1. Бистерде кандый кӱчтер болот, је Иегова бойыныҥ чындык ишчилерин кӧрӱп, нениҥ учун сӱӱнет? (Јӧрмӧлдиҥ бажындагы јуруктарды кӧрӱгер.)

БУ ТЕЛЕКЕЙДЕ уур-кӱчтер кӧп деп, кажы ла кижи билер. Кару ака-эјелер, уур-кӱчтер слердиҥ кажыгарда ла бар. Кӧп сабагар јаан оорулардаҥ шыралайт. Кезигер, јажыгар јаанап та калган болзо, карып калган тӧрӧӧндӧрин кичеейт. Кезигерге билегерди эҥ керектӱ немеле јеткилдеерге кӧп иштенерге келижет. Је кезигерге мынаҥ да кӧп кӱчтерди ӧдӧргӧ келижет. Мындый кӱчтерде кӧп ӧй лӧ ийде-кӱч керек, анайда ок кӧп акча керек болот. Је слер Кудайдыҥ берген сӧзи чын деп бир де алаҥзыбай јадыгар ла келер ӧйгӧ ижемјилӱ кӧрӧдигер. Анайып Иегованы сӱреен тыҥ сӱӱндиредигер!

2. Исаия 40:29-тагы сӧстӧр бистиҥ кӱӱн-санаабысты канайып кӧдӱрет, је биске кандый јастыра кӧрӱмнеҥ кыйар керек?

² Јӱрӱмниҥ кӱчтеринеҥ улам ийде-кӱчигер јетпей барган деп билдирип турган болзо, санааркабагар, слер јаҥыскан эмезигер. Јебрен ӧйдӧги Кудайдыҥ ишчилери де кезикте кӧп кӱчтердеҥ улам ал-санаага тӱшкен деп, Агару Бичикте айдылат (1 Каан. 19:4; Иов 7:7). Је олор бош салынардыҥ ордына, Иегованаҥ болуш сурап чӧкӧбӧгӧн, нениҥ учун дезе Кудай «арыган кижиге ийде берет» (Иса. 40:29).  Эмдиги ӧйдӧ Кудайдыҥ кезик ишчилериниҥ јӱрӱмде уур-кӱчтерди ӧдӱп чыгатан эҥ јакшы арга — «чындыктаҥ амыраары» деп сананганы ачынчылу. Олордыҥ санаазыла болзо, христиан болоры сӱӱнчи эмес, карын уур јӱк болот. Андый ака-эјелер Кудайдыҥ Сӧзин кычырбай барган, анайда ок јуунныҥ туштажуларына ла јарлаар ишке барбай барган. Анайып, олор Сатананыҥ табын бӱдӱргендер!

3. а) Сатана бистиҥ ийде-кӱчисти јоголтпозын деп, нени эдер керек? б) Бис бу јӧрмӧлдӧ нени шӱӱп кӧрӧрис?

³ Бис кӧгӱс керектерди бӱдӱрип турзаас, ийде-кӱчтӱ болодыс. Мыны Дьявол билер, оныҥ учун ол бисте ийде-кӱч јок болзын деп кӱӱнзейт. Айдарда эмоциялык ийде-кӱчигер ле эди каныгардыҥ ийде-кӱчи чек јоголып баратса, Иегованаҥ бир де ырабагар. Карын Кудайга јууктагар, ол слерди «кӱчтӱ, турумкай» эдер (1 Пет. 5:10; Иак. 4:8). Бу јӧрмӧлдӧ Кудайдыҥ ижин эрчимдӱ бӱдӱрерин уйададып салатан эки уур-кӱчти шӱӱжерис, анайда ок бу уур-кӱчтерди ӧдӱп чыгарга болужатан библиялык принциптерди кӧрӧрис. Је озо баштап Исаия 40:26—31-де айдылганын кӧрӱп ийеектер. Анда Иегова биске ийде-кӱчти канайып берип турганы кӧргӱзилет.

4. Исаия 40:26-да бичилген сӧстӧрдӧҥ бис неге ӱренедис?

