1, 2. а) Ефестегилерге 6:16-ла болзо, биске нениҥ учун бӱдериниҥ куйагы керек? б) Бис кандый сурактар шӱӱжерис?

СЛЕРДЕ бӱдериниҥ куйагы бар ба? (Ефестегилерге 6:16 кычырыгар.) Бар эмей. Канайып јуучылдыҥ куйагы оныҥ эди-канын корулап јат, анайып ла бӱдӱмјигер слерди бу телекейдиҥ јаман салтарынаҥ — балыр јӱрӱмнеҥ, калју керектердеҥ ле Кудайдыҥ нормаларына келишпей турган ончо немедеҥ корулап јат.

² Је бис «калганчы кӱндерде» јададыс, оныҥ учун бистиҥ бӱдӱмјибис оноҥ ло ары ченелер (2 Тим. 3:1). Айдарда, бистиҥ бӱдеристиҥ куйагы бек пе деп бӱдӱмјиленип аларга нени эдер керек? Куйакты тыҥ тудунып аларга не болужар? Бу сурактарды шӱӱжип ийектер.

3. Јуучылдар бойыныҥ куйактарын канайып кичееген, нениҥ учун?

³ Библиялык ӧйлӧрдӧ кӧп куйактарды тереле јабып, тартырып салатан. Јуучылдар терени кургап катпазын деп, куйактыҥ темирлери татабазын деп, куйакты ӱсле сӱркӱштеп туратан. Је јуучыл куйагыныҥ нези-нези ӱрелип јатканын кӧрӱп ийген болзо, оны тургуза ла јазаар учурлу болгон. Оноҥ башка јуучыл кенетейин јуу-согуш башталза, белен болбос эди. Бу темде ле слердиҥ бӱдӱмјигерде кандый колбу бар?

4. Бӱдеристиҥ куйагын нениҥ учун шиҥдеп кӧрӱп турар керек, мыны канайып эдер?

⁴ Канайып јебрен ӧйдиҥ јуучылдарына бойыныҥ куйагын  бек пе, јок по деп кӧрӱп турар керек болгон, анайып ла биске јуу-согушка јаантайын белен болорго, бӱдеристиҥ куйагын шиҥдеп кӧрӱп турар керек. Христиандар кӧгӱс јуу-согушта туружат, бистиҥ ӧштӱлерис — калју тындар болот (Еф. 6:10—12). Куйагыс бек пе, јок по деп, бойыстаҥ ӧскӧ кем де кӧрбӧс. Је ченелтелерди ӧдӧргӧ, бӱткенис бек пе деп, бӱдӱмјилӱ болорго нени эдер керек? Баштапкызында, Кудайдаҥ болуш сураар керек. Экинчизинде, Иегованыҥ кӧзинде бис кандый кижи болгонысты билип аларга, Агару Бичик кычырар керек (Евр. 4:12). Анда мынайып айдылат: «Бойыҥныҥ оҥдомолыҥа иженбе, бастыра јӱрегиҥле Иеговага ижен» (Укаа 3:5, 6). Бу керегинде ундыбай јадып, бу јуукта кандый тӱп-шӱӱлтелер эткенигерди шӱӱп сананып ийзегер. Темдектезе, слерде акча-манат јанынаҥ јаан кӱчтер болгон болор. Бу ӧйдӧ Еврейлерге 13:5-те бичилген Иегованыҥ: «Сени артырбазым, сени таштабазым» — деп айткан сӧстӧри санаагарга кирген бе? Бу сӧстӧрди кычырып, Иегова слерди артыргыспас деп алаҥзыбай турган болзогор, айдарда бӱдӱмјигер бек эмтир.

5. Бӱдӱмјигисти шиҥдеп тура, нени кӧрӱп ийер болорыс?

⁵ Бӱдӱмјигерди шиҥдеп тура, алдында кӧрӱнбеген уйан јандараарды кӧрӱп ийзегер, кайкаар болорыгар. Темдектезе, слердиҥ бӱдӱмјигер ӧйинеҥ ӧткӱре санааркаарынаҥ, тӧгӱннеҥ ле кунугарынаҥ уйадап калган болор. Андый болзо, бӱдӱмјигер оноҥ тыҥ уйадап калбазын деп, нени эдер керек?

