1. Матфей 28:18—20-ле болзо, Иисус кандый јакару берген?

ИИСУС тирилген кийнинде Галилейде ӱренчиктерине кӧрӱнген. Ол ӱренчиктерине сӱреен јаан учурлу јакару берген. Бу јакару Матфей 28:18—20-де (кычырыгар) бичилген.

2. Бис бу јӧрмӧлдӧ нени шӱӱжерис?

² Бӱгӱнги кӱнде Кудайдыҥ кажы ла ишчизине Иисустыҥ јакылтазын база бӱдӱрер керек. Бис бу јакарула колбой мындый ӱч сурак шӱӱжип кӧрӧрис. 1) Ӱренип турган кижини Христостыҥ јакарузын бӱдӱрзин деп, канайып ӱредер керек? 2) Ӱренип турган кижиге кӧгӱс јанынаҥ ӧзӧргӧ јуун канайып болужар аргалу? 3) Јууннаҥ ырап калган ака-эјелерге ӱренчиктер белетеер иште ойто турушсын деп, канайып болужар? *

3. Иисустыҥ биске берген јакарузыла колбой, нени ундыбас керек?

³ Иисус биске јарт башкарту берип салган. Бис улусты оныҥ јакаруларына ӱредер учурлу. Је биске бир јаан учурлу немени ундыбас керек. Иисус: «Барыгар, слерге јакарганымды ончозын ӱредигер» — деп айткан эмес, је: «Барыгар, слерге јакарганымды ончозын бӱдӱрерге ӱредигер» — деп айткан. Айдарда, ӱренип турган улузыска јӱк ле билгирлер берер керек эмес, је алган билгирлерин  тузаланарга ӱредер керек. Нениҥ учун?

4. Јакаруны бӱдӱрери дегени нени темдектейт? Тем куучындап беригер.

⁴ Јакаруны бӱдӱрери дегени — оны сӧсуккур болуп эдерин темдектейт. А ӱренип турган кижини Христостыҥ јакарузын бӱдӱрзин деп канайып ӱредер? Мыны оҥдоорго бир тем кӧрӱп ийектер. Темдектезе, инструктор улусты машинала маҥтадарга канайып ӱредет? Озо ло баштап ол улусты јолдо маҥтадатан ээжилерге ӱредет. Је бу ээжилерди оҥдоорго, јӱк билгирлер ас болуп јат. Оныҥ учун инструкторлор ӱренип турган улусла кожо маҥтадып, бу ээжилерди канайып тузаланарын кӧргӱзип јат. Бу темнеҥ бис неге ӱренедис?

5. а) Биске ӱренип турган улузысты, Иоанн 14:15 ле 1 Иоанн 2:3-ле болзо, неге ӱредер керек? б) Ӱренип турган улуска библиялык принциптерди тузаланарга канайып болужар?

⁵ Бис кижиле ӱредӱ ӧткӱрип турала, ого Кудайдыҥ некелтелерин јартап јадыс. Је биске мынаҥ да ӧскӧ неме эдер керек. Кижини алган билгирлерин тузаланзын деп ӱредер керек. (Иоанн 14:15; 1 Иоанн 2:3 кычырыгар.) Темдектезе, слерге кандый бир библиялык принцип школдо, иште, амыраар ӧйдӧ канайып болушканын куучындап береер. Кудайдыҥ Сӧзиндеги јӧптӧр слерди јеткердеҥ канайып корулаганын эмезе ойгор јӧп чыгарарга канайып болушканын куучындап беригер. Анайда ок ӱренип турган кижиле мӱргӱп јаткан ӧйдӧ, Иегованы ого ойгор јӧптӧр чыгарарга болушсын деп сурагар (Иоанн 16:13).

6. Ӱренип турган кижи Иисустыҥ јакарузын бӱдӱрерге ӱренип алзын деп, биске база нени эдер керек?

⁶ Је ӱренип турган кижи Иисустыҥ јакарузын бӱдӱрерге ӱренип алзын деп, биске база нени эдер керек? Оны ӱренчиктер белетеер ишке турушсын деп кӱӱнзедер керек. Кӧп саба улус јарлаарга коркып јат, оныҥ учун кижи библиялык чындыктарды оҥдоп турзын деп болужып турзаас, биске чыдамкай болор керек. Качан библиялык чындыктар кижиниҥ јӱрегин томултып ийзе, ол јарлаарга кӱӱнзей берер. Је кижи сӱӱнчилӱ јарды јарлаарга кӱӱнзезин деп, бис нени эдер аргалу?

