1, 2. а) Иисус божоор алдында ӱренчиктериле не керегинде куучындашкан? (Јӧрмӧлдиҥ бажындагы јурукты кӧрӱгер.) б) Јарлап турганыстыҥ шылтактарын нениҥ учун ундыбас керек? в) Бу јӧрмӧлдӧ бис нени шӱӱп кӧрӧрис?

ИИСУС божоор алдында эҥирде элчилериле узак куучындашкан. Ол олорды тыҥ сӱӱп турганында бӱдӱмјилеген. Ӧткӧн јӧрмӧлдӧ айдылганыла, ол бойыныҥ ӱренчиктерине виноградтыҥ тӧс сабы керегинде укаа сӧсти куучындап, олорды кӧп тӱжӱм экелзин, ӧскӧртӧ айтса, Каандык керегинде јарды турумкай артып јарлазын деп кӱӱнзеткен (Иоанн 15:8).

² Је Иисус ӱренчиктерине јаҥыс ла нени эдерин эмес, је оны нениҥ учун эдер керек деп база јартаган. Ӧскӧртӧ айтса, нениҥ учун оноҥ ары јарлаар керек дегениниҥ шылтактарын айткан. Бу шылтактарды нениҥ учун ундыбас керек? Олор биске турумкай артып, сӱӱнчилӱ јарды «ончо калыктарга кере болзын деп» јарлаарга болужар (Матф. 24:13, 14). Бу јӧрмӧлдӧ нениҥ учун оноҥ ары јарлаар керек дегениниҥ библиялык тӧрт шылтакты шӱӱп кӧрӧрис. Анайда ок турумкай артып, тӱжӱм  экелерге Иегова биске канайып болужып турганын кӧрӧрис.

3. а) Иоанн 15:8-ле болзо, бис кандый эҥ јаан шылтактаҥ улам јарлайдыс? б) Иисустыҥ укаа сӧзиндеги виноградтыҥ јиилектери нени темдектейт, нениҥ учун бу сӱреен јакшы тӱҥдештирӱ болот?

³ Иоанн 15:1, 8 кычырыгар. Бис Иегованы мактап, оныҥ адын агарулаарга кӱӱнзейдис. Бу јарлап турганыстыҥ эҥ јаан шылтагы. Иисус бойыныҥ адазын, Иегованы, виноград ӧскӱреечиге тӱҥейлеген. Бойын — виноградтыҥ тӧс сабына, а ӱренчиктерин — виноградтыҥ саптарына (Иоанн 15:5). Айдарда, виноградтыҥ јиилектери — Христостыҥ ӱренчиктери экелип турган Каандыктыҥ тӱжӱмин темдектейт. Бу сӱреен јакшы тӱҥдештирӱ. Не дезе, Иисус элчилерине мынайып айткан: «Кӧп јиилек ӧскӱрип [турзагар]... Адам онызыла макталар». Виноград кӧп јиилек берзе, оны ӧскӱрген кижи макталат, анайып ла бис канча кире аргабыс бар Каандык керегинде јарды јарлазаас, Иегова макталат (Матф. 25:20—23).

4. а) Бис Кудайдыҥ адын канайып агарулап јадыс? б) Кудайдыҥ адын агарулаар арга берилгени учун слерге кандый сезимдер келет?

⁴ Кудайдыҥ ады бистиҥ јарлаганыстаҥ улам канайып агарулалат? Кудайдыҥ ады тегин де агару болордо, бис оны оноҥ агару эдер аргабыс јок. Је Исаия судурчы мындый сӧстӧр бичиген: «Теҥеридеги черӱлердиҥ Башчызын, Иегованы, агару эдигер» (Иса. 8:13). Бис Иегованыҥ адын ӧскӧ аттарга кӧрӧ, улу деп аҥылап, улуска оныҥ агарузын оҥдоорго болужып турзаас, Кудайдыҥ адын агарулап јадыс (Матф. 6:9). Мыны бис канайып эдедис? Темдектезе, улуска Иегованыҥ јараш јандарын ла оныҥ улусты ӱргӱлјиге райда јӱрзин деген амадузын куучындайдыс. Анайып бис Кудайдыҥ адын Сатананыҥ таркадып турган тӧгӱнинеҥ корулап јадыс (Баш. 3:1—5). Анайда ок улуска Иегова «макты, кӱндӱни ле кӱчти аларга јарамык» деп оҥдоорго болужып турзаас, оныҥ адын агарулап јадыс (Ачыл. 4:11). 16 јылдыҥ туркунына пионер болуп турган Руне айдат: «Меге Јер-телекейдиҥ Јайаачызы керегинде куучындайтан арга берилгенин сананзам, јӱрегимдеги быйанымды айдарга оноҥ ло ары јарлап јадым».

5. а) Иоанн 15:9, 10-ло болзо, бис база кандый шылтактаҥ улам јарлайдыс? б) Иисус турумкай болорыныҥ керектӱзин канайып кӧргӱскен?

⁵ Иоанн 15:9, 10 кычырыгар. Бис Иегованы ла Иисусты тыҥ сӱӱп јадыс. Бу Каандык керегинде јарды јарлап турганыстыҥ база бир шылтагы (Марк 12:30; Иоанн 14:15). Иисус бойыныҥ ӱренчиктерине: «Мениҥ сӱӱжимде јӱригер» — деп айткан. Ол нениҥ учун мынайып айткан? Јылдаҥ јылга Иисустыҥ чындык ӱренчиги болуп јӱрерге, турумкай болор керек. Иоанн 15:4—10-ло болзо, виноградтыҥ тӧс сабы керегинде укаа сӧсти јартап тура, Иисус «јӱригер» деген сӧсти башка-башка эдип тузаланганыла  турумкай болорыныҥ керектӱзин кӧргӱскен.

6. Бис Христостыҥ сӱӱжинде јӱрерге кӱӱнзеп турганысты канайып кӧргӱзерис?

⁶ Бис Христостыҥ сӱӱжинде јӱрерге ле оныҥ јарадузын аларга кӱӱнзеп турганысты канайып кӧргӱзер аргалу? Ӧрӧги айдылган сӧстӧрлӧ Иисус: «Мениҥ сӧзимди угыгар» — деп айдарга сананган. Оныҥ учун биске Иисустыҥ јасактарын бӱдӱрер керек. Иисус бойы нени эткен, бисти анайып ла этсин деп кӱӱнзедип: «Мен Адамныҥ јакылталарын бӱдӱрип, Оныҥ сӱӱжинде јӱрӱп јадым» — деп айткан. Анайып, Иисус биске тем артыргыскан (Иоанн 13:15).

7. Сӱӱште ле сӧсуккур болорында кандый колбу бар?

⁷ Иисус сӧсуккур болорыныҥ ла сӱӱштиҥ колбузын кӧргӱзип, элчилерине айткан: «Кемде Мениҥ јакылталарым бар, кем олорды бӱдӱрип турган, Мени сӱӱп турганы ол» (Иоанн 14:21). Анайда ок бис Иисустыҥ барып, јарлагар деген јакылтазын бӱдӱрип турзабыс, Кудайды сӱӱп турганысты кӧргӱзедис, нениҥ учун дезе Иисустыҥ јасактарында оныҥ Адазыныҥ кӧрӱми кӧрӱнет (Матф. 17:5; Иоанн 8:28). Бистиҥ сӱӱжисти кӧрӱп, Иегова ла Иисус бисти база сӱӱр.

8, 9. а) Јарлап турганыстыҥ ӱчинчи шылтагы кандый? б) Иезекииль 3:18, 19-тагы ла 18:23-теги Иегованыҥ сӧстӧри бисти канайып јарлаарга кӱӱнзедет?

⁸ Јарлап турганыстыҥ ӱчинчи шылтагы — улуска Иегованыҥ кӱнин јууктап келгенин озодоҥ айдары. Агару Бичикте Ной «јарлыктаачы» деп адалган. (2 Петр 2:5 кычырыгар.) Ол Чайыктыҥ алдында јарлап турарда, калју телекейдиҥ јоголтылары керегинде улуска озодоҥ айткан болор. Нениҥ учун мындый шӱӱлте эдерге јараар? Иисус мынайып айткан: «Чайык чыгар кӱндердиҥ алдында, Ной ковчегке кирердиҥ киргенче, улус ичип-јип јаткан, кижи алары алып, кижиге барары барып турган. Чайык чыгып, ончозын кырганча, олор нени де сананбай јӱргендер. Кижи Уулыныҥ келери андый ла болор» (Матф. 24:38, 39). Ной Кудайдыҥ јаргызын улус керекке албай да турарда, оноҥ ары јарлаган.

⁹ Бӱгӱнги кӱнде бис Каандык керегинде јарды келер ӧйдӧ Кудай нени  эдерге турганын ончо улус билип алзын деп јарлайдыс. Бис, Иегова ла чылап, бу јарды улус алынып, аргадалзын деп кӱӱнзеп јадыс (Иез. 18:23). Бого коштой, айылдар сайын эмезе улусту јерлерде јарлазаас, Кудайдыҥ Каандыгы калју телекейди јоголторго турганын канча ла кире кӧп улуска озодоҥ айдып саларга албаданадыс (Иез. 3:18, 19; Дан. 2:44; Ачыл. 14:6, 7).

10. а) Матфей 22:39-ла болзо, бис кандый шылтактаҥ улам јарлайдыс? б) Павел ле Сила Филиппыдагы тӱрмениҥ каруулчыгына канайып болушканын куучындап беригер.

¹⁰ Оноҥ ары јарлап турганыстыҥ тӧртинчи шылтагы — јуугысты сӱӱп турганыс (Матф. 22:39). Сӱӱш бу јакылтаны оноҥ ары бӱдӱрерге кӱӱнзедет, нениҥ учун дезе улустыҥ јӱрӱминиҥ айалгазы солына берзе, олор сӱӱнчилӱ јарды алынар болор. Бир катап, элчи Павелде ле оныла кожо иштеген Силада кандый учурал болгонын эске алып ийеектер. Олор экӱни Филиппы деген калада тӱрмеге отургызып койгон. Тӱн ортозында јер силкинерде, тӱрмениҥ эжиктери ачыла берди. Тӱрмениҥ ишчизи кижендӱлер кача берген болор деп, сайынарга јастаган. Је Павел ого: «Бойыҥа јаман неме этпе!» — деп кыйгырып ийди. Каруулчык сертилдеп, Павел ле Силанаҥ: «Аргаданарга нени эдейин?» — деп сураарда, олор ого: «Иисус Христос Кайраканга бӱт. Ол тушта сен де, айылдагы улузыҥ да аргадалар» — деди (Ап. ижи 16:25—34).

11, 12. а) Тӱрмениҥ каруулчыгыла болгон учурал биске јарлаар иш јанынаҥ кандый ӱредӱ берет? б) Бис нениҥ учун оноҥ ары јарлаарга кӱӱнзейдис?

¹¹ Бу учурал биске јарлаар иш јанынаҥ кандый ӱредӱ берет? Сананып кӧрӱгер: тӱрмениҥ каруулчыгы чындыкты билип аларга, Павел ле Силанаҥ болушты јӱк ле јер силкинген кийнинеҥ сураган. Агару Бичиктиҥ јарын алынбаган улустыҥ кезиги јӱрӱминде кандый бир уур-кӱч ӧткӧн кийнинеҥ бойыныҥ кӧрӱмин солыган учуралдар бӱгӱнги де кӱнде бар. Темдектезе, кем-кем сакыбаган јанынаҥ узак јылдарга иштеп салган ижин јылыйткан. Кем де айрылышкан кийнинеҥ, токунап болбой јат. Ол эмезе кем де кандый бир оору-јоболго табартып эмезе јуук кижизин јылыйтып санааркайт. Кезик улус мындый тӱбектердеҥ улам, алдында керекке албаган јӱрӱмниҥ учурлу сурактарыла јилбиркеп баштайдылар. Олор керек дезе: «Аргаданарга, нени эдер керек?» — деп сананып турган болор. Оныҥ учун бис олорго келзеес, олор ижемји берип турган сӱӱнчилӱ јарды јӱрӱминде баштапкы катап угарга кӱӱнзеер болор.

¹² Айдарда, оноҥ ары турумкай јарлазаас, бисти угуп, токунал аларга турган улуска туштаар болорыс (Иса. 61:1). 38 јылдыҥ туркунына ӧйин толо берип иштеп турган Шарлотта эје мынайып айдат: «Бӱгӱнги кӱнде улус шакпыртта. Олорго сӱӱнчилӱ јарды куучындаар керек». 34 јылдыҥ туркунына пионер болуп турган Эйвор эје: «Алдында ӧйдӧ бӱгӱнги кӱндий санааркаштар болбогон. Оныҥ учун санааркаган  улуска акту јӱрегимнеҥ болужарга кӱӱнзеп турганымнаҥ улам барып јадым» — деп айдат. Чын, улусты сӱӱри — оноҥ ары јарлайтаныныҥ јаан шылтагы болот.

13, 14. а) Иоанн 15:11-ле болзо, јарлаарга биске не болужат? б) Иисустыҥ сӱӱнчизи ошкош сӱӱнчини аларга, биске нени эдер керек? в) Јарлаар ишке сӱӱнчи канайып болужат?

¹³ Иисус божоор алдында эҥирде бойыныҥ элчилерине оноҥ ло ары тӱжӱм экелерге болужатан сыйлар керегинде айткан. Бу кандый сыйлар, олор биске канайып болужар аргалу?

¹⁴ Сӱӱнчи. Иисустыҥ јарлазын деп јакарузын уур јӱк деп айтса, чын болор бо? Јок, не дезе, Иисус виноградтыҥ сабы керегинде укаа сӧсти куучындаган кийнинеҥ, Каандык керегинде јарлаары ӱренчиктерге сӱӱнчи экелер деп айткан. (Иоанн 15:11 кычырыгар.) Ӧскӧртӧ айтса, Кудайдыҥ табын бӱдӱреринде Иисустыҥ алган сӱӱнчизин бис те алар аргалу деп ол бӱдӱмјилеген. Бу сӧстӧрлӧ Иисус нени айдарга сананган? Ӧрӧги айдылганыла болзо, Иисус бойын виноградтыҥ тӧс сабына, а ӱренчиктерин саптарга тӱҥейлеген. Саптар сууны ла тузалу немелерди тӧс сабы ажыра алат. Анайып ла биске Иисустыҥ сӱӱнчизи ошкош сӱӱнчини аларга, оныла бирлик артар керек (Иоанн 4:34; 17:13; 1 Петр 2:21). Пионер болгоны 40 јылдаҥ ажа берген Ханне эје айдат: «Јарлаган кийнинеҥ алып турган сӱӱнчи меге оноҥ ары јарлаарга болужат». Чындап та, јеҥил эмес те јерлерде јарлап јӱретен ийде-кӱчти сӱӱнчи берет (Матф. 5:10—12).

15. а) Иоанн 14:27-де Иисус не керегинде айткан? б) Оноҥ ары јарлаарга, амыр биске канайып болужат?

¹⁵ Амыр. (Иоанн 14:27 кычырыгар.) Иисус божоор алдында эҥирде элчилерине мынайып база айткан: «Бойымныҥ амырымды слерге берип јадым». Христостыҥ амыры биске оноҥ ары јарлаарга канайып болужат? Бис Иеговага турумкай артып, јарлап турзаас, Иегованыҥ ла Иисустыҥ јарадузын аладыс. Мынаҥ улам јӱрегиске амыр келет (Сар. 149:4; Рим. 5:3, 4, ЈТ; Кол. 3:15). 45 јылдыҥ туркунына ӧйин толо берип иштеп турган Ульф ака айдат: «Јарлаганымныҥ кийнинеҥ  арып та калзам, јӱрегиме сӱӱнчи келет. Мен чыннаҥ ла ырысту кижи». Амыр ла јӱректеги токунал учун бис Иеговага јаан быйанысты айдадыс!

16. а) Иоанн 15:15-ле болзо, Христостыҥ элчилеринде кандый арга болгон? б) Иисустыҥ најылары болуп артарга, элчилер нени эдер учурлу болгон?

¹⁶ Иисусла најылажары. Иисус, элчилериниҥ сӱӱнчизи толо болзын деп айтканыныҥ кийнинеҥ, нениҥ учун килебес сӱӱшти кӧргӱзер керек деп, олорго јартап берген (Иоанн 15:11—13). Оноҥ Иисус олорды «најыларым» деп адаган. Иисустыҥ најызы болотоны андый јаан сый! Је Иисустыҥ најызы болуп артарга, олор кӧп «јиилек экелер» учурлу болгон. (Иоанн 15:14—16 кычырыгар.) Иисус элчилерине бу сӧстӧрди айдардаҥ эки јыл кире озо мынайып айткан: «Теҥери Каандыгы јууктап келди деп, базып, јарлап јӱрӱгер» (Матф. 10:7). Божоор алдында эҥирде Иисус ӱренчиктерин оноҥ ло ары јарлазын деп кӱӱнзеткен (Матф. 24:13; Марк 3:13—15). Иисустыҥ берген јакарузы јеҥил эмес те болгон болзо, ӱренчиктери оны бӱдӱрип, оныҥ најылары болуп арткан. Олорго не болушкан?

17, 18. а) Иоанн 15:16-да кандый сый керегинде айдылган? б) Бу сый ӱренчиктерге канайып болушкан? в) Бӱгӱнги кӱнде бистерге кандый сыйлар болужат?

¹⁷ Мӱргӱӱлдерге каруу алары. Иисус айткан: «Мениҥ адымда Аданаҥ нени де суразагар, оны Ол слерге берзин [берер, ЈТ]» (Иоанн 15:16). Бу сӧстӧр элчилерге ийде ле бӱдӱмји берген *. Элчилер Иисустыҥ удабас ла божоп каларын јетире оҥдобой до турган болордо, бу сӧстӧр олордыҥ болуш јок артпазын кӧргӱскен. Иегова олордыҥ мӱргӱӱлине каруу берерге ле олорго Каандык керегинде јарды оноҥ ло ары јарлаарына болужарга белен болгон. Иисустыҥ божогон кийнинде, элчилер удабай ла Иегованыҥ болужын кӧргӧн (Ап. ижи 4:29, 31).

¹⁸ Бис бӱгӱнги де кӱнде мӱргӱӱлдериске каруу аладыс. Бис турумкай артып, тӱжӱм экелип турзаас, Христостыҥ најылары болуп артадыс. Анайда ок Каандык керегинде јарды јарлап турала, кӱчтерге туштазаас, Иегова бистиҥ мӱргӱӱлиске карууны кыйалта јогынаҥ берер (2 Кор. 4:7). Иегова бистиҥ мӱргӱӱлдериске каруу берип турганына ла Иисустыҥ најылары болотон арга барына бис јаан быйанду! Бу сыйлар биске оноҥ ло ары тӱжӱм экелерге болужын јетирет (Иак. 1:17).

19. а) Бис нениҥ учун оноҥ ло ары јарлап јадыс? б) Јарлаар ишти тӱгезе бӱдӱрип саларга биске не болужат?

¹⁹ Бу јӧрмӧлдӧ бис нениҥ учун оноҥ ло ары јарлап турганыстыҥ тӧрт шылтагын кӧрдис: бис Иегованы мактаарга ла оныҥ адын агарулаарга кӱӱнзейдис, Иегованы ла Иисусты сӱӱп јадыс, Кудайдыҥ кӱни келерин озодоҥ айдадыс ла јуугысты сӱӱп јадыс. Анайда ок мындый тӧрт сый керегинде билип алдыс: сӱӱнчи, амыр, Иисусла најылажары ла мӱргӱӱлдериске каруу алары. Бу сыйлар биске Кудайдаҥ берилген јакаруны тӱгезе бӱдӱрип саларга ийде берет. Иегова бистиҥ «кӧп јиилек ӧскӱрип» турганысты кӧрӱп, тыҥ сӱӱнип јат!