БӰДӰМЈИ коркышту јаан ийде-кӱчтӱ. Темдектезе, ол биске, кӧгӱс јанынаҥ ӧлтӱрип саларга умзанып турган «јаманныҥ [Сатананыҥ] кызыган ончо согоондорын ӧчӱрип» ийетен арга берет (Еф. 6:16). Бӱдӱмјиниҥ болужыла бис кырдый ошкош кӱчтерди ӧдӧр аргалу. Иисус ӱренчиктерине айткан: «Бӱдӱмјигер горчицаныҥ ӱренинче болуп, бу кырды мынаҥ кӧчӱп бар дезегер, ол кӧчӱп барар» (Матф. 17:20). Бӱдӱмји бистиҥ кӧгӱс јанысты тыҥыдар аргалу, оныҥ учун мындый сурактарды шӱӱп сананар керек: бӱдӱмји ол не? Јӱрек бӱдӱмјиге кандый камаанын эмезе салтарын јетирер аргалу? Бӱдӱмјини канайып тыҥыдар? Биске кемге бӱдер керек? (Рим. 4:3).

Бӱдӱмји — јӱк ле кандый бир чындыкка бӱдӱп турганы ол эмезе кандый бир немеге алаҥзыбай турганы эмес, нениҥ учун дезе «шилемирлер де [Кудай бар деп] бӱдӱп, сертилдеп јадылар» (Иак. 2:19). Айдарда, бӱдӱмји ол не?

Агару Бичикле болзо, бӱдӱмји эки немедеҥ турат. Баштапкызында, «бӱдери — ол неге иженип јӱргениске бӱдӱмјилӱ болоры» (Евр. 11:1а). Слерде бӱдӱмји бар болзо, Иегованыҥ ончо айткан сӧстӧри чын деп, анайда ок кыйалта јогынаҥ бӱдӱп калар деп, бир де алаҥзыбай јадыгар. Темдектезе, Иегова израильтяндарга мынайып айткан: «Слер тӱш ле тӱн турар эдип тургускан јӧптӧжӱӱмди бузып ийетен болзогор, мениҥ Давид ишчимле тургускан јӧптӧжӱӱм бузулып калар эди» (Иер. 33:20, 21). Слер кӱн чыкпаза эмезе ашпаза, тӱн тӱшке солынбас деп, качан бирде коркыганаар ба? Солынбайтан физикалык закондор аайынча кӱнниҥ чыгарына ла ажа берерине алаҥзыбай турган болзоос, бу закондорды тургускан Јайаачы бойыныҥ берген сӧзин бӱдӱрер деп, алаҥзыыр бедис? Јок эмей! (Иса. 55:10, 11; Матф. 5:18).

Экинчизинде, бӱдӱмји — «кӧрӱнбей турган немелерди чын эдет» (Евр. 11:1б). Бу шӱӱлтени оҥдоорго, мындый тем кӧрӱп ийектер. Бала слердеҥ: «Бисти айландыра кей бар деп, кайдаҥ билип тургаҥ?» — деп, сураган болзын. Слер кейди качан да кӧрбӧгӧн дӧ болзогор, балага кейдиҥ бар болгонын кӧргӱзип турган керелерди, темдектезе, кейле тынып турганысты, салкынныҥ сокконын кӧрӱп турганысты ол эмезе ӧскӧ нени-нени куучындап берер эдигер. Ол слердиҥ айткан керелеригерле јӧпсинзе, кӧскӧ кӧрӱнбес немеге бӱдер керек деп оҥдоп ийер. Анайып ла бистиҥ бӱдӱп турганыс чын керелерге тӧзӧлӧнӧт (Рим. 1:20).

