1, 2. а) Кайраканныҥ Эҥирине миллиондор тоолу улус јуулышса, Иегова нени кӧрӱп јат? (Кадарындагы јурукты кӧрӱгер.) б) Бу јӧрмӧлдӧ нени шӱӱжерис?

БАСТЫРА јердиҥ ӱстинде миллиондор тоолу улус Христостыҥ ӧлӱмин эске алатан Эҥирге јуулат. Иегова олордыҥ кажызын ла кӧрӱп јат. Темдектезе, ол бу туштажуга кажы ла јыл келип турган улусты кӧрӱп јат. Олордыҥ кезиги тыҥ истежӱлерге табартат. А кем де јуунныҥ туштажуларына јаантайын јӱрбей турган да болзо, је Кайраканныҥ Эҥирин качан да божотпой јат. Бу туштажуга баштапкы ла катап соныркап келген улус та Иегованыҥ кӧзинеҥ туура калбай јат.

² Кайраканныҥ Эҥирине андый кӧп улус келип турган деп, Иегова сӱӱнип јат (Лука 22:19). Је Иеговага улустыҥ тоозына эмес, олордыҥ нени сананып келип турганына ајару эдет. Бу јӧрмӧлдӧ бис јаан учурлу сурак шӱӱжерис: бис кажы ла јыл ӧткӱрилип турган Кайраканныҥ Эҥирине, анайда ок Иегова сӱӱген улузын кичеерге берген неделе сайын болуп турган јуунныҥ туштажуларына нениҥ учун јӱредис?

3, 4. а) Бис нениҥ учун туштажуларга јӱредис? б) Туштажуларга јӱргенис нени кӧргӱзет? в) 1 Коринфтегилерге 11:23—26-ла болзо, биске нениҥ учун Кайраканныҥ Эҥирин божотпос керек?

³ Бис нениҥ учун јуунныҥ туштажуларына јӱредис? Нениҥ учун дезе јуундар Иеговага бажыратан аргалардыҥ тоозына кирет. Анайда ок јуундар ажыра Иегова бисти ӱредип јат. Бийиркек улус кемниҥ-кемниҥ ӱредӱзине багынарга кӱӱнзебей јат (3 Иоанн 9). Је олорго кӧрӧ, бис Иегованыҥ ла оныҥ организациязыныҥ ӱредӱзине сӱӱнип јадыс (Иса. 30:20; Иоанн 6:45).

 ⁴ Туштажуларга келгенисле јобош болгонысты ла ӱренерге белен болгонысты кӧргӱзип јадыс. Кайраканныҥ Эҥирине молјулу болгоныстаҥ улам эмес, је Иисустыҥ: «Мени эске алынып, анайда эдип јӱригер» — деген јакарузын јобош болуп бӱдӱрерге турганыстаҥ улам барып јадыс. (1 Коринфтегилерге 11:23—26 кычырыгар.) Бу аҥылу туштажу келер ӧйгӧ ижемјини јылыйтпаска ла Иегованыҥ изӱ сӱӱжин ундыбаска болужат. Је кӱӱнисти кӧдӱретен ле бӱдеристи тыҥыдатан туштажулар бир јылга бир ле катап болзо, ас болор деп, Кудай оҥдоп јат. Оныҥ учун ол неделе сайын болотон туштажулар эдип, бисти олорго јӱрзин деп кӱӱнзедип јат. Кудайдыҥ мындый јакарузын бӱдӱрерге, биске јобош болор керек. Не дезе, кажы ла неделеде туштажуларга белетенерге ле олорго барарга, ас эмес ӧй керек болот.

5. Иегованыҥ кычырузын нениҥ учун јобош улус алынат?

⁵ Иегова улусты оноҥ ӱрензин деп кычырып јат. Бу кычыруны кажы ла јыл кӧп јобош улус алынат (Иса. 50:4). Кайраканныҥ Эҥирине келген улуска туштажу сӱреен јарайт, оныҥ учун олор ӧскӧ дӧ туштажуларга келерге кӱӱнзей берет (Зах. 8:20—23). Бис те олорло кожо Болушчы ла Аргадаачы Иегова Кудайыстыҥ ӱредӱзин аларга сӱӱнип јадыбыс (Сар. 40:17). Иегованаҥ ла оныҥ сӱӱген Уулынаҥ, Иисустаҥ, ӱренетен арганаҥ тузалу ла јакшы арга бар эмеш пе? (Матф. 17:5; 18:20; 28:20).

6. Бир эр кижини јобош болгоны Кайраканныҥ Эҥирине келерге канайып кӱӱнзеткен?

⁶ Бис кажы ла јыл Кайраканныҥ Эҥирине канча ла кире кӧп улус кычырарга албаданадыс. Кӧп јобош улус бу кычыруны алынганын калас болгон деп сананбай јат. Бир учурал кӧрӱп ийектер. Канча да јыл кайра бир ака бир эр кижиге Кайраканныҥ Эҥирине кычырту берген. Ол оны алган да болзо, је келип болбозым деп айткан. Је соондо ака бу эр кижиниҥ Кайраканныҥ Эҥирине тӱҥей ле келгенин кӧрӱп, кайкаган! Эр кижини улустыҥ јылу уткыганы јӱрегин томулткан, оныҥ учун ол Каандыктыҥ Туразына кажы ла неделе келер болгон. Бир јылга ол јӱк ле ӱч туштажу божоткон. Бу кижи туштажуларды нениҥ учун андый тыҥ баалаган? Нениҥ учун дезе ол јобош болгонынаҥ улам керектерин келиштиреле, Кайраканныҥ Эҥирине келген. Бу эр кижини кычырган ака: «Ол сӱрекей јобош кижи» — деп айткан. Иегова бу эр кижини бойына кычырган, эмди ол чӧҥӱрилген христиан ака болот (2 Сам. 22:28; Иоанн 6:44).

7. Туштажуларга јӱргенистеҥ ле Агару Бичикти кычырганыстаҥ алган билгирлер јобош болорго канайып болужат?

⁷ Туштажуларга јӱргенистеҥ ле Агару Бичикти кычырганыстаҥ алган билгирлер, биске јобош болорго болужат. Кайраканныҥ Эҥиринеҥ озо, канча да неделениҥ туркунына јуунныҥ туштажуларында Иисустыҥ темине ле бис учун јӱрӱмин берип, јобожын кӧргӱскенине јаан ајару эдилет. А Кайраканныҥ Эҥиринеҥ канча да кӱн озо, бис Иисустыҥ ӧлӱми ле тирилгени керегинде библиялык ӱзӱктерди кычырарга албаданадыс. Бу ӱзе неме Христостыҥ тайылгазын оноҥ тыҥ баалаарга болужат. Јӱрегис быйанду болзо, бис Иисус чылап јобош болорго ло Иегованыҥ табын кӱч те болзо бӱдӱрерге кӱӱнзейдис (Лука 22:41, 42).

8. Иисустыҥ јалтанбазы недеҥ кӧрӱнген?

⁸ Анайда ок бис Иисус ла чылап јалтанбас болорго албаданадыс. Иисус јердеги калганчы кӱндеринде јалтанбай јӱргенин сананып ийзеер де. Иисус ӧштӱлери удабас оны  базынар, согор, учы-учында кере тартырып койор деп билген (Матф. 20:17—19). Је тӱҥей ле ӱзе бу уур-кӱчтерди ӧдӧргӧ белен болгон. Ӧй једип келерде, оныла кожо Гефсиман јерде болгон чындык ӱренчиктерине: «Туругар, баралы! Бат, Мени садып јатканы јууктап келди» — деп айткан (Матф. 26:36, 46). Је јуучыл јепселдерлӱ улус оны тудуп аларга келерде, ол јажынбай, олорго удура базып келеле, элчилерин божодып ийзин деп сураган (Иоанн 18:3—8). Ол кандый јалтанбас болгон! Бӱгӱнги кӱнде майлаткан христиандар ла ӧскӧ койлор Иисустый јалтанбас болорго албаданат. Канайып?

9. а) Јуунныҥ туштажуларына јаантайын јӱрерге бистердиҥ кезигиске нениҥ учун јалтанбас болор керек? б) Бӱдери учун тӱрмеде отурган ака-эјелерге бистиҥ темис кандый тузазын јетирет?

