1. Иисус Иегованы ӱренчиктерди корулазын деп, нениҥ учун сураган?

ИИСУС божоор алдында тӱнде ӱренчиктеринде кандый кӱчтер болорын сананган. Ол бойыныҥ ӱренчиктерин тыҥ сӱӱген, оныҥ учун Иегованы олорды «јаманнаҥ корула[зын]» деп сурап јат (Иоанн 17:14, 15). Иисус тирилеле теҥеридӧӧн јӱрӱп калза, Сатана Дьявол Иеговага иштеерге турган улуска удурлажар деп билген. Оныҥ да учун Иегованыҥ ишчилерине кору керек болгон.

2. Иегова бистиҥ мӱргӱӱлдериске каруу берер деп, нениҥ учун алаҥзыбай јадыс?

² Иегова Уулын сӱӱп јат, оныҥ да учун оныҥ мӱргӱӱлине каруу берген. Бис те Иеговага јараар керектер эдип турзаас, ол бисти корулаар ла болужар. Иегова бойыныҥ балдарын сӱӱп јат, ол бисти кору јогынаҥ бир де артыргыспас. Иегова бистерди оноҥ ло ары кичеер. Кудай бисти кичеебезе, оныҥ ады јабарлалар эди.

3. Биске нениҥ учун Иегованыҥ корузы керек?

³ Биске Иегованыҥ корузы алдындагызына кӧрӧ оноҥ тыҥ керек болуп јат. Нениҥ учун дезе Сатана теҥеридеҥ ташталып, «тыҥ атыйланып калган» (Ачыл. 12:12). Мынаҥ улам кезик улус «Кудайга јарамык эд[едис]» деп сананып, бисти истежип јадылар (Иоанн 16:2). Је кезик улус дезе бисти бу телекейдиҥ кӧрӱмине келишпей турган дейле истежип јат. Бу истежӱлердиҥ шылтагы кандый да болзо, бис коркыбай јадыс, нениҥ учун дезе Агару Бичикте мынайып айдылган: «Кайракан чындык, ол слерди тыҥыдып, јаманнаҥ  чеберлеер» (2 Фес. 3:3). Је эмди Иегова бисти канайып корулап турганын кӧрӱп ийектер.

4. Ефестегилерге 6:13—17-ле болзо, Иегова бисти корулаарга нени берген?

⁴ Иегова бистерди Сатананаҥ корулаарга кӧгӱс јепселдер берген. (Ефестегилерге 6:13—17 кычырыгар.) Бу јепселдер бисти сӱреен јакшы корулаар аргалу. Иегова бисти јаантайын корулап турзын деп турган болзоос, биске бу јепселдердиҥ ончозын кийип алала, олорды бир де уштыбас керек. Бу јепселдердиҥ кажызын ла кӧрӱп ийектер.

5. Чындыктыҥ куры ол не, биске оны нениҥ учун кийер керек?

⁵ Чындыктыҥ куры — Агару Бичиктеги чындыктар. Биске бу курды нениҥ учун кийер керек? Нениҥ учун дезе Сатана «тӧгӱнниҥ адазы» (Иоанн 8:44). Ол дезе канча муҥ јылдардыҥ туркунына «бастыра телекейди мекел[ейт]» (Ачыл. 12:9). Биске оныҥ тӧгӱнине кирбеске чындыктыҥ курын уштыбас керек. Бис Иегова керегинде билгирлер алып турзаас, ого «тын ла чындыкла» бажырып турзаас, анайда ок тӧгӱндебей јӱрзеес, Сатананыҥ тӧгӱнине кирбезис (Иоанн 4:24; Еф. 4:25; Евр. 13:18).

6. Чындыктыҥ кӧӧ куйагы ол не, биске оны нениҥ учун кийер керек?

