1. Эје-сыйындар јуунга кандый болужын јетирет ле олордыҥ кӧбизинде кандый кӱчтер болот? (Кадарындагы јурукты кӧрӱгер.)

ЈУУНДА кӧп эје-сыйындар албаданып иштеп турганына бис тыҥ сӱӱнип јадыс! Олор христиан туштажуларда ла јарлаар иште туружат. Каандыктыҥ Тураларында эдилип турган иштерде болужат ла јуунныҥ ака-эјелерин кичеегилейт. Је олордыҥ јӱрӱми кӱчтер јогынаҥ болбой јат. Темдектезе, олордыҥ кемизи де јажы јаанап калган ада-энезин кичеейт. Кемизине де тӧрӧӧн-тугаандары удурлажат. А та кемизине де јаҥыскан балдар чыдадып, кӧп иштеерге келижет.

2. Биске нениҥ учун эје-сыйындарга болужар керек?

² Биске нениҥ учун эје-сыйындарга болужар керек? Нениҥ учун дезе бу телекейде кезикте улус олорды тообой јат. Анайда ок олорго болушсын деп, бисти Агару Бичик кӱӱнзедет. Темдектезе, апостол Павел Римдеги јуунда Фива эјени јылу уткып, ого «не-немедеҥ тутакту болзо, болужыгар» деп айткан (Рим. 16:1, 2). Ӧткӧн ӧйдӧ Павел фарисей болгон. Оныҥ учун ол ончо фарисейлер чылап, ӱй улусты јабыс кӧргӧн болор. Је христиан болгон кийнинде, ол Иисустаҥ тем алып, ӱй улуска јалакай ла тоомјылу баштанатан (1 Кор. 11:1).

3. Иисустыҥ ӱй улуска кӧрӱми, анчада ла Кудайдыҥ табын бӱдӱрген ӱй улуска кандый болгон?

³ Иисус ӱй улусты тооп туратан (Иоанн 4:27). Ӱй улуска Иисустыҥ кӧрӱми иудей кудай јаҥныҥ башчыларына кӧрӧ, чек башка болгон. Библиялык бир энциклопедияда мынайып айдылат: «Иисус ӱй улусты качан да јамандабаган ла јабыс кӧрбӧгӧн». Ол анчада ла Адазыныҥ табын бӱдӱрген ӱй улусты тооп туратан. Иисус олорго сыйындар деп баштанып, олорды эр улусла кожо оныҥ кӧгӱс билезиниҥ улузы деп кӧргӧн (Матф. 12:50).

4. Бу јӧрмӧлдӧ бис нени шӱӱжерис?

 ⁴ Иисус Иеговага иштеп турган ӱй улуска болужарга јаантайын белен болгон. Ол олордыҥ ижин баалаган ла олорды корулаган. Је эмди Иисустаҥ тем алып, эје-сыйындарга канайып болужатанын шӱӱжип ийектер.

5. Кезик эје-сыйындарга најылар табарга нениҥ учун кӱч болот?

⁵ Бистиҥ ончобыска — ака-карындаштарга да, эје-сыйындарга да — јакшы најылар керек болуп јат. Је кезикте эје-сыйындарга најылар табарга кӱч болот. Нениҥ учун? Олордыҥ кезиги нени айдып турганын кӧрӱп ийектер. Джордан * деп атту сыйын куучындайт: «Мен кижиге барбагам. Јуунда мен јогынаҥ да јакшы ошкош. Мен кемге де керек јок деп бодоп јадым». А бу кӧп јарлаарга кӧчӧ берген Кристен деп атту пионер сыйынныҥ сӧстӧри: «Јаҥы јуунга кӧчӱп барзаҥ, јаҥысканзырай берердеҥ айабазыҥ». Кезик христиандарда бойыныҥ билезиниҥ Керечил эмес улузыла јуук колбулар болбой јат. Бу ок ӧйдӧ олор кӧгӱс те биледе бойлорын кереги јок деп санангылайт. Анайда ок оору-јоболдоҥ улам айылынаҥ чыкпай турган ла јуук оору улузын кичееп турган христиандар јаҥысканзыраар болор. «Ака-эјелер мени амыраарга кычырза, мен јӧпсинбейтем, нениҥ учун дезе мен энемди кичеегем» — деп, Аннетт эске алынат.