Бӱдӱмји чын керелерге тӧзӧлӧнӧт, оныҥ учун неге де бӱдӱп турарга, кижиге «чындыкты [чике, ЈТ] билип» алар керек (1 Тим. 2:4). Је бого коштой база бир неме эдер керек. Элчи Павел мынайып бичиген: «Јӱрегиле бӱдедилер» (Рим. 10:10). Кижиге јаҥыс ла чындыкты билип алар керек эмес, је бого коштой оны баалап турар керек. Јӱк ле бу тушта кижи бӱдӱп турганын керектерле кӧргӱзерге, ӧскӧртӧ айтса, чындык аайынча јӱрерге кӱӱнзеер  (Иак. 2:20). Чындык учун јӱрегинде быйаны јок кижи јастыра кӧрӱминеҥ айрылбай, кедерлеп, бойыныҥ кинчектӱ кӱӱнин бӱдӱрип јӱрзе, чын керелерди де јектеер болор (2 Петр 3:3, 4; Иуда 18). Оныҥ да учун библиялык ӧйлӧрдӧ кайкалдар кӧргӧн улустыҥ кезиги бӱдӱп турганын керектериле кӧргӱспеген (Тоол. 14:11; Иоанн 12:37). Бӱдӱмји, Кудайдыҥ агару тыныныҥ болужыла, чындыкты јӱк ле чыннаҥ сӱӱп турган ла тӧгӱнге бӱдер кӱӱни јок улустыҥ јӱректеринде ӧзӱп јат (Гал. 5:22; 2 Фес. 2:10, 11).

Бек бӱдӱмјилӱ болгон улустыҥ тоозынаҥ Давид каанды аҥылаарга јараар (Евр. 11:32, 33). Андый бӱдӱмји оныҥ билезиниҥ кажы ла кижизинде болбогон. Темдектезе, оныҥ аказы Елиав, Голиафтыҥ электеп шоотконына ачынган Давидти јамандаганыла, Кудайга бойыныҥ тыҥ бӱтпей турганын кӧргӱскен (1 Сам. 17:26—28). Кем де бӱдӱмјилӱ болуп чыкпай јат, бӱдӱмји ада-энедеҥ укталып келбей јат. Айдарда, Давидтиҥ бӱдӱмјизи Кудайла јуук колбуларлу болгонынаҥ улам тыҥыган.

27-чи Сарында Давидке тыҥ бӱдӱмјилӱ болорго не болушканы јарталат (1-кы ӱлгер). Давид, Иегова оны ӧштӱлердеҥ канайып аргадаганын шӱӱп сананган (2-чи, 3-чи ӱлгерлер). Ол Иегованыҥ агару байканын баалаган (4-чи ӱлгер). Давид Кудайга оныҥ ишчилериле кожо бажырган (6-чы ӱлгер). Ол Иеговага акту јӱрегинеҥ мӱргӱген (7-чи, 8-чи ӱлгерлер). Анайда ок ол Иегованаҥ ӱренерге кӱӱнзеген (11-чи ӱлгер). Давидке бӱдӱмји сӱреен баалу болгон, оныҥ учун: «Менде бӱдӱмји болбогон болзо, кайда болор эдим?» — деп бичиген (13-чи ӱлгер, Јаҥы телекейдиҥ кӧчӱрмези, 2013 јыл, англ.).

Слер 27-чи Сарында айдылган кӧгӱс керектерди јаантайын эдип турзагар ла кӧгӱс кӧрӱм-санаалу болзогор, Давид чилеп бек бӱдӱмјилӱ болорыгар. Бӱдӱмји болзын деп, чике билгирлер керек. Агару Бичикти ле ого тайанган бичиктерди канча ла кире кӧп шиҥдезеес, агару тынныҥ тӱжӱмине кирип турган бу кылык-јаҥды тыҥыдарга, ончо ло киреге јеҥил болор (Сар. 1:2, 3). Шиҥжӱ ӧткӱрген тушта шӱӱп сананарга ӧй табыгар. Шӱӱп сананары — быйанзак болорын ӧскӱретен сӱреен јакшы арга. Анайып, бис Иеговага канча ла кире быйанду болзоос, ончо ло кире бӱдӱмјибисти керектерисле кӧргӱзерге кӱӱнзеерис, темдектезе, Кудайга бажырарга јуунныҥ туштажуларына барарыс ла улуска јаҥы јӱрӱм керегинде куучындаарыс (Евр. 10:23—25). Анайда ок бӱдӱмјибисти јаантайын мӱргӱп, чӧкӧбӧй турганысла кӧргӱзедис (Лука 18:1—8). Оныҥ учун Иеговага «туркаары мӱргигер», «ол слерди кичееп кӧрӱп јӱрӱ» деп алаҥзыбагар (1 Фес. 5:17; 1 Петр 5:7). Бӱдӱмји бисти керектер эдерине кӱӱнзедет, эдип турган керектерис бӱдӱмјибисти тыҥыдат (Иак. 2:22).

