1. Тураны тудардаҥ озо, нени эдер керек?

БИР кижи тура тударга сананган болзын. Ол кандый тура тударга турганын јакшы билер де болзо, капшай ла тура тударга, материалдар алып барар ба? Јок. Тура тудардаҥ озо, бир јаан учурлу сурактыҥ аайына — јаҥы тура тударга канча кире акча керек болорына — чыгып алар керек. Нениҥ учун дезе бу јогынаҥ, канча кире акча керек болорын билип болбозыҥ. Айдарда, чыгымды озодоҥ чоттоп алзаҥ, тураны учына јетире тудуп аларыҥ.

2. Лука 14:27—30-ла болзо, чӧҥӱрилердеҥ озо нени јазап шӱӱп сананар керек?

² Слер Иегованы сӱӱп турганаардаҥ ла ого быйанду болгоноордоҥ улам чӧҥӱрилерге кӱӱнзейдигер бе? Эйе болзо, слерди тура тударга турган кижиге тӱҥдештирерге јараар. Нениҥ учун? Иисустыҥ сӧстӧрин кӧрӱп ийектер (Лука 14:27—30 кычырыгар). Иисус бу ӱлгерлерде оныҥ ӱренчиги кандый болор учурлу деп айдат. Иисустыҥ ӱренчиги болорго, «чыгым» эдерге — кӱчтерди чыдажып ӧдӧргӧ лӧ бойыстыҥ јаныстаҥ нени-нени артыргызарга — белен болор керек (Лука 9:23—26; 12:51—53). Оныҥ учун сууга чӧҥӱрилердеҥ озо, јазап шӱӱп сананып, ончо чыгымды чоттоп алар керек. Ол тушта Кудайга чӧҥӱрилген христиан болуп иштеерге, јакшы белетенип алараар.

3. Бу јӧрмӧлдӧ нени шӱӱжерис?

³ Јаан «чыгым» эткенис калас болуп калбас па? Јок, андый болор аргазы јок! Нениҥ учун дезе, чӧҥӱрилиш эмдиги де, келер де ӧйдӧ сӱрекей јаан аргалар ачат. Оныҥ учун чӧҥӱрилериле колбулу сурактардыҥ кезигин шӱӱжип ийектер. Бу  слерге јаан учурлу алтамга белетенип аларга болужар.

4. а) Учурланары ол не? б) Матфей 16:24-тӧ «бойынаҥ бойы мойно[гоны]» нени темдектеп јат?

⁴ Учурланары ол не? Чӧҥӱрилердеҥ озо, Кудайга учурланар керек. Иеговага учурланары — Кудайга акту јӱректеҥ јажын-чакка иштеерге, сӧзин берип мӱргӱгени. Кудайга учурланган кийнинде слер бойыгардаҥ «мойноп» јадыгар. (Матфей 16:24 кычырыгар.) Бу ӧйдӧҥ ала слердиҥ јӱрӱмигерле Иегова башкарып јат. Бу сӱрекей јаан кӱндӱ (Рим. 14:8). Анайда ок слер бойыгардыҥ кӱӱнигерди эмес, је Кудайдыҥ кӱӱнин баштапкы јерге јаантайын тургузадыгар. Мындый шӱӱлтеге слер бойоор келип јадыгар. Иегова кемди де албадабай јат. Оныҥ учун слер берген сӧзигерди бӱдӱреригер деп, Иегова сакыыр аргалу (Сар. 116:12, 14).

5. Учурланарында чӧҥӱрилериле кандый колбу бар?