7. Бис ӱренип турган кижиге сӱӱнчилӱ јарды јарлаарга кӱӱнзезин деп, канайып болужарыс?

⁷ Ӱренип турган кижиге мындый сурактар берип кӧрӱгер: «Слерге Агару Бичиктеҥ алган билгирлер тузалу болгон бо? Улуска бу билгирлерди куучындаар керек пе? Олорго слер канайып болужар эдигер?» (Укаа 3:27; Матф. 9:37, 38). Анайда ок ого јарлаар иштиҥ јепселдерине кирип турган буклеттерди кӧргӱзип, оныҥ најыларына, тӧрӧӧндӧрине, кожо ӱренип турган улузына кажызы јилбилӱ болор деп сурагар. Ӱренип турган кижи бу буклеттердиҥ кезигин улуска канайып берер эди деп, слерге кӧргӱзип берзин. Качан ол сууга чӧҥӱрилбеген јарчы болуп калза, бис ого јарлаарга оноҥ ло ары болужарыс (Эккл. 4:9, 10; Лука 6:40).

8. Ӱренип турган кижиге Кудайды ла улусты сӱӱрге нениҥ учун ӱренер керек? (« Ӱренип турган кижиге Кудайды сӱӱзин деп канайып болужар?» деген рамканы кӧрӱгер.)

⁸ Иисус бистерге улусты ӱредип тура, оныҥ јакылталарыныҥ ончозын бӱдӱрзин деген. Бу јакарулардыҥ тоозына јаан учурлу эки јакылта база кирет: Кудайды ла улусты сӱӱп турары (Матф. 22:37—39). Бу эки јакылта ӱренчиктер  белетеер ишле, јарлаар ишле колбулу. Нениҥ учун дезе бистер Кудайды ла улусты сӱӱгенистеҥ улам јарлаар ишке туружып, ӱренчиктер белетейдис. Је Агару Бичикти ӱренип турган кезик улус јарлаар иштеҥ коркып јат. Бис олорды: «Иегова слерге коркыбаска болужар» — деп бӱдӱмјилеер аргалу (Сар. 18:1—3; Укаа 29:25). Бу јӧрмӧлдӧги рамканыҥ болужыла бис ӱренип турган улуска Кудайга сӱӱжин тыҥыдарга болужарыс. А јуун канайып болужар аргалу?

9. Ӱренчикке маҥтадып ӱренип аларга не болужып јат?

⁹ Је эмди машинала јаҥы ла маҥтадарга ӱренип турган кижиниҥ темин база катап кӧрӱп ийектер. Мында ӱренчик јӱк ле инструкторын угуп турган эмес, је ӧскӧ дӧ улус канайып маҥтадып турганын кӧрӱп јат. Темдектезе, та кем де кижиниҥ кӧзин кылбыктырбаска дальний сведин ближнийге кӧчӱрет. А кемизи де коштой бараткан машинага ӧскӧ јанына кӧчӱп алзын деп, јол берет. Ӱренчик мыны кӧрӱп, маҥтадарга ӱренип јат.

10. Ӱренип турган кижиге кӧгӱс јанынаҥ ӧзӧргӧ не болужар?

¹⁰ Агару Бичикти ӱренип, јӱрӱмниҥ јолыла барарга турган кижиле андый ла болот. Ого јаҥыс ла ӱредӱ ӧткӱрип турган кижини угар керек эмес, је Иегованыҥ ӧскӧ дӧ ишчилерин кӧрӧр керек. Оныҥ учун ого јуунныҥ туштажуларына јӱрер керек. Туштажуларга јӱрзе, ол кӧгӱс јанынаҥ тӱрген ӧзӱп, Иеговага сӱӱжин тыҥыдар (Ап. ижи 15:30—32). Анайда ок Каандыктыҥ Туразында ака-эјелерле таныжар. Кажы бир ака-эјениҥ јӱрӱми эмезе айалгазы ӱренип турган кижиниҥ јӱрӱмине эмезе айалгазына тӱҥей болордоҥ айабас. Мынайып ӱренип турган кижи јуунда чын христиан сӱӱшти кӧрӱп јат. Кезик учуралдар кӧрӱп ийектер.

11. Ӱренип турган кижиге јуундагы ака-эјелерле танышканынаҥ кандый туза болот?

