1. Иисус «теҥеридеги јӧӧжӧ» керегинде нени айткан?

ЭҤ БААЛУ эрјинелер кӧскӧ кӧрӱнбей јат. Иисус Кырдагы куучынында, јердеги эрјинелердеҥ канча киреге баалу теҥеридеги эрјинелер керегинде куучындаган. Ол: «Јӧӧжӧгӧр кайда, јӱрегеер де анда болор» — деп айткан (Матф. 6:19—21). Бистиҥ јӱрегис, нени баалап турганысты, оны ла эдерге јӱткӱдет. Бис Кудайдыҥ јарадузын алып турзаас, «теҥериде јӧӧжӧ» јууйдыс. Иисустыҥ јартаганыла, андый эрјинелерди јоголтып салар эмезе уурдап алар арга јок.

2. а) Павел бисти 2 Коринфтегилерге 4:17, 18-те неге кӱӱнзедет? б) Бу јӧрмӧлдӧ не керегинде айдылар?

² Апостол Павел бисти «кӧрӱнбей турганына» кӧрзин деп кӱӱнзедет. (2 Коринфтегилерге 4:17, 18 кычырыгар.) Павелдиҥ «кӧрӱнбей турганы» деп айтканы нени темдектеген? Темдектезе, мында јаҥы телекейде болотон алкыштар керегинде айдылган. Је кӧскӧ кӧрӱнбес эрјинелердиҥ кезиги бисте эмди де бар. Ол тоодо Кудайла најылажары, мӱргӱӱл, агару тынныҥ болужы, анайда ок јарлаар иште Иегованыҥ, Иисустыҥ ла ангелдердиҥ болужы. Бу јӧрмӧлдӧ шак ла бу тӧрт эрјине кӧрӱлер. Анайда ок Иеговага бу эрјинелер учун быйанысты канайып кӧргӱзери шӱӱжилер.

3. Кӧскӧ кӧрӱнбес кандый эрјине эҥ баалу? Бис оны недеҥ улам алар аргалу?

³ Бисте бар эҥ баалу эрјине — Иеговала најылажары (Сар. 25:14). Кудай кинчектӱ улусла најылажып тура, канайып  агару болуп артат? Ол дезе, «телекейдиҥ улузыныҥ кинчегин» алып турган Иисус Христостыҥ толынты тайылгазынаҥ улам агару артат (Иоанн 1:29). Иегова, Иисусты учына јетире чындык артар ла кижиликти аргадаар деп, бир де алаҥзыбаган. Ол оныҥ учун Христостоҥ озо јӱрген улусла најылажар аргалу болгон (Рим. 3:25).

4. Христостоҥ озо јӱрген Кудайдыҥ најылары керегинде куучындап беригер.

⁴ Христостоҥ озо јӱрген, је Кудайдыҥ најылары болгон улусты сананып ийектер. Темдектезе, Авраам. Ол Иеговага сӱрекей тыҥ бӱткен. Керек дезе, Иегова Авраамныҥ божогонынаҥ ала 1000-наҥ да кӧп јыл ӧдӱп каларда, оны бойыныҥ најызы деп адаган (Иса. 41:8). Айдарда, ӧлӱм Иеговала најылажарын ӱзӱп болбос. Авраам Иегованыҥ санаазында эмдигенче ле тирӱ (Лука 20:37, 38). База бир тем — Иов. Бир катап Иегова ончо ангелдердиҥ алдына Иов керегинде мынайып айткан: «Ол Кудайдаҥ айап, јаманнаҥ тууралап турган чындык ла јек јок кижи» (Иов 1:6—8). А Даниилди Иегова кандый кижи деп кӧргӧн? Даниил 80 јылдыҥ туркунына язычниктердиҥ ортозында да јаткан болзо, Кудайга чындык арткан. Карып калган Даниилди ангелдер, Кудайдыҥ кӧзинде «сӱреен баалу кижи» деп, ӱч катап бӱдӱмјилегендер (Дан. 9:23; 10:11, 19). Оныҥ учун, Иегова сӱӱген најыларын тиргизетен ӧйди сӱрекей тыҥ сакып турган деп, бис бир деп алаҥзыбай јадыс (Иов 14:15).