6. Лука 10:38—42-ле болзо, Иисус Марфа ла Марияга канайып болушкан?

⁶ Иисус кӧгӱс эје-сыйындарына ӧйин берип, олорго чын најы болгон. Иисустыҥ Мария ла Марфала најылашканын сананып ийектер. Бу эје-сыйындар кижиге барбаган болор. (Лука 10:38—42 кычырыгар.) Иисус јакшы најы болгон, оныҥ учун Мария ла Марфага оныла кожо болорго јарап туратан. Бир катап Мария Иисустыҥ ӱренчиктери чылап, оныҥ будыныҥ јанына отурып алган. Иисус оны јаман айтпас деп, ол билген *. Мария ого болушпай турган деп ачынып калган Марфа нени сананып турганын Иисуска уйалбай айдып берген. Бу учуралда Иисус Мария ла Марфага јаан учурлу кӧгӱс чындыктарды оҥдоорго болушкан. Ол Марфа, Мария ла Лазарьга кӧп катап келип туратан. Мынаҥ Иисустыҥ олорды тыҥ сӱӱп турганы кӧрӱнген (Иоанн 12:1—3). Оныҥ учун Лазарь тыҥ ооруп каларда, Марфа ла Марияныҥ Иисустаҥ болуш сураганына бис кайкабай јадыс (Иоанн 11:3, 5).

7. Бис эје-сыйындарды канайып оморкодор аргалу?

⁷ Кезик эје-сыйындарга јуунныҥ туштажулары јуунныҥ улузыла кӧрӱжетен аргалардыҥ бирӱзи болуп јат. Оныҥ учун биске Каандыктыҥ Туразында олорды јылу уткып, олорло јилбиркеп, куучындажып турар керек. Ӧрӧги айдылган Джордан сыйын мынайып айдат: «Ака-эјелер мени јуундагы карууларым учун мактап турза, јарлаар ишке кычырып турза, ајаруны база канайып та эдип турза, оморкоду аладым». Эје-сыйындарды баалап турганыс деп, биске кӧргӱзер керек. «Мен јуунныҥ туштажузына келбей калзам, кем-кем меге бичип, менле ӱзе јакшы ба деп, сурап ийерине бир де алаҥзыбай јадым» — деп, Киа айдат. Бу мени ака-эјелер сӱӱп турган деп бӱдӱмјилейт.

8. Бис Иисустаҥ база кандый тем алар аргалу?

⁸ Иисус кӧгӱс эје-сыйындарла ӧй ӧткӱретен. Биске оноҥ тем алар керек. Олорды чай  ичерге эмезе јӱк ле куучындажарга айылдӧӧн кычырарга јараар. Је бистиҥ куучындаарыс кӱӱн-санааны кӧдӱрип турар учурлу (Рим. 1:11, 12). Кезик улуска биле тӧзӧбӧй јӱрерге кӱч болор деп, Иисус билген. Кижиниҥ чын ырызы билелӱ ле балдарлу болгонынаҥ камаанду эмес деп, Иисус јарт айткан (Лука 11:27, 28). Кижиниҥ ырызы Иеговага иштеерин баштапкы јерге тургузып турганынаҥ камаанду (Матф. 19:12). Биле тӧзӧбӧй јӱрерине аксагалдардыҥ кӧрӱми Иисустыҥ ла кӧрӱминдий болор керек.

9. Аксагалдар эје-сыйындарга болужарга, нени эдер аргалу?

⁹ Аксагалдарга анчада ла јуундагы ӱй улуска ла кыстарга бойыныҥ кӧгӱс эје-сыйындарына ла энелерине чилеп баштанар керек (1 Тим. 5:1, 2). Аксагалдар олорго јуунныҥ туштажузыныҥ алдында ла кийнинде ајару эдип турар керек. Кристен деп атту сыйын мынайып куучындаган: «Мен пионер болуп иштегем ле ижимде де кӧп иш болгон, оныҥ учун мен јаантайын божобой туратам. Бир аксагал мыны кӧрӱп, бу ончо ишти канайып эдип тургаҥ деп, јилбиркеп сураган. Бу мениҥ јӱрегиме тыҥ тийген». Аксагалдар эје-сыйындарла куучындажарга ӧйди јаантайын табып турза, аксагалдар олорды кичееп турган деп, эје-сыйындар оҥдоп јат. Аннетт сыйын аксагалдарла јаантайын куучындажып  турганынаҥ кандый туза алып турганын куучындайт: «Мен олорды јакшы билип аладым, а олор мени. Оныҥ учун менле не-не боло берзе, меге олордоҥ болуш сураарга јеҥил болот» *.

