1, 2. а) Матфей 28:18—20-ле болзо, христиан јуунныҥ тӧс амадузы кандый? б) Бу јӧрмӧлдӧ кандый сурактар шӱӱжилер?

ГАЛИЛЕЙ кырдыҥ јаказына элчилердиҥ ӧкпӧӧрип јуулышканын сананып ийзеер. Олорды бу кырга тирилген Иисус кычырган (Матф. 28:16). Ол шак ла бу ӧйдӧ «беш јӱстеҥ ажыра карындаштарга кӧрӱнген» болор (1 Кор. 15:6). Иисус олорды нениҥ учун јууган? Ол ӱренчиктерине јилбилӱ јакару берип, мынайып айткан: «Барыгар, ончо калыктарды ӱредигер». (Матфей 28:18—20 кычырыгар.)

² Бу сӧстӧрди уккан ӱренчиктер баштапкы чактыҥ христиан јуунныҥ тоозына кирген. Бу јуунныҥ тӧс амадузы — Христостыҥ јаҥы ӱренчиктерин белетеери болгон *. Бӱгӱнги кӱнде бастыра јердиҥ ӱстинде муҥдар тоолу христиан јуундар бар. Олор база ӱренчиктер белетеерге амадап јат. Бу јӧрмӧлдӧ мындый тӧрт сурак кӧрӱлер: нениҥ учун ӱренчиктер белетеер керек? Мыны канайып эдер? Ӱренчиктер белетеер ишке ончо христиандар туружат па? Биске нениҥ учун чыдамкай болор керек?

3. Иоанн 14:6 ла 17:3-ле болзо, нениҥ учун ӱренчиктер белетеер керек?

³ Нениҥ учун ӱренчиктер белетеер керек? Нениҥ учун дезе јӱк ле Христостыҥ ӱренчиктери Кудайдыҥ најылары  болор аргалу. Анайда ок Христостоҥ тем алып турган улус јӱрӱмин бӱгӱнги ле кӱннеҥ ала јакшы јанындӧӧн солып, ӱргӱлјиге јӱретен ижемји алат. (Иоанн 14:6; 17:3 кычырыгар.) Иисустыҥ берген јакарузы јаан каруулу иш, је бу ишти бис јаҥыскан этпей јадыс. Элчи Павел бойы керегинде ле христиандар керегинде мындый сӧстӧр айткан: «Кудайга [Кудайла, ЈТ] кожо иштеп јӱргенибис» (1 Кор. 3:9). Анайып Иегова ла Иисус биске, толо кемдӱ эмес улуска, јаан кӱндӱ эткен!

4. Иван ла Матильданыҥ теми бисти неге ӱредет?

⁴ Ӱренчиктер белетеер ишке туружары јаан сӱӱнчи экелет. Тем эдип, Колумбияда јадып турган Иван ла оныҥ ӱйи Матильданыҥ учуралын кӧрӱп ийектер. Бир катап олор Давьер деген јиит уулга јарлаган. Давьер олорго: «Солынар кӱӱним бар, је чек солынып болбой јадым» — деген. Ол профессиональный боксер болгон, наркотиктер тузаланган, аракызак болгон, анайда ок Эрика деп кысла јасак аайынча алышпай јаткан. Иван эске алат: «Давьердиҥ јаткан деремнези туку ыраагында турган. Ого једерге, биске суу јип салган балкашту јолдорло канча сааттыҥ туркунына велосипедтӱ барарга келижетен. Давьердиҥ солынып турганын кӧрӱп, Эрика Агару Бичикти ӱренерге база кӱӱнзей берген». Канча да кире ӧйдиҥ бажынаҥ Давьер аракыдабай барган, наркотиктерди ле боксты таштап ийген. Анайда ок Эрикала јасак аайынча алыжып алган. Матильда куучындайт: «2016 јылда олор кожо сууга чӧҥӱрилерде, бистиҥ санааска Давьердиҥ: „Солынар кӱӱним бар, је чек солынып болбой јадым“— деген сӧстӧри келди. Сӱӱнгенистеҥ улам кӧзистиҥ јажын токтодып болбой турдыс». Айдарда, улуска Христостыҥ ӱренчиги болорго болужары — сӱрекей јаан сӱӱнчи!

