Иов јӧӧжӧзин ле бала-барказын јылыйткан, анайда ок тыҥ ооруп калган. Је ол тӱҥей ле Кудайга чындык арткан. Оныҥ учун Сатана Иовты ак-чегинеҥ тайкылтарга, ал-санаага тӱжӱрерге умзанган. Иовтыҥ ӱч «најызы» келген. Озо баштап олор оныла кожо кунугып турганын кӧргӱскен. Оныҥ кийнинде бир де токунадулу сӧс айтпай, