1. Нениҥ учун бар-јок неме Иегованыҥ болот? (Јӧрмӧлдиҥ бажындагы јурукты кӧрӱгер.)

ОНЧО бары-јогы: «теҥери де, теҥеринеҥ бийиги де, јер де, јерде бары да» Иегованыҥ болот (Јаҥ. т. 10:14; Ачыл. 4:11). Улусты да ол јайаган болордо, олор до Кудайдыҥ болот (Сар. 100:3). Је кижиликтиҥ тӱӱкизин кӧргӧндӧ, Кудай кезик улусты алдынаҥ бери аҥылу албаты эдип талдап јат.

2. Агару Бичик Иегованыҥ аҥылу албатызы деп кемдерди айдат?

² Анайып, 135-чи Сарында јебрен ӧйдӧ јаткан чындык израильтяндар оныҥ «аҥылу байлыгы» деп айдылган (Сар. 135:4). А Осия деген бичикте, кезик израильтян эмес те улус Иегованыҥ албатызыныҥ тоозына кирер деп, судурлалып калган (Ос. 2:23). Бу судур келер ӧйдӧ Христосло кожо башкаратан улусты Иегова ӧскӧ албатылардаҥ талдап баштаарда  бӱткен (Ап. ижи 10:45; Рим. 9:23—26). Бу «агару албаты» — Иегованыҥ «аҥылу байлыгы» (1 Пет. 2:9, 10). Булар агару тынла майлалган ла теҥериде јадатан улус. А јерде јадатан ижемјилӱ кӧп саба чындык ишчилерин Иегова база «калыгым» ла «талдап алгандарым» деп адайт (Иса. 65:22).

3. а) Бӱгӱнги кӱнде кемдерде Иеговала аҥылу колбулар бар? б) Бу јӧрмӧлдӧ кандый сурак шӱӱжилер?

³ Бӱгӱнги кӱнде «ас ӱӱр» — теҥериде јадатан ижемјилӱ улус ла «ӧскӧ койлор» — јерде јадатан ижемјилӱ улус, Иеговага кожо бажырып, «јаҥыс ӱӱр» болот (Лука 12:32; Иоанн 10:16). Бу јӧрмӧлдӧ мындый кӱндӱ учун Иеговага быйанысты канайып кӧргӱзерге јараарын шӱӱжерис.

4. Бис Кудайдыҥ албатызыныҥ тоозына кирип турганыс учун, Иеговага быйанысты канайып кӧргӱзерис? Иисус Кудайдыҥ табын бӱдӱрерге белен болгонын канайып кӧргӱскен?

⁴ Бис Иеговага быйанысты кӧргӱзерге, ого акту јӱрегистеҥ јӱрӱмисти учурлап, сууга чӧҥӱриледис. Анайып эткенисле бис Иегованыҥ кижизи болуп јатканысты ла оныҥ сӧзин угарга турганысты ончо улус алдына кӧргӱзип јадыс (Евр. 12:9). Иисустыҥ да чӧҥӱрилгениниҥ учуры андый ла болгон. Је ол Кудайга учурлалып калган албатынаҥ да болгон болзо, чӧҥӱрилгениле Кудайдыҥ табын бӱдӱрерге белен болгонын кӧргӱскен. Ӧскӧртӧ айтса, ол Иеговага: «О-о Кудайым, сениҥ табыҥды бӱдӱргенимнеҥ сӱӱнчи аладым» — деп айткан (Сар. 40:7, 8).

5, 6. а) Иегова Иисустыҥ чӧҥӱрилгенин кӧрӱп, нени сескен? б) Иегова бистиҥ учурланганысты кӧрӱп, нени сезет? Тем куучындап беригер.

⁵ Иисустыҥ чӧҥӱрилгенинеҥ улам Иеговада кандый сезимдер болгон? Агару Бичикте мынайып айдылат: «Иисус креске тӱжеле, ол тарый суудаҥ чыгып келерде, Ого теҥери ачылды. Ол кӱӱле чилеп Ого тӱжӱп келеткен Кудайдыҥ Тынын кӧрӱп ийди. Теҥеридеҥ ӱн чыкты: „Бу Мениҥ сӱӱген Уулым, Оныҥ Бойында Мениҥ јакшылыкту табым“» (Матф. 3:16, 17). Иисус теҥеридеги Адазыныйы да болгон болзо, сууга чӧҥӱрилгениле јӱк бойыныҥ Адазына иштеер кӱӱнин кӧргӱзип, Иеговага јаан сӱӱнчи јетирген. Анайып ла бис те бойыстыҥ јӱрӱмисти Иеговага учурлазаас, Кудай сӱӱнип, алкыжын берет (Сар. 149:4).

