоткондорды ӧдӧргӧ болужат.

⁵ Бу ӱлгердиҥ контекстинде Павел майлаткандардыҥ ижемјизи керегинде айткан. Је бу сӧстӧр јерде ӱргӱлјиге јадатан Кудайдыҥ ишчилерине база тузалу (Иоанн 3:16). Мындый ижемји јӱрӱмниҥ учурын оҥдоп турарга болужат.

6, 7. Ивон эјеге келер ӧй керегинде чындык канай болушкан?

⁶ Ивон деп атту эјениҥ учуралын кӧрӱп ийектер. Ол јаш тужында чындыкты билбестеҥ улам ӧлӱмнеҥ тыҥ коркыган. Бир катап ол эје бир бичиктеҥ: «Эртенги кӱн болбойтон кӱн келер» — деп сӧстӧр кычырып ийген. Бу сӧстӧр оныҥ бажынаҥ чыкпай барган. Ивон эске алат: «Мен бу сӧстӧрдӧҥ улам келер ӧйди сананып, токунап болбой, тӱниле уйуктап болбогом. „Јӱрӱмниҥ учуры неде? Мен неге керектӱ чыккам?“ Мениҥ чек ӧлӧр кӱӱним јок!»

⁷ Кийнинде Ивон эје бир эмеш јаандап келеле, Иегованыҥ Керечилериле танышкан. Ол айдат: «Оноҥ ло бери райда ӱргӱлји јӱрӱм јӱрерим деп иженип баштагам». Ого бу чындыкты билгени канайып болушты? Ол куучындайт: «Эмди мен тӱндер сайын келер ӧй лӧ ӧлӱм керегинде бир де санааркабай јадым». Бу эје чындыкты сӱреен тыҥ баалап јат. Анайда ок ого бу ижемјини улуска куучындаарга сӱреен јарайт (1 Тим. 4:16).

8, 9. а) Иисустыҥ укаа сӧзиндеги кижи табып алган эрјинени баалап турганын канайып кӧргӱскен? б) Слер чындыкты канай баалап јадаар?

⁸ Библиялык чындыкка база не кирет? Каандык керегинде сӱӱнчилӱ јар. Иисус Каандык керегинде јарды јажырып койгон эрјинеге тӱҥейлеген. Ол мындый сӧстӧр айткан: «Теҥери Каандыгы јалаҥда сугуп койгон јӧӧжӧгӧ [эрјинеге] тӱҥей. Оны кижи табала, кӧмӱп койгон, сӱӱнген бойынча барып, не барын садып ийип, байагы јалаҥды садып алган» (Матф. 13:44). Бу кижи јалаҥдӧӧн ӧнӧтийин ле эрјине бедиреп барбаган эмтир. Је ол оны табып алала, бастыра бар-јок немезин садып ийген. Нениҥ учун ол анайып эткен? Нениҥ учун дезе табылган эрјине сӱреен баалу болгонын билген. Оныҥ јӧӧжӧзине кӧрӧ, бу эрјине канча катапка баалу болгон.

⁹ Слер чындыкты база мынайып ла баалап турганаар ба? Эйе, баалап јадаар деп алаҥзыбайдыс! Иеговага иштегенинеҥ алып турган сӱӱнчини, бу телекей берип болбос. Анайда ок Кудайдыҥ Каандыгы башкарар ӧйдӧ бисте ӱргӱлји јӱрӱм јӱретен ижемји бар. А база бир неме дезе, бис Иегованыҥ јуук  најылары болодыс. Иеговала најылашканы кандый да чыгымнаҥ баалу, «оныҥ кӱӱнин бӱдӱрип» јӱреринеҥ јаан сӱӱнчи јок! (Кол. 1:10, ЈТ).

10, 11. Майклды јӱрӱмин солыырга не кӱӱнзеткен?

