1. Кӱчтер болуп турза биске кандый сӧстӧр болужар? (Сарын 118:5—7).

КУДАЙДЫҤ ишчилеринде кезикте мындый санаалар болот: «Кемнеҥ де болуш јок. Чек јаҥыскан артып калдым» (1 Каан. 19:14). Мындый сезимдер слерде де бар болзо, Иегованыҥ берген сӧзи болужар. Ол мынайып айткан: «Сени артырбазым, сени таштабазым» (Евр. 13:5, 6). Мындый сӧстӧрди апостол Павел Иуда јериндеги ака-эјелерге б. э. 61-чи јылы кирезинде бичиген. Павелдиҥ сӧстӧри 118-чи Сарынды бичиген кижиниҥ сезимдерине тӱҥей. (Сарын 118:5—7 кычырыгар *.)

2. Бис бу јӧрмӧлдӧ нени шӱӱжерис, нениҥ учун?

² Павел, сарнаачы ла чылап, Иегованыҥ болужын јаантайын алып туратан. Темдектезе, ол Еврейлерге самара бичиирдеҥ эки јыл кире озо коркышту јаан јотконго табарткан (Ап. ижи 27:4, 15, 20). Иегова ого бу да ӧйдӧ, мынаҥ да озо ӧйдӧ болушкан. Мындый ӱч аргала: 1) Иисус ла ангелдер ажыра; 2) јаҥда отурган улус ажыра; 3) ака-эјелер ажыра. Бу јӧрмӧлдӧ Иегованыҥ Павелге болушканын шӱӱжип, бис бойыстыҥ бӱдеристи тыҥыдып аларыс.

3. Апостол Павел нени билерге кӱӱнзеген, нениҥ учун?

³ Павел б. э. 56-чы јылы киреде Иерусалимдеги ӧргӧӧгӧ келген. Иудейлер оны ӧргӧӧнӧҥ сӱртеп чыгарала, ӧлтӱрерге сананган. Эртезинде оны Синедрионго апаргандар. Андагы улус оны јара тартарга тургылады (Ап. ижи 21:30—32; 22:30; 23:6—10). Оныҥ учун Павел мынайып сананган болор: «Канчазын мынайып шыралап јӱргейим не?»

4. Иегова Павелге Иисус ажыра канайып болушкан?

⁴ Олор Павелге канайып болушкан? Павел каруулда отурарда Иисус оныҥ кӱӱнин кӧдӱрерге мындый сӧстӧр айткан: «Јалтанба, Мен керегинде Иерусалимде керелегениҥ чилеп, сеге Римде де керелеер керек» (Ап. ижи 23:11). Бу сӧстӧр Павелдиҥ кӱӱнин кӧдӱрген. Мынайып ол: «Римге эзен-амыр једип баратан эмтирим» — деп, оҥдоп ийген. Мынаҥ ол бойын адазыныҥ колында деп сескен.

5. Иегова ангел ажыра Павелге канайып болушкан? (Кадарындагы јурукты кӧрӱгер.)

⁵ Павелде база кандый кӱчтер болгон? Эки јыл ӧдӧ берерде оны Италияга аткарып јат. Јолой коркышту тыҥ јоткон башталган. Тонокчылар ла ондогы улус тыҥ коркып, божоп каларыс деп сананган. Је Павел бир де коркыбаган. Нениҥ учун дезе ого тӱнде ангел келип, мынайып айткан: «Коркыба, Павел! Сен каган алдына барып турар учурлу. Је бат, Кудай сеге кожо јӱзӱп отурган улусты ончозын берди». Павел бу сӧстӧрди керептеги улуска куучындап берди. Канайып эки јыл кайра Иисус Павелдиҥ кӱӱнин кӧдӱрген, анайып ла ангел оныҥ кӱӱнин кӧдӱрип салды. Олордыҥ айтканыла, Павел Римге эзен-амыр једип барды (Ап. ижи 27:20—25; 28:16).

6. Иисустыҥ кандый сӧстӧри биске ийде-кӱч берет? Јартап беригер.

⁶ Олор биске канайып болужат? Иисус Павелге де болушкан, биске де болужар. Нениҥ учун дезе ол ӱренчиктерине мынайып айткан: «Ончо кӱндердиҥ туркунына, чак тӱгенгенче Мен слерле кожо» (Матф. 28:20). Бу сӧстӧр биске кӱч ӧйлӧрдӧ ийде-кӱч берет. Темдектезе: јуук кижи божозо, јажыс јаанай берзе эмезе депрессияга алдыртсаас. Иисустыҥ  «ончо кӱндердиҥ туркунына» бисле кожо болотоны, коркышту кӱч айалгаларда биске јаан болуш болот (Матф. 11:28—30).

7. Ачылта 14:6-ла болзо, Иегова биске канайып болужат?