5. Ӱренчиктер белетеер иш недеҥ башталат?

⁵ Ӱренчиктер белетеер иш сӱӱнчилӱ јарды угарга белен улусты бедирееринеҥ башталат (Матф. 10:11). Иегова керегинде јарлап турзаас, бис чыннаҥ ла Иегованыҥ Керечилери болгонысты кӧргӱзедис. А Христостыҥ јарлазын деген јакарузын бӱдӱрип турзаас, чындык христиандар болгонысты кӧргӱзедис.

6. Бистиҥ јарлаар ижис тӱжӱмдӱ болзын деп турган болзоос, нени эдер керек?

⁶ Кезик улус Агару Бичикти ӱренерге тӱрген јилбиркей берет, је кезик улусты кӧрзӧ, озо баштап јилбиркебей турган деп билдирер. Андый улустыҥ јилбӱзин ӧскӱрер керек болор. Ижис тӱжӱмдӱ болзын деп турган болзоос, нени куучындаарын јазаптыра пландап алар керек. Улуска јилбилӱ болгодый темалар талдап алыгар. Оноҥ, куучынды канайып баштаарын белетеп алыгар.

7. Куучынды недеҥ баштаарга јараар? Слер сананзаар, кижиниҥ кӧрӱмин тооп, оны нениҥ учун лаптап угар керек?

⁷ Темдектезе, кижиге мынайып айдарга јараар: «Слердеҥ сурап угарга турум. Бастыра јердиҥ улузында бир тӱҥей кӱчтер болот. Слер канайып сананадыгар, бу кӱчтерди бастыра телекейлик башкару јоголтып болор бо?» Сурактыҥ кийнинеҥ Даниил 2:44-ти шӱӱжип ийерге јараар. База бир тем: «Баланы јакшы таскадарга не болужар?» — деп сурап ийеле, Јаҥды такыганы 6:6, 7-ни шӱӱжип ийигер. Кандый бир тема талдап турзагар, улусты сананып туругар. Агару Бичикте бичилгени олорго кандый тузазын јетирерин сананып ийигер. Улусла куучындажып тура, олордыҥ кӧрӱмин тооп, олорды лаптап угар керек. Анайып слер олорды јакшы оҥдоп алараар. А улус дезе, слерди угарга кӱӱнзеер болор.

8. Кижиле ӱредӱ баштаарга, ого нениҥ учун канча катап барар керек?

 ⁸ Кижиле ӱредӱ баштаарга, ого канча катап барар керек. Је такып барарга, кӧп ийде-кӱч ле ӧй керек болордоҥ айабас. Нениҥ учун дезе улусты айылында тударга кӱч болот. Анайда ок кижи слерге ӱренижип, Агару Бичикти ӱренерге кӱӱнзей берзин деп, ого кӧп катап барарга келижер болор. Канайып ӧзӱмди улам сайын сугарар керек, анайып ла кижиге Иегованы ла Иисусты сӱӱп баштазын деп болужарга, оныла Кудайдыҥ Сӧзин улам сайын шӱӱжер керек.

9, 10. Христостыҥ ӱренчиги болгодый улусты бедиреер иште кажы ла христиан туружат деп, нениҥ учун айдарга јараар?

⁹ Христостыҥ ӱренчиги болгодый улусты бедиреер ишке кажы ла христиан туружып јат. Бу ишти јылыйган баланы бедирегенине тӱҥейлеерге јараар. Бир катап ӱч јашту уулчак јылыйып каларда, оны 500 кире кижи бедиреп чыккан. 20 саат ӧткӧн кийнинеҥ, бедиреген улустыҥ бирӱзи баланы кукурузалар отургызылган јалаҥнаҥ таап алган. Бу кижи: «Баланы мен таптым» — деп сананбаган, карын: «Баланы канча јӱс кижи бедирегенис. Оныҥ учун бу ончобыстыҥ ижис» — деп айткан.

¹⁰ Кӧп улус андый балага тӱҥей: олордо ижемји де јок, болуш алар јери де јок (Еф. 2:12). Олорды 8 миллионноҥ ажык Иегованыҥ Керечилери бедирейт. Слер эм тура Агару Бичикти ӱренерге турган кижи таппаган болороор, је ӧскӧ јарчылар андый кижини табып алган болзо, кунукпагар. Кандый бир ака эмезе эје андый кижини табып алза, кийнинде ол Христостыҥ ӱренчиги болуп калза, бис ончобыс сӱӱнедис, нениҥ учун дезе бу ишти бастырабыс кожо эдип јадыс.