¹⁰ Кезик улуска Иегованы сӱӱндирерге, јӱрӱмин бӱдӱнге солыырга келишкен. Кезик улус кӧп акчалу ижин артыргыскан. А ӧскӧ улус бай болотон арганы јектеп ийген, та кем де чек ӧскӧ кижи болуп калган. Темдектезе, андый учурал Майкл деген акада болгон. Ол јиит тужында каратэге ӱренген. Ол айдат: «Мениҥ эди-каным сӱреен јакшы тазыктырылып калганына оморкоп туратам. Кезикте дезе мени кем де јеҥип болбос деп сананатам». Је оноҥ Майкл Иегованыҥ Керечилерине туштап, Агару Бичикти ӱренеле, Иегованыҥ базынышка кӧрӱмин билип алган (Сар. 11:5). Майкл оныла Агару Бичик ӱренген биле керегинде мынайда айдат: «Олор мени каратэни таштап ийзин деп бир де айтпайтан, карын меге оноҥ ло ары библиялык чындыкты ӱреткилеген».

¹¹ Майкл Иеговала канча ла кире јуук таныжарда, ого сӱӱжи ончо ло кире тыҥыган. Оныҥ јӱрегин анчада ла Иегованыҥ јалакайы томулткан. Бир канча ӧйдӧҥ ол бойын солыыр керек деп оҥдогон. Майкл айдат: «Меге эҥ ле тыҥ каратэни артыргызып саларга кӱч болгон. Је артыргызып салзам, Иегованыҥ јӱрегин сӱӱндирерим деп оҥдогом. Иеговага иштеерге, ончо немени артыргызып салзам, калас болбос деп билгем». Оныҥ учун Майкл чындыкты баалаганынаҥ улам јӱрӱмин солыган (Иак. 1:25).

12, 13. Майлиниҥ јӱрӱмин чындык канайып јарыткан?

¹² Агару Бичик чындыкты андый баалу деп кӧргӱзерге, оны караҥуй јерди јарыдып турган јарыткышка тӱҥдештирет (Сар. 119:105; Эф. 5:8). Азербайджан јериниҥ Майли деп сыйынныҥ учуралын кӧрӱп ийектер. Агару Бичиктеги чындык оныҥ јӱрӱмин јарыткыш чылап јарыткан. Оныҥ эне-адазы эки башка кудай јаҥда јӱрген. Адазы — мусульман, энези — иудей јаҥду кижи болгон. Ол эске алат: «Мен Кудай барына бир де алаҥзыбагам. Је кезик сурактардыҥ карууларын чек таппай туратам. Темдектезе: „Кудай кижини неге керектӱ јайаган? Та кем де бастыра јӱрӱмине шыралап, божогон кийнинде јажын чакка отту таамыга кыйналар ба?“ Је база бир ичиме кирбей турган неме, улустыҥ: „Ӱзе ле неме Кудайдыҥ табыла болот“ — деп айткан сӧстӧри. „Айдарда не, бис Кудайга марионеткалар ба, ого улустыҥ шыразын кӧрӧргӧ јарап турган ба?“»

¹³ Майли сурактарыныҥ карууларын оноҥ ло ары бедиреген. Бир канча ӧйдӧҥ ол Агару Бичикти ӱренип баштайла, Иегованыҥ Керечизи болуп калган. Ол айдат: «Агару Бичик бастыра немени чокум, јарт јартап турганынаҥ улам јӱрӱмге кӧрӱмим солынган. Сурактарымныҥ карууларын табып алала, јӱрегим токунаган». Чындап та, Иегова бисти «караҥуйдаҥ Бойыныҥ кайкамчылу јарыгына кычырган[ы]» учун бисте оны мактабайтан шылтак јок (1 Пётр 2:9).

14. Биске чындыкты оноҥ тыҥ сӱӱрге не болужар? (« База неге тӱҥей?» деген рамканы кӧрӱгер.)

¹⁴ Чындыкты якорьго, эрјинеге, јарыткышка тӱҥдештиргени биске чындыкты оноҥ тыҥ баалаарга болушты. Шылтактардыҥ јӱк ле ӱчӱзин кӧрдис. Је слерде оны баалайтан шылтактар оноҥ до кӧп болордоҥ айабас. Оныҥ учун  Агару Бичикти таҥынаҥ шиҥдеген тужыста оноҥ до ӧскӧ шылтактарды не бедиребес? Чындыкты канча ла кире тыҥ сӱӱзеес, сӱӱжисти керектерисле кӧргӱзетен оноҥ до ӧскӧ эп-аргалар табылар.

15. Бис чындыкты сӱӱп турганыс деп, керектерисле канай кӧргӱзер аргалу?

¹⁵ Бис чындыкты сӱӱп турган болзоос, Агару Бичикти ле оны јартап турган бичиктерди јаантайын ӱренип турарыс. Слер јӧпсинер болороор: чындыкта јӱргенис удап та калган болзо, јаантайын јаҥы та нени де билип аладыс. «Каруулчы шибее» деген журналдыҥ баштапкы чыгармазында мындый сӧстӧр бичилген: «Чындык дезе, јӱрӱм деп адалып турган јерде ӧзӱп јаткан кичинек јараш чечекке тӱҥей. Оны тӧгӱнниҥ баргаазы туй тудуп бараткан. Чындыкты табып аларга турган болзоор — тӱни-тӱжи ойгу болугар. [...] Чындыкты билерге турган болзоор — бӧкӧйип, оны ӱзӱп алыгар. Чындыктыҥ јӱк ле бир чечегиле болорзынбагар. [...] Олорды оноҥ ло ары бедиреп, јууп туругар». Агару Бичикти ӱренери јеҥил неме эмес, је ол јаан тӱжӱм экелет.

16. Слер Агару Бичикти канайып ӱренип турганаар? (Укаа 2:4—6).

 ¹⁶ Кажы ла кижиге кычырарга ла ӱренерге јарап турган деп айдып болбозыс. Је Иегова бисти «бедирезин» деп кӱӱнзедет. Ол бисти чындыкты тереҥ оҥдоп турган шиҥдеечилер болзын деп кӱӱнзейт. (Укаа сӧстӧр 2:4—6 кычырыгар.) Ол тушта Иегова бисти алкыш јогынаҥ артыргыспас! Кори деп ака Агару Бичикти таҥынаҥ ӱренип јатса, мындый принципти тузаланат — «Бир ӱредӱге бир ӱлгер». Ака куучындайт: «Мен бастыра сноскаларды, ӱлгерле колбулу ссылкаларды, анайда ок ӧскӧ дӧ материал табып, кычырып јадым. ...Анайып, сӱреен кӧп јаҥы неме билип аладым!» Је кандый да аргала шиҥдеп турган болзоос, эҥ керектӱзи — Агару Бичикти шиҥдеерге ийде-кӱчисти ле ӧйисти карамдабай турган болзоос, бис чындыкты баалап турганысты кӧргӱзедис (Сар. 1:1—3).

17. Чындыкла јӱрери ол не дегени? (Иаков 1:25).

¹⁷ Чындык — ол јӱк ле билгирлер алары эмес. Билгирди алган кийнинде оны јӱрӱмде тузаланар керек, ӧскӧртӧ айтса, чындыкла јӱрер керек. Јӱк ле ол тушта бис ырысту болорыс. (Иаков 1:25 кычырыгар, ЈТ.) Је бис чындыкла јӱредис пе, јок по деп канай билип алар? Темдектезе, алган билгирлеристиҥ кажызын тузаланып турганысты, је кажызын тузаланып болбой турганысты билип алар керек. Апостол Павел мынайда айткан: «Бис неге једип алганыс, анайда ла сананар, ол ээжиле јӱрер учурлу» (Флп. 3:16).

18. Нениҥ учун чындыктыҥ јолыла јӱрер керек?

¹⁸ Чындыктыҥ јолыла јӱреринеҥ артык не де јок! Чындыкла јӱрзеес, бис ырысту болодыс, Иегова ла ака-эјелеристи сӱӱндиредис (Укаа 27:11; 3 Иоанн 4). Чындыкты сӱӱйтен ле чындыкла јӱретен шылтактар бисте сӱреен кӧп деп, бир де алаҥзыбайдыс!