⁵ Учурланарында чӧҥӱрилериле кандый колбу бар? Кудайга учурланары — јӱк ле слердиҥ ле Иегованыҥ ортодо болуп турган јажытту куучын. А сууга чӧҥӱрилери дезе, улус алдына ӧткӱрилип јат. Ол кӧп сабада курултайдыҥ ӧйинде ӧдӧт. Сууга чӧҥурилгенеерле слер Иеговага учурланганаарды улуска кӧргӱзип јадыгар *. Анайда ок Иегова Кудайыгарды «бастыра јӱрегеерле, бастыра јулагарла [«бойыгарла», ЈТ], бастыра санаагарла, бастыра кӱчигерле» сӱӱп турганаарды ла ого ӱргӱлјиге иштеерге шӱӱп алганаарды кӧргӱзедигер (Марк 12:30).

6, 7. 1 Петр 3:21-ле болзо, кандый эки шылтактаҥ улам чӧҥӱрилер керек?

⁶ Чын ла чӧҥӱрилер керек пе? Мындый сӧстӧрди кӧрӱп ийектер. (1 Петр 3:21, ЈТ кычырыгар *.) Канайып ковчег Нойдыҥ Кудайга бӱдӱп турганын кӧргӱскен, анайып ла сууга чӧҥӱрилгенеер Иеговага учурланып салганаарды кӧргӱзет. Је чын ла чӧҥӱрилер керек пе? Эйе. Апостол Петрдыҥ јартаганыла, баштапкызында, чӧҥӱрилиш слерди аргадап јат. Кижи Иисуска — Христос ол учун јӱрӱмин берип, теҥеридеги јӱрӱмге тирилгенине ле эмди «Кудайдыҥ оҥ јанында јӱрет» деп бӱдӱп турганын керектериле кӧргӱзип турган болзо, чӧҥӱрилгени оны аргадап јат (1 Петр 3:22).

⁷ Экинчизинде, чӧҥӱрилген кижи «ару уйатту» болор аргалу. Бис Кудайга учурланып, сууга чӧҥӱрилзеес, бисте Кудайла аҥылу колбулар башталат. Кудай бистиҥ акту јӱрегистеҥ кинчегисти алынып турганысты ла Христостыҥ толынты тайылгазына бӱдӱп турганысты кӧрӱп, кинчектеристи таштап јат. Анайып, бистиҥ уйадыс ару болуп калат.

8. Чӧҥӱрилерге слерди не кӱӱнзедер учурлу?

⁸ Чӧҥӱрилерге слерди не кӱӱнзедер учурлу? Агару Бичикти лаптап ӱренип, слер Иегова керегинде кӧп билгирлер алганаар — оныҥ кылык-јаҥын ла башка-башка учуралдарда нени эдип турганын. Бу билгирлер слердиҥ јӱрегерди томултып баштаарда, слер Иегованы тыҥ сӱӱп баштаганаар. Айдарда, чӧҥӱрилерге, озо ло баштап Иегова Кудайды сӱӱп турганаар кӱӱнзедер учурлу.

9. Матфей 28:19, 20-деги Аданыҥ, Уулыныҥ ла Агару Тынныҥ адыла сууга чӧҥӱрилери дегени нени темдектейт?

⁹ Анайда ок чӧҥӱрилерге турган кижи Агару Бичиктиҥ чындыктарына бӱдӱп турар учурлу. Темдектезе, Иисус ӱренчиктер белетезин деп јакылта берген. (Матфей 28:19, 20 кычырыгар.) Иисустыҥ айтканыла бол зо, јаҥы ӱренчиктер «Аданыҥ, Уулыныҥ ла Агару Тынныҥ адыла» сууга чӧҥӱрилер учурлу. Бу сӧстӧр нени темдектейт? Бу дезе, слер Агару Бичиктеги Иегова керегинде, оныҥ Уулы Иисус ла агару тын керегинде чындыкка бастыра јӱрегердеҥ бӱдер учурлу дегенин темдектейт. Мындый чындыктар сӱрекей јаан ийделӱ, олор слердиҥ јӱрегерди томултар аргалу (Евр. 4:12). Олорды эске алынып ийектер.

10, 11. Ада керегинде слер кандый чындыктар билип алганаар?