⁴ Исаия 40:26-ны кычырыгар *. Јер-телекейде бар-јок јылдыстарды кем де тоолоп болбой јат. Билимчилердиҥ айтканыла болзо, јӱк Кардыҥ Јолы деген галактикада 400 миллиард кире јылдыстар бар. Иегова кажы ла јылдыстыҥ адын билер. Бис мынаҥ неге ӱренедис? Кудай тын јок јайаандарга ајару эдип турарда, слерге, Кудайды акту кӱӱнинеҥ сӱӱп тургандарга, канайып баштанып турганын сананып ийзеер (Сар. 19:1, 3, 14). Теҥеридеги Адабыс бис керегинде ончоны билер. Матфей 10:30-та «бажыгардыҥ кылы да ончозы тоололып калган» деп айдылган. А Сарын 37:18-теҥ «Иегова јек јок улустыҥ кӱндерин билет» деп кычырадыс. Бу ӱлгерлер Иегова бистиҥ кӱчтеристи кӧрӱп турган деп ле олордыҥ аайына чыгарга ийде-кӱч берер деп бӱдӱмјилеп јат.

5. Иегова биске ийде-кӱч берер аргалу деп, нениҥ учун алаҥзыбайдыс?

⁵ Исаия 40:28-ти кычырыгар *. Иегова — сӱреен јаан ийде-кӱчтиҥ Башталгазы. Темдектезе, Кӱнниҥ берип турган јылузын сананып ийеектер. Наукалык бичиктердиҥ бичиичизи Дэвид Боданистиҥ айтканыла болзо, Кӱнниҥ кажы ла секундта чыгып турган энергиязы, миллиардтар тоолу атомный бомбалардыҥ јарылган энергиязы кире болот. База бир билимчиниҥ шиҥдегениле болзо, «Кӱнниҥ бир секундка чыгарып турган энергиязы улуска 200000 јылга једер эди»! Оныҥ учун Кӱнниҥ чогын берген Кудай бистерге де кандый ла  кӱчти ӧдӧргӧ ийде берер аргалу деп алаҥзыбайдыс.

6. Иисустыҥ јӱгин нениҥ учун јеҥил деп айдарга јараар? Мыны билгенис бисти неге кӱӱнзедет?

⁶ Исаия 40:29-ты кычырыгар *. Бис Иеговага иштегенистеҥ сӱӱнчи аладыс. Иисус бойыныҥ ӱренчиктерине айткан: «Мен берер комутты бойыгарга кийип, Менеҥ ӱренигер... Ол тушта... амыр табарыгар. Мен берер комут јакшы, Мен салар јӱк јеҥил» (Матф. 11:28—30). Кандый чын сӧстӧр! Кезикте јуунныҥ туштажузына эмезе јарлаар ишке барарга, ийде-кӱчистиҥ јетпей турганын сезедис. Је јанып келзеес, нени сезедис? Кӱӱнис кӧдӱрилип, уур-кӱчтерди ӧдӧргӧ ийде-кӱчтӱ болуп каладыс. Чын, Иисустыҥ јӱги јеҥил!

7. Матфей 11:28—30-тагы Иисустыҥ сӧстӧриниҥ чынын кӧргӱзип турган учуралды куучындап беригер.

⁷ Бир эје, оныҥ ады Кемене болзын, јаантайын арып турар оорула оорыйт. Ол јаантайын бажы оорып турганынаҥ ла депрессиянаҥ шыралап јат. Оныҥ учун христиан туштажуларга барарга, ого кезикте јаан ченелте болот. Је Каандыктыҥ Туразына тӱҥей ле барып келгениниҥ кийнинеҥ мынайып бичиген: «Куучын-эрмек кунугары керегинде болгон. Ака улустыҥ сезимдерин ајаруга алып, куучын-эрмегин јалакай эдип айтканынаҥ улам мен ыйлай бергем. Христиан туштажулар меге сӱреен керектӱ деп, мен база ла катап оҥдоп алгам». Кемене туштажуга албаданып барып келгенине сӱреен тыҥ сӱӱнген!

8, 9. Элчи Павелдиҥ: «Чине јок тужымда мен кӱчтӱ» — деген сӧстӧри нени темдектейт?