Иисус божоор алдында эҥирде, ӱренчиктерине: «Кудайга бӱдигер, Меге де бӱдигер» — деп айткан (Иоанн 14:1). Айдарда биске јӱк ле Иеговага бӱдер керек эмес, је Иисуска да бӱдер керек. Мыны канайып эдер? Ӱч арга кӧрӱп ийектер.

Баштапкызында, толынтыны Кудайдыҥ шак ла слер учун берген сыйы деп кӧрӱгер. Элчи Павел: «Кудайдыҥ Уулына бӱткенимле јӱрӱп јадым. Ол меге буурзап јат, мен учун Бойын берген» — деп айткан (Гал. 2:20). Слер Иисуска бӱдӱп турган болзогор, толынты слер учун тӧлӧлгӧн, кинчектерис ташталатан тӧзӧлгӧ ачылган, ӱргӱлјиге јӱретен ижемји берилген, анайда ок Кудайдыҥ бисти тыҥ сӱӱп турганы керелелген деп, бир де алаҥзыбай јадыгар (Рим. 8:32, 38, 39; Еф. 1:7). Бу ончо неме, бойыгарды эш кереги јок деп сананып турганаарла тартыжарга болужатан ийде-кӱч берет (2 Фес. 2:16, 17).

Экинчизинде, Иеговага мӱргӱп јатсагар, мындый арга Христостыҥ тайылгазынаҥ улам ачылган деп ундыбагар. Толынтынаҥ улам, бис Иегованаҥ «ӧйлӱ-ӧйинде болуш ла быйан алар[га], јакшылык табар[га]», ого ару уйатту мӱргӱӱр аргалу (Евр. 4:15, 16; 10:19—22). Мӱргӱӱл кинчектӱ кӱӱнисле тартыжарга болужат (Лука 22:40).

Ӱчинчизинде, Иисуска сӧсуккур болугар. Элчи Павел: «Уулына бӱткени, ӱргӱлји јӱрӱмдӱ, Уулына бакпаганы, јӱрӱм кӧрбӧс: оныҥ ӱстинде Кудайдыҥ чугулы јӱрет» — деп айткан (Иоанн 3:36). Ајарып ийзегер де: Иисуска бӱдӱп турарын, Иоанн сӧсукпас болорынаҥ чек башка болот деп кӧргӱскен. Оныҥ учун Иисуска сӧсуккур болзогор, ого бӱдӱп турганаарды кӧргӱзедигер. Слер «Христостыҥ Јасагын», ӧскӧртӧ айтса, оныҥ ӱреткенин ле јакарганын бӱдӱрип турзагар, Иисуска сӧсуккур болгоноорды кӧргӱзедигер (Гал. 6:2). Анайда ок Иисустыҥ «бӱдӱмјилӱ ле керсӱ кул» ажыра берилген јакаруларын бӱдӱрип турганаарла, сӧсуккур болгоноорды база кӧргӱзедигер (Матф. 24:45). Айдарда, Иисуска сӧсуккур болгоныс јӱрӱмниҥ кӱчтерин ӧдӧтӧн ийде-кӱч берер (Лука 6:47, 48).

Бир катап, бир кижи Иисуска кыйгырып: «Бӱдӱп турум! Бӱдӱп турганымды тыҥыдарга болуш!» — деп айткан (Марк 9:24, ЈТ). Бу кижиде бӱдӱмји болгон до болзо, је ого оны тыҥыдар керек деп, ол оҥдогон. Анайып ла бистиҥ кажыбыста ла бек бӱдӱмји керек болгодый айалгалар болор. Оныҥ учун бӱдӱмјибисти бӱгӱннеҥ ле ала тыҥыдар керек. Бӱдӱмјибисти тыҥыдарга, биске Кудайдыҥ сӧзин шиҥдеп, оны шӱӱп сананар керек. Мынайып бистиҥ Иеговага быйаныс оноҥ тыҥ болор. Анайда ок ака-эјелерле кожо Иеговага бажырып турзаас, улуска јаҥы телекей керегинде ижемјини куучындап турзаас ла јаантайын мӱргӱп турзаас, бӱдӱмјибис там тыҥыйт. «Агару бӱдӱмјибиске тайанып, бойысты тыҥыдып турзаас, ЈТ», Кудайдыҥ сӱӱжинде артар эҥ јаан кайралды аладыс (Иуда 20, 21).