¹⁰ Агару Бичикти ӱренип, слер Ада керегинде мындый чындыктар билип алганаар: оныҥ ады — Иегова, ол «јердиҥ ӱстинде јаҥыс... Эҥ Бийик Кудай» ла сок јаҥыс чындык Кудай (Сар. 83:18; Иса. 37:16). Ол — Јайаачы, «аргаданыш — Иегованаҥ» (Сар. 3:8; 36:9). Ол биске кинчектеҥ ле ӧлӱмнеҥ айрылатан арга берген ле ӱргӱлјиге јӱретен ижемји сыйлаган (Иоанн 17:3). Анайда ок слер Иеговага учурланып, чӧҥӱрилзеер, Иегованыҥ Керечили болуп каладаар (Иса. 43:10—12). Анайып слер Иегованыҥ ишчилериниҥ телекейлик билезине кожулып јадыгар. Бу биле Иегованыҥ адыла аданып турганыла оморкоп, оныҥ адын улуска куучындайт (Сар. 86:12).

¹¹ Ада керегинде мындый чындыктарды билери — сӱрекей јаан кӱндӱ! Слер бу баалу чындыктарга бӱдӱп турзагар, јӱрегер слерди Иеговага учурланарга ла чӧҥӱрилерге кӱӱнзедер.

12, 13. Кудайдыҥ Уулы керегинде слер кандый чындыктар билип алганаар?

¹² Кудайдыҥ Уулы керегинде тӧмӧнги чындыктарды билип алала, слерде кандый сезимдер болгон? Темдектезе, бастыра Јер-телекейдиҥ ӱстинде Иисустаҥ бийик јайаан јок. Оноҥ јӱк ле Иегова бийик. Анайда ок Иисус бис учун бойыныҥ јӱрӱмин толынты эдип берген. Бу толынтыга бӱдӱп турганысты керектерисле кӧргӱзип турзаас, кинчектерис ташталар, Кудайла најылажарыс, анайда ок ӱргӱлји јӱрӱм аларыс (Иоанн 3:16). Иисус — Улу абыс. Ол бисти, толынтынаҥ улам берилип турган алкыштарды алып, Кудайдыҥ најызы болуп калзын деп кӱӱнзейт (Евр. 4:15; 7:24, 25). Бого коштой, Иисус — Кудайдыҥ Каандыгыныҥ Кааны. Иегова јӱк ле бу Каанныҥ болужыла бойыныҥ адын агарулаар, јаманды јоголтор, јердеги райды орныктырар ла улуска ӱргӱлји јӱрӱм сыйлаар (Матф. 6:9, 10; Ачыл. 11:15). Иисус — биске толо кемдӱ тем (1 Петр 2:21). Ол Кудайдыҥ табын бойын килебей бӱдӱрериниҥ темин кӧргӱскен (Иоанн 4:34).

¹³ Иисус керегинде библиялык чындыктарга бӱдӱп турзаар, слер Кудайдыҥ Уулын сӱӱп баштайдыгар. Бу сӱӱш слерди Кудайдыҥ табын Иисус ла чылап бӱдӱрерге кӱӱнзедет. Анайып, слер Иеговага учурланарга ла сууга чӧҥӱрилерге кӱӱнзей бередигер.

14, 15. Агару тын керегинде слер кандый чындыктар билип алганаар?

¹⁴ Агару тын керегинде тӧмӧнги чындыктарды билип алала, нени сескенеер? Агару тын — тирӱ неме эмес, је Кудайдыҥ ийде-кӱчи. Иегова бойыныҥ Сӧзин агару тынныҥ болужыла бичиткен, бу ла тын биске Агару Бичиктеҥ кычырганысты оҥдоорго ло тузаланарга болужат (Иоанн 14:26; 2 Петр 1:21). Анайда ок Иегова агару тыны ажыра биске «артыкташкан кӱч» берет (2 Кор. 4:7). Бу тын сӱӱнчилӱ јарды јарлаарга, ченелтелерле тартыжарга, кунукпаска ла кӱчтерди ӧдӧргӧ болужат. Бого ло коштой, агару тынныҥ тӱжӱмине кирип турган јакшы кылык-јаҥдарга ӱренип аларга болужат (Гал. 5:22). Иегова бу тынды, Кудайга бӱдӱп турган ла акту јӱрегинеҥ Оноҥ агару тын сурап турган улуска кысканбазынаҥ берет (Лука 11:13).