⁸ Исаия 40:30-ты кычырыгар *. Бис нени де эдип билер болзоос, тӱҥей ле ӱзе немени бойыстыҥ кӱчисле эдип болбой јадыс деп, ончобыска оҥдоп турар керек. Темдектезе, элчи Павел кӧпти эдип билер де болгон болзо, ончо кӱӱнзегенин эдер аргазы јок болгон. Ол бойыныҥ санааркаштарын Кудайга куучындап берерде, Кудай ого: «Сен чине јок тужыҥда Мениҥ кӱчим толо кемине једет» — деп айткан. Бу ӱредӱни Павел јакшы оҥдоп алган. Оныҥ учун: «Чине јок тужымда мен кӱчтӱ» — деп айткан (2 Кор. 12:7—10). Павел бу сӧстӧрлӧ нени айдарга сананган?

⁹ Ол кӧп немени бойыныҥ ийде-кӱчиле эдип болбозын билген. Оныҥ учун ого Кудайдыҥ болужы керек болгон. Павел арып калган тужында јетпей турган ийдени Кудайдыҥ агару тынынаҥ алган. Оныҥ болужыла Павел Кудайдаҥ берилген кандый ла ишти бӱдӱрген. Је ол бойына иженген болзо, бу ишти качан да эдип болбос эди. Мынайып ла бистер керегинде айдарга јараар. Иегова биске агару тынын берип турза, бис чыннаҥ ла кӱчтӱ болодыс!

10. Иегова Давидке уур-кӱчтерди ӧдӧргӧ, канайып болужып туратан?

¹⁰ Сарнаачы Давид Кудайдыҥ агару тыныныҥ ийдезин бойында бар деп сезип туратан. Ол мынайып бичиген: «Сениҥ болужыҥла мен тонокчыларга удура чыгарым, Кудайымныҥ кӱчиле стенеге чыгарым» (Сар. 18:29).  Је кезикте бойыс чыгып болбойтон «стенелер» болот. Мындый стенелерди — кӱчтерди ӧдӱп чыгарга, Иегованыҥ болужы керек.

11. Агару тын кӱчтердиҥ аайына чыгарга канайып болужат?

¹¹ Исаия 40:31-ди кычырыгар *. Мӱркӱттер кейде айланып, сӱреен ыраак учат. Је олор мынайып јаҥыс ла бойыныҥ ийде-кӱчиле учпай јат. Олор кейдиҥ јылузын таап алганда, оныҥ болужыла кейде айланып, там ӧрӧ кӧдӱрилет. Анайып, мӱркӱттер бойыныҥ кӱчин кӧп јылыйтпай јат. Оныҥ учун слерге јеҥил эмес јакару берилзе, мӱркӱттерди эске алып туругар. Анайда ок слерге бойыныҥ болушчызын — агару тынын берип, «ӧрӧ кӧдӱрзин» деп, Иегова Кудайдаҥ болуш сурагар (Иоанн 14:26). Биске Иеговага кандый ла ӧйдӧ — тӱнде де, тӱште де мӱргӱӱрге јараар. Кудайдыҥ болужы анчада ла јуунда кандый бир ака-эјеле оҥдошпой калган тушта керектӱ. Је мындый оҥдошпостор недеҥ улам болот?

12, 13. а) Јуунда нениҥ учун кезикте оҥдошпостор болот? б) Иосифле болгон учуралдаҥ бис Иегова керегинде нени билип алдыс?

¹² Ончобыс толо кеминде эмес болгоныстаҥ улам, кезикте оҥдошпостор болот. Кезикте ака-эјелеристиҥ айткан сӧстӧри, эткен керектери биске јарабай јат. Анайып ла бистиҥ де сӧстӧрис эмезе керектерис кемге-кемге јарабай турган болор. Иегова мындый оҥдошпосторды бӱдӱмјибистиҥ ӧскӧ дӧ ченелтелери чилеп токтотпой турган. Анайып бис ака-эјелерле амыр јадарга ӱренедис, нениҥ учун дезе олордо једикпестер де бар болзо, Иегова олорды сӱӱп јат. Мынайып бисте Кудайга чындык болгонысты кӧргӱзетен арга болот.

