1, 2. а) Кезик ороондордо бистиҥ ижис токтодуда болгоны бисти нениҥ учун кайкатпай јат? б) Бу јӧрмӧлдӧ нени шӱӱжерис?

2018 јылда бистиҥ агару ижис чек токтодылган эмезе кандый бир токтодулар тургузылган ороондордогы јарчылардыҥ тоозы 223 000-наҥ ажык болгон. Јаҥдардыҥ Иегованыҥ Керечилерине јаман баштанып турганы бисти кайкатпай јат. Ӧткӧн јӧрмӧлдӧ айдылганыла, чындык христиандар истедерин озодоҥ билген (2 Тим. 3:12). Бис кайда да јадып турган болзоос, сӱӱштӱ Иегова Кудайга иштеер аргабыс кенетийин токтодылып калардаҥ айабас.

² Иеговага бажырары слердиҥ орооныгарда токтодылып калган болзо, мындый сурактар келер болор: бис Иегованыҥ јарадузын јылыйтып салганыс па? Токтодунаҥ улам бистиҥ агару ижис токтоп калар ба? Иеговага јайым бажырарга, ӧскӧ ороондӧӧн кӧчӧтӧн бӧ? Бу сурактарды кӧрӱп, токтодуныҥ ӧйинде Иеговага канайып иштеерин ле кандый јастыралар этпезин шӱӱжип ийектер.

3. 2 Коринфтегилерге 11:23—27-ле болзо, элчи Павелде кандый истежӱлер болгон? Оныҥ теми нени кӧргӱзет?

³ Бистер агару ижистиҥ токтодылганын Иегованыҥ чугулы деп, сананып баштаардаҥ айабазыс. Је бу андый эмес. Темдектезе, элчи Павелдиҥ учуралын эске алактар. Павелде Кудайдыҥ јарадузы болгон. Оныҥ да учун Иегова Павелге Христиан Грек Бичимелдердиҥ тоозына кирген 14 самара бичийтен кӱндӱ эткен. Анайда ок Кудай Павелди ӧскӧ албатыларга элчи эдип кӧстӧгӧн. Андый да болзо, Павелде коркышту истежӱлер болгон. (2 Коринфтегилерге 11:23—27  кычырыгар.) Айдарда, Павелдиҥ темиле болзо, Иегова бойыныҥ ишчилериниҥ истедерин болдыртып јат.

4. Телекей бисти нениҥ учун јаман кӧрӧт?

⁴ Иисус айткан: «Слер телекейдеҥ эместе... слерди телекей јаман кӧрӱп јат» (Иоанн 15:18, 19). Оныҥ учун бистер истежӱлер болуп турганына кайкабай јадыс. Истежӱлер Иегованы биске алкыжын бербей турган деп кӧргӱспей јат. Бу карын, бистиҥ чындык јӱргенистиҥ керези болот!

5. Улус Иегова Кудайга бажырарын јоголтып болор бо? Јартап беригер.

⁵ Улус Кӱчтӱдеҥ Кӱчтӱ Иегова Кудайга бажырарын качан да јоголтып болбос. Бисти кӧп улус јоголторго сананган, је олор нени де эдип болбоды. Телекейлик экинчи јуу-согуштыҥ ӧйин эске алып ийектер. Ол ӧйдӧ кӧп ороондордыҥ башчылары Кудайдыҥ албатызына јаан истежӱлер эткен. Иегованыҥ Керечилери јаҥыс ла нацистский Германияда эмес, је Австралияда, Канадада, анайда ок ӧскӧ дӧ ороондордо токтодуда болгон. Је мындый тоолорго ајару эдип ийзеер де. 1939 јылда јуу-согуш башталып турарда, бастыра јердиҥ ӱстинде 72 475 јарчы болгон. Је јуу-согуштыҥ учында дезе, 1945 јылда, олордыҥ тоозы 156 299 кижиге јеткен. Анайып Керечилердиҥ тоозы эки катапка кӧп болуп калган! Андый неме јӱк ле Иегованыҥ болужыла болор аргалу.

6. Токтодулар кандый туза экелер аргалу? Тем куучындап беригер.

⁶ Истежӱлер болорын сананып ийзеес, бис бир эмеш санааркап, коркый берер болорыс. Је бир эмеш коркый береринде јаман неме јок. Истежӱлер карын Иеговага оноҥ кӧп иштеерге кӱӱнзедер болор. Кичинек балалу эш-нӧкӧрлӧрдиҥ темин кӧрӱп ийектер. Олор Иегованыҥ Керечилериниҥ ижи токтодуда болгон ороондо јаткан да болзо, коркыбай, пионердиҥ ижин баштаган. Керек дезе ӱйи пионер болорго, кӧп акчалу ижин де артыргызып салган. Ӧбӧӧниниҥ айтканыла болзо, токтоду болуп каларда, улус Иегованыҥ Керечилери керегинде кӧптӧдӧ билерге кӱӱнзей берген. Оныҥ учун ого Агару Бичикле ӱредӱлер баштаарга кӱч болбогон. Токтодуда база бир јакшы јаны бар. Бу ла ороондо јадып турган аксагалдыҥ сӧстӧриле болзо, Иеговага иштебей барган јарчылардыҥ кӧбизи јуунныҥ туштажуларына келип баштайла, јарлаар ижин орныктырган.