¹⁵ Иегова бойыныҥ ишчилерине агару ишти оноҥ ло ары бӱдӱрерге, агару тынын берип јат деп билерге, кандый јакшы! Агару  тын керегинде бу чындыктарга бӱдӱп турзагар, слер Иеговага учурланып, сууга чӧҥӱрилерге кӱӱнзеп баштайдыгар.

16. Бу јӧрмӧлдӧ бис нени шӱӱштис?

¹⁶ Кудайга јӱрӱмисти учурлаары ла сууга чӧҥӱрилери — јаан учурлу алтам. Ӧрӧги билип алганыстаҥ, биске «чыгым» эдерге — кӱчтерди чыдажып ӧдӧргӧ лӧ бойыстыҥ јаныстаҥ нени-нени артыргызарга — белен болор керек. Бу алтамга болуп эткен чыгым, бир де калас болбос. Чӧҥӱрилери слерге аргаданатан ла Кудайдыҥ алдында ару уйатту болотон арга берет. Чӧҥӱрилерге, озо ло баштап Иегова Кудайды сӱӱп турганаар кӱӱнзедер учурлу. Анайда ок слерге Ада керегинде, Уулы ла агару тын керегинде чындыктарга акту јӱректеҥ бӱдер керек. Эмди, мынайып шӱӱп сананган кийнинеҥ, слер бойыгарды сууга чӧҥӱрилерге белен деп айдып болороор бо?

17. Чӧҥӱрилердеҥ озо кандый алтамдар эдер керек?

¹⁷ Слер бойыгарды чӧҥӱрилерге белен деп сананып турган болзогор, Иеговага јууктаарга кӧп алтамдар эткен эмейигер *. Озо ло баштап слер Агару Бичикти лаптап ӱренгенеердеҥ улам, Иегова ла Иисус керегинде кӧп билгирлер алганаар. Анайып, Кудайга бӱдӱп баштаганаар (Евр. 11:6). Бого коштой Агару Бичиктеги Иегованыҥ сӧстӧрине алаҥзыбай бӱдерге јараар деп ле Христостыҥ толынты тайылгазына бӱдери слерди кинчектеҥ ле ӧлӱмнеҥ аргадап алар аргалу деп бӱдӱмјиленип алганаар. Анайда ок кинчегерди алынганаар, ӧскӧртӧ айтса Иегованы, јаманыгарды таштазын деп, акту јӱрегердеҥ сураганаар. Мыныҥ кийнинеҥ Кудайга баштанганаар (обратились), ӧскӧртӧ айтса бойыгардыҥ јӱрӱмигерди бӱткӱлинче солып, Кудайдыҥ нормаларыла јӱрӱп баштадыгар (Ап. ижи 3:19). Слер бойыгардыҥ бӱдӱмјигерди улуска куучындаарга кӱӱнзей бергенеер. Анайып, сууга чӧҥӱрилбеген јарчы болуп алала, јуунла кожо јарлап баштаганаар (Матф. 24:14). Иегова слердиҥ мындый алтамдараарла тыҥ оморкоп јат! Слер Кудайдыҥ јӱрегин тыҥ сӱӱндирип јадыгар (Укаа 27:11).

18. Чӧҥӱрилердеҥ озо база кандый алтамдар эдер керек?

