1, 2. Ангел сӧӧк салган јерге келген ӱй улуска кандый сӧстӧр айтты, Иисус бу ӱй улуска нени айтты?

ТАҤ алдында, Иисустыҥ ӧлӱмине кунугып турган ӱй улус эки кӱн кайра оныҥ сӧӧгин јууган јерге барып јаттылар. Бу б. э. 33 јылы нисан айдыҥ 16-чы кӱни. Байагы ӱй улус јараш јытту ӧлӧҥдӧрди ле майды алып, Иисустыҥ эди-канын сӱртӱп саларга барып јатты. Је сӧӧк салган јер куру болордо, олор алаҥ кайкажа бергиледи! Бу ӧйдӧ ангел олорго, Иисус тирилип калган, анайда ок: «Галилейге слердеҥ озо барып јат, Оны анда кӧрӧригер» — деп айтты (Матф. 28:1—7; Лука 23:56; 24:10).

² Олор кайра барып јадала, Иисуска туштай бергендер. Иисус олорго: «Барып, карындаштарыма айдыгар, Галилей дӧӧн барзын. Мени анда кӧргӱлеер» — деп айткан (Матф. 28:10). Нениҥ учун дезе Иисус тирилгениниҥ ле кийнинеҥ ӱренчиктериле Галилеяда туштажып, олорго јаан учурлу јакару берерге сананган.

3, 4. Матфей 28:19, 20-де айдылган јакару јӱк ле апостолдорго берилбеген деп, кайдаҥ билерис? (Кадарындагы јурукты кӧрӱгер.)

³ Матфей 28:16—20 кычырыгар. Иисус Галилеядагы туштажуда ӱренчиктерине баштапкы чакта бӱдӱретен јаан учурлу иш берген. Бӱгӱнги кӱнде бистер де ол ло ишти бӱдӱредис. Иисус мындый сӧстӧр айткан: «Барыгар, ончо калыктарды ӱредигер... слерге јакарганымды ончозын бӱдӱрерге ӱредигер».

⁴ Иисус бу јакаруны ончо ӱренчиктерине берген. Бу јакару оныҥ јӱк ле 11 чындык апостолына берилбеген деп, бис  кайдаҥ билерис? Эмеш сананып ийектер. Галилеядагы туштажуга јӱк ле апостолдор јуулышкан ба? Ангел ӱй улуска: «Оны анда [Галилеяда] кӧрӧригер» — деп айткан. Айдарда, бу кудайзак ӱй улус ол туштажуда база болгон болор. Бого коштой апостол Павел, Иисус «бир уунда беш јӱстеҥ ажыра карындаштарга кӧрӱнген» деп бичиген (1 Кор. 15:6). Бу учурал кайда болгон?

5. 1 Коринфтегилерге 15:6-ны кычырып, нени билип аладыс?

⁵ 1 Коринфтегилерге 15:6-да айдылган туштажу Матфейдиҥ Сӱӱнчилӱ Јарыныҥ 28-чи бажалыгында айдылган Галилеядагы туштажу болгон деп, бисте кандый керелер бар? Баштапкызында, Иисустыҥ ӱренчиктериниҥ кӧбизи Галилей јеринеҥ болгон. Оныҥ учун Галилеядагы кыр (Иерусалимде кандый бир турада јуулыжарына кӧрӧ) сӱрекей кӧп улуска туштажатан эптӱ јер болгон. Экинчизинде, Иисус тирилген кийнинеҥ 11 апостолыла, бу туштажунаҥ озо, Иерусалимде кӧрӱшкен болгон. Айдарда Иисус ӱренчиктер белетейтен ле јарлайтан ишти јӱк ле апостолдорына берерге сананган болзо, ол оны Иерусалимде ле айдып салар эди. Ол тушта Иисус апостолдорды, анайда ок ӱй улусты ла ӧскӧ дӧ ӱренчиктерди Галилеяда јуубас эди (Лука 24:33, 36).

6. Ӱренчиктер белетеер иш бӱгӱнги де кӱнниҥ христиандарына берилген деп, Матфей 28:20 канайып керелейт? Олор бу ишти канайып бӱдӱрет?

⁶ База бир јилбилӱ кере кӧрӱп ийектер. Иисус ӱренчиктер белетеер јакаруны јӱк ле баштапкы чактыҥ христиандарына бербеген деп, бис кайдаҥ билерис? Иисус јакарузын мындый сӧстӧрлӧ божоткон: «Ончо кӱндердиҥ туркунына, чак тӱгенгенче Мен слерле кожо» (Матф. 28:20). Бӱгӱнги кӱнде, Иисустыҥ судурлаганыла, ӱренчиктер белетеер иш сӱрекей эрчимдӱ ӧдӱп јат. Сананып ийзеер де, кажы ла јыл 300 000 кире кижи чӧҥӱрилет. Анайып олор Христостыҥ ӱренчиктери болуп, Иегованыҥ организациязына кожулат!

7. Бис кандый сурак шӱӱжерис, нениҥ учун?

⁷ Агару Бичикти ӱренип турган улустыҥ кезиги кӧгӱс јанынаҥ ӧзӱп, сууга чӧҥӱрилет. Је кезиги Христостыҥ ӱренчиктери болорго албаданбай јат. Олорго Агару Бичикти ӱренерге јарап та турза, олор сууга чӧҥӱрилетен алтамдар этпей јат. Слерде Агару Бичикти ӱренип турган кижи бар болзо, слер оны билип алганын тузаланып, Христостыҥ ӱренчиги болуп калзын деп, кӱӱнзеп турган эмейигер. Оныҥ учун бу јӧрмӧлдӧ Агару Бичикти ӱренип турган улуска Иегованы сӱӱрге ле кӧгӱс јанынаҥ ӧзӧргӧ канайып болужарга јараар деп кӧрӱп ийерис. Бу нениҥ учун јаан учурлу сурак болот? Нениҥ учун дезе ӱредӱни токтодотон бо, јок по деп, качан бирде тӱҥей ле сананар керек болор.

8. Кижиге Иегованы сӱӱрге нениҥ учун кӱч болордоҥ айабас?

⁸ Иегова улусты ого акту сӱӱжинеҥ иштезин деп кӱӱнзейт. Оныҥ учун бис Агару Бичикти ӱренип турган улузыска, Иегова кажы ла кижини баалап ла сӱӱп турганын оҥдозын деп, болужарга јадыбыс. Бис улуска Иегованы «ӧскӱстердиҥ адазы ла тул ӱй улустыҥ коруучызы» деп кӧрӧргӧ болужадыс (Сар. 68:5, Смысловой перевод). Ӱренип турган кижи, Кудай оны сӱӱп турган деп оҥдоп ийзе, Кудайды сӱӱп баштаар болор. Је кезик улуска Иегованы сӱӱштӱ Ада деп сананарга кӱч болот, нениҥ учун дезе олордыҥ чыдаган билезинде адазы олорды качан да сӱӱбеген (2 Тим. 3:1, 3). Андый болзо, ӱредӱниҥ ӧйинде Иегованыҥ сӱрекей јакшы кылык-јаҥдарына ајару эдип туругар. Ӱренип турган кижиге, сӱӱштӱ Кудайыс олорго ӱргӱлји јӱрӱм сыйлаарга турганын ла бу јӱрӱмди аларга  болужарга турганын оҥдоп аларга болужыгар. Бис база канайып болужар аргалу?

9, 10. Агару Бичикти кандый бичиктердиҥ болужыла ӱренер керек, нениҥ учун?

⁹ Ӱредӱлерди «Агару Бичик неге ӱредет?» ле «Бойыгарды Кудайдыҥ сӱӱжинде чеберлегер» деген бичиктерле ӧткӱригер. Бу бичиктер ӱренип турган улуска Иегованы сӱӱрге болужат. Темдектезе «Агару Бичик неге ӱредет?» деген бичиктиҥ 1-кы бажалыгы мындый сурактарга каруу берет: «Кыйын-шыра Кудайдаҥ ба?», «Кудай улустыҥ шыразын кӧрӱп, нени сезет?» эмезе «Кудайдыҥ најызы болор арга бар ба?». А «Кудайдыҥ сӱӱжи» деген бичик, библиялык принциптерди тузаланганы јӱрӱмди солыырга ла Иеговага јууктаарга канайып болужар аргалу деп, оҥдоорго болужат. Слер бу бичиктердиҥ болужыла кӧп ӱредӱлер ӧткӱрген де болзогор, ӱренип турган кижиниҥ айалгазын ајаруга алып, кажы ла ӱредӱге јакшы белетенип туругар.

¹⁰ Је ӱренип турган кижиде «Агару Бичик неге ӱредет?» ле «Бойыгарды Кудайдыҥ сӱӱжинде чеберлегер» деген бичиктерде јарталбай  турган сурак бар болзо, нени эдер керек? Кижини, сурагына каруу берип турган бичикти бойы кычырып алзын деп, айдарга јараар. Је ӱредӱни ӧрӧги айдылган бичиктердиҥ болужыла анаҥ ары ӧткӱрер керек.

11. Ӱредӱлерде качан мӱргӱп баштаар керек? Нениҥ учун мӱргӱӱр керек деп, канайып јартап берерге јараар?

¹¹ Кажы ла ӱредӱни мӱргӱӱлле баштагар. Ӱредӱлерди мӱргӱӱлле баштап, мӱргӱӱлле божодорго канча ла кире эрте албаданыгар. Ӱредӱ улам сайын ӧткӱрилип баштаза ла, мӱргӱӱрге јараар. Анайып ӱренип турган кижи, Кудайдыҥ Сӧзин јӱк ле агару тынныҥ болужыла оҥдоор аргалу деп, аайлап турар. Кезик јарчылар, нениҥ учун мӱргӱӱр керек деп јартаарга, Иаков 1:5-те: «Кемигерге ойгорлык јетпей турган болзо... Кудайдаҥ сурагажын,— ого берилер» — деп айдылган сӧстӧрди тузаланат. Бу ӱлгерди кычырып ийеле, олор ӱренип турган кижинеҥ: «Кудайдаҥ ойгорды канайып сураар керек?» — деп сурап ийет. Ӱренип турган кижи дезе, кӧп сабада, мӱргӱӱр керек деп, каруу берет.

12. Сарын 139:2—4-тиҥ болужыла, ӱренип турган кижиге, Иеговала мӱргӱӱлде ачыгынча куучындашсын деп, канайып болужып берер?

¹² Ӱренип турган кижини мӱргӱӱрге ӱредигер. Ӱренип турган кижи, Иегова оныҥ акту јӱрегинеҥ мӱргӱгенин угарга турганында бӱдӱмјиленип алзын. Ол јаҥыскан мӱргӱп јаткан тушта, Иеговага јӱрегинде барын — кемге де куучындап болбос кандый бир немени, ачыгынча куучындаар аргалу деп јартап беригер. Нениҥ учун дезе Иегова бистиҥ јажытту санааларысты тегин де билип јат. (Сарын 139:2—4 кычырыгар *.) Анайда ок бис ӱренип турган кижини, јаман санааларынаҥ ла кылык-јаҥынаҥ айрыларга, Кудайдаҥ болуш суразын деп кӱӱнзедер аргалу. Темдектезе, Агару Бичикти канча да кире ӧйгӧ ӱренип турган кижи, Кудайга јарабай турган кандый бир байрамды баалап турган болзын. Ол бу байрамды ӧткӱрери јастыра болор деп оҥдоп то турган болзо, је тӱҥей ле бу байрамды јарадып јат. Андый кижини, Иеговага бойыныҥ сезимдерин куучындап, Кудайды оныҥ сӱӱп турганын сӱӱрге болушсын деп, јайнап сураарына кӱӱнзедигер (Сар. 97:10).

13. а) Ӱренип турган кижини јуунныҥ туштажуларына нениҥ учун канча ла кире эрте кычырар керек? б) Ӱренип турган кижиге Каандыктыҥ Туразында эби јок болбозын деп, нени эдерге јараар?

¹³ Ӱренип турган кижини јуунныҥ туштажуларына канча ла кире эрте кычырыгар. Јуунда кӧргӧни ле укканы кижиниҥ јӱрегин томултып, кӧгӱс јанынаҥ ӧзӧргӧ кӱӱнзедер болор. Кижиге «Каандыктыҥ Туразында не болуп турган?» деп кӧрӱлмени кӧргӱзип, слерле кожо јуунныҥ туштажузына барып келзин деп кычырыгар. Арга бар болзо, јуунныҥ туштажузына барып јатсагар, кижини машинагарга отургызып алыгар. Анайда ок ӱредӱге башка-башка јарчыларды кычырыгар. Анайып, ӱренип турган кижи јуунныҥ ака-эјелериле таныжып алза, Каандыктыҥ Туразына келерге эбијоксынбас болор.

14. Ӱренип турган кижи недеҥ улам кӧгӱс јанынаҥ ӧзӧргӧ кӱӱнзедилер болор?

¹⁴ Бис Агару Бичикти ӱренип турган кижиге кӧгӱс јанынаҥ ӧссин деп болужарга амадайдыс (Еф. 4:13). Кижи Агару Бичикти ӱренерге јӧпсинген тушта, озо ло баштап, бойына кандый туза аларын сананып турган болор. Је Иеговага сӱӱжи тыҥыган сайын, ол улуска, ол тоодо јуундагы ака-эјелерге, канайып болужарын сананып баштаар болор (Матф. 22:37—39). Мындый ӧйдӧ, кажы ла кижиде Каандыктыҥ ижине акча-манатла  јӧмӧжӧтӧн арга бар деп айдарга эбијоксынбагар.

15. Ӱренип турган кижиге, уур-кӱчтериниҥ аайына чыгарга ӱренип алзын деп, канайып болужар?

¹⁵ Уур-кӱчтердиҥ аайына чыгарга ӱредигер. Темдектезе, Агару Бичикти ӱренип турган сууга чӧҥӱрилбеген јарчы слерге, оны јуунда бир кижи ачындырып ийген деп куучындаган болзын. Мындый учуралда кемди-кемди бурулаардыҥ ордына, бу учуралдыҥ аайына Агару Бичиктиҥ болужыла канайып чыгарга јараарын јартап беригер. Ол, аканыҥ эмезе эјениҥ јаманын таштап, ачынышты ундып салар аргалу, је јаманын таштап болбой турза, ого акала эмезе эјеле јаражып аларга, јалакай куучындажып ийер керек. (Матфей 18:15 тӱҥдештиригер.) Ӱренип турган кижиге бу куучынга белетенип аларга болужыгар. Ого, кем-кем бисти ачындырган тушта нени эдетенине Агару Бичик кандый јӧптӧр берип турганын билип аларга, JW Library^® деген приложениеле, «Путеводитель по публикациям Свидетелей Иеговы» деген бичикле эмезе jw.org^® сайтла канайып тузаланарын кӧргӱзип беригер. Ӱренип турган кижи чӧҥӱрилердеҥ озо кӱчтериниҥ аайына чыгарга ӱренип алза, ого сууга чӧҥӱрилген де кийнинеҥ ака-эјелерле эптӱ-јӧптӱ јӱрерге јеҥил болор.

16. Ӱредӱлерге нениҥ учун ӧскӧ јарчыларды кычырар керек?

¹⁶ Ӱредӱге ӧскӧ јарчыларды, ол тоодо аймак кӧрӧӧчини кычырыгар. Нениҥ учун? Ӧрӧги айдылганына коштой ӧскӧ ака-эјелер ӱренип турган кижиге слердиҥ болужып болбой турган сурагарда, болужып берер аргалу. Темдектезе, ӱренип турган кижи таҥкызын таштап болбой, ойто ло тартып ийет. Бу учуралда мындый ла айалгада болгон јарчыны кычырыгар. Ол јарчы ӱренип турган кижиге болужатан кандый бир шӱӱлте айдар болор. Слер ченемелдӱ јарчыныҥ кӧзинче ӱредӱ ӧткӱрерге эбијоксынып турган болзогор, оны ӱредӱни ӧткӱрип ийзин деп сураар аргалу. Ӱредӱлерге ӧскӧ јарчыларды кычырып турзаас, ӱренип турган кижиге туза болор. Бис ӱренип турган кижини кӧгӱс јанынаҥ ӧссин деп амадап турганысты ундыбай јадыс.

17, 18. Ӱредӱни токтодотон бо, јок по деп сананып, нени ајаруга алар керек?