7. а) Левит 26:36, 37-неҥ бис неге ӱренедис? б) Токтодуныҥ ӧйинде слер нени эдеригер?

 ⁷ Ӧштӱлер бисти коркып, Иеговага иштебей барзын деп кӱӱнзеп турганынаҥ улам, агару ижисти токтодып јат. Олор бис керегинде тӧгӱн јайар, айылдарысты тинтиир, бисти јаргыга алдыртар, керек дезе тӱрмеге де отургызар аргалу. Олор бистердиҥ кезигисти тӱрмелеп салза, арткандарыс коркый берер деп иженет. Мындый ӧйдӧ бис коркый берзеес, бойыс бойысты токтодып саларыс. Је бис Левит 26:36, 37-де айдылган улуска тӱҥей болорго кӱӱнзебей јадыс. (Кычырыгар *.) Олордоҥ коркып, Кудайга эрчимдӱ иштеерин араайлатпазыс та, токтотпозыс та. Бис бӱткӱлинче Иеговага иженип, ӧйинеҥ ӧткӱре коркыбазыс (Иса. 28:16). Карын Иегованаҥ башкарту сураарыс. Кудайыс јаныста болзо, бу телекейдиҥ эҥ кӱчтӱлери де биске чындык иштеерге чаптыгын јетирип болбос деп алаҥзыбай јадыс (Евр. 13:6).

8, 9. а) Кажы ла билениҥ бажына кандый суракты шӱӱп сананар керек? б) Јакшы тӱп-шӱӱлтеге келерге не болужар?

⁸ Слердиҥ јаткан ороондо Иегованыҥ Керечилериниҥ ижи токтодуда болзо, слерде мындый сурак чыгардаҥ айабас: «Иеговага јайым иштеерге, ӧскӧ кандый бир ороонго кӧчсӧм кайдар?» Мындый суракты кажы ла кижи бойы кӧрӧт. Кем де баштапкы чактыҥ христиандарыныҥ темиле башкарынар болор. Ол ӧйдӧ јаан истежӱлер башталып, Стефанды таштарла ӧлтӱрип саларда, Иерусалимдеги ӱренчиктер «Иудей ле Самар јерлери сайын тозо бергендер», керек дезе «Финикия, Кипр ле Антиохияга јеттилер» (Ап. ижи 8:1; 11:19; Матф. 10:23). А кем де элчи Павелдиҥ темиле башкарынар болор. Павел дезе, јарлаар ишке тыҥ истежӱлер болуп турган јерди артыргыспаска шӱӱп алган. Ол бойыныҥ јӱрӱмин кысканбай, сӱӱнчилӱ јарды јарлап, тыҥ истежӱлер болуп турган калалардагы ака-эјелерге болушкан (Ап. ижи 14:19—23).

⁹ Бис бу темдердеҥ неге ӱренедис? Кажы ла билениҥ бажына, нени этсе билезине јакшы болор деп, шӱӱп кӧрӧр керек. Тӱп-шӱӱлтеге келердеҥ озо, Иеговага мӱргӱп, билезиниҥ айалгазын лаптап сананар керек. Анайда ок кӧчӧргӧ сананып турзагар, алды-кийнинде не болорын база шӱӱп сананыгар. Бу суракта кажы ла христиан «бойыныҥ јӱгин апарар» (Гал. 6:5). Оныҥ учун улустыҥ эткен тӱп-шӱӱлтезин јаргылабагар.

10. Филиал ла аксагалдар кандый башкартулар берер?

¹⁰ Токтодуныҥ ӧйинде оноҥ ло ары Иеговага бажырарга, нени эдер керек? Мындый ӧйдӧ филиал аксагалдарга кӧгӱс курсакты канайып аларына ла јуунныҥ туштажуларын ла јарлаар ишти канайып ӧткӱрерине башкартулар берер. Је филиалда аксагалдарла колбожор арга јок болзо, аксагалдар бойлоры слерге ле слердиҥ јууныгарга Иеговага оноҥ ло ары бажырарга болужар. Олор башкартуларды Агару Бичикке ле бистиҥ бичиктерге тайанып берер (Матф. 28:19, 20; Ап. ижи 5:29; Евр. 10:24, 25).