6. Кезик санааркаштарда нениҥ учун јаман неме јок?

⁶ Кезик санааркаштарда јаман неме јок. Темдектезе, бис Иегова ла Иисусты ачындырып ийбеске санааркап јадыс (1 Кор. 7:32). Эмезе кандый бир уур кинчек эдип ийеле, Кудайла колбуларысты канайып орныктырарыс деп санааркайдыс (Сар. 38:18). Ол эмезе эш-нӧкӧрис, тӧрӧӧндӧрис ле јуундагы ака-эјелерис учун санааркап јадыс (1 Кор. 7:33; 2 Кор. 11:28).

7. а) Ӧйинеҥ ӧткӱре санааркаары бистиҥ бӱдӱмјибиске кандый каршузын јетирердеҥ айабас? б) Укаа сӧстӧр 29:25-ле болзо, биске нениҥ учун улустаҥ коркыбас керек?

⁷ Ӧйинеҥ ӧткӱре санааркаары бӱдӱмјибиске каршузын јетирердеҥ айабас. Темдектезе, бис нени јиирис, нени ичерис ле нени кийерис деп, јаантайын ла санааркаар болорыс (Матф. 6:31, 32). Мынаҥ улам бис јӱк ле акча-манат керегинде сананардаҥ айабазыс. Керек дезе, акчаны сӱӱй де берер болорыс. Мынаҥ улам бӱдерис уйадап, Иеговала колбуларыс ӱрелип калар (Марк 4:19; 1 Тим. 6:10). Анайда ок бис оноҥ до ӧскӧ немеге тыҥ санааркаар болорыс, темдектезе, улуска јаман кӧрдӱрбеске санааркаарыс. Мынаҥ улам, улус биске каткырыжар эмезе бисти истежер деп, коркый берердеҥ айабазыс. Бу тушта бис Иегованаҥ эмес, је улустаҥ тыҥ коркыырыс. Оныҥ учун мындый немедеҥ коруланарга, Иеговага мӱргӱп, јалтанбас болорго ло бӱткенис бек болзын деп, болуш сураар керек. (Укаа сӧстӧр 29:25 кычырыгар *; Лука 17:5.)

8. Тӧгӱнге туштазаас, биске нени эдер керек?

⁸ Сатана Дьявол, «тӧгӱнниҥ адазы», Иегова ла бистиҥ ака-эјелер керегинде тӧгӱн јайарга, бойыныҥ улузын тузаланат (Иоанн 8:44). Темдектезе, Кудайдаҥ јана баскан улус интернет, телевидение эмезе СМИ-ниҥ ӧскӧ дӧ бӱдӱмдери ажыра кӧк-тӧгӱн неме јайат эмезе Иегованыҥ  организациязы керегинде јастыра јетирӱлер таркадат. Бу Сатананыҥ «кызыган... согоондорыныҥ» бирӱзи (Еф. 6:16). Андый тӧгӱнге туштазаас, биске нени эдер керек? Тӧгӱнди бир де укпас керек! Нениҥ учун дезе Иеговага ла ака-карындаштарга бӱдедис. Бис јана баскан улусла качан да куучындашпазыс. Андый улустыҥ јетирӱлери биске јилбилӱ де болуп турза, олорды укпазыс та, олорло сӧс блаашпазыс та.

9. Кунугып турганыстаҥ улам не болордоҥ айабас?

⁹ Бӱдӱмјибис кунугып турганыстаҥ да улам уйадаардаҥ айабас. Бисте кӱчтер јок деп сананзаас, сагыш јогыс кӧрӱнет. Кезикте бис кунугып јадыс. Је биске кӱчтердеҥ улам, ал санаага тӱшпес керек. Мынаҥ ӧскӧ, Иегованыҥ сыйлаган сӱрекей јакшы ижемјини јылыйтып саларыс (Ачыл. 21:3, 4). Кунугып турзаас, ийде-кӱчис јоголып, Иеговага иштебей барардаҥ айабазыс (Укаа 24:10).