¹¹ Агару Бичикти балдарын јаҥыскан чыдадып турган ӱй кижи ӱренип турган болзын. Ол јуунныҥ туштажузына келип, балдарын анайып ла јаҥыскан чыдадып турган эјеле таныжып јат. Ол эјениҥ балдарын јуунга кожо экелип турганы байагы ӱй кижиниҥ јӱрегине тийет. Эмезе мындый учурал: Агару Бичикти ӱренип турган эр кижи таҥкызын таштап болбой турган болзын. Ол Каандыктыҥ Туразына келип, таҥкылаган акала таныжып јат. Је ол ака Иегованы тыҥ сӱӱгенинеҥ улам, таҥкызын таштап ийген (2 Кор. 7:1; 2 Кор. 4:7). Оныҥ учун: «Сен де таштап ийериҥ» — деп, ол ӱренип турган эр кижиге айткан. Мыны угуп, байагы эр кижиниҥ кӱӱни кӧдӱрилип: «Мен де таҥкыны таштап ийетен эмтирим!» — деп сананат. База бир учурал Агару Бичикти ӱренип турган јиит кысла болзын. Ол јуунныҥ туштажузына келип, бойыла јажыт сыйынла таныжат. Ол сыйынныҥ Иеговага сӱӱнчилӱ иштеп турганын кӧрӱп, нениҥ учун јаантайын сӱӱнчилӱ болуп турганын билип аларга кӱӱнзейт.

12. Јуунныҥ кажы ла кижизи ӱренип турган кижиге канайып болужар аргалу?

¹² Айдарда, Агару Бичикти ӱренип турган кижи јуундагы башка-башка ака-эјелерле таныжып турза, Кудайды ла јуугыҥды сӱӱ деген Иисустыҥ јакылтазын јакшы бӱдӱрерге ӱренип јат (Иоанн 13:35; 1 Тим. 4:12). Анайда ок ӱренип турган кижи јуундагы андый ла кӱчтерлӱ ака-эјелерле таныжып: «Мен де Христостыҥ ӱренчиги болор аргалу  эмтирим» — деп бӱдӱмјиленип јат (Јаҥ. т. 30:11). Јуунныҥ кажы ла кижизи ӱренип турган кижиге кӧгӱс јанынаҥ ӧзӧргӧ болужар аргалу (Матф. 5:16). Андый улуска болужарга слер нени эдедигер?

13, 14. Иисус санааркап калган апостолдорына канайып баштанган?

¹³ Бис ака-эјелерге јарлаар ишке ойто турушсын деп, болужарга кӱӱнзейдис. Олорго болужарга, биске Иисустыҥ теми болужар. Оныҥ учун санааркап калган апостолдорго Иисустыҥ канайып болушканын кӧрӱп ийектер.

¹⁴ Иисусты божоор алдында апостолдоры таштайла, ончозы кача берди (Марк 14:50; Иоанн 16:32). Мынаҥ улам ол ӱренчиктерин јаман кӧргӧн бӧ? Јок. Нениҥ учун дезе ол ӱренчиктери болгон ӱй улуска мындый сӧстӧр айткан: «Коркыбагар... Барып карындаштарыма айдыгар, Галилей дӧӧн барзын. Мени анда кӧргӱлеер» (Матф. 28:10). Бу сӧстӧрдӧ Иисус ӱренчиктерине «карындаштарым» деп баштанат. Айдарда, ол олордоҥ чӧкӧбӧгӧн, олорды Адазы ла чылап килеп, јаманын таштаган (2 Каан. 13:23).

15. Јарлабай барган ака-эјелерге бисте кандый сезимдер болот?

¹⁵ Бис Иисус ла чылап јарлабай барган ака-эјелер учун санааркап јадыбыс. Нениҥ учун дезе олор бистиҥ ака-эјелерис ле бис олорды сӱӱп јадыбыс. Олордыҥ алдындагы ӧйлӧрдӧ канайып эрчимдӱ јарлаганын ундыбаганыс (Евр. 6:10). Бис олорго тыҥ санап калганыс (Лука 15:4—7). Иисустаҥ тем алып, олорго канайып болужарыс?

16. Јууннаҥ ырап калган ака-эјелерге канайып болужарыс?

