1. Кӧп улус Агару Бичиктиҥ ойгорына кандый кӧрӱмдӱ болот? (Укаа сӧстӧр 1:20, 21).

 КӦП ороондордо Иегованыҥ сӱӱнчилӱ ишчилери улусту јерлерде туруп, улуска бичиктер бергилейт. Слер мындый јилбилӱ јарлаар ишке турушканаар ба? Эйе болзо, Укаа сӧстӧрдӧ бичилгени санаагарга кирген болор: ойгор дезе кӧп улусту јерлерде бастыра улусты оныҥ јӧптӧрин уксын деп кычырат. (Укаа сӧстӧр 1:20, 21 кычырыгар.) «Чын ойгор» — Иегованыҥ ойгоры — Агару Бичикте ле бистердиҥ бичиктерде бар. А јӱрӱмниҥ јолыла барарга турган улуска Иегованыҥ ойгоры сӱреен керектӱ. Оныҥ учун кезик улус бисти угуп, кандый бир бичикти кычырарга алза, биске јарап јат. Је кезик улус Агару Бичик керегинде нени де угар кӱӱни јок. А кезиги биске каткырыжып јат. Нениҥ учун дезе Агару Бичикти эскирип калган дежет. Анайда ок Агару Бичиктиҥ нормаларын јаратпай да турган улус бар. Олордыҥ санаазыла болзо, андый нормаларла јӱрӱп турган улус бийиркек ле ӧйинеҥ ӧткӱре кату. Андый да болзо, Иегова оныҥ ойгорын кажы ла кижи уксын деп кӱӱнзейт. Ол мыны канайып эдет?

2. Чын ойгорды кайдаҥ таап аларга јараар, је улустыҥ кӧрӱми кандый?

² Иегова Сӧзин, Агару Бичикти, бастыра јерде улуста болзын деп кичееп салган. Бистиҥ Агару Бичикти јартап турган бичиктер керегинде нени айдарга јараар? Иегованыҥ болужыла бу бичиктер 1 000-наҥ ажыра тилдерге  кӧчӱрилип јат. Иегованыҥ ойгорын угуп турган улус — Агару Бичикти кычырып, билгенин тузаланып турган улус — ырысту болот. Је бистиҥ ӧйдиҥ кӧп саба улузы Иегованы угарга кӱӱнзебей јат. Јӧп чыгарарга олор бойына эмезе ӧскӧ улуска иженет. Керек дезе олор бисти јабыс та кӧрӧт, нениҥ учун дезе бис Агару Бичик аайынча јӱрӱп јадыс. Бу јӧрмӧлдӧ нениҥ учун улус андый кӧрӱмдӱ болуп турганын билип аларыс. Је озо баштап, бис Иегованыҥ ойгорынаҥ канай ӱренер аргалу деп суракты кӧрӱп ийектер.

3. Чыннаҥ ла ойгор болорго нени эдер керек?

³ Ойгор болоры — билгирлерди нени-нени эдердеҥ озо чын тузаланып билери. Је чын ойгор болоры дегениниҥ учуры оноҥ до тереҥ. Агару Бичикте мынайда айдылган: «Ойгор болоры — Иегованаҥ айап турарынаҥ башталат. Агару Кудайды билген кижи керсӱ болор» (Укаа 9:10). Айдарда, кандый бир алтам эдерге турзаас, Иегованыҥ кӧрӱмиле башкарынар керек. Је оныҥ кӧрӱмин кайдаҥ билип аларыс? Агару Бичикте ле ого тӧзӧлӧнгӧн бичиктерди ӱренер керек. Мынайып эткен кижи чыннаҥ ла ойгор болор (Укаа 2:5—7).

4. Чын ойгорды биске јӱк ле Иегова берер деп нениҥ учун айдарга јараар?