10. Бир эјениҥ самаразы слерди неге ӱредет?

¹⁰ Бириктирилген Штаттарда јадып турган эјениҥ темин кӧрӱп ийектер. Ол тыҥ ооруп турган ӧбӧӧнин кичееп јат. Бу эје бойыныҥ бӱдерин канайып тыҥыдат? Ол Иегованыҥ Керечилериниҥ тӧс башкарузына мындый самара бичиген: «Кезикте биске коркышту кӱч болуп турганынаҥ улам кунугып јадыс, је ижемјибис алдындагызындый ла бек. Иегова биске бӱдеристи тыҥыдарга сӱреен кӧп немелер берет. Ого мындый болужы учун јаан быйаным айдадым. Биске оныҥ јӧптӧри ле оморкодузы Сатананыҥ эдип турган ченелтелерин ӧдӧргӧ болужат». Бу эјениҥ сӧстӧриле болзо, биске кунукпаска не болужар? Ченелтелерди Сатанага удура туратан арга деп кӧрӧр керек, кӧгӱс курсакты баалаар керек ле Кудай бисти токунадар аргалу деп ундыбас керек.

11. Бӱдӱмјибис бек пе, јок по деп билерге, бойыстаҥ кандый сурактар сураар керек?

¹¹ Сананып ийзеер: слерге бӱдӱмјигердиҥ куйагын тыҥыдар керек пе? Калганчы ӧткӧн айларда ӧйинеҥ ӧткӱре санааркабай јӱрерге келишти бе? Јана баскандарды укпаска эмезе олорло сӧс блаашпаска албаданганаар ба? Эмезе кунукпай јӱрерге келишти бе? Эйе болзо, бӱдӱмјигер бек эмтир.  Је биске тӱҥей ле јайымжыбас керек, нениҥ учун дезе Сатанада оноҥ до ӧскӧ јепсел бар.

12. Акча-јӧӧжӧни јуурга албаданганыстаҥ не болордоҥ айабас?

¹² Акча-јӧӧжӧ јуурга албаданзаас, бӱдӱмјибис уйадап, кӧгӱс керектерге эрчимдӱ турушпай барарыс. Элчи Павел айткан: «Черӱге алган кижиге јарайын деп, кандый да јуучыл јадын-јӱрӱмдеги керектерле бойын колбобой јат» (2 Тим. 2:4). Римниҥ јуучылдарына иштеерге јарабас болгон. Олор бу токтодуга багынбаза, не болор эди?

13. Јуучылга нениҥ учун иштеерге јарабас болгон?

¹³ Сананып кӧрӱгер: јуучылдар эртен тура кылышла тузаланарына тазыктырынып јат, је бу ӧйдӧ олордыҥ бирӱзи тазыктырынышка келбеген болзын. Оныҥ ордына ол садуга барып, немелер садып јат. Эҥирде јуучылдар јепселдерин јазап, кылыштарын курчыдат. Је байагы јуучыл эртенге садатан товарын белетейт. Кенетийин эртен тура олорго ӧштӱ табарат. Јуучылдардыҥ кемизи јуу-согушка белен? Черӱ бажыныҥ јарадузын кем алар? Бу јуучылдардыҥ кемизин бойыгардыҥ јаныгарда кӧрӧргӧ кӱӱнзейдигер: јуу-согушка белетенген јуучылды ба, айса садуда садыжып отурганын ба?

14. Бистерде, Христостыҥ јуучылдарында, кандый амаду бар?

¹⁴ Биске јуу-согушка белен јуучылдардаҥ тем алар керек. Бистиҥ тӧс амаду — Башчыларыбыс болгон Иегованыҥ ла Христостыҥ јарадузын алары. Биске бу амадубысты бир де ундыбас керек. Олордоҥ јараду алары Сатананыҥ телекейи берип турган ончо немезинеҥ канча катапка баалу деп, алаҥзыбай јадыс. Бис Иеговага иштеерге ле бӱдӱмјибистиҥ куйагын да, ӧскӧ дӧ кӧгӱс јепселдеристи кичеерге, ӧй лӧ ийде-кӱч табып јадыс.

15. Павел нени айткан, нениҥ учун?

