ИИСУС ӱренчиктерин сӱӱнчилӱ јарды јарлаарга ӱредип турарда, бу јарды кезик улус укпас деп айткан (Лука 10:3, 5, 6). Кезикте јарлаар иште биске улус кату сӧстӧр айдып, калјуурып та јат. Мынаҥ улам бистерге килемкей болорго кӱч болордоҥ айабас.

Килемкей кижи улустыҥ кӱчтерин кӧрӱп, олорды килеп, болужарга кӱӱнзейт. Је биске јарлаар иште улуска килемкей болорго кӱч болуп турган болзо, улуска болужарга турган кӱӱнис ӧчӱп калардаҥ айабас. Је улуска килемкей болорго албаданып турзаас, отко одын салып турганына тӱҥей болодыс. Ол тушта бис јарлаар ишке эрчимдӱ туружарыс (1 Фес. 5:19).

Улуска килемкей болорго кӱч те болуп турза, нени эдер керек? Мындый ӧйдӧ биске Иегованыҥ, Иисустыҥ ла элчи Павелдиҥ теми болужар.

Канча муҥ јылдардыҥ туркунына улус Кудай керегинде тӧгӱн јайып, Кудайды јабарлап јат. Је Иегова «јакшызы јок то, јаман да улуска быйанзак [јалакай, ЈТ]» болот (Лука 6:35). Оныҥ јалакайы чыдамкайынаҥ кӧрӱнет. Иегова «ончо улус» аргадалзын деп кӱӱнзейт (1 Тим. 2:3, 4). Кудай јаманды кӧрӧр кӱӱни јок то болзо, улусты ӧлӱп калзын деп кӱӱнзебей јат, не дезе кижиниҥ јӱрӱми ого баалу болот (2 Петр 3:9).

Сатана Кудайга бӱтпей тургандардыҥ сагыжын сокортып салган деп, Иегова билер (2 Кор. 4:3, 4). Кезик улус јаштаҥ ла ала Кудай керегинде тӧгӱн немеге ӱредилген, оноҥ улам олорго чындыкты алынарга кӱч болот. Андый улуска Иегова болужарга албаданат. Бис мыны кайдаҥ билерис?

Иегова ниневитяндарды канайып килегенин эске алып ийектер. Олор калју улус болгон до болзо, Иегова Ионага айткан: «Оҥ колын сол колынаҥ ылгаштырбай турган јӱс јирме муҥнаҥ кӧп улусту улу Ниневия каланы мен канайып килебейтем?» (Иона 4:11). Олор Иегова керегинде чындыкты билбеген, оныҥ учун Иегова олорды карамдап, Ионаны ийген. Иона олорго барып, Кудайдыҥ јаргызын айдар учурлу болгон.

Бис улуска Иегова ла чылап баштанарга албаданадыс. Темдектезе, бис кажы ла кижиге, керек дезе, бистиҥ јарыс кижиниҥ јӱрегин томултпас деп билдирип те турза, болужарга албаданадыс.

Иисус кӧгӱс јанынаҥ торолоп калган улусты, Адазы ла чылап, килеген. Агару Бичикте айдылат: «Кӧп улусты кӧрӧлӧ, олорго ичи ачыды: олор кӱдӱчизи јок койлордый тӱймеп, тозуп калгандар» (Матф. 9:36). Улус нениҥ учун мындый шыралгалу айалгага кирип калганын Иисус оҥдоп туратан, не дезе, кудай јаҥныҥ башчылары улусты тӧгӱнге ӱредип, олорго јаман баштанар болгон. Оныҥ јарын улус башка-башка шылтактардаҥ улам алынбас деп билген де болзо, ол олорды оноҥ ло ары «кӧп ӱретти» (Марк 4:1—9).

 Биске улус јарды нениҥ учун укпай турган деп, билип алар керек. Кезик улус, бойлорын христиандар деп аданып турган улустыҥ јаман темин кӧрӱп, Агару Бичикти эмезе христиан кудай јаҥдарды јаратпай јат. Кем де бис керегинде тӧгӱн неме уккан болор. А кем де айылдаштарынаҥ эмезе јууктарынаҥ уйалып, бисле куучындашпай турган болор.

Кезик улус бисти кандый бир тӱбек болгонынаҥ улам укпай јат. Ким деп, бир миссионер эје мынайып куучындайт: «Бис јарлап тура кӧп лӧ сабада јуу-чак ӧдӱп, бастыра јӧӧжӧзин јылыйткан улуска туштап јадыс. Олордо кандый да ижемји јок. Олор улустаҥ чӧкӧп, кемге де бӱтпей барган. Бис јаантайын јарлаар ижисти токтодорго албаданып турган улуска туштайдыс. Бир катап мени улус согорго чурап та келген учурал болгон».

Је Ким эјеге мындый кӱчтерде улусты килеерге не болужат? Ол айдат: «Мени улус јамандап турза, мен Укаа сӧстӧрдӧ 19:11-де айдылган сӧстӧрди эске аладым: „Ӧткӱн кижи чугулданбай јат“. Олордыҥ ӧткӧн тӱбегин ундыбай турзам, меге олорды килеерге јеҥил болот. Анайда ок ӱзе улус биске калјуурбай јат. Кезиги, такып келзеес, бисти јилбиркеп угат».

Бойыгардаҥ сурагар: «Мен олордыҥ ордына болгон болзом, Каандык керегинде јарды канайып угар эдим?» Темдектезе, слер Иегованыҥ Керечилери керегинде кӧп тӧгӱн уккан болзоор, олорды угар бедигер? Слер де Керечилердиҥ куучындаганын укпас болорыгар, карын олор слердиҥ сезимдеригерди оҥдозын деп кӱӱнзеер эдигер. Оныҥ учун Иисустыҥ сӧстӧрин ундыбай јӱректер: «Слерге улус кандый болзын дезегер, бойыгар да олорго андый ок болыгар» (Матф. 7:12). Эйе, улуска чыдамкай болорго кӱч те болзо, биске олордыҥ сезимдерин оҥдоорго албаданар керек.

Элчи Павел ого калјуурып удурлашкан да улуска килемкей болгон. Нениҥ учун? Нениҥ учун дезе, чындыктаҥ озо ол кандый кижи болгонын ундыбай јӱрген. Ол мынайып бичиген: «Башкыда Оны јамандагам, истегем ле тарындыргам, је меге быйан [буурзаш, ЈТ] эдилген, нениҥ учун дезе билбей ле бӱтпей јадып анайда эткем» (1 Тим. 1:13). Иегова ла Иисус ого тыҥ буурзаган деп, Павел оҥдоп туратан. Оныҥ учун јарлап турала туштаган кезик улустаҥ ол бойын кӧргӧн болор.

Павел кезикте тӧгӱн ӱредӱлерге тыҥ бӱдӱп турган улуска учурап туратан. Мындый  айалгада, ол нени эткен? Бир катап ол Афинада болордо, «кала чалуларла толо болгонын кӧрӱп, оныҥ бойында тыны чугулданып турды» (Ап. ижи 17:16). Је андый да болзо, ол бу учуралды Афинадагы улуска чындык Кудай керегинде куучындайтан эптӱ арга деп кӧргӧн (Ап. ижи 17:22, 23). Павел «кезиктерин де болзо аргадап аларга» болуп, кандый ла куучындажатан аргалар тузаланган (1 Кор. 9:20—23).

Бисти јаман кӧрӱп турган эмезе тӧгӱн ӱредӱлерге бӱдӱп турган улуска јарлазаас, бис Павелдеҥ тем алар аргалу. Олорго «јакшылык керегинде сӱӱнчилӱ јар» јарлап, олордыҥ неге бӱдӱп турганын ајаруга алар керек (Иса. 52:7). Дороти деген эје айдат: «Бистиҥ јердеги улустыҥ кезиги, Кудай калју ла ол јаантайын улусты јаргылайт деп бӱдет. Мен олорды Кудайга тыҥ бӱдӱп турганы учун мактап, Агару Бичикте Иегова улусты тыҥ сӱӱп турганы керегинде ле келер ӧйдӧ биске кандый јӱрӱм берерге турганы керегинде куучындап бередим».

Калју телекейдиҥ учы јууктаганы сайын, кезик улус бисти ле бистиҥ јарысты там ла јаратпай барат (2 Тим. 3:1, 13). Је мындый айалга бистиҥ сӱӱнчисти айрып, улуска килемкей болорында буудак болбос учурлу. Иегова биске јаманды јакшыла јеҥерге ийде-кӱч берер (Рим. 12:21). Пионер болуп турган Джессика эје айдат: «Меге јаантайын улуркак улус туштайт. Олор биске ле бистиҥ јарга каткырыжып јат. Мынаҥ улам мен кезикте тыҥ ачынып јадым. Оныҥ учун куучынды баштап ийеле, кижиге Иегова ла чылап кӧрӧргӧ, бойымга мӱргӱйдим. Мынайып, бойымды тудунып, кижиге канайып болужары керегинде сананып јадым».

Анайда ок кожо јарлап турган јарчыны база оморкодор керек. «Јарлаар иште кандый бир јаман учурал боло берзе, мен куучынды солып, ӧскӧ кандый бир неме керегинде куучындаарга албаданадым. Темдектезе, ајаруны, бисти улус укпай турганына эмес, је јарлаар ижистиҥ јакшы једимдерине эдерге албаданадым».

Јарлаар иште бисте кандый кӱчтер болуп турганын Иегова јакшы билер. Оныҥ учун улуска килемкей болорында Иегованаҥ тем алып турганысты кӧрӱп, Иегова тыҥ сӱӱнип јат! (Лука 6:36). Је Кудай јаантайынга улусты килебес. Оныҥ учун калју телекейди Кудай јоголтып салар деп, алаҥзыбаска јараар. Је ол ӧй келгелекте, биске сӱӱнчилӱ јарды токтобозынаҥ јарлаар керек (2 Тим. 4:2). Айдарда, оноҥ ло ары эрчимдӱ јарлап, «ончо улуска» килемкей болуп јӱректер!