10. Эје-сыйындарды не сӱӱндирет?

¹⁰ Бистиҥ ончобыска — ака-карындаштарга да, эје-сыйындарга да — улус бистиҥ та нени де јакшы эдип билеристи ајаруга алып, эткен ижисти баалап турза, јарап јат. Је бистиҥ јайалталарыска ла ижиске кем де ајару этпей турза, кунуга бередис. Кижиге барбаган Абигейл деп сыйынга кезикте ого кем де ајару этпей турган деп билдирет. Ол айдат: «Ака-эјелердеҥ мен јӱк ле мындый сӧстӧр угадым: „Сен ол аканыҥ сыйыны ба?“, „Ол улустыҥ кызы эдиҥ бе?“, а мени бойымды керекке албай јат». Је эмди кижиге барбаган Пэм деп атту эјениҥ теми. Ол кӧп јылдардыҥ туркунына миссионер болуп иштеген. Је оноҥ ада-энезин кичеерге, кайра јанып келген. Эмди ол 70 јаштаҥ ажа да берген болзо, пионер болуп иштейт. Пэм айдат: «Улустыҥ ижимди баалап турган деп айткан сӧстӧри меге јаан сӱӱнчи экелет».

11. Иисус ого болужып јӱрген ӱй улустыҥ ижин баалап турган деп канайып кӧргӱскен?

¹¹ Иисус оныла «бары-јогыла ӱлежип турган», Кудайдаҥ айап јӱрген ӱй улустыҥ болужын баалаган (Лука 8:1—3). Бу ӱй улуска Иисуска иштейтен арганаҥ ӧскӧ, тереҥ кӧгӱс чындыктарды билип алатан арга ачылган. Темдектезе, Иисус олорго божоп каларын ла тирилерин айткан (Лука 24:5—8). Ол бу ӱй улусты апостолдорды ла чылап, болотон ченелтелерге белетеген (Марк 9:30—32; 10:32—34). Темдектезе, Иисусты айдуга апарган кийнинде, апостолдоры оны таштап, кача бергендер. А бу ӱй улустыҥ кезиги Иисус керӱ агашта божоп јадарда, оныҥ јанында болгон (Матф. 26:56; Марк 15:40, 41).

12. Иисус ӱй улуска кандый јакылталар берип туратан?

¹² Иисус ӱй улуска јаан учурлу јакылталар берип туратан. Темдектезе, тирилген Иисусты шак ла ӱй улус озо кӧргӧн. Иисус олорго оныҥ тирилгени керегинде апостолдорго куучындазын деп јакару берген (Матф. 28:5, 9, 10). Б. э. 33 јылыныҥ Беженинчи кӱнинде агару тын урулган христиандардыҥ ортозында ӱй улус та болгон болор. Андый болордо, майлаткан ол эје-сыйындар «Кудайдыҥ улу керектери» керегинде башка-башка тилдерге куучындайтан кайкамчылу арга алган (Ап. ижи 1:14; 2:2—4, 11).

13. Бӱгӱнги кӱнде эје-сыйындар кандый иштер эдедилер? Бис олордыҥ ижин баалап турганыс деп канайып кӧргӱзерис?