¹³ Иегованыҥ бойыныҥ ишчилерин ченелтелердеҥ айрыбай турганы Иосифтиҥ теминеҥ јакшы кӧрӱнет. Оныҥ кожо чыккан акалары Иосифти јиит ле тужында Египетке кул эдип садып ийген (Баш. 37:28). Иеговага Иосифти буру јогынаҥ садып ийгенин кӧрӧргӧ ачу болгон деп, бис алаҥзыбай јадыс. Је андый да болзо, Иегова бу учуралга киришпеген. Иосифти Потифардыҥ ӱйин албадап саларга албаданган  деп бурулап, тӱрмеге таштап та саларда Иегова киришпеген. Кудай бу учуралда Иосифти артыргызып салган деп айдарга јараар ба? Јок, карын Агару Бичикте мынайып айдылат: «Кайракан Иосифле кожо, ол нени де эткенде, ого ачык јол берип турган» (Баш. 39:21—23).

14. Чугулданбас болоры кандый туза берет?

¹⁴ База бир тем — Давидтиҥ теми. Ол кезик ӧйдӧ улуска јаман кӧрдӱрип јӱрген. Кӧп улус мындый кӱчтерди кӧрбӧгӧн дӧ. Је Давид Иеговала јуук колбуларлу болгонынаҥ улам, јӱрегинде кара санаа тутпаган. Ол: «Чугулданба, калјуурба, јаманды этпеске, кыртыштанба» — деп айткан (Сар. 37:8). Бис Иеговага тӱҥейлежерге кӱӱнзейдис, оныҥ учун чугулданбаска албаданадыс. Ол «бисти јастыраларыска келиштире кату каруузына тургуспай јат» (Сар. 103:10). Анайда ок, чугулданбас болоры ӧскӧ дӧ јанынаҥ тузалу болот. Чугулданганы су-кадыкка каршу јетирет, темдектезе канныҥ тебӱзи бийиктейт эмезе ӧкпӧ-тыныштыҥ оорулары табылат. Эмезе буурдыҥ ла телӱӱнниҥ оорулары табылып, ич-карынныҥ иштеер аайы бузылат. Чугулданган кижи јакшы сананып болбой барат. Оныҥ учун бис улусты айткан сӧзисле эмезе эткен керектерисле ачындырардаҥ айабазыс ла бойыс узак ӧйгӧ кунугар болорыс. Бого ло коштой Агару Бичик: «Јӱректиҥ амыры эт-канга јӱрӱм берет» — деп айдат (Укаа 14:30). Бисти кем-кем ачындырып ийген болзо, нени эдер керек? Бисти ачындырган кижиниҥ јаманын канайып таштаар? Бу учуралда эҥ јакшы јӧп береечи — Агару Бичик болот.

15, 16. Бисти јууннаҥ кем-кем ачындырып ийген болзо, нени эдерге јараар?

¹⁵ Ефестегилерге 4:26-ны кычырыгар. Керечилер эмес улустыҥ кату баштанып турганын бис кайкабай јадыс. Је кожо чыкканыстыҥ эмезе јуундагы ака-эјебистиҥ ачу сӧзинеҥ эмезе эткен керегинеҥ бистиҥ амырыс јылыйардаҥ айабас. Мындый айалга баштаҥ чыкпай турза, бис канча јылдарга ачынып јӱрерис пе? Эмезе бис библиялык ойгор јӧпти тузаланып, керектиҥ аайына капшай чыгарга албаданарыс па? Ӧйди канча ла кире узак чӧйзӧӧс, амырды орныктырарга ончо ло кире кӱч болор.

¹⁶ Темдектезе, јуунда кандый бир ака слерди ачындырып ийген болзын, је слер оныҥ јаманын таштап болбой јадыгар. Мындый учуралда амырды орныктырарга нени эдерге јараар? Озо баштап санааркаштараарды Иеговага куучындап беригер. Ачынышкан акала јаражып аларга, болуш сурагар. Оны Иегованыҥ најызы деп, ундыбагар (Сар. 25:14). Кудай оны сӱӱп јат. Иегова бойыныҥ најыларына јымжак ла јалакай баштанат, бисти де андый болзын деп кӱӱнзейт (Укаа 15:23; Матф. 7:12; Кол. 4:6). Оноҥ нени айдарга турганаарды белетеп алыгар. Ол ака слерди ӧнӧтийин ачындырган деп сананбай, слер бой-бойыгарды оҥдошпой калган болорыгар деп сананыгар. Бу учуралда слердиҥ де буругар бар болордоҥ айабас. Куучынды мынайып баштаарга јараар: «Мен немени ӧйинеҥ ӧткӱре јуук алынып турган болорым, је кечеги куучыныстаҥ меге  мынайып билдирген...» Баштапкы ла куучынаҥ јаражып аларга келишпеген болзо, чӧкӧбӧгӧр. Ол ака учун мӱргӱгер, Иегова оны алкап салзын ла слерге аканыҥ јакшы јандарын кӧрӧргӧ болушсын деп сурагар. Слердиҥ акагар Иегованыҥ најызы болордо, акту кӱӱнигердеҥ акала амырды орныктырып аларга турганаарды кӧрӱп, Кудай сӱӱнет деп алаҥзыбагар.