⁶ Чындыктыҥ кӧӧ куйагы — Иегованыҥ чындык нормалары. Биске чындыктыҥ кӧӧ куйагын нениҥ учун кийер керек? Канайып бу јепсел јуучылдыҥ јӱрегин корулап јат, анайып ла Иегованыҥ чындык нормалары сӱрлеп айдылган јӱрегисти, ол эмезе ичисте кандый кижи болгонысты корулайт (Укаа 4:23). Иегова бисти ого акту јӱрегистеҥ иштезин деп кӱӱнзейт (Матф. 22:36, 37). Сатана дезе бистиҥ јӱрегисти экилендирип саларга албаданат. Ӧскӧртӧ айтса, ол бисти Иегованыҥ айтканын бӱдӱрбей, бу телекейди сӱӱзин деп кӱӱнзейт (Иак. 4:4; 1 Иоанн 2:15, 16). Је неме болбой турза, ол бисти Кудайдыҥ нормаларын бузып ийзин деп, темдектезе, истежӱлер ажыра коркыдып јат.

7. Чындыктыҥ кӧӧ куйагын кийип алары нени темдектейт?

⁷ Иегованыҥ тургузып салган нормаларыла јӱрӱп турзаас, чындыктыҥ кӧӧ куйагын кийип алган болодыс (Сар. 97:10). Кезик улус дезе Кудайдыҥ нормаларын уур јӱк дежип, оны бӱдӱрбей барат. Је бу дезе јуу ӧйинде јуучыл кижиниҥ кӧӧ куйагын уурзынып, уштып ийгенине тӱҥей болот. Кандый коркынчылу дезеер! Мынайып јуучыл кижи јӱрӱмин јылыйтып салар эди. Је Кудайды сӱӱп тургандарга Кудайдыҥ јасактары бир де уур эмес. Карын бу јасактар јӱрӱм берет эмей (1 Иоанн 5:3).

8. Амыр керегинде Сӱӱнчилӱ јар јарлаарга ӧдӱк кийип алары нени темдектейт?

⁸ Анайда ок бистерге амыр керегинде Сӱӱнчилӱ јар јарлаарга ӧдӱк кийип алар керек. Ӧскӧртӧ айтса, улуска Кудайдыҥ Каандыгы керегинде куучындаарга јаантайын белен болор керек. Јаантайын јарлап турзаас, бистиҥ бӱдӱмјибис бек болор. Иегованыҥ Керечилери дезе бастыра јер телекейде Кудайдыҥ Каандыгы керегинде куучындаарга кандый ла аргалар тузаланып јадылар. Темдектезе олор иште, школдо, тӧрӧӧндӧрине, кӧп улусту јерлерде, анайда ок бойыныҥ керектерин эдип јӱреле јарлап јадылар. Анайда ок олор айылдар сайын јарлап јат, керек дезе айылдаҥ чыгар арга јок то болзо, кӧрӱш-таныштарына  куучындап јат. Ака эјелердиҥ мынайып јарлап турганын кӧрӧргӧ кандый сӱӱнчилӱ! Је бис коркыйла јарлабай барзаас, јууныҥ ӧйинде ӧдӱгин уштып ийген јуучылга тӱҥей болодыс. Андый јуучыл будын шыркаладып алза, ӧштӱзине капшай јеҥдиртип алар ла башчызыныҥ берген јакаруларын бӱдӱрип болбос.

9. Бӱдериниҥ јаан куйагы биске нениҥ учун керек?

⁹ Бӱдӱмјиниҥ јаан куйагы — Иеговага ла оныҥ берген сӧзине бӱдери. Мындый куйакла бис «јаманныҥ кызыган ончо согоондорын ӧчӱрип» јадыбыс. Бу јаан куйак биске нениҥ учун керек болот? Ол јогынаҥ бис јана баскандардыҥ тӧгӱнине кирип калардаҥ айабазыс. Эмезе улус бисти јамандап, каткырыжып турза, уйалып эби јоксынар болорыс. Ол эмезе улуска јараарга болуп, Кудайдыҥ нормаларын бузып ийердеҥ айабазыс. Анайда ок бӱдериниҥ јаан куйагын школдо эмезе иште јаантайын тузаланып јадыбыс (1 Петр 3:15). Кезикте бистиҥ кӧгӱс керектериске каршу јетиргедий кӧп акчалу иш берилерге турза, база ла бу куйак керек болуп јат (Евр. 13:5, 6). Бого коштой ол бисти удурлажулардыҥ да ӧйинде корулап јат (1 Фес. 2:2).

