АГАРУ БИЧИКТИ бичиген улус кезик сӧстӧрди такып-такып айдып туратан. Мыныҥ ӱч шылтагын кӧрӱп ийектер.

Ӧйи. Јебрен Израильде кӧп саба улуста јасактыҥ копиязы болбогон. Олор јасактыҥ кычырылганын озо баштап агару байканныҥ алдында, оноҥ ӧргӧӧниҥ алдында јуулыжып угар болгон (Јаҥ. т. 31:10—12). Анайып олорго канча сааттыҥ туркунына бут бажына турарга келижетен (Неем. 8:2, 3, 7). Оноҥ, байла, јӱзӱн-базын табыштардаҥ улам јасактыҥ кычырылганын угарга кӱч болгон болор. Оныҥ учун кезик сӧстӧр такып-такып айдылып турза, албатыга Кудайдыҥ јасактарын сананып аларга ла тузаланарга јеҥил болгон (Лев. 18:4—22; Јаҥ. т. 5:1).

Бӱдӱми. Агару Бичиктиҥ 10 кире проценти кожоҥдордоҥ турат. Ол кожоҥдорго Сарындар, Соломонныҥ кожоҥы ла Иеремияныҥ ыйы кирет. Кезик кожоҥдордо припев бар болгон. Ол дезе кожоҥныҥ темазын аҥылаган ла кожоҥныҥ сӧстӧрин сананып аларга болушкан. Темдектезе, Агару Бичикте мынайда айдылганын кӧрӱп ийигер. Сарын 115:9—11: «Израиль, Иеговага ижен. Ол сениҥ болушчыҥ ла куйагыҥ. Ааронныҥ бала-барказы, Иеговага иженигер. Ол слердиҥ болушчыгар ла куйагар. Иегованаҥ айап тургандар, Иеговага иженигер. Ол слердиҥ болушчыгар ла куйагар». Бу сӧстӧрди мынайда такып-такып айтканы кожоҥдоп турган улустыҥ санаазына ла јӱрегине тереҥ артып калатан.

Амадузы. Кезикте Агару Бичикти бичиген улус јаан учурлу шӱӱлтелерди аҥылаарга, теманы ачып турган сӧстӧрди такып-такып айдар болгон. Темдектезе, Иегова кан керегинде јасакты Моисей ажыра кӧп катап айттыртып салган. Нениҥ учун Иегова анайып эткен? Нениҥ учун дезе анайып ол бастыра тынар-тынду немениҥ јӱрӱми — канда; ӧскӧртӧ айтса, кан јӱрӱмди темдектеп турганын кӧргӱзерге сананган (Лев. 17:11, 14). Кийнинде, Иерусалимдеги апостолдор ло аксагалдар христиан јуундарга Кудайды ачындыргадый кандый керектердеҥ тууралаар керек деп бичип јадарда, кан керегинде јасакты база катап бичип салгандар (Ап. ижи 15:20, 29).

Иегова бисти Агару Бичимелдиҥ ӱзӱктерин сананбай ла такып-такып айдып турзын деп кӱӱнзебей јат. Темдектезе, оныҥ Уулы мынайда айткан: «Мӱргӱп јатсагар, бир ле немени канча катап айтпагар» (Матф. 6:7, ЈТ). Оныҥ кийнинде Иисус Кудайдыҥ табы аайынча канайып мӱргӱӱрин айдып салган (Матф. 6:9—13). Оныҥ учун бис мӱргӱп јатсаас, бир сӧстӧрди канча катап айтпай да турган болзоос, је керектӱ немени такып-такып айдар аргалу (Матф. 7:7—11).

Айдарда, Иегова бойыныҥ Сӧзинде бир ле сӧстӧрди такып-такып тегин јерге бичитпеген эмтир. Бу арга — Улу Ӱредӱчибистиҥ, Иегованыҥ, бисти ӱредип турган эп-аргаларыныҥ јӱк бирӱзи (Иса. 48:17, 18).