⁹ Јуундарга јаантайын јӱрӱп турарга, кезикте јалтанбас болор керек. Бистиҥ кезигис јуундарга тӱбек те болгон болзо, кунугып та турган болзо эмезе ооруп та турган болзо келип јат. Кезигиске јаҥдардыҥ эмезе билениҥ улузы удурлажып јат. Бистиҥ темис бӱдӱмјизи учун тӱрмеде отурган ака-эјелерге кандый тузазын јетирет деп сананып ийзегер (Евр. 13:3). Олор бисти кӱчтердеҥ коркыбай, Иеговага иштеп турганыс деп угуп турза, оноҥ ло ары бӱдерин тыҥыдарга, јалтанбас болорго ло Иеговага чындык артарга ийде-кӱч алынат. Мындый ла сезимдер элчи Павелде болгон. Ол Римде каруулда болордо, акалардыҥ Кудайга чындык иштеп турганын угуп, сӱӱнип туратан (Флп. 1:3—5, 12—14). Јайымдаларынаҥ бир эмеш озо эмезе јайымдалган ла кийнинде Павел еврейлерге самара бичиген. Бу самарада ол чындык еврей христиандарды: «Бой-бойыгарды карындаштарды чылап сӱӱгер» — деп кӱӱнзеткен. Анайда ок: «Јуундарыста јок болуп калбай туралы» — деп айткан (Евр. 10:24, 25; 13:1, ЈК 2003).

10, 11. а) Биске Кайраканныҥ Эҥирине кемдерди кычырар керек? б) Ефестегилерге 1:7-ле болзо, бис мыны нениҥ учун эдип јадыс?

¹⁰ Кайраканныҥ Эҥирине тӧрӧӧндӧрди, кожо иштеп турган улусты ла айылдаштарды кычырарга база јалтанбас болор керек. Је бис олорды нениҥ учун кычырадыс? Не дезе, Иеговага ла Иисуска биске эткен ончо немези учун быйанду болгоныстаҥ улам, улусты бу Эҥирге кычырбас аргабыс јок. Бис улусты толынты берген «Кудайдыҥ тегинге берип турган јалакайын» база алзын деп кӱӱнзейдис. (Ефестегилерге 1:7, ЈТ кычырыгар *; Ачыл. 22:17.)

¹¹ Бис туштажуларга келзеес, база бир керектӱ кылык-јаҥысты кӧргӱзедис. Бу кылык-јаҥ Иегова ла Иисустыҥ аҥылу кылык-јаҥы болот.

12. а) Јуунныҥ туштажулары Иеговага ла Иисуска сӱӱжисти канайып тыҥыдат? б) 2 Коринфтегилерге 5:14, 15-ле болзо, Христостыҥ теми аайынча биске нени эдер керек?

¹² Бисти христиан туштажуларга барарга,  Иегованы ла Иисусты сӱӱп турганыс кӱӱнзедет. Бу туштажулардаҥ билип алганыс сӱӱжисти тыҥыдат. Кудай ла оныҥ Уулы бистерге нени эткенин Каандыктыҥ Туразында јаантайын угуп јадыс (Рим. 5:8). А Кайраканныҥ Эҥири улуска, керек дезе толынтыныҥ баазын билгелек те улуска, Иегова ла Иисустыҥ јаан сӱӱжин аҥылу эдип эске алындырат. Толынты учун быйанду болгоныс бисти кӱнӱҥ сайын Христостыҥ темиле јӱрерге кӱӱнзедет. (2 Коринфтегилерге 5:14, 15 кычырыгар). Анайда ок мындый јаан сый учун Иегованы мактаар кӱӱнис тыҥыйт. Мыны канайып эдерге јараар? Темдектезе, Иеговага сӱӱжисти, јуунныҥ туштажуларында акту јӱрегистеҥ јартамалдар берип турганысла кӧргӱзерге јараар.

13. Иегованы ла оныҥ Уулын бастыра јӱрегистеҥ сӱӱп турганысты канайып кӧргӱзерис? Јартап беригер.