¹⁷ Агару Бичикти ӱренип турган кижи кӧгӱс јанынаҥ ӧспӧй турган болзо, биске бойыстаҥ мындый сурак сураарга келижер болор: «Ӱредӱни токтодотон бо, јок по?» Мындый айалгада ӱренип турган кижиниҥ ӱренер, оҥдоор аргазын ол эмезе кылык-јаҥын ајаруга алып турар керек. Нениҥ учун дезе кезик улуска Иегованы сӱӱп баштаарга кӧп ӧй керек болот, кезик улуска дезе, ас ӧй керек болот. Оныҥ учун бойыгарга мындый сурактар беригер: «Ӱренип турган кижи кӧгӱс јанынаҥ ӧзӧт пӧ? Бойыныҥ айалгаларында кӧгӱс алтамдар эдерге албаданат па? Алган билгирлерди тузаланып турган ба?» (Матф. 28:20). Кижиниҥ кӧгӱс ӧзӱми араай  да болзо, је солынталары кӧрӱнип турар учурлу.

¹⁸ Је ӱренип турган кижи ӱредӱлерди тыҥ баалабай турган болзо, нени эдер? Темдектезе, кижи «Агару Бичик неге ӱредет?» деп бичикти ӱренип божодоло, эмди дезе «Кудайдыҥ сӱӱжи» деп бичикти ӱренип турган. Је ол јуунныҥ туштажуларына да, Кайраканныҥ Эҥирине де бир де келбеген. Анайда ок кижи јаантайын ла кандый ла шылтактар табып турганынаҥ улам ӱредӱлер улам сайын ӧткӱрилбей јат. Андый учуралда кижиле ачыгынча куучындажар керек *.

19. Кижи Агару Бичикти ӱренерин баалабай турган деп билдирип турза, ого нени айдарга јараар? Је нени ајаруга алар керек?

¹⁹ Куучынды «Слерге Иегованыҥ Керечизи болорго, не буудактап турган?» деп сурактаҥ баштаарга јараар. Бу суракка кижи мындый каруу берер болор: «Меге Агару Бичикти ӱренерге јарап јат, је мен качан да Иегованыҥ Керечили болбозым!» Мындый кижи узак ӧйдиҥ туркунына ӱренип, андый санаазын солыбаган болзо, ӱредӱни оноҥ ары ӧткӱрерис пе? Је бир јанынаҥ, ӱренип турган кижи кӧгӱс ӧзӱмине не буудак болуп турганын слерге баштапкы ла катап айдып берген болор. Темдектезе, ол айылдар сайын јарлаарынаҥ коркып турган. Бу учуралда, слер оныҥ айалгазын билип алала, ого канайып болужарын јакшы оҥдоп ийген болороор.

20. Апостолдордыҥ ижи 13:48-теги сӧстӧр, кижиле Агару Бичикти ӱренетен бе, јок по деп оҥдоп аларга канайып болужар?

²⁰ Је ӱренип турган кезик улустыҥ кӱӱн-санаазы, Иезекиильдиҥ ӧйинде болгон израильтяндардыҥ кӱӱн-санаазы ошкош болот. Иегова олор керегинде судурчызына мындый сӧстӧр айткан: «Сен олорго сӱӱш керегинде кожоҥдогон јараш ӱндӱ кожоҥчыдый, кӱӱлик ойноткышла јакшы ойногон кижидий болодыҥ. Олор сениҥ сӧзиҥди угуп јадылар, је кемизи де бӱдӱрбейдилер» (Иез. 33:32). Кижиге ӱредӱни оноҥ ары ӧткӱрбезис деп айдарга јеҥил эмес болот. Је «ӧй ас артып јат» деп ундыбагар (1 Кор. 7:29). Алтамдар этпей турган кижиле ӱредӱ ӧткӱрердиҥ ордына, «чыннаҥ ла ӱргӱлји јӱрӱм аларга турган улусты» (ЈТ) бедиреер керек. (Апостолдордыҥ ижи 13:48 кычырыгар.)

21. 2020 јылдыҥ ӱлгери кандый, бу ӱлгер биске нени эдерге болужар?

²¹ 2020 јылдыҥ ӱлгери ӱредӱлердиҥ чыҥдыйын тыҥыдарга болужар. Бу сӧстӧрди Иисус ӱренчиктериле Галилей јеринде тушташкан ӧйдӧ айткан: «Барыгар, ончо калыктарды ӱреди[п]... кресте[гер]» (Матф. 28:19).