¹⁵ Биске јуу-согушка јаантайын белен болор керек. Нениҥ учун дезе элчи Павел: «Байыырга сананган улус [...] бӱдӱп јӱреринеҥ астыг[ар]» — деп айткан (1 Тим. 6:9, 10). «Астыгар» деген сӧс кереги јок  немелер јуурына тартыларын кӧргӱзет. Мынаҥ улам бистиҥ јӱрегис «эш-кереги јок ло каршулу кӧп кычага» алдыртардаҥ айабас. Је андый неме болбозын деп, ајарыҥкай болор керек, нениҥ учун дезе мындый кӱӱн — бистиҥ бӱдериске каршу јетирерге турган Сатананыҥ јепсели болуп јат.

16. Марк 10:17—22-де бичилген учурал нени шӱӱп сананарга кӱӱнзедет?

¹⁶ Темдектезе, бисте кӧп јӧӧжӧ алатан акчабыс бар, мынаҥ улам бойыска јарап турган, је тыҥ ла керектӱ эмес немени садып аладыс. Мында јаман ла неме јок ошкош. Је сананып ийзеер: кандый бир немени садып алатан арга бар да болзо, је бисте оны тузаланарга, јазаарга ла кичеерге ӧй лӧ ийде-кӱч болор бо? Эмезе јӧӧжӧбиске ӧйинеҥ ӧткӱре тартыларыс па? Кудайга кӧп иштеерге, Иисустыҥ кычырузын алынбаган јиит уул чылап јӱрерис пе? (Марк 10:17—22 кычырыгар.) Мыныҥ ордына чӱм јок јӱрӱм јӱрӱп, баалу ӧйисти ле ийде-кӱчисти Кудайдыҥ табын бӱдӱрерине берери артык болор.

17. Бис нени ундыбас учурлу?

¹⁷ Бис јуу-согушта туружып турганысты ла биске кажы ла кӱн јуу-согушка белен  болор керек деп ундыбай турактар (Ачыл. 12:17). Бистиҥ ака-эјелерис бӱдериниҥ куйагын бис учун апарбас. Оныҥ учун куйакты кажы ла кижи бойы тыҥ тудуп алар учурлу.

18. Јебрен ӧйдӧ јуу-согуштыҥ ӧйинде јуучылдар куйагын нениҥ учун тыҥ тударга албаданган?

¹⁸ Јебрен ӧйдӧ јуу-согушта јалтанбай турушкан јуучылдарга улус тоомјылу баштанар болгон. Је јуу-согуштаҥ куйагы јок келген јуучылды улус уйатка тӱжӱретен. Римниҥ Тацит деп тӱӱкичизи мынайып бичиген: «Куйагын таштаганы — эҥ јаан уйат». Бу, јуу-согуштыҥ ӧйинде јуучылдар куйагын нениҥ учун тыҥ тудунган деп, кӧргӱзип турган шылтактардыҥ бирӱзи.

19. Бӱдеристиҥ куйагын тыҥ тудуп аларга не болужар?

¹⁹ Бӱдеристиҥ куйагын тыҥ тудуп аларга не болужар? Биске христиан туштажуларга јаантайын јӱрер керек, анайда ок улуска Иегова ла оныҥ Каандыгы керегинде куучындаар керек (Евр. 10:23—25). Бого коштой, Агару Бичикти кажы ла кӱн кычырып, оныҥ јӧптӧрин јаантайын тузаланарга, Иегованаҥ болуш сураар керек (2 Тим. 3:16, 17). Ол тушта Сатананыҥ тузаланып турган кандый да јепсели биске тӱзедилбес каршу јетирип болбос (Иса. 54:17). «Бӱдериниҥ куйагы» бисти корулаар. Бис ака-эјелерисле кожо кӧгӱс јуу-согушта јалтанбай турушсаас, бӱдерис учун кажы ла кӱн тартыжып турган јуу-согушты јеҥип аларыс. Је эҥ учурлузы, Иисус Христос Сатананыҥ черӱзин ле оныҥ болушчыларын одо соккон ӧйдӧ, Иисустыҥ јанында болорыс (Ачыл. 17:14; 20:10).