5. Иеговага јуук најы болорго нени эдер керек?

⁵ Иегова бӱгӱнги кӱнде толо кемдӱ эмес улусла најылажат па? Эйе, андый улустыҥ тоозы миллиондор тоолу. Бис мыны, Кудайды сӱӱндирерге турган миллиондор тоолу эр ле ӱй улустыҥ, анайда ок балдардыҥ јӱрӱминеҥ билип јадыс. Бу чындык улусла Иегова јуук најылажып јат (Укаа 3:32). Олор Иисустыҥ толынты тайылгазына бӱдӱп турганынаҥ улам, Кудайга јуук најылар болот. Иегова бу тайылгага тӧзӧлӧнип, биске ого јӱрӱмисти учурлап, сууга чӧҥӱрилер арга берген. Бу јаан учурлу алтамдарды эдип, бис Јер-телекейдиҥ Кӱчтӱдеҥ Кӱчтӱ Јайаачыбыска јуук најылар болуп калганына сӱӱнип турган миллиондор тоолу христиандарга кожулганыс!

6. Бис Иеговала најылыгысты баалап турганыс деп, канайып кӧргӱзерис?

⁶ Бис Иеговала најылыгысты баалап турганыс деп канайып кӧргӱзерис? Авраам ла Иов Кудайга јӱс јылдаҥ ажыра чындык јӱрген. Биске де, Иеговага канча да јыл иштеп турган болзоос, чындык артар керек. Даниил Иеговала најылыгын јӱрӱминеҥ артык баалаган — биске де анайып баалаар керек (Дан. 6:7, 10, 16, 22). Иегованыҥ болужыла бис кандый ла ченелтелерди ӧдӱп, оныла јуук колбуларлу артарыс (2 Кор. 4:7).

7. а) Укаа сӧстӧр 15:8-ле болзо, Иегова бистиҥ мӱргӱӱлдеристи канайып угат? б) Иегова бистиҥ мӱргӱӱлдериске канайып каруу берет?

⁷ Кӧскӧ кӧрӱнбес база бир эрјине — мӱргӱӱл. Јуук најыларга бой-бойыныҥ санааларын ла сезимдерин куучындажарга јарап јат. А бис Иеговала канайып куучындажар аргалу? Ол бисле бойыныҥ Сӧзи ажыра куучындажат. Анаҥ оныҥ санааларын ла сезимдерин билип аларга јараар. Бис дезе, Иеговага мӱргӱп, бойыстыҥ јажытту санааларысты ла сезимдеристи куучындаар аргалу. Иеговага бистиҥ мӱргӱӱлдеристи угарга тыҥ јарап јат. (Укаа сӧстӧр 15:8 кычырыгар *.) Ол мӱргӱӱлдеристи јӱк  ле угуп турган эмес, је каруузын да берет. Кезикте Иегова карууны капшай ла берип ийет. Је кезикте бир ле немени канча катап сураарга келижет. Андый да болзо, Кудай карууны качан ла канайып берерин јакшы билер деп алаҥзыбай јадыс. Је кезикте оныҥ каруузы сураганыстаҥ чек башка болордоҥ айабас. Ол бистиҥ кӱчтеристи јоголтпозо до, олорды ӧдӧргӧ керектӱ ийде-кӱч ле ойгор берер (1 Кор. 10:13).

8. Мӱргӱӱр арга учун Иеговага быйанысты канайып кӧргӱзерис?