¹³ Бистиҥ эје-сыйындарды Иеговага иштееринде эдип турган ончо ижи учун мактап јадыс. Олор туралар тударында ла олорды јазаарында туружат, ар-бӱткенниҥ тӱбеги болзо болужып јат, башка тилдерге куучындап турган бӧлӱктерге болужат, бистиҥ бичиктерди кӧчӱрип јат, бойыныҥ кӱӱниле Бет-Элде иштейдилер, анайда ок миссионерлер ле пионерлер болодылар. Акалар ла чылап, эје-сыйындар Пионер иштиҥ сургалында, Каандыктыҥ јарчыларыныҥ сургалында ла Галаад сургалда ӱренедилер. Анайда ок ӱйлери ӧбӧӧндӧрине Иегованыҥ организациязында ла јуунда берилген молјуларын бӱдӱрер аргалу болзын деп, јӧмӧжип јадылар. «Сый эдип берилген», (ЈТ) бу акалар ӱйлериниҥ болужы јогынаҥ молјуларын јакшы бӱдӱрип албас эди (Еф. 4:8). Сананып кӧрзӧӧр дӧ: слер мындый иштеҥкей эје-сыйындарга канайып болужар эдеер?

14. Сарын 68:11-деги сӧстӧрди ајаруга алып, ойгор аксагалдар нени эдет?

 ¹⁴ Ойгор аксагалдар эје-сыйындарды албаданчак ишчилердиҥ «тӱмен черӱзи» ле сӱӱнчилӱ јарды кӧп сабада шак олор јарлап јат деп оҥдоп јадылар. (Сарын 68:11 кычырыгар *.) Оныҥ учун аксагалдар андый эје-сыйындардаҥ ӱренерге албаданып јат. Абигейл деп сыйыннаҥ акалар ченемелиле ӱлежип, ого улусла јакшы куучындажарга не болужып турганын јилбиркеп сурап јат. Бу Абигейлдиҥ кӱӱнин кӧдӱрет. Ол айдат: «Анайып Иегова меге бойыныҥ организациязында јаан учурлу иш берип салган деп, бӱдӱмјиленип јадым». Анайда ок аксагалдар чындык, кӧгӱзи тереҥ эјелерди кӱчтерге табартып турган сыйындарга јаан болужын јетирер аргалу деп билип јат (Тит. 2:3—5). Эйе, бис эје-сыйындарды сӱӱп јадыс ла олордыҥ ижи учун быйанду болодыс.

15. Эје-сыйындарга кандый айалгаларда бистиҥ болужыс керек болор?

¹⁵ Кезикте јеҥил эмес айалгада болуп калган эје-сыйындарга болужатан ла корулайтан улус керек болуп јат (Иса. 1:17). Темдектезе, ӧбӧӧни божоп калган эмезе айрылып калган эје-сыйынга ӧбӧӧни эдип туратан керектердиҥ аайы-бажына чыгарга болуш керек болордоҥ айабас. А јажы јаанап калган эјеге врачтарла куучындажарында болуш керек болор. Эмезе теократический иштерде туружып, пионерлер чылап кӧп јарлабай турган деп буруладып турган пионер эје-сыйынды корулаарга келижер болор. Мындый эје-сыйындарга канайып болужар? Иисустыҥ темин база катап кӧрӱп ийектер.

16. Марк 14:3—9-ла болзо, Иисус Марияныҥ адаанын канайып алган?

¹⁶ Эје-сыйындар керегинде улус јастыра сананып турза, олордыҥ адаанын Иисус тургуза ла алган. Темдектезе, Марфа Марияны бурулаарда, ол анайып ла эткен. База бир тушта улус Марияныҥ эткен керегин јастыра деп бодоп, оны арбангылап турарда, Иисус оныҥ адаанын алган. (Марк 14:3—9 кычырыгар.) Иисус Марияда јакшы кӱӱн-санаа болгон деп оҥдоп, оны мактап айткан: «Ол меге јакшы керек этти. [...] Ол эдер аргалузын этти». Ол керек дезе мындый судур сӧстӧр айткан: «Сӱӱнчилӱ Јар бӱткӱл телекейде, кайда ла јарлалза, оны эске алгылап, улус оныҥ эткени керегинде айдар». Бу јӧрмӧл бого кере болуп јат. Иисустыҥ бу айткан сӧстӧри Марияныҥ кӱӱн-санаазын сӱреен кӧдӱрген болор. Нениҥ учун дезе Иисус оныҥ акту јӱрегинеҥ эткен керегин телекейлик јарлаар ишле колбоп айткан!

17. Кандый учуралдарда эје-сыйындардыҥ адаанын алар керек? Тем куучындап беригер.