⁷ Агару Бичикте Иегова биске ангелдер ажыра болужат деп айдылат (Евр. 1:7, 14). Темдектезе, олор биске сӱӱнчилӱ јарды «кандый ла укка, ӱйеге, тилге ле калыкка јарлаарга» болужат (Ачылта 14:6 кычырыгар; Матф. 24:13, 14).

8. Иегова Павелге јаҥда отурган улус ажыра канайып болушкан?

⁸ Олор Павелге канайып болушкан? Ӧрӧги айдылганыла, б. э. 56-чы јылы киреде Иисус апостол Павелге Римге једип барар деп айткан. Је Иерусалимде иудейлер оны ӧлтӱрерге сананган. Мыны Римниҥ черӱзиниҥ бажы Клавдий Лисий угуп ийген. Оныҥ учун Павелди Иерусалимнеҥ Кесарияга эзен-амыр једип барзын деп, бойыныҥ канча јӱс јуучылын ийип јат. Бу јолдыҥ узуны 105 километр кире болгон. Кесарияда оны Феликс башкараачы Иродтыҥ байканында каруулда туткан. Анайып иудейлер Павелди ӧлтӱрип болбогондор (Ап. ижи 23:12—35).

9. Фест башкараачы Павелге канайып болушкан?

⁹ Б. э. 58-чи јылында Павел Кесарияда каруулда отурганча болгон. Бу ӧйдӧ, Феликстиҥ ордына јаҥга Фест келген. Иудейлер дезе, Павелди Иерусалимдеги јаргыга экелзин деп сурадылар. Је Фест болбогон. Нениҥ учун дезе ол «Павелди [иудейлер] јолдо тозоло» ӧлтӱрерге турган деп билип ийген болор (Ап. ижи 24:27—25:5).

10. Павел каганга барарга турарда Фест кандый каруу берди?

¹⁰ Павелди Кесарияда јаргылап баштагылады. Фест иудейлердиҥ алдына јакшы кӧрӱнерге, Павелдеҥ: «Иерусалим дӧӧн барарга тургаҥ ба?» — деп сураган. Је Павел: «Каганныҥ јаргызын некеп турум!» — деген. Нениҥ учун дезе Павел иудейлер оны Иерусалимде ӧлтӱргилеп салар деп билер болгон. А ого дезе, Римге једеле ондо јарлаар керек. Фест Павелдиҥ каруузын угала: «Каганныҥ јаргызын некеген болзоҥ, каганга атанарыҥ» — деген. Анайып Павел тирӱ артып калды (Ап. ижи 25:6—12).

11. Павел судурчы Исаияныҥ кандый сӧстӧрин эске алган болор?

¹¹ Италияга атанардаҥ озо Павелге судурчы Исаияныҥ сӧстӧри санаазына кирген болор. Ол айткан: «Слердиҥ кара санаагар да, амадугар да бӱтпес! Нениҥ учун дезе Кудай бисле кожо!» (Иса. 8:10). Бу сӧстӧрдӧҥ Павел Иегова оны таштабас деп бӱдӱмјиленген. Анайда ок болотон ченелтелерди ӧдӧтӧн ийде-кӱч алган.

12. Юлий апостол Павелге канайып баштанган, мынаҥ Павел нени кӧрӱп јат?

¹² Айдарда, б. э. 58-чи јылында Павелди Италияга апарып јат. Јолой оны каруулдазын деп, јӱс башчыны — Юлийди — тургускан. Мынаҥ ары Павелдиҥ јӱрӱми бу кижиниҥ колында болды. Павелге оныҥ канайып баштанып турганы эртезинде ле кӧрӱнип  келген. Олордыҥ баштапкы ла токтогон јеринде, Юлий апостол Павелди најыларына барып келзин деп, божодып ийет. А база бир учуралда, кереп оодылып јадарда, јуучылдар улусты кача бербезин деп, олорды ончозын ӧлтӱрер керек деп шӱӱштилер. Је Юлий олорды токтодып алды. Мынаҥ Павел Иегованыҥ болужын кӧрӱп јат (Ап. ижи 27:1—3, 42—44).

13. Иегова јаҥда отурган улусты канайып тузаланар аргалу?

¹³ Олор биске канайып болужат? Соломон каан мындый сӧстӧр айткан: «Каанныҥ јӱреги Иегованыҥ колында. Ол оны суу агысканы чылап, кайдӧӧн керек ары ла ууландырып ийет» (Укаа 21:1). Бу сӧстӧрди канайып оҥдоор? Темдектезе, улус сууны керектӱ јерге агызарга, канал каскылайт. А Иегова улустыҥ санаазын солыырга, агару тынын тузаланат. Анайып Иегова агару тыныныҥ болужыла јаҥда отурган улустыҥ санаазын бойыныҥ албатызына болужарга солып ийер аргалу. (Ездра 7:21, 25, 26 тӱҥдештиригер.)

14. Апостолдордыҥ ижи 12:5-ле болзо, бис кемдер учун мӱргӱӱр аргалу?