¹³ Иегованы ла оныҥ Уулын бастыра јӱрегистеҥ сӱӱп турганысты кӧргӱзерге, олор учун нени-нени артыргызарга белен болодыс. Јуунныҥ туштажуларына јӱрерге, бистиҥ кӧбизиске нени-нени солыырга келижет. Кӧп сабада јуундардыҥ бир туштажузы иштеер кӱндерде, эҥирде ӧдӱп јат, бу ӧйдӧ бис арып калган болодыс. База бир туштажу амыраар кӱнде, ӱзе улус амырап јаткан ӧйдӧ болот. Оныҥ учун туштажуларга арып та калган болзоос, је албаданып келип турганысты Иегова баалабайт эмеш пе? Бис канча ла кире кӧп албаданзаас, Иегова бистиҥ сӱӱжисти ончо ло кире тыҥ баалайт (Марк 12:41—44).

14. Иисустыҥ бойын килебес сӱӱжи, нениҥ учун биске тем болот?

¹⁴ Иисус бистерге бойын килебес сӱӱшти канайып кӧргӱзетениниҥ темин артыргыскан. Ол јӱк ле бойыныҥ ӱренчиктери учун јӱрӱмин берерге белен болгон эмес, је олордыҥ керексиништерин кажы ла кӱн бойындыйынаҥ бийик тургузарга белен болгон. Бир катап Иисус тыҥ арып-чылап та каларда, бойыныҥ ӱренчиктерине ајару эткен (Лука 22:39—46). Ол улустаҥ аларга эмес, карын берерге белен болгон (Матф. 20:28). Бис Иегованы ла ака-эјелеристи Иисус чылап тыҥ сӱӱп турзаас, Кайраканныҥ Эҥирине ле ӧскӧ дӧ туштажуларга келип турарга, ончо кӱчистеҥ албаданып турарыс.

15. Бис анчада ла кемдерге болужарга кӱӱнзейдис?

¹⁵ Чындык христиандардыҥ карындаштыгына кирип турганыска бис тыҥ сӱӱнип  јадыс! Оныҥ учун улусты бистерге кожулзын деп кычырарга, ӧйисти кысканбайдыс. Је озо ло баштап бис јарлабай барган эмезе туштажуларга јӱрбей барган христиандарга болужарга кӱӱнзейдис (Гал. 6:10). Бу ака-эјелерди сӱӱп турганыстаҥ улам, бистиҥ туштажуларыска, анчада ла Кайраканныҥ Эҥирине келзин деп кӱӱнзедип јадыс. Олордыҥ кемизи-кемизи бистиҥ сӱӱштӱ Адабыска ла Кӱдӱчибиске кайра јанып келзе, тыҥ сӱӱнедис. Иегова ла Иисуста андый ла сезимдер болот (Матф. 18:14).

16. а) Бис бой-бойысты канайып оморкодор аргалу ла биске ончо туштажуларга нениҥ учун јӱрер керек? б) Иоанн 3:16-да айдылган Иисустыҥ сӧстӧрин нениҥ учун эмди эске алынар керек?

¹⁶ 2019 јылда кандык айдыҥ 19-чы кӱнинде, пятницада болотон Кайраканныҥ Эҥиринеҥ канча да неделе озо, канча ла кире кӧп улусты кычырарга албаданып ийектер. (« Кайраканныҥ Эҥирине ле аҥылу куучын-эрмекке ончо улусты кычырыгар!» деген рамканы кӧрӱгер). А јыл туркунына болотон христиан туштажулардыҥ кажызында ла бой-бойысты оморкодорго албаданарыс. Сатананыҥ телекейиниҥ учы там ла јууктаган сайын, туштажуларысты бир де божотпос керек, не дезе, олор бистерге јобош болорго, јалтанбас болорго ло сӱӱжисти тыҥыдарга болужат (1 Фес. 5:8—11). Айдарда, Иегованыҥ ла оныҥ Уулыныҥ јаан сӱӱжи учун акту јӱрегистеҥ быйанду болгонысты кӧргӱзип турактар! (Иоанн 3:16 кычырыгар.)