10. Аргаданыштыҥ јуучыл бӧрӱги ол не ле биске оны нениҥ учун кийер керек?

 ¹⁰ Аргаданыштыҥ јуучыл бӧрӱги — Иегованыҥ берген ижемјизи. Иегова оныҥ табын бӱдӱрип турган улусты кайралдаар ла олор божоп то калза, тиргизип алар деп иженип јадыбыс (1 Фес. 5:8; 1 Тим. 4:10; Титке 1:1, 2). Канайып јуучылдыҥ бӧрӱги оныҥ бажын корулаган, анайып ла ижемји бистиҥ санааларысты корулап јат. Канайып? Ижемји биске Иегованыҥ берген сӧзин ундыбай јӱрерге ле кӱчтерге чын кӧрӱмдӱ болорго болужат. Бистиҥ кӧрӱмис Иегованыҥ кӧрӱмине тӱҥей болуп турза, бисти бу бӧрӱкти кийип алганыс деп айдарга јараар. Је темдектезе, бис Иеговага иженердиҥ ордына «чындык эмес байлыкка» иженип турзаас, ол бӧрӱкти уштып салганыска тӱҥей болот (Сар. 26:2; 104:34; 1 Тим. 6:17).

11. Тынныҥ кылыжы ол не? Биске оны нениҥ учун тузаланар керек?

¹¹ Тынныҥ кылыжы — Агару Бичик. Бу кылышла јакшыны јаманнаҥ ылгаштырадыс, анайда ок улуска тӧгӱн ӱредӱлердеҥ ле јаман кылык-јаҥнаҥ јайымдаларга болужадыс (2 Кор. 10:4, 5; 2 Тим. 3:16, 17; Евр. 4:12). Бис Агару Бичикти ӱрензеес, Кудайдыҥ берип турган башкартуларын тузаланзаас, бу кылышла чын тузаланарга ӱренедис (2 Тим. 2:15). Је Иегова бисти бу кӧгӱс јепселдердеҥ башка ӧскӧ дӧ аргала корулайт.

12. Биске база кандый болуш керек, нениҥ учун?

¹² Ченемелдӱ јуучыл јаан черӱле качан да јаҥыскан јуулашпас. Анайда ла ок бис Сатанага ла оныҥ черӱзине качан да јаҥыскан удура туруп болбозыс. Оныҥ учун бисте јаан черӱдий ака-эјелер бар (1 Петр 2:17).

13. Еврейлерге 10:24, 25-ле болзо, јуунныҥ туштажуларынаҥ кандый туза аладыс?

¹³ Ака-эјелердиҥ болужын јуунныҥ туштажуларында аладыс. (Еврейлерге 10:24, 25 кычырыгар.) Кезикте бис кунугып, арып, чылап каладыс. Андый ӧйдӧ јуунныҥ туштажулары биске ийде-кӱч берет. Темдектезе, ака-эјелердиҥ акту кӱӱнинеҥ берген јартамалдары кӱӱнисти кӧдӱрет. Анайда ок куучын-эрмектер, ака-эјелердиҥ јакылталары Иеговага оноҥ ло ары иштейтен кӱӱнисти тыҥыдат. Бого коштой туштажунаҥ озо эмезе туштажуныҥ кийнинде ака-эјелерле куучындажып, сӱӱнчи аладыс (1 Фес. 5:14; Ап. ижи 20:35; Рим. 1:11, 12). Јууныҥ туштажулары биске ӧскӧ дӧ јанынаҥ тузалу. Темдектезе, ондо бис јарлаар иштиҥ темигӱлерин тыҥыдарга ӱренедис. Бу биске јарлаар иштиҥ јепселдериле эпчил тузаланарга болужат. Оныҥ учун јуунныҥ туштажуларына јазап белетенигер, программаны јакшы угугар. Анайда ок билип алганаарды тузаланып туругар. Анайып слер Иисус Христостыҥ «јакшы јуучылы» болуп каларыгар (2 Тим. 2:3).