⁴ Чын ойгорды биске јӱк ле Иегова берип турган (Рим. 16:27). Нениҥ учун анайып айдарга јараар? Баштапкы шылтагы, Иегова — Јайаачы. Ол бойыныҥ јайаандарын сӱреен јакшы билер (Сар. 104:24). Экинчизи, ол ойгор јогынаҥ нени де этпей јат (Рим. 11:33). Ӱчинчизи, оныҥ берген ойгор јӧптӧри биске јаантайын тузалу болот (Укаа 2:10—12). Оныҥ учун чыннаҥ ла ойгор болорго турган болзоос, нени-нени эдердеҥ озо бу ӱч шылтакты ундыбай турар керек.

5. Ойгорды Иегова берип турган деп бӱтпези неге экелет?

⁵ Бистиҥ кӧп саба јарлап турган улус, ар-бӱткенде ӱзе неме јакшы ла јараш эдилген деп јӧпсинип јат. Је бу ок ӧйдӧ олор Кудай — Јайаачы деп бӱтпейдилер. Кезиктери Кудайга бӱдӱп јат, је библиялык нормалар эскирип калган ла бис бойыстыҥ санаабысла јӱрерис деп айдыжат. Бу мындый кӧрӱм-санаа неге экелди? Улус Кудайдыҥ ойгорын јектеп, бойына иженерде, олордыҥ јӱрӱми јакшы болды ба? Олор ырысту болуп калды ба? Келер ӧйгӧ олордо ижемји бар ба? Айландыра јӱрӱмди кӧрӱп, Агару Бичиктиҥ бу сӧстӧри чын деп оҥдоп јадыс: «Иегованыҥ ойгоры, јӧби эҥ артык» (Укаа 21:30). Оныҥ учун биске Иегованаҥ ойгор сураар керек! Је кӧп саба улус мынайып этпей јат. Нениҥ учун?

6. Чын ойгорды кандый улус јектеп јат? (Укаа сӧстӧр 1:22—25).

⁶ «Чын ойгор тышкары тыҥ куучындап» турза, кӧп улус укпай јат. Агару Бичикте айдылганыла, ойгорды керексибей турган ӱч бӧлӱк улус бар: «бӱдӱҥкейлер», «электеечилер» ле «тенектер». (Укаа сӧстӧр 1:22—25 кычырыгар.) Олор нениҥ учун Кудайдыҥ ойгорын керексибей турган ла биске олорго тӱҥей болбоско нени эдер керек деп кӧрӱп ийектер.

7. Кезик улус нениҥ учун «бӱдӱҥкей» болорго кӱӱнзейт?

⁷ «Бӱдӱҥкей» улусты тӧгӱндеп саларга ол эмезе санаазын булгай куучындап  саларга јеҥил (Укаа 14:15). Јарлаар иште бис андый улуска кӧп туштап јадыс. Темдектезе, канча миллион улус кудай јаҥдарга эмезе политикалык башчыларга тӧгӱндедип јӱргенин билип ийеле, коркышту тыҥ санааркаган. Је бӱдӱҥкей улустыҥ кезиги Укаа сӧстӧр 1:22-де бичилгени чилеп, андый јолды бойлоры талдагандар. Олорго андый јӱрӱм јарап јат (Иер. 5:31). Олор бойыныҥ кӱӱниле јӱрерге кӱӱнзейт. Агару Бичикти јазап оҥдоп аларга ол эмезе Кудайдыҥ чындык нормаларыла јӱрерге кӱӱнзебей јат. Квебекте јадып турган бир кудайзак ӱй кижи бистиҥ акага мындый сӧстӧр айткан: «Абыс мени тӧгӱндеп турган болзо, ол оныҥ бурузы. Мен оны канайдып ийетем?» Мындый кӧрӱм кӧп улуста бар. Олор кӧрбӧӧчи, укпаачы болуп јӱргӱлейт. Је бис бӱдӱҥкей болуп јӱрбектер! (Укаа 1:32; 27:12).

8. Эр кемине јеткен болорго биске не болужар?