¹⁷ Эје-сыйындарга болуш керек болуп турза, слер олордыҥ адаанын аладаар ба? Мындый айалга болзын. Јуундагы кезик јарчылар Иеговага иштебей турган ӧбӧӧндӱ бир эјени туштажуга јаантайын оройтып, туштажуныҥ кийнинеҥ Каандыктыҥ Туразынаҥ тӱрген ле јӱре берип турганын кӧрӧт. Анайда ок ол балдарын да туштажуга каа-јаада ла кожо алат. Бу јарчылар эјени ӧбӧӧниле бир эмеш кату болгон болзо, ол балдарын туштажуларга божодып турар эди деп айдыжат. Је чынынча болзо, эје канча кире аргазы бар, оны эдип јат. Ол бастыра керектерин, ол тоодо балдарыла колбулу суракты ӧбӧӧниле јӧптӧшпӧй јадып, эдер аргазы јок. Слер эјениҥ адаанын канайып алар эдеер? Улустыҥ кӧзинче оны мактап туругар, ол керегинде, јаныгарда јок то болзо, јакшы сӧстӧр айдыгар. Анайып, ол керегинде улус јаман айтпай барар.

18. Эје-сыйындарга бис база канайып болужар аргалу?

 ¹⁸ Эје-сыйындарга база канайып болужарга јараар? Болужысты керектерле кӧргӱзерис (1 Иоанн 3:18). Аннетт деп сыйын мынайып айдат: «Кезик ака-эјелер мени керектеримди эдип алзын деп, оору энемле отурарга келгилейт эмезе курсак та экелет. Мынаҥ улам мени јуунда сӱӱп ле баалап јат деп сезедим». Джордан сыйын болуш учун база быйанду. Бир ака ого машинаны канайып кичеейтени јанынаҥ бир канча тузалу јӧптӧр берген. Ол айдат: «Ака-эјелердиҥ мениле јеткер болбозын деп, кичееп турганын билерге кандый јакшы!»

19. Аксагалдар эје-сыйындарга кандый болуш јетирер аргалу?

¹⁹ Аксагалдар эје-сыйындарга болужарга база албаданат. Эје-сыйындарды кичеезин деп, Иегованыҥ кӱӱнзеп турганын олор билер (Иак. 1:27). Олор Иисустаҥ тем алып, керсӱ болуп јат. Бу ака-карындаштар кандый бир айалгада ээжилер тургуспай, кижини оҥдоорго ло килеерге албадангылайт (Матф. 15:22—28). Аксагалдар эје-сыйындарга болужарга арга бедиреп турза, Иегова ла оныҥ организациязы олорды кичееп турган деп, эје-сыйындар сезип јат. Темдектезе, Киа сыйынныҥ иштеп турган бӧлӱгиниҥ кӧрӧӧчизи Кианы кӧчӱп јаткан деп угала, тургуза ла болуш јетирген. «Бу меге јаан стресске кирбеске болушкан — деп, Киа эске алат.— Аксагалдардыҥ јакшы сӧстӧри ле олордыҥ болужы мен јуунга керектӱ ле кӱч ӧйдӧ јаҥыскан артпазым деп, мени бӱдӱмјилеген».

20, 21. Бис ончо эје-сыйындарысты баалап турганысты канайып кӧргӱзерис?

²⁰ Бистиҥ јуундарда улуска кӧпти эдип турган эје-сыйындардыҥ тоозы сӱреен кӧп! Оныҥ учун бис олорго болужарыс. Је мыны эдерге биске Иисустаҥ тем алар керек: эје-сыйындарды јакшы билип аларга, олорло ӧй ӧткӱрерис; јарлаар ижи учун быйанду болорыс; керек тушта олорды корулаарыс!

²¹ Апостол Павел Римдегилерге деп самаразыныҥ учында тогус христиан ӱй кижиниҥ ады-јолын айдып салган (Рим. 16:1, 3, 6, 12, 13, 15). Павелдиҥ мактап айткан, уткуул сӧстӧри бу ӱй улустыҥ кӱӱнин алаҥзу јогынаҥ кӧдӱрген болор. Оныҥ учун бис те јуунныҥ ончо эје-сыйындарына болужып јӱректер. Анайып бис олорды кӧгӱс билегистиҥ улузы деп, баалап ла сӱӱп турганысты кӧргӱзерис.