11. Бисте кӧгӱс курсак јаантайын болор деп, нениҥ учун алаҥзыбаска јараар? Кӧгӱс курсак јок артпаска, слер нени эдеригер?

¹¹ Иегова ишчилериниҥ кӧгӱс курсагы јеткил болор деп сӧзин берген (Иса. 65:13, 14; Лука 12:42—44). Оныҥ учун оныҥ организациязы слерди Кудайга чындык артсын деп, ончо аргаларды тузаланар. Је слер бойыгардыҥ  јаныгардаҥ нени эдер аргалу? Токтодуныҥ ӧйи келзе, Агару Бичикти ле бистиҥ бичиктерди улус таппас эдип јажырып салыгар. Бу баалу кӧгӱс курсакты, кепке базылганын да, электронный бӱдӱмдӱзин де, јеҥил табып алатан јерге качан да артыргыспагар. Айдарда кӧгӱс јанынаҥ бек артарга, мындый алтамдарды кажыбыска ла эдер керек.

12. Аксагалдар туштажуларды улустыҥ кӧзине илинбезин эдип канайып ӧткӱрер?

¹² Јуунныҥ туштажулары канайып ӧткӱрилер? Аксагалдар туштажуларды улустыҥ кӧзине илинбезин эдип ӧткӱрер. Темдектезе, аксагалдар бисти јаан эмес бӧлӱктерле јуулышсын деп айдар болор, анайда ок туштажулардыҥ ӧйин ле ӧткӱрилип турган јерин улам сайын солып турар. Ака-эјелерди јеткерлӱ айалгага тургуспаска, туштажуларга келип те, јӱрӱп те јатсаас, арай куучындажарга ла кӧскӧ јаан илинбес эдип кийинерге келижер болор.

13. Совет јаҥныҥ ӧйинде јаткан ака-эјелердиҥ теминеҥ бис неге ӱренедис?

¹³ Јарлаар иш канайып ӧткӱрилер? Ӱзе неме јербойыныҥ айалгазынаҥ камаанду болор. Је кандый да болзо, бис Иегова Кудайысты сӱӱп јадыс ла оныҥ Каандыгы керегинде улуска куучындаарга кӱӱнзейдис, оныҥ учун јарлайтан эп-аргаларды тӱҥей ле табып аларыс (Лука 8:1; Ап. ижи 4:29). Эмили Бэран деген тӱӱкичи Совет јаҥныҥ ӧйинде јаткан Иегованыҥ Керечилери керегинде мынайып бичиген: «Кудайга бӱдӱп тургандарга јасак аайынча бойыныҥ кӧрӱмин таркадарга јарабас болуп каларда, Керечилер айылдаштарына, кожо иштеп турган улуска ла најыларына јарлап баштаган. Је мынаҥ улам Керечилерди трудовой лагерьлердӧӧн аткарып ийерде, олор андагы лагерьлерде отурган улуска јарлап баштаган». Айдарда, токтоду ака-эјелердиҥ оозын јабып болбоды. Оныҥ учун слердиҥ ороондо јарлаар иш качан бирде токтодылып калза, бу ака-эјелердиҥ сӱрекей јакшы темин эске алып туругар.

14. Сарын 39:1 биске недеҥ кыйарга болужат?

¹⁴ Артык неме айтпагар. Токтодуныҥ ӧйинде «унчукпай јӱретен ӧй бар» деп ундыбас керек (Јарл. 3:7). Биске ака-эјелердиҥ ады-јолын, туштажулардыҥ ӧдӱп турган јерлерин, јарлаар иштиҥ канайып ӧткӱрилип турганын ла кӧгӱс курсактыҥ канайып берилип турганын кемге де айтпас керек. Андый јетирӱлерди бис јаҥдардыҥ улузына, керек дезе бистиҥ ороондо эмезе ӧскӧ ороондо јадып турган најыларыска да, тӧрӧӧндӧриске де куучындабазыс. Оноҥ башка ака-эјелерди кӱч айалгага тургузып салардаҥ айабазыс. (Сарын 39:1 кычырыгар *.)

15. Сатана нени эдерге албаданат, је оныҥ тузагына тӱшпеске нени эдер керек?

 ¹⁵ Оок-теек немелер бирлигисти бузардаҥ айабас. Сатана «биле бойынаҥ бойы бӧлинзе, ол биле јайрадылар» деп, сӱрекей јакшы билер (Марк 3:24, 25). Оныҥ учун ол бастыра кӱчиле бистиҥ бирлигисти бузарга албаданар. Сатана бисти оныла тартышсын деп эмес, је бисти бой-бойысла тартышсын деп кӱӱнзейт.

16. Бис Гертруд Пётцингер эјениҥ теминеҥ неге ӱренедис?