⁸ Бис мӱргӱӱр арга учун, сӱрекей баалу сый учун, Иеговага быйанысты кӧргӱзерге нени эдер аргалу? Быйанысты кӧргӱзетен аргалардыҥ бирӱзи — Оныҥ Сӧзиндеги: «Туркаары мӱргигер» — деп айдылган јӧпти бӱдӱрери (1 Фес. 5:17). Иегова бисти ого мӱргӱзин деп албадабай јат. Ол бистиҥ јайымысты тооп, бисти ого јаантайын мӱргӱзин деп кӱӱнзедет (Рим. 12:12). Оныҥ учун кажы ла кӱн канча катап мӱргӱп, Иеговага быйанысты айдып, оны мактап јӱректер (Сар. 145:2, 3).

9. Бир ака мӱргӱӱр арга учун быйанын канайып кӧргӱзет, слер канайып кӧргӱзедигер?

⁹ Бис Иеговага канча ла кире узак иштеп, мӱргӱӱлдериске канайып каруу алганысты кӧрӱп турзаас, мӱргӱӱр арга учун оноҥ тыҥ быйанду болор учурлу. 47 јылга Кудайга ӧйин толо берип иштеп турган Крис деп ака мынайып айдат: «Меге таҥ эртеде, кӱнниҥ чогына чалын суркурап турган ӧйдӧ туруп, меҥдебезинеҥ Иеговала куучындажарга сӱреен јарап јат! Мен Иеговага ончо сыйлары учун, ол тоодо мӱргӱӱр арга учун, быйанымды айдадым. Уйуктаар алдында база мӱргӱйдим, анайып јӱрегиме амыр-энчӱ алып, јакшы уйуктайдым».

10. Биске Кудайдыҥ агару тынын нениҥ учун баалаар керек?

¹⁰ Агару тын — Иегованыҥ кӧскӧ кӧрӱнбес, је эҥ баалу сыйларыныҥ база бирӱзи. Иисус бойыныҥ ӱренчиктерин агару тын сурап турзын деп кӱӱнзеткен (Лука 11:9, 13). Иегова агару тыныныҥ болужыла биске ийде-кӱч  берет, керек дезе «артыкташкан кӱч» те берердеҥ айабас (2 Кор. 4:7; Ап. ижи 1:8). Бу тынныҥ болужыла бис кандый ла кӱчтерди ӧдӱп чыгарыс.

11. Агару тын биске канайып болужат?

¹¹ Агару тын биске Иегованыҥ организациязындагы јакылталарды бӱдӱрерге болужат. Бу тын бистиҥ јайалталарысты тыҥыдар аргалу. Кудайдыҥ ижинде јединген једимдерис, бистиҥ јайалталарыстаҥ улам эмес, је агару тынныҥ болужынаҥ улам деп оҥдоп јадыс.

12. Сарын 139:23, 24-лӧ болзо, бис не керегинде мӱргӱӱр аргалу?

¹² Иеговага агару тынныҥ болужын баалап турганысты кӧргӱзетен аргалардыҥ бирӱзи — бу тынды јӱрегистеги јастыра санааларысты ла кӱӱнисти кӧргӱзип берзин деп мӱргӱӱри. (Сарын 139:23, 24 кычырыгар *.) Бис бу керегинде мӱргӱп турган болзоос, Иегова агару тыныныҥ болужыла бистиҥ јастырабысты кӧргӱзип берер аргалу. Јастыраларысты кӧрӱп ийзеес, Кудайдыҥ агару тыны биске олорды тӱзедерге ийде-кӱч берзин деп, мӱргӱӱр учурлу. Анайып, биске Иегованыҥ агару тынын аларга не де чаптыгын јетирбезин деп кӱӱнзеп турганысты кӧргӱзедис (Еф. 4:30).

13. Агару тынды оноҥ тыҥ баалаарга биске не болужар?