17. Иегова уур кинчек эткен улуска канайып болужат ла оныҥ болужын нениҥ учун алар керек?

¹⁷ Јаан кинчек эткенинеҥ улам кезик ака-эјелер Иеговага качан да иштеп болбозыс деп сананат. Бойын јинип турган кижиниҥ сӱӱнчизи, ийде-кӱчи ле амыры јылыйат. Давид каан бойыныҥ јингенин мындый сӧстӧрлӧ бичиген: «Унчукпай јӱргемде, кӱнӱҥ сайынгы онту-калагымнаҥ сӧӧктӧрим кургап калды. Нениҥ учун дезе сениҥ колыҥ мениҥ ӱстимде тӱни-тӱжи уур јӱк болуп турды». Карын Давид бойын тереҥ кӧгӱстӱ кижи деп кӧргӱскен. Ол: «Учы-учында бойымныҥ кинчегимди сеге ачтым... сен мениҥ буруумды ла кинчегимди таштап салдыҥ» — деп бичиген (Сар. 32:3—5). Слер уур кинчек эдип салган болзогор, Иегова слердиҥ кинчегеерди таштаарга јаантайын белен ле слерге болужарга кӱӱнзейт. Је слерге јуун ажыра берилип турган болушты алып турар керек (Укаа 24:16; Иак. 5:13—15). Ӧйди чӧйбӧгӧр, нениҥ учун дезе мынаҥ келер јӱрӱмигер камаанду! Је Иегова слердиҥ јаманыгарды таштап салган да болзо, бойыгарды јинип турган болзогор, нени эдер керек?

18. Иегованыҥ ишчизи болорго турбазым деп сананып турган улуска Павелдиҥ теми канайып болужар аргалу?

¹⁸ Павел эткен јастыралары учун кезикте тыҥ санааркаган болор. Ол: «Мен ончо апостолдордыҥ јабызы инем, апостол деп адаларга турбазым, нениҥ учун дезе Кудайдыҥ Серкпезин истегем» — деп бичиген. Оноҥ ары мынайып айткан: «Је Кудайдыҥ јакшылыгыла мен эмди кем, ол болорым» (1 Кор. 15:9, 10). Иегова Павелди толо кемдӱ эмес кижи деп билген. Андый да болзо, ол оны элчи болор аргалу деп сананган ла Павел мыны билип турзын деп кӱӱнзеген. Слер кинчегеерди акту јӱрегеердеҥ алынып, Иеговага, керек болзо аксагалдарга, куучындап салган болзогор, Кудайдыҥ јалакайында бир де алаҥзыбагар. Ол слердиҥ кинчегеерди таштап салган деп тыҥ бӱдӱгер! (Иса. 55:6, 7).

19. 2018 јылга кандый ӱлгер талдалган ла бӱгӱнги кӱнде ол нениҥ учун сӱреен керектӱ болот?

¹⁹ Бу калју телекей удабас јоголып калар, оныҥ учун бистиҥ јӱрӱмис там ла кӱч болуп барар деп оҥдоп јадыс. Је Кудай «арыган кижиге ийде берет, чылаган кижиге кӱч берет» деп ундыбагар. Айдарда, ол биске де ийде-кӱчти берер аргалу (Иса. 40:29; Сар. 55:22; 68:19). Бис 2018 јылда Каандыктыҥ Туразында болуп турган јуунныҥ туштажуларына кажы ла катап келгенисте бу керегинде эске алып турарыс, нениҥ учун дезе «Иеговага иженип тургандар јаҥыдаҥ ийде-кӱч алынар» деген јылдык ӱлгер јаантайын кӧзистиҥ алдында болор (Иса. 40:31).