¹⁶ Кӧгӱзи тереҥ де христиандарга ајарыҥкай болор керек. Гертруд Пётцингер ле Эльфриде Лёр деген майлаткан эјелерде мындый учурал болгон. Олор экӱ ӧскӧ эјелерле кожо нацисттердиҥ концлагеринде отурган. Гертруд эје Эльфриде эјениҥ лагерьде отурган эјелерге куучын-эрмектер айдып, олордыҥ кӱӱнин кӧдӱрип турганын кӧрӱп, кӱйӱнип баштаган. Канча да ӧйдиҥ бажында Гертруд эје бойыныҥ мындый кылыгынаҥ уйалып баштайла, Иеговага мӱргӱп, болуш сураган. Ол мынайып бичиген: «Ака-эјелерге кӧрӧ, кезик немени эдип болбой турганыска, эмезе олордо биске кӧрӧ, кӧп каруулу молјулар бар болгонына кӱйӱнбеске ӱренер керек». Гертруд эје мынайып кӱйӱнбеске нени эткен? Ол Эльфриде эјениҥ јакшы кылык-јаҥдарына ла јалакай болгонына ајарып баштаарда, олордыҥ колбулары тыҥып калган. Гертруд ле Эльфриде эјелер концлагерьди кожо ӧдӱп, јердеги јӱрӱминиҥ учына јетире Иеговага чындык иштеген. Анайып ла бис бастыра кӱчистеҥ ака-эјелерле амыр јӱрерге албаданып турган болзоос, Сатана бистиҥ бирлигисти бузып болбос (Кол. 3:13, 14).

17. Бойыска иженгенис неге экелердеҥ айабас?

¹⁷ Бойыгарга иженбегер. Бис каруулу акалардыҥ башкартуларыла јӱрзеес, кереги јок кӱчтерге кирбезис (1 Петр 5:5). Бир тем кӧрӱп ийектер. Бистиҥ ижис токтодылып калган бир ороондо, каруулу акалар јарчыларга јарлаар иште бичиктер артыргыспазын деп јакару берген. Је бир пионер ака, билеркеп, ӱренишкен аайынча јарлап јӱрген. Мынаҥ улам не болды? Бир катап бу ака, анайда ок ӧскӧ јарчылар јарлаар ижин божодып ла ийерде, олорго полицейскийлер базып келген. Кӧрӧр болзо, полицейскийлер олорды бир канча ӧйгӧ истешкен болтыр. Анайып, акалардыҥ улуска артыргыскан бичиктери олордыҥ колына кирген. Бу учуралдаҥ бис неге ӱренедис? Акалардыҥ берген башкартуларын, керек дезе бойыстыҥ санаагысла этсе јакшы болор деп билдирип турза да, бӱдӱрер керек. Айдарда, бис Иегованыҥ кӧстӧп салган улузын угуп турзаас, Иегова јаантайын алкыжын берер (Евр. 13:7, 17).

18. Нениҥ учун кереги јок ээжилер тургуспас керек?

 ¹⁸ Кереги јок ээжилер тургуспагар. Аксагалдар кереги јок ээжилер тургузып турза, ака-эјелердиҥ јӱрӱмин уурладат. Юрай Каминский ака Чехословакияда токтоду болгон ӧйлӧрди эске алып, куучындайт: «Каруулу акаларды ла кӧп аксагалдарды отургызып саларда, јуундарды ла аймактарды башкарарын алган акалар јарчыларга нени эдерине, нени этпезине кӧп ээжилер тургузып баштаган». Је Иегова биске ӧскӧ улус учун сананатан јаҥ бербеген. Ээжилер тургузып турган улус, ака-эјелерди корулап турган эмес, је олордыҥ Кудайга бӱдӱп турганын башкарарга албаданат (2 Кор. 1:24).

19. 2 Летопись 32:7, 8-теги сӧстӧр бисти неде бӱдӱмјилейт?

¹⁹ Бистиҥ эҥ јаан ӧштӱ, Сатана Дьявол, Иегованыҥ ишчилерин оноҥ ло ары истежер (1 Петр 5:8; Ачыл. 2:10). Сатана ла оныҥ ишчилери Иеговага бажырарын токтодып саларга бастыра кӱчин салар. Је бис коркып та турган болзоос, Иеговага бажырарын качан да токтотпозыс (Јаҥ. т. 7:21). Иегова бистиҥ јаныста. Бистиҥ ижисти токтодып та салза, Кудай биске болужар. (2 Летопись 32:7, 8 кычырыгар *.)

20. Слер нени эдерге шӱӱп алдыгар?

²⁰ Айдарда, јаҥда отурган улуска: «Шӱӱп кӧрзӧгӧр, слерди Кудайдаҥ артык укса, Кудайдыҥ алдында чын болор бо? Нени кӧргӧнисти ле нени укканысты айтпас аргабыс јок» — деп айткан христиандардаҥ тем алактар (Ап. ижи 4:19, 20).