¹³ Агару тынды оноҥ тыҥ баалаарга, бӱгӱнги кӱнде Кудай агару тыныныҥ болужыла нени эдип турганын шӱӱп сананганыс болужар. Иисус теҥериге кӧдӱрилердеҥ озо, ӱренчиктерине: «Слерге Агару Тын тӱшкежин, кӱч алынып... јердиҥ јаказына да јетире Мениҥ керечилерим болорыгар» — деп айткан (Ап. ижи 1:8). Бис шак ла бу ишти бойыстыҥ кӧзисле кӧрӱп јадыс. Агару тынныҥ болужыла бастыра јердиҥ ӱстинде сегис јарым миллионноҥ ажык улус Иегованыҥ ишчилери болуп калган. Анайда ок агару тын биске оныҥ тӱжӱмине кирип турган кылык-јаҥдарга ӱренип аларга болужат: сӱӱш, сӱӱнчи, амыр, чыдажыш, јалакай,  буурзаш, бӱдӱмји, јобожыш, тудуныш (Гал. 5:22, 23). Мынайып, бис кӧгӱс райда јададыс. Агару тын — Иегованыҥ сӱреен баалу сыйы!

14. Јарлаар иште биске кемдер болужат?

¹⁴ Бисте кӧскӧ кӧрӱнбес ӧскӧ дӧ эрјине бар — Иеговала, Иисусла, анайда ок ангелдерле кожо иштенетен арга (2 Кор. 6:1). Бис ӱренчиктер белетеер ишке турушкан ӧйдӧ олорло кожо иштенип јадыс. Павел, бойы да керегинде, ӧскӧ дӧ јарчылар керегинде мынайып айткан: «Кудайга [«Кудайла», ЈТ] кожо иштеп јӱргенибис» (1 Кор. 3:9). Јарлаар ишке турушсаас, бис Иисусла да кожо иштеп јадыс. Ол бойыныҥ ӱренчиктерине ончо албатылардаҥ ӱренчиктер белетезин деп јакарып, олорго: «Мен слерле кожо» — деп айткан (Матф. 28:19, 20). А ангелдерле кожо бис канайып иштейдис? Олор биске сӱӱнчилӱ јарды јарлаарга болужат. Бу бисти тыҥ сӱӱндирип јат! (Ачыл. 14:6).

15. Агару Бичиктиҥ кандый учуралынаҥ, Иегова јарлаар иште јаан иш эдип турган деп кӧрӱнет?

¹⁵ Теҥеридеҥ келип турган мындый болушла бис нени эдер аргалу? Бис Каандыктыҥ ӱренин сееп турзаас, кезик ӱрендер чындыкты угарга турган улустыҥ јӱрегине тӱжӱп, ӧзӱп чыгат (Матф. 13:18, 23). Је бу ӱрендер кемниҥ болужыла ӧзӱп, тӱжӱм экелип баштайт? Иисус мынайып јартаган: «Адам јараткан кижи, јаҥыс ол Меге келер аргалу» (Иоанн 6:44). Агару Бичикте бир учурал бу сӧстӧрди чын деп кӧргӱзет. Павел Филиппы каланыҥ јанында тоолу ӱй улуска јарлап турарда не болгонын сананып ийектер. Бу ӱй улустыҥ ортозында Лидия деп кижи болгон. Ол керегинде Агару Бичикте мынайып айдылат: «Павелдиҥ айтканын кӧксине алынзын деп, Кайракан оныҥ јӱрегин ачты» (Ап. ижи 16:13—15). Анайып ла Иегова миллиондор тоолу ӧскӧ дӧ улусты бойына јууктадат.

16. Бистиҥ јарлаар ижистиҥ једими кемнеҥ камаанду?

¹⁶ Бистиҥ јарлаар ижистиҥ једими озо ло баштап кемнеҥ камаанду? Бу сурактыҥ каруузын апостол Павелдиҥ Коринфтеги јуунга бичиген самаразынаҥ табып аларга јараар. Ол: «Мен тарыдым, Аполлос сугарды, је ӧскӱргени Кудай болды. Оныҥ учун тарып та, сугарып та турганы учурлу эмес, јаҥыс ӧскӱрип турган Кудай учурлу» — деп бичиген (1 Кор. 3:6, 7). Биске, јарлаар ижиниҥ једими Кудайдаҥ камаанду деп сананган Павелдеҥ тем алар керек.