⁸ Агару Бичик бисти «бӱдӱҥкей» болбозын деп кӱӱнзедет. Ондо мынайда айдылган: «Санаагарла — эр кемине јеткен улус болыгар» (1 Кор. 14:20). Эр кемине јеткен кижи болорго, библиялык принциптерди тузаланар керек. А бу дезе биске кӧп јастыралардаҥ кыйарга ла ойгор кижи болорго болужар. Бойысты шиҥдеп, кӧрӱп турар керек. Агару Бичикти ӱренгени́с ле јуундарга јӱрӱп баштаганы́с удай берген болзо, бойыска мындый сурактар берер керек: «Иеговага учурланарга ла сууга чӧҥӱрилерге меге не буудактап турган?» Сууга чӧҥӱрилип калган болзоос, сӱӱнчилӱ јарды јарлайтан ла ӱредӱчилер болотон ченемелис тыҥып турган ба? Бистиҥ керектердеҥ библиялык принциптерле башкарынып турганы́с кӧрӱнип турган ба? Айландыра улуска Иисус чылап баштанадыс па? Бу сурактардыҥ болужыла бойыстыҥ уйан јандарысты кӧрӱп ийзеес, Иегованыҥ ӱредӱлери «ченемел јокты ойгор эдет» деп ундыбай, тереҥжиде сананып турактар (Сар. 19:7).

9. «Электеечилер» Кудайдыҥ ойгорын керексибей турган деп недеҥ кӧрӱнет?

⁹ Кудайдыҥ нормаларын јектеп турган экинчи бӧлӱк улус — «электеечилер». Кезикте андый улус биске јарлаар иште туштайт. Олорго улусты јаман кӧрӱп, базынарга јарап јат (Сар. 123:4). Агару Бичикте калганчы кӱндерде электеечилер коркышту кӧп болор деп айдылган (2 Пётр 3:3, 4). Олор чындык Лоттыҥ кӱйӱлери чилеп, Кудайдыҥ сӧзин угарга кӱӱнзебейдилер (Баш. 19:14). Бу улус библиялык нормаларла јӱрӱп турган улуска каткырыжып јат. Андый электеечилер бойыныҥ «кычаларыла [кинчектӱ кӱӱниле] кылынып» јӱргилейт (Иуда 7, 17, 18). Агару Бичикте электеечилер керегинде айдылган сӧстӧр јана баскандарга ла Кудайды билерге кӱӱнзебей турган улуска коркышту келижип јат.

10. Сарын 1:1-ле болзо, биске электеечи болуп калбаска нени эдер керек?

¹⁰ Электеечи болбоско нени эдер керек? Эп-аргалардыҥ бирӱзи — не ле немени јамандап турган улусла куучындашпазы́. (Сарын 1:1 кычырыгар.) Бу дезе јана баскандарла куучындашпазы́н ла олордыҥ бичиктерин кычырбазы́н темдектейт. Бис бу јанынаҥ ајарыҥкай болбозоос, тӱрген ле комудап баштаардаҥ айабазыс, анайда ок Иеговага ла оныҥ организациязы ажыра берилген башкартуларга алаҥзып баштаарыс деп, јакшы оҥдоп јадыс. Оныҥ учун мындый сурактарды јазап шӱӱп сананып кӧрӧр керек: «Кандый бир јаҥы башкартулар эмезе јаҥы оҥдомол келзе, мен комудап  баштайдым ба? Мен јуунда башкарар јаҥ алган акаларга бийиркеп, олорды јамандай бередим бе?» Бойыстаҥ андый кылык-јаҥысты тӱрген ле јоголторго албаданып турзаас, Иегованы сӱӱндиредис (Укаа 3:34, 35).

11. «Тенектер» Иегованыҥ нормаларына кандый кӧрӱмдӱ?

¹¹ Ойгорды јектеп турган ӱчинчи бӧлӱк улус — «тенектер». Агару Бичик олорды «тенектер» деп адайт, нениҥ учун дезе андый улус Иегованыҥ нормаларыла јӱрбей турган. Олорго јӱк ле бойыныҥ кӧрӱм-санаазыла јӱрерге јарап јат (Укаа 12:15). Олор ойгорды Иегова берип турган деп, бир де јуутпай јат (Сар. 53:1). Бистер јарлап турзаас, олор бисти Агару Бичиктиҥ сӧзиле јӱрӱп турганаар деп, коркышту јамандажат. Је бу улус Иегованыҥ берерге турганынаҥ артык нени беретен эди? Агару Бичикте айдылганыла: «Тенек кижи ойгорды аайлап болбой турган, ондо каланыҥ эжиктериниҥ јанында айдар сӧзи де јок» (Укаа 24:7). Андый кижи биске ойгор нени де айдып бербес. Оныҥ да учун Иегова бистерге: «Тенек кижиге јууктабай јӱрӱгер» — деп јакыйт (Укаа 14:7).