¹⁸ Чӧҥӱрилердеҥ озо база да алтамдар эдер керек. Ӧрӧги айдылганыла, слерге Кудайга учурланар керек. Јаҥыскан тужыгарда, эмди слер Кудайдыҥ табын бӱдӱререер деп, акту јӱректеҥ сӧзигерди берип, мӱргӱгер (1 Петр 4:2). Оноҥ чӧҥӱрилерге турганаарды, аксагалдардыҥ јӧбиниҥ координаторына айдып ийзегер, аксагалдар слерле туштажып, Агару Бичиктиҥ тӧс ӱредӱлериле шӱӱжӱ ӧткӱрер. Олорло куучындажарга коркыбагар деп, сурап турубыс. Слер бу јалакай акаларла таныш, олор слерди сӱӱп јат. Олор слерди учурланарыныҥ ла чӧҥӱрилериниҥ јаан учурын оҥдоп турганаар деп, билип аларга кӱӱнзейт. Аксагалдар слерди чӧҥӱрилерге  белен деп јӧп чыгарза, слер келер курултайда чӧҥӱрилер аргалу деп айдып салар.

19, 20. Чӧҥӱрилген кийнинеҥ нени эдер керек ле бого не кирет?

¹⁹ Чӧҥӱрилген кийнинеҥ нени эдер керек? * Ӧрӧги кӧргӧнисле, учурланары — Кудайга акту јӱректеҥ јажын-чакка иштеерге, сӧзин берип мӱргӱгени. Оныҥ учун Иегова слерди берген сӧзигерди бӱдӱреригер деп сакып јат. Айдарда, чӧҥӱрилген кийнинеҥ слерге учурланганаар аайынча јӱрер керек. Бого не кирет?

²⁰ Јуундагы ака-эјелерле јуук колбулараарды кичеегер. Чӧҥӱрилген кийнинеҥ, слер телекейлик карындаштыкка кожулып јадыгар (1 Петр 2:17). Эмди олор слердиҥ кӧгӱс биле. Слер јуунныҥ туштажуларын божотпой турзагар, ака-эјелерле најылыгарды тыҥыдадыгар. Кудайдыҥ Сӧзин кажы ла кӱн кычырыгар ла шӱӱп сананыгар (Сар. 1:1, 2). Агару Бичиктиҥ ӱзӱгин кычырып, оны тереҥ шӱӱп сананарга, ӧй табып туругар. Ол тушта Агару Бичиктиҥ шӱӱлтелери слердиҥ јӱрегерди томултар. Иеговага јаантайын мӱргӱгер (Матф. 26:41). Анайып, акту јӱректеҥ мӱргӱгенеер слерди Иеговага јууктадар. Анайда ок «элдеҥ озо Оныҥ Каандыгын» бедирегер (Матф. 6:33). Оныҥ учун јарлаар иш слердиҥ јӱрӱмигерде эҥ учурлу керектердиҥ тоозына кирзин. Јаантайын јарлап турзагар, слер бӱдӱмјигерди тыҥыдадыгар ла улуска ӱргӱлји јӱрӱмге апарып турган јолго туруп аларга болужадаар (1 Тим. 4:16).

21. Сууга чӧҥӱрилери кандый арга ачат?

²¹ Јӱрӱмде, Иеговага учурланарынаҥ ла сууга чӧҥӱрилеринеҥ јаан алтам јок! Бу алтамды эдерге, бойыстыҥ јаныстаҥ чыгым эдер керек. Је бу алтам калас болуп калбас па? Јок, андый болор аргазы јок! Бу телекейдиҥ кандый ла кӱчтери «кыска ӧйгӧ» лӧ «јеҥил» болот (2 Кор. 4:17). Бого кӧрӧ, сууга чӧҥӱрилери эмди де ырысту јӱрерге ле келер ӧйдӧ «ӱргӱлји јӱрӱм» алатан арга ачат (1 Тим. 6:19). Оныҥ учун, сурап турубыс, мӱргӱӱлде бу суракты лаптап сананып кӧрӱгер: «Мен сууга чӧҥӱрилерге белен бе?»