17. Бис Иеговала, Иисусла анайда ок ангелдерле кожо иштенер арганы баалап турганысты канайып кӧргӱзерис?

¹⁷ Бис Иеговала, Иисусла анайда ок ангелдерле кожо иштенер арганы баалап турганысты канайып кӧргӱзерис? Биске сӱӱнчилӱ јарды улуска куучындайтан аргаларды бир де божотпой турар керек. Темдектезе, сӱӱнчилӱ јарды айылдар сайын эмезе кӧп улусту јерлерде јарлаарга јараар (Ап. ижи 20:20). Кезик јарчыларга бойыныҥ керектериле јӱрген ӧйдӧ јарлаарга јарап јат. Олор кижиге туштай берзе, оныла јакшылажып ийеле куучын баштаарга албаданат. Кижи јакшы куучындажа берзе, олор куучынды араайынаҥ Кудайдыҥ Каандыгына кӧчӱрип ийет.

18, 19. а) Бис чындыктыҥ ӱренин канайып сугарадыс? б) Иегова Агару Бичикти ӱренген бир кижиге канайып болушкан?

¹⁸ Бис Кудайла кожо иштенип турган болорыста биске чындыктыҥ ӱренин јӱк ле отургызар керек эмес, је оны сугарар да керек. Кижи сӱӱнчилӱ јарды јилбиркеп угуп турган болзо, бис Агару Бичикле ӱредӱ баштаарга, ого такып келерге албаданадыс эмезе ӧскӧ јарчыны сурап саладыс. Ӱредӱ  ӧткӱрген ӧйлӧрдӧ Иегова ачык јӱректӱ кижиниҥ санаазын ла јӱрегин канайып солып турганын сӱӱнип кӧрӧдис.

¹⁹ ЮАР-да јадып турган Рапалалани деп эр кижиниҥ темин кӧрӱп ийектер. Алдында ол улусты эмдеп-томдоп турган кижи болгон. Ого Агару Бичикти Иегованыҥ Керечилериле ӱренерге јарап туратан. Је ого божогон улусла куучындажарын Агару Бичиктиҥ јаратпай турганыла јӧпсинерге кӱч болгон (Јаҥ. т. 18:10—12). Канча да ӧйдиҥ бажынаҥ ол бу сурак аайынча Кудайдыҥ кӧрӱмиле араайынаҥ јӧпсине берген. Анайып, тарма оныҥ акчазы да болгон болзо, ол оныла урушпай барган. Эмди Рапалалани 60 јашту. Ол мынайып айдат: «Иегованыҥ Керечилерине меге ӱзе јанынаҥ болушканы учун, темдектезе иш табып бергени учун, јаан быйаным айдадым. Је озо ло баштап мен Иеговага быйанду, нениҥ учун дезе мен оныҥ болужыла јаҥы јӱрӱм баштагам. Эмди мен Иегованыҥ сууга чӧҥӱрилген Керечизи болодым, ого сӱӱнип иштейдим».

20. Бу јӧрмӧл слерди неге кӱӱнзетти?

²⁰ Бу јӧрмӧлдӧ бис кӧскӧ кӧрӱнбес тӧрт эрјине керегинде куучындаштыс. Эҥ керектӱ баштапкы эрјине — Иеговала јуук најылажары. Андый најылык кӧскӧ кӧрӱнбес ӧскӧ дӧ ӱч эрјине алар арга ачат: мӱргӱйтен арга, агару тынныҥ болужын алатан арга, анайда ок Иеговала, Иисусла, ангелдерле кожо иштенетен арга. Оныҥ учун Иеговага бу кӧскӧ кӧрӱнбес эрјинелер учун ла бисте андый јакшы Најы бар учун јаантайын быйанду јӱректер!