11. Слердиҥ бойыгарда Агару Бичикле ӱредӱ јок то болзо, ӱренчиктер белетеер ишке слер канайып јӧмӧжӧр аргалу?

 ¹¹ Эм тура слер Агару Бичикле ӱредӱ ӧткӱрбей де турган болзогор, је ӱренчиктер белетеер ишке тӱҥей ле јӧмӧжӧр аргалу. Темдектезе, Каандыктыҥ Туразына баштапкы катап келген улусты јылу уткып, олорго болужарга јараар. Анайып олор слердиҥ сӱӱжигерди кӧрӱп, слерди чындык христиандар деп, бӱдӱмјиленип алар (Иоанн 13:34, 35). Јуунныҥ туштажуларда кыска да болзо каруулар бергенигерле, слер јаҥы келген улусты бойыныҥ бӱдӱмјизин тоомјылу ла јарт эдип јартаарга ӱредип салар аргалу. Анайда ок јаҥы јарчыла кожо јарлап барзагар, ого библиялык ӱлгерлерди канайып тузаланарын кӧргӱзип берер эдигер. Анайып слер оны Христостоҥ тем алып турарга ӱредип саларыгар (Лука 10:25—28).

12. Ӱренчиктер белетеерге, кандый бир аҥылу темигӱлер керек пе? Јартап беригер.

¹² Христостыҥ ӱренчиктерин белетеерге, кандый бир аҥылу темигӱлер керек деп сананбас керек. Мындый тем кӧрӱп ийектер. Боливияда јадып турган Фаустина баштапкы катап Иегованыҥ Керечилерине туштаарда, кычырып билбес болгон. Је оноҥ ол, јӱк арайдаҥ да болзо, кычырып баштаган. Эмди Фаустина сууга чӧҥӱрилген. Ого улусты чындыкка ӱредерге јарап јат. Ол кажы ла неделеде Агару Бичикле беш ӱредӱ ӧткӱрет. Фаустина ӱредип турган улузыныҥ кӧбизинеҥ уйан кычырып турган да болзо, оныҥ болужыла алты кижи чӧҥӱрилген (Лука 10:21).

13. Бистиҥ эдетен керектерис кӧп тӧ болзо, је ӱренчиктер белетеер ишке туружып турганыс кандый туза экелер?

¹³ Кезик христиандарда кӧгӱс керектердеҥ башка, ӧскӧ дӧ керектери коркышту кӧп болот. Андый да болзо, олор Агару Бичикле ӱредӱлер ӧткӱрерге ӧй табып, јаан сӱӱнчи алат. Эмди, Аляскада кичинек калада јадып турган Мелани эјениҥ темин кӧрӱп ийектер. Ол сегис јашту кызычагын јаҥыскан чыдаткан. Оныҥ иштеп турган ижи кере тӱжине болгон. Анайда ок ол ракла ооруп турган адазын кичееген. Оныҥ калазында Меланинеҥ ӧскӧ Иегованыҥ Керечизи болбогон. Ол, Агару Бичик ӱренетен кижи таап аларга тыҥ кӱӱнзеп, соок то болзо, јарлап турарга, Иегованаҥ јаантайын ийде-кӱч сураган. Бир канча ӧйдӧҥ ол Сара деген кижиле танышкан. Байагы кижи Кудайдыҥ адын угала сӱрекей тыҥ сӱӱнип, бир эмеш ӧйдӧҥ Агару Бичикти ӱренерге јӧпсинген. Мелани эске алат: «Кажы ла пятницада кызымла кожо, арып калганыма буттарыма туруп болбой до турзам, ӱредӱге барар болгоныс. Бу ӱредӱ биске экӱлегиске тузалу болгон. Сараныҥ сӱрекей  кӧп сурактарына биске каруулар табарга јарап туратан. Сараныҥ Иеговала колбулары тыҥып турганын кӧрӱп, тыҥ сӱӱнип туратаныс!» Соондо Сара удурлажуларды јалтанбай ӧдӱп, серкпенеҥ јӱре береле, сууга чӧҥӱрилген.