12. Тенектердиҥ јолыла барбаска биске не болужар?

¹² Кудайды угарга кӱӱнзебей турган улуска кӧрӧ, бис оныҥ јӧптӧриле, нормаларыла јӱрерге албаданадыс. Кудайдыҥ сӧзин угуп турган ла укпай турган улустыҥ јӱрӱмин кӧрӱп тӱҥдештирзеес, оныҥ јӧптӧрин ле нормаларын оноҥ тыҥ сӱӱйдис. Кудайдыҥ ойгор ӱредӱлерин јектеп турган улус коркышту кӧп кӱчтерге табартат. Бойоордыҥ јӱрӱмеерди сананып ийзеер де: Кудайдыҥ сӧзин угуп турганыстаҥ улам јӱрӱмис не аайлу јакшы! (Сар. 32:8, 10).

13. Иегова улусты оныҥ ойгор јӧптӧрин уксын деп албадап турган ба?

¹³ Иегова бойыныҥ ойгорын кемнеҥ де јажырбай јат. Је бу ок ӧйдӧ ол бойыныҥ ойгорын кемге де албадабай јат. Андый да болзо, Иегованыҥ ойгорын јектеп турган улусла не болуп турганын јартап салган (Укаа 1:29—32). Иеговага багынарга кӱӱнзебеген улус «эткен керектериниҥ тӱжӱмин» јууп алган. Соҥында андый улустыҥ јӱрӱминде сакыбаган јанынаҥ коркышту кӧп кӱчтер болот. Учы-учында олорды ачу-корон, кыйын-шыра ла ӧлӱм сакыйт. Је Иеговага сӧсуккур улус «мени угуп тургандар тӱбектеҥ коркыбай амыр јадар» деген сӧстӧрдиҥ бӱткенин кӧрӧр (Укаа 1:33).

14, 15. Укаа сӧстӧр 4:23-теҥ бистер неге ӱренедис?

¹⁴ Иегованыҥ јӧптӧри бистерге јаантайын тузалу. Оныҥ јӧптӧрин табып аларга бир де кӱч эмес. Темдектезе, Укаа сӧстӧрдӧ качан да эскирбей турган јӧптӧр сӱреен кӧп. Бу јӧптӧр бистиҥ  јӱрӱмиске јаан тузазын јетирет. Эмди дезе олордыҥ тӧртӱзин кӧрӱп ийектер.

¹⁵ Кӧгӱс јӱрегерди кичеегер. Агару Бичикте айдылат: «Эҥ ле тыҥ бойыҥныҥ јӱрегиҥди чеберле, нениҥ учун дезе оноҥ јӱрӱмиҥ камаанду» (Укаа 4:23). Јӱрек су-кадык болзын деп, нени эдер керек деп, сананып ийзеер де: тузалу курсак јиир керек, эт-канды тазыктырар ла оны киртидип турган не-немелердеҥ тууралаар керек. Биске анайып ла кӧгӱс јӱрегисти корулаар керек. Бис ажанарга Кудайдыҥ Сӧзин кӱнӱҥ ле кычырадыс. Анайда ок јуунныҥ туштажуларына белетенип, туштажуларга јӱрӱп, анда туружадыс. Бого ло коштой јарлаарга ийде-кӱчисти кысканбай јадыс, санааларысты киртидетен ончо немелердеҥ, темдектезе, кирлӱ соот-јыргалдардаҥ ла јаман улустаҥ тууралап јадыс.

16. Укаа сӧстӧр 23:4, 5-теги сӧстӧр незиле тузалу?