⁶ Темдектезе, кижи садта јараш чечектер ӧскӱрип турган болзын. Је бир катап оныҥ кичинек кызычагы адазыныҥ чечектериниҥ бирӱзин ӱзӱп, ого сыйлап јат. Сӱӱштӱ ада: «Мениҥ чечектеримди меге канайып сыйлайт?» — деп, сананбас та. Карын кызычагыныҥ сыйын ол сӱӱнип алар. Бу чечекти, садындагы ӧскӧ чечектерине кӧрӧ, эҥ тыҥ баалаар. Анайып ла Иегова, јӱрӱмисти  јаҥыс ого иштеерге учурлаганыска сӱӱнип јат (Чыг. 34:14).

7. Малахияныҥ сӧстӧриле болзо, Иегова акту јӱрегинеҥ иштеп турган улузын канайып кӧрӧт?

⁷ Малахия 3:16 кычырыгар *. Слер јӱрӱмигерди Иеговага учурлап, чӧҥӱрилбеген болзоор, бу алтам нениҥ учун јаан учурлу болот деп сананып кӧрӱгер. Ончо улустыҥ јӱрӱми энениҥ ичинде тӱӱлгенинеҥ ле ала Иегованыйы болот. Је слер Иегованыҥ јаҥына багынып, оныҥ табын бӱдӱрерге ого јӱрӱмигерди учурлазаар, ол сӱрекей тыҥ сӱӱнип јат! (Укаа 23:15). Иегова акту јӱрегинеҥ иштеп турган улузын јакшы билер ле олордыҥ ады-јолын бойыныҥ «эзем бичигине» бичийт.

8, 9. Ады-јолы «эзем бичикке» бичилген улустаҥ Иегова нени сакыйт?

⁸ Иегова бистиҥ ады-јолысты «эзем бичигине» бичип салзын деп турган болзоос, Малахияныҥ бичигени аайынча, бис Иегованаҥ айап, оныҥ ады керегинде шӱӱп сананар учурлу. Је качан бис Иегованаҥ ӧскӧ, база кемге де эмезе неге де бажырып баштазаас, учы-учында бистиҥ ады-јолыс Иегованыҥ «јӱрӱм тӱрбегинеҥ» јоголып калар (Ачыл. 3:5; Чыг. 32:33).

⁹ Иеговага учурланып, чӧҥӱрилип алганысла болорзынбас керек. Не дезе, бу эки алтамды бис јӱрӱмисте бир ле катап эдедис, је Иеговага иштеери бастыра јӱрӱмиске болот. Бис Иеговага сӧсуккурысты кажы ла кӱн кӧргӱзип јадыс (1 Петр 4:1, 2).

10. Иеговага иштеп тургандар, ого иштебей тургандардаҥ незиле башка болор учурлу?

¹⁰ Ӧткӧн јӧрмӧлдӧ бис Каинниҥ, Соломонныҥ ла јебрен Израиль албатыныҥ темин кӧргӧнис. Олор ончозы бойлорын Иеговага бажырып турган деп сананган, је бӱткӱлинче Кудайга чындык болбогон. Бис олордыҥ теминеҥ, Иеговага бажырып турганысла болорзынбас учурлу деп ӱренедис. Карын биске јакшыны сӱӱп, јаманды јаман кӧрӧр керек (Рим. 12:9). Малахия «эзем бичик» керегинде айдып, Иегованыҥ мындый сӧстӧрин бичиген: «Слер чындык ла чындык эмес кижиниҥ, Кудайга иштеп турган ла иштебей турган кижиниҥ башказын ойто ло катап кӧрӧригер» (Мал. 3:18).

11. Иегованаҥ ӧскӧ кемге де бажырбай турганыс, нениҥ учун улуска јарт кӧрӱнип турар учурлу?

¹¹ Бис Кудайдыҥ албатызына кирип турганыс учун Иеговага быйанысты кӧргӱзерге, база нени эдер аргалу? Бистиҥ кӧгӱс једимдерис ончо улуска кӧрӱнип турар учурлу (Матф. 5:16; 1 Тим. 4:15). Бойыгардаҥ сурагар: «Улус мени јӱк Иеговага чындык кижи деп кӧрӧт  пӧ? Мен Иегованыҥ Керечили деп, улуска айдарга уйалбай јадым ба?» Бойысты Иегованыҥ кижизи деп, улуска айдарга уйалып турзаас, Иеговага ачынчылу болор эди (Сар. 119:46; Марк 8:38 кычырыгар).

12, 13. Кезик христиандарды Иегованыҥ ишчилери деп, нениҥ учун айдып болбозыҥ?

¹² Кезик христиандардыҥ «телекейдиҥ тынын» алынып турганы ачынчылу. Мынаҥ улам олорды Иеговага бажырбай турган улустаҥ ылгаштырарга кӱч болот (1 Кор. 2:12). «Телекейдиҥ тыны» улусты «эт-канныҥ кычазыла» јӱрерге кӱӱнзедет (Еф. 2:3). Темдектезе, тыш бӱдӱм јанынаҥ биске јаантайын јӧптӧр берилип турган да болзо, кезик христиандардыҥ кийими эмезе тыш бӱдӱми бу јӧптӧргӧ келишпей јат. Олор тар эмезе ӧйинеҥ ӧткӱре ачык кийим кийгилейт, керек дезе христиан туштажуларга да андый кийимдӱ баргылайт. Кезик христиандар чачын саҥ-башка этире (экстравагантный) кайчыладып, јазап алат (1 Тим. 2:9, 10). Андый кижи Иегованыҥ Керечили деп эмес, је бу телекейдиҥ најызы деп кӧрӱнет (Иак. 4:4).

¹³ Кезик Иегованыҥ Керечилерине телекейдиҥ тыны ӧскӧ јанынаҥ тийет. Олордыҥ бијелегени де, бойын тудунганы да бу телекейдиҥ улузына тӱҥей. Социальный сетьтерде чыгарып турган фотолорын ла комментарийлерин кӧрзӧ, олорды кӧгӱс јанынаҥ ӧзӧргӧ албаданып турган улус деп айдып болбозыҥ. Олор  аксагалдар тӱзедетен јаан кинчек этпей де турган болор, је бу телекейдеҥ башкаланарга турган ака-эјелерге јаман салтарын јетирердеҥ айабас. (1 Петр 2:11, 12 кычырыгар.)

14. Иеговала јуук колбуларысты јылыйтпаска турган болзоос, биске нени эдер керек?

¹⁴ Бу телекей бисти эт-кан кычазын ла кӧс кычазын бӱдӱрзин эмезе јадын-јӱрӱмле оморкозын деп кӱӱнзедет (1 Иоанн 2:16). Је бис Иегованыйы болодыс, оныҥ учун «Кудай јок јӱрерин ле телекейдиҥ улузыныҥ кычаларын јектеп, эмдиги ӧйдӧ чын сананып, акту јӱрерге ле Кудайга беринип јӱрерге» албаданар учурлу (Тит. 2:12). Бистиҥ куучыныстаҥ, кийимистеҥ, тыш бӱдӱмистеҥ, анайда ок ишке, курсакка ла аракыга кандый кӧрӱмдӱ болгоныстаҥ, кыскарта айтса, бастыра јӱрӱмистеҥ, бис јӱк Иеговага бажырып турганыс деп, улуска кӧрӱнип турар учурлу. (1 Коринфтегилерге 10:31, 32 кычырыгар.)

15. Бис ака-эјелерге нениҥ учун јалакай ла сӱӱштӱ баштанар учурлу?

¹⁵ Иеговала јуук колбуларыс учун быйанду болгоныс, ака-эјелериске канайып баштанып турганыстаҥ кӧрӱнет. Олор база Иегованыйы болот деп ундыбай турзаас, бис олорго јаантайын јалакай ла сӱӱштӱ баштанарыс (1 Фес. 5:15). Иисус ӱренчиктерине мынайып айткан: «Ортогордо сӱӱш болзо, слерди  Мениҥ ӱренчиктерим деп, ончозы танып ийер» (Иоанн 13:35).

16. Бойыныҥ ишчилерин Иегова баалап јат деп, Моисейдиҥ јасагынаҥ канайып кӧрӱнет?

¹⁶ Јуундагы ака-эјелерге канайып баштанарын кӧргӱзип турган тем кӧрӱп ийектер. Иегованыҥ ӧргӧӧзиндеги јӧӧжӧ јӱк ле Иеговага бажырарында тузаланылган. Моисейдиҥ јасагында бу јӧӧжӧни канайып тузаланарыныҥ ээжилери болгон. Бу јӧӧжӧни јастыра тузаланган кижини ӧлӱм сакыйтан (Тоол. 1:50, 51). Иегова ӧргӧӧдӧги јӧӧжӧни анайып баалап турарда, бис оныҥ чындык ишчилерине канайып баштанып турганыска, ол оноҥ јаан ајару эдет. Иегова албатызына мынайып айткан болгон: «Слерге тийген кижи, мениҥ кӧзимниҥ каразына тийгендий болот» (Зах. 2:8).

17. Иегова неге јаан ајару эдет?

¹⁷ Малахияныҥ бичигинде, Иегова ишчилериниҥ куучындажып јатканын «лаптап уккан» деп айдылат (Мал. 3:16). Эйе, Иегова «Бойыныҥ улузын билер» (2 Тим. 2:19). Бистиҥ нени айдып турганысты, нени эдип турганысты Иегова ончозын билер (Евр. 4:13). Ака-эјелерге кезикте јалакай баштанбай турганыс, Иегованыҥ кӧзинеҥ туура калбай јат. Је бистиҥ олорго кӱндӱзек ле јалакай болгоныс, бары-јогыла ӱлежип турганыс, анайда ок олордыҥ јаманын таштап турганыс, Иегованыҥ кӧзинеҥ база туура калбай јат (Евр. 13:16; 1 Петр 4:8, 9).

18. Иегованыҥ албатызына кирип турганыс учун, быйанысты канайып кӧргӱзедис?

¹⁸ Иегованыҥ албатызына кирип турганыс учун Кудайга сӱреен јаан быйанысты айдадыс. Кудайга јӱрӱмисти учурлазаас, бис эҥ ле ойгор алтам эдедис. Бис «кинчектӱ ле балыр јӱрӱмдӱ ӱйе ортодо» јӱрген де болзоос, «јек јок ло ару болуп», «телекейдеги јарыткыштар чылап», јаркындалар аргалу (Флп. 2:15). Оныҥ учун Иеговага јарабай турган керектердеҥ тууралап јӱрерге албаданадыс (Иак. 4:7). Анайда ок ака-эјелериске сӱӱштӱ ле тоомјылу баштанадыс, нениҥ учун дезе олор база Иегованыҥ болот (Рим. 12:10).

19. Иегова бойыныҥ улузын канайып кайралдайт?

¹⁹ «Иегова бойыныҥ албатызын таштабас» — деп, Агару Бичикте айдылат (Сар. 94:14). Иегова, бисле не де болуп калза, бисти артыргыспас деп сӧзин берет. Керек дезе ӧлӱм де бисти оныҥ сӱӱжинеҥ айрып болбос (Рим. 8:38, 39). Римдегилерге 14:8-те: «Јӱрген болзобыс, Кайраканга болуп јӱрӱп јадыбыс. Ӧлӱп јаткан болзобыс, Кайраканга болуп ӧлӱп јадыбыс. Анайдарда, јӱргенис пе, ӧлӱп јатканыс па,— бис Кайракандыйы» деп айдылат. Иегова бойыныҥ чындык најыларын тирилтер ӧйди бис энчикпей сакып јадыс (Матф. 22:32). Бисте бӱгӱнги де кӱнде кӧп алкыштар бар. Сарын 33:12-де мынайып айдылат: «Кудайы — Иегова болгон калык ырысту. Бу албаты Кудайдыҥ энчизи болуп талдалган».