14. а) Ӱренчиктер белетеер ишти нениҥ учун балык тударыла тӱҥдештирерге јараар? б) 2 Тимофейге 4:1, 2-де бичилген Павелдиҥ сӧстӧри слерди неге кӱӱнзедет?

¹⁴ Јарлаар ижис тӱжӱмдӱ эмес те деп билдирип турза, Христостыҥ ӱренчиктери болгодый улусты бедиреерин токтотпогор. Иисус бу ишти балык тударыла тӱҥдештирген деп ундыбагар. Кезикте балыкчыларга балык тудуп аларга, кӧп ӧй керек болот. Олорго анчада ла караҥуй тӱнде эмезе таҥ эртеде иштенерге келижет, керек дезе јараттаҥ ыраак јӱзӱп барарга да келижет (Лука 5:5). Анайып ла кезик јарчылар чыдамкай болуп башка-башка ӧйдӧ лӧ јерлерде канча сааттыҥ туркунына «балыктап турза», кӧп улуска туштайдылар. Ийде-кӱчин артыктай берип турган ака-эјелер бистиҥ јарла јилбиркеп турган улусты табат. Оныҥ учун бис кӧп саба улус айылында болгон ӧйдӧ јарлазаас эмезе кӧп улусла куучындажатан јерлерде јарлазаас, јакшы болор. (2 Тимофейге 4:1, 2 кычырыгар.)

15. Агару Бичикле ӱредӱ ӧткӱрерге, нениҥ учун чыдамкай болор керек?

¹⁵ Агару Бичикле ӱредӱ де ӧткӱрип турзаас, нениҥ учун чыдамкай болор керек? Бис кижиге јӱк ле библиялык ӱредӱлерле эмес, је Агару Бичиктиҥ Чӱмдеечизиле, Иеговала, јуук таныжып, оны сӱӱп баштазын деп болужарга кӱӱнзеп јадыс. Анайда ок  кижиге Иисус бойыныҥ ӱренчиктеринеҥ јӱк ле нени сакып турганын эмес, је Христостыҥ ӱредӱлери аайынча канайып јӱрерин кӧргӱзип турар керек. Кижиге библиялык принциптерди тузаланып, јаҥыдаҥ јӱрӱм јӱрзин деп болужарга, биске чыдамкай болор керек. Нениҥ учун дезе кем де бойыныҥ кӧрӱм-санаазын ла кылык-јаҥын канча да айдыҥ туркунына солып алат, је кем де эмеш узак ӧйдиҥ туркунына солынат.

16. Раульдыҥ теми слерди неге ӱредет?

¹⁶ Чыдамкай болгоныс кайралдалып јат деп кӧргӱзип турган бир учурал кӧрӱп ийектер. Бу учурал Перуда иштеген миссионер акала болгон. Ол ака куучындайт: «Мен Рауль деген кижиге Агару Бичикле ӱредӱ ӧткӱргем. Бис оныла эки бичикти ӱренип салган да болзоос, је ол бойыныҥ кӱчтериниҥ аайына анайып ла чыгып болбогон. Раульда ӱйиле колбулары јаман болгон, балдары дезе, оны бир де тообой туратан. Је ол јуунныҥ туштажуларына јаантайын келип турарда, мен оны ла оныҥ билезин артыргыспай, олорго болужарга кирип туратам. Бистиҥ баштапкы туштажунаҥ ала Раульдыҥ сууга чӧҥӱрилетен некелтелерге келижип баштаганына јетире, ӱч јылдаҥ кӧп ӧй ӧткӧн».

17. Келер јӧрмӧлдӧ бис нени шӱӱжерис?

¹⁷ Иисус бистерге: «Барыгар, ончо калыктарды ӱредигер» — деген јакылта берген. Бу јакылтаны бӱдӱрип, бистиҥ кӧрӱмистеҥ чек башка кӧрӱмдӱ улуска туштайдыс. Олордыҥ ортозында Кудайга бӱтпей турган эмезе кандый да кудай јаҥга кирбеске турган улус бар. Андый улуска канайып јарлаарын келер јӧрмӧлдӧ шӱӱжип кӧрӧрис.