ДАЙАНА 80 јаштаҥ ажып калган. Оныҥ ӧбӧӧни Альцгеймер деген оорула ооруп, ӧлӧрдиҥ ӧлгӧнчӧ каргандардыҥ туразында јаткан. Анайда ок ол эки уулын јылыйтып, бойы да эмчегинде рак оорула тартышкан. Је андый да болзо, ака-эјелер оны кайда ла кӧргӧндӧ — јуунныҥ туштажуларында эмезе јарлаар иште Дайана јаантайын сӱӱнчилӱ јӱрет деп айдыжат.

Джон 43 јылга јорыкчы ишчи болуп иштеген. Мындый иш ого сӱреен јараган, бу оныҥ јӱрӱми болгон. Је Джонго оору тӧрӧӧн кижини кичеерге, бу ишти артыргызарга келишкен. Озогы таныштары курултайда ого јолыккан кийнинде, оны чек солынбаган, андый ла сӱӱнчилӱ бойы деп ајаруга алат.

Дайана ла Джонго сӱӱнчизин јылыйтпаска не болужат? Эмоциональный јанынаҥ эмезе кандый бир оорула ооруп та турзаас, сӱӱнчилӱ артарга нени эдер керек? Баалаган каруулу молјуларды бӱдӱрип болбой до барзаас, сӱӱнчисти јылыйтпаска нени эдер керек? Агару Бичикте мындый каруу берилет: «Чындык кижи Иеговада сӱӱнер» (Сар. 64:10). Бу сӧстӧрди јакшы оҥдоорго, чын сӱӱнчи недеҥ камаанду болгонын ла недеҥ камаанду эмес болгонын шӱӱжип ийектер.

Јӱрӱмде кӧп сӱӱнчилӱ учуралдар болуп јат деп, слер јӧп болбойоор. Темдектезе, бой-бойын сӱӱп турган улустыҥ тойы, эш-нӧкӧрлӧрдиҥ балалу болгоны, христиан кижиниҥ јуунда каруулу молју алганы. Бу учуралдар биске чындаптаҥ ла сӱӱнчи экелет, не дезе, билени Иегова тӧзӧгӧн, балдарлу болор арганы Иегова берген, анайда ок христиан јуунда јакылталар бӱдӱрерин база ол берген (Баш. 2:18, 22; Сар. 127:3; 1 Тим. 3:1).

Је бу сӱӱнчи узак ӧйгӧ болбой јат. Эш-нӧкӧрлӧрдиҥ бир-бирӱзи божоп калардаҥ айабас эмезе чайдам кылык эткенинде бурулу болуп калардаҥ айабас (Иез. 24:18; Ос. 3:1). Балдар кезикте ада-энезиниҥ ле Кудайдыҥ сӧзин укпай, јууннаҥ чыгардырып та салат. Мынайып ла Самуилдиҥ уулдары Иегованыҥ јасактарын бускан. Давидтиҥ кинчегинеҥ улам, оныҥ билезинде уур-кӱчтер болгон  (1 Сам. 8:1—3; 2 Сам. 12:11). Бистиҥ јӱрӱмисте мындый ла учуралдар боло берзе, сӱӱнчибис јылыйып јат.

Кудайдыҥ ижинде алган каруулу молјуларды качан бирде берип ийерге келижет. Нениҥ учун дезе су-кадык уйадай берер болор, биледе эмезе организацияда солынталар болордоҥ айабас. Мындый айалгада болгондордыҥ кӧбизи алдындагы јӱрӱмине эригип јат деп айдат.

Сӱӱнчи кыска ла ӧйгӧ болор аргалу деп кӧрӱнет. Је јӱрӱмде уур-кӱч ӧйлӧр боло берзе, сӱӱнчилӱ артар арга бар ба? Эйе бар, бу Самуилдиҥ, Давидтиҥ ле Иегованыҥ ӧскӧ дӧ ишчилериниҥ јӱрӱминеҥ кӧрӱнет. Олор јӱрӱминде кӱчтер де болордо, сӱӱнчизин јылыйтпаган.

Иисус чын сӱӱнчи ол не дегенин јакшы билген. Иеговала кожо теҥериде јӱрерде, ол «оныҥ алдында» јаантайын сӱӱнип јӱретен (Укаа 8:30). Јерде болордо, ого кӱч ченелтелер ӧдӧргӧ келишкен. Андый да болзо, Иисус Адазыныҥ табын сӱӱнип бӱдӱрген (Иоанн 4:34). Је оныҥ јӱрӱминиҥ шыралу калганчы сааттары керегинде нени айдарга јараар? Агару Бичикте мынайып бичилген: «Ого темдектелген сӱӱнчиниҥ ордына Ол уйатка каларын керекке албай, керӱ агашта кыйынды чыдажып» ӧткӧн (Евр. 12:2). Оныҥ учун чын ырыс керегинде билип аларга, Иисустыҥ айткан сӧстӧрин шӱӱп сананарга јараар.

Бир катап Иисус 70 ӱренчикти јарлаарга ийген. Оныҥ јакылтазын бӱдӱрип, олор сӱӱнчилӱ јангылап, ого улу керектер эткени ле кӧрмӧстӧрди чыгара сӱргени керегинде куучындаган. Иисус олорго: «Јелбистер слерге багып турганына сӱӱнбегер, ады-јолыгар теҥериде бичилгенине сӱӱнигер!» — деп айткан (Лука 10:1—9, 17, 20). Иегованыҥ јарадузын алары кандый ла аҥылу јакылтанаҥ учурлу ла јаан сӱӱнчи экелип јат.

Ӧскӧ учуралда Иисус албатыга јарлап турарда, бир иудей ӱй кижи оныҥ энезин сӱреен ырысту болбой деп кайкап айткан. Је Иисус бу ӱй кижини тӱзедип: «Кудайдыҥ сӧзин угуп, бӱдӱрип јӱргени кежиктӱ!» — деген (Лука  11:27, 28). Уулы эмезе кызы учун оморкооры — сӱреен јакшы сезим, је Иегованыҥ сӧзин угуп, оныла јуук колбуда болгоныҥнаҥ алган сӱӱнчи эҥ артык.

Чын, јӱректеги јаан сӱӱнчи Иегованыҥ јарадузынаҥ камаанду. Уур-кӱчтер сӱӱнчи экелбей јат, је Иегова бисти тӱҥей ле јарадып турган деп алаҥзыбай јадыс. Ченелтелерди турумкай ӧдӱп, јеҥӱ аладыс ла јӱрегис сӱӱнип чыгат (Рим. 5:3—5). Сӱӱнчи — агару тынныҥ тӱжӱми болот, бу тынды Иегова ого бӱдӱп тургандарга берет (Гал. 5:22). Бу Сарын 64:10-до: «Чындык кижи Иеговада сӱӱнер» — деп айдылганын јакшы оҥдоорго болужат.

Эмди Дайана ла Джон уур-кӱчтерде нениҥ учун ырысту артканын оҥдоп јадыс. Дайана айдат: «Иеговала кожо болзом, бойымды адазыныҥ корузында болгон баладый деп сезедим». Иегованыҥ јарадузын алып турганында Дайана нениҥ учун алаҥзыбай јат? «Иегованыҥ алкыжын кӧрӧдим, нениҥ учун дезе ол меге јарлаар ишти сӱӱнчилӱ бӱдӱрерге ийде-кӱч берет» — деп, Дайана айдат. Јорыкчы кӧрӧӧчи болуп иштеген сӱӱген ижин артыргыскан Джон ака оноҥ ло ары эрчимдӱ јарлап јат. Ого не болужат? Ол куучындайт: «1998 јылдаҥ ала мени Агару иштиҥ чыҥдыйын бийиктедип турган сургалдыҥ (Школа усовершенствования служения) ӱредӱчизи эдип кӧстӧӧрдӧ, Агару Бичикти таҥынаҥ шиҥдеерине ӧйди кӧптӧдӧ бередим». Ол бойы ла ӱйи керегинде мындый сӧстӧр айдат: «Бу јылдардыҥ туркунына кандый ла јакарулар берилерде, Иеговага иштеерге белен болгоныс, јаҥы айалгага ӱренип каларга болушкан. Бистиҥ јӱрӱмис бир де калас болбогон».

Ӧскӧ дӧ ака-эјелер Сарын 64:10-до айдылганы чын деп бӱдӱмјиленген. США-дагы Бет-Элде 30 јылдаҥ ажыра иштеп, оноҥ специальный пионердиҥ ижине кӧстӧлгӧн эш-нӧкӧрлӧрдиҥ темин кӧрӱп ийектер. «Нени сӱӱп тургаҥ, оны јылыйтып салзаҥ сеге ачу болот. Ол јогынаҥ болбой јат. Је мындый ачу бир эмеш ӧйдӧҥ ӧдӱп калат» — деп, олор оҥдогон. Бу эш-нӧкӧрлӧр бойыныҥ јууныныҥ јарчыларыла кӧптӧдӧ јарлап баштаган. Олор: «Бис Иеговага мӱргӱгенис, мӱргӱлдерис чокум болгон. Кудайдыҥ каруу берип турганын кӧрӱп, тыҥ сӱӱнгенистеҥ, кӱӱнис кӧдӱрилип туратан. Бистиҥ келгенистеҥ ала јуунныҥ кезик ака-эјелери пионердиҥ ижин баштаган, а бисте агару бичикле эки јакшы ӱредӱ табылган».

Јӱрӱм кыйын-шыра јок болбой турганынаҥ улам јаантайын сӱӱнчилӱ јӱрерге јеҥил эмес болот. Је андый да болзо, Иегова Сарын 64:10-догы сӧстӧрди бичидип салган. Кезикте бис кунугып та турзаас, је кандый ла айалгада Кудайга чындык арткандар, «Иеговада сӱӱнер» деп алаҥзыбай јадыс. Анайда ок бис Иегованыҥ айдып салган «јаҥы теҥери ле јаҥы јер» болотон ӧйди шӱӱп сананар аргалу. Бу ӧй келзе, биске толо кемдӱ эмес болгоныс салтарын јетирбес. Иегованыҥ ончо ишчилери оныҥ алкыжын кӧрӱп, ӱргӱлјиге сӱӱнип јӱрер (Иса. 65:17, 18).

Сананып ийзеер: бистиҥ су-кадыгыс бийик кеминде болор ло бис кажы ла кӱн јаҥы ийде-кӱчтӱ ойгонорыс. Бистиҥ ончо эмоциональный уур-кӱчтерис — ачу јетирип турган ончо санааркаштарыс јоголып калар. Нениҥ учун дезе «озогызы санаага да, јӱрекке де келбес» деп бир де алаҥзыбай јадыс. Божогон улус тирилзе, бис тӧрӧӧндӧристи ле јууктарысты катап кӧрӧрис. Иисус 12 јашту кызычакты тиргизип ийерде, оныҥ ада-энези «алаҥ кайкаган» деп айдылат. Анайып ла миллиондор тоолу улуста, кызычактыҥ ада-энезинде ошкош сезимдер болор (Марк 5:42). Анайып ӱзе улус чыннаҥ ла акту болуп, ӱргӱлјиге «Иеговада сӱӱнер».