¹⁶ Јуунныҥ туштажуларына кычырыгар. Иисус санааркап калган апостолдорын аҥылу туштажуга кычырган (Матф. 28:10б; 1 Кор. 15:6). Айдарда, биске де јууннаҥ ырап калган ака-эјелерди јуунныҥ туштажуларына кычырар керек. Је олорды јаҥыс катап кычырзаас, олор келбестеҥ де айабас. Оныҥ учун олорды кӧп катап кычырар керек. Канайып Иисус келген ӱренчиктерине сӱреен тыҥ сӱӱнген, анайып бис те јуунныҥ туштажуларына келген ака-эјелерге сӱӱнип јадыс (Матф. 28:16; Лука 15:6 тӱҥдештиригер).

17. Јууннаҥ ырап калган ака-эјени канайып уткыыр керек?

¹⁷ Олорды јылу уткыгар. Иисус туштажуга келген ӱренчиктерин эби-јок айалгага тургуспай, карын олорго јууктап, куучын баштаган (Матф. 28:18). Бис те јуунга келген ака-эјеге бойыс јууктаар учурлу. Је слер андый кижиге кандый сӧстӧр айдатанын билбей турган болороор. Бу јанынаҥ бир де санааркабагар. Келген ака-эјеге: «Сени кӧрӧргӧ кандый сӱӱнчилӱ!» — деп айдарга јараар. Анайып кижини эби-јок айалгага тургуспазыс.

18. Јууннаҥ ырап калган ака-эјелерге сӱӱжисти канайып кӧргӱзерис?

¹⁸ Сӱӱжигерди кӧргӱзигер. Иисустыҥ ӱренчиктери Каандык керегинде сӱӱнчилӱ јарды бастыра јердиҥ ӱстине јарлап болбос деп санангылаган болор. Је Иисус олорго: «Ончо кӱндердиҥ туркунына... Мен слерле кожо» — деп айткан (Матф. 28:20). Иисустыҥ сӧстӧри олорго болушкан ба? Эйе. Нениҥ учун дезе олор «кажы ла кӱн... улус ӱредерин токтотпой... Сӱӱнчилӱ Јарды айдып јӱрдилер»  (Ап. ижи 5:42). А јууннаҥ ырап калган ака-эјелер јарлаарга база коркып тургылаган болор. Оныҥ учун биске олорго болужар керек. Олорго сӱӱжигерди кӧргӱзип, јарлаар ишке кычырыгар. Качан олор јарлаарга кӱӱнзей берзе, кожо јарлап барып келигер. Олор бу болуш учун быйанду болор. Јууннаҥ ырап калган улуска ака-эјелерге чилеп кӧрӱп турзаар, олор јуунла кожо јарлап баштаар. А бого бастыра јуун сӱӱнер.

19. Бис акту јӱректеҥ нени кӱӱнзейдис? Нениҥ учун?

¹⁹ Јарлаар ишти бис база канча кире бӱдӱрерис? Иисустыҥ сӧстӧриле болзо, «чак тӱгенгенче» бӱдӱрерис (Матф. 28:20). А бу ишти чак тӱгенгенче бӱдӱрип болорыс па? Эйе. Бис чыннаҥ ла «ӱргӱлји јӱрӱм аларга турган улусты» бедиреерге, бойыстыҥ ӧйисти, ийде-кӱчисти ле акча-манадысты берерге кӱӱнзейдис (Ап. ижи 13:48, ЈТ). Анайып, «Мениҥ курсагым — Мени Ийгенниҥ табыла эдери ле Оныҥ керегин бӱдӱрери» — деп айткан Иисустаҥ тем алзаас, оныҥ јакылтазын бӱдӱрип саларыс (Иоанн 4:34; 17:4; Иоанн 20:21). Бу ишти бис акту јӱректеҥ бӱдӱрерге кӱӱнзейдис. Анайда ок бу ишке бисле кожо ӧскӧ дӧ улус, ол тоодо јууннаҥ ырап калган ака-эјелер де, турушсын деп база кӱӱнзеп јадыс (Матф. 24:13).

20. 2 Коринфтегилерге 4:7-ле болзо, бис Иисустыҥ јакылтазын кемниҥ болужыла бӱдӱрип саларыс?

²⁰ Иисустыҥ јакылтазын бӱдӱрерге јеҥил эмес. Је бис јаҥыскан эмезис. Иисус биске болужар деп, сӧзин берген. Анайда ок бис Иеговала кожо иштеп јадыс (1 Кор. 3:9). Ол биске ийде-кӱчин берер. Олордыҥ болужыла бу ишти учына јетире бӱдӱрип саларыс. Мындый иш биске сӱреен јаан сӱӱнчи ле кӱндӱ болуп јат! (2 Коринфтегилерге 4:7 кычырыгар.)