¹⁶ Бары-јогыла болорзынып јӱрӱгер. Агару Бичикте сӱреен јакшы јӧп берилет: «Кӱчиҥ чыкканча иштеп, байыырга албаданба. [...] Сен ого кӧрӱп ийзеҥ — ол јок болор. Ол бойына канаттар эдип, мӱркӱт чилеп теҥериге уча берер» (Укаа 23:4, 5). Бу сӧстӧрди кӧрзӧӧс, акча-јӧӧжӧ бир ле кӱн јок болуп калардаҥ айабас. Андый да болзо, бай да улус, јокту да улус акчаныҥ кийнинеҥ сӱрӱжип јадылар (Укаа 28:20; 1 Тим. 6:9, 10). Байыырга албаданганынаҥ улам, кезикте олордыҥ јаман ады чыгат, улусла ачыныжып салат, керек дезе су-кадыгына да каршу јетирилет. Је бис Кудайдыҥ ойгорыла јӱргенис, оныҥ учун ӧйинеҥ ӧткӱре акча јанынаҥ санааркабай јадыс. Бу биске бары-јогысла болорзынып јӱрерге ле ачурканбаска болужат (Эккл. 7:12).

17. Укаа сӧстӧр 12:18-те айдылганыла, ойгор кижиниҥ тилиле куучынданарга нени эдер керек?

¹⁷ Айдардаҥ озо сананыгар. Бис ајарыҥкай болбозоос, айткан сӧстӧрис каршу экелердеҥ айабас. Агару Бичикте айдылган: «Сананбай айдылган сӧстӧр, кылыш чылап шыркалап јат, је ойгор кижиниҥ тили эмдеп јат» (Укаа 12:18). Бис коп-сап јайбай турзаас, улусла ачынышпай  јӱрерис (Укаа 20:19). Айткан сӧстӧрисле улусты шыркалабай, карын эмдеерге турзаас, јӱрегисти Кудайдыҥ сӧстӧриле толтырарыс (Лука 6:45). Айдарда, Кудайдыҥ Сӧзинде айдылганын шӱӱп сананып турзаас, оозыстаҥ ойгор сӧстӧр чыгар. А бу дезе, улустыҥ кӱӱн-санаазын кӧдӱрер (Укаа 18:4).

18. Укаа сӧстӧр 24:6-да айдылган принцип јарлаар иште канай болужат?

¹⁸ Организацияныҥ башкартузыла јӱрӱгер. Агару Бичикте айдылат: «Јуулажып тура, ойгор башкарту бедире. Кайда кӧп јӧптӧжӧӧчилер, анда јеҥӱ» (Укаа 24:6). Јарлаарга ла ӱредӱ ӧткӱрерге бойыстыҥ эп-аргаларысты тузаланардыҥ ордына организацияныҥ берип турган башкартуларын тузаланарга албаданадыс. Бу башкартуларды бис христиан јуундарда ченемелдӱ акалардыҥ Агару Бичикке тӧзӧлӧнгӧн куучын-эрмектеринеҥ ле ака-эјелердиҥ јакылталарынаҥ аладыс. Анайда ок Иегованыҥ организациязы улуска Агару Бичикти оҥдойтон бичиктер ле видеолор чыгарат. Бу јепселдерди слер тузаланарга албаданадаар ба?

19. Слер Иегованыҥ ойгорына кандый кӧрӱмдӱ? (Укаа сӧстӧр 3:13—18).

¹⁹ Укаа сӧстӧр 3:13—18 кычырыгар. Иегованыҥ ойгор јӧптӧрин бис тыҥ баалап јадыс! Олор јогынаҥ бис кайда болор эдис? Бу јӧрмӧлдӧ бис Укаа сӧстӧрдӧги кезик принциптерди шӱӱжип кӧрдис. Је Агару Бичикте оноҥ до ӧскӧ ойгор сӧстӧр бар. Олорды јаантайын тузаланып јӱректер. Бу телекей Кудайдыҥ ойгорына кандый кӧрӱмдӱ болгоны биске керек те јок. Бис алаҥзыбай јадыс: «Ойгордоҥ бек тудунган улусты ырысту деп айдыжар».