14. Иегова бисти база канайып корулап јат?

¹⁴ Анайда ок Иегова бисти мириадтар тоолу ангелдер ажыра корулайт. Бир ле ангел бӱдӱн черӱни јоголтып ийип турарда, ангелдердиҥ черӱзи нени этпес? (Иса. 37:36). Иегованыҥ ийде-кӱчтӱ черӱзине кижи де, кӧрмӧстӧр дӧ, кем де удура чыгып болбос. Эҥ ле кӱчтӱ Иегова! Ол бисле кожо болордо, бисти кем јеҥип болотон!? (Јарг. 6:16). Слерди школдо, иште улус ол эмезе Иеговага бӱтпей турган тӧрӧӧндӧрӧӧр коркыдып турза, мыны бир де ундыбагар. Слер  Иегованыҥ нормаларыла јӱрӱп турганаар, оныҥ учун Иегова слерди качан да артыргыспас.

15. Исаия 54:15, 17-ле болзо, сӱӱнчилӱ јарды јарлаарын нениҥ учун кем де токтодып болбос?

¹⁵ Бу телекейдиҥ бисти кӧрӧр кӱӱни јок болгонына кайкабай јадыс. Олор бисти политикага киришпей турганыс ла колдорыска мылтык-јепсел албай турганыс учун кӧрӧр кӱӱндери јок. Анайда ок олор бисти Кудайдыҥ адын јарлап, јӱк ле Кудайдыҥ Каандыгы улуска амыр экелер деп јарлап турганыс учун, анайда ок Кудайдыҥ чындык нормаларыла јӱрӱп турганыс учун јаман кӧрӱп јадылар. Бого коштой Сатана ла оныҥ телекейи удабас јоголып калар деп куучындап јадыс. Бу телекейдиҥ башкараачызы тӧгӱнчи ле улус ӧлтӱреечи деп ачыгынча айдып јадыбыс (Иоанн 8:44). Сатананыҥ ийде-кӱчи јаан. Је ол канайып та албаданза, бистиҥ оозысты јабып болбос. Нениҥ учун дезе Иегованы мактаарга бис кандый ла аргала тузаланарыс. Сӱӱнчилӱ јаар бастыра телекейге угулып калар, нениҥ учун дезе Кудай бисти корулап јат. (Исаия 54:15, 17 кычырыгар.)

16. Иегова бисти улу тӱбектиҥ ӧйинде канайып корулаар?

¹⁶ Иегова бисти келер ӧйдӧ канайып корулаар? Ол бойыныҥ ишчилерин улу тӱбектиҥ ӧйинде болотон эки учуралда кайкамчылу эдип аргадап алар. Баштапкызында, Улу Вавилон, тӧгӱн кудай јаҥныҥ телекейлик империязы, јоголтылып јатса аргадаар (Ачыл. 17:16—18; 18:2, 4). Экинчизинде, Армагеддондо, Сатананыҥ арткан-калган системазы јоголтылып калза аргадаар (Ачыл. 7:9, 10; 16:14, 16).

17. Иеговала јуук колбуларлу болгоныстаҥ кандый туза аладыс?

¹⁷ Иеговала колбулараар бек болзо, Сатананыҥ слерге јетирип турган каршузынаҥ јажын-чакка шыралабазыгар. Карын ол бойы јажын-чакка јоголтылып калар (Рим. 16:20). Оныҥ учун Иегованыҥ берген кӧгӱс јепселдерин кийип, бир де уштыбагар! Ӧштӱле качан да јаҥыскан тартышпагар. Ака-эјелерге болужыгар. Мынайып эдип турзагар, теҥеридеги Иегова Адабыс слерге ийде-кӱч берер ле слерди корулап алар (Иса. 41:10).