¹⁴ Бис нени эдер аргалу? Бистер «каандар ла јаҥда тургандар» учун мӱргӱӱр аргалу. Анчада ла олор Иегованыҥ Керечилериниҥ ижин буудактарга јатса (1 Тим. 2:1, 2; Неем. 1:11). Биске баштапкы чактыҥ христиандары чылап, тӱрмедеги ака-эјелер учун мӱргӱӱр керек (Апостолдордыҥ ижи 12:5 кычырыгар; Евр. 13:3). Анайда ок тӱрмениҥ каруулчылары учун мӱргӱӱр керек. Тӱрмениҥ каруулчыктары, Павелге јалакай баштанган Юлий чилеп, бистиҥ ака-эјелерге база јымжак баштанзын деп мӱргӱӱрге јараар (Ап. ижи 27:3).

15, 16. Иегова Павелге Аристарх ла Лука ажыра канайып болушкан?

¹⁵ Ака-эјелер канайып болушкан? Павел Рим барып јадарда, Иегова ого ака-эјелер ажыра болушкан. Кезик темдер кӧрӱп ийектер.

¹⁶ Павел Кесариянаҥ атанып јадарда, Аристарх ла Лука деп најылары  кожо барган *. Олор экӱ, Павелге кӧрӧ, Римге једер бе, јок по деп билбес болгон. Павел олорды тирӱ артар деп, јӱк талайда јоткон башталарда айткан. Је андый да болзо, бу јалтанбас акалар кӱч ӧйдӧ најызын артыргыспаган. Апостол Павел мындый ӧйдӧ најылары оныла кожо болгонына Иеговага јаан быйанду болгон (Ап. ижи 27:1, 2, 20—25).

17. Иегова Павелге ака-эјелер ажыра канайып болушкан?

¹⁷ Бу јол-јорыкта Иегова Павелге ака-эјелер ажыра болушкан. Темдектезе, кереп Сидон деп портовый калада токтоордо, Юлий апостол Павелге најыларына јолугарга јараду берген. Оноҥ Путеолы деп калага келерде, Павел, Аристарх ла Лука ака-эјелерди таап алала, олордо јети кӱн айылдагандар. Ондогы ака-эјелер олорды јакшы кӱндӱлеген. А Павел олорго јарлаар ижиниҥ јилбилӱ учуралдарын куучындаган. (Ап. ижи 15:2, 3 тӱҥдештиригер.) Анайып олор ака-эјелердеҥ оморкоду алып, оноҥ ло ары јолго атангандар (Ап. ижи 27:3; 28:13, 14).

18. Нениҥ учун Павел Иеговага быйанду болгон?

¹⁸ Јолой барып јадала, Павелге ӱч јыл кайра бичиген сӧстӧри санаазына кирген болор. Ол Римдеги јуунга мындый сӧстӧр бичиген: «[Мен] слерге кӧп јылдардыҥ туркунына келерге кӱӱнзеге[м]» (Рим. 15:23). Је ол Римге мынайып келер деп бодобогон. Оныҥ учун ака-эјелер оны уткыырга удура келерде, ол сӱреен тыҥ сӱӱнген. Павел олорды кӧрӧлӧ, кӱӱни кӧдӱрилип, Иеговага быйанын айткан (Ап. ижи 28:15). Анайып Павел ойто ло катап Иегованыҥ болужын кӧргӧн.

19. 1 Петр 4:10-ло болзо, Иегова бис ажыра ака-эјелерге канайып болужар аргалу?

 ¹⁹ Бис нени эдер аргалу? Јуундагы ака-эјелер керегинде сананып кӧрӱгер. Олордыҥ та кемизи де ооруп турган, јуугын јылыйткан эмезе ӧскӧ кандый бир кӱчтерге табартып турган болор. Андый ака-эјелерге канайып болужарын билип аларга, Иегованаҥ болуш сурагар. Слердиҥ болужыгар олордыҥ кӱӱнин кӧдӱрер. (1 Петр 4:10 кычырыгар.) * Мынаҥ улам андый ака-эјелер «сени артырбазым, сени таштабазым» деп сӧстӧрди эске алып, Иегованыҥ сӱӱжин кӧрӧр. Мыны кӧрӱп, слер де сӱӱнереер.

20. «Кайракан — мениҥ болушчым» деп, нениҥ учун алаҥзыбай јадыс?

²⁰ Бистиҥ јӱрӱмисте Павелде, Аристарх ла Лукада болгон јоткондый кӱчтер база болуп јат. Је бис коркыбай јадыс, нениҥ учун дезе Иегова бисле кожо. Ол биске Иисус ла ангелдер ажыра болужып јат. Анайда ок агару тыныла ака-эјелер ажыра болужат. Керек болзо, јаҥда отурган улус та ажыра болужын јетирип јат. Оныҥ учун бис Павел ле чилеп алаҥзыбай јадыс: «Кайракан — мениҥ болушчым, коркыыр немем јок. Кижи меге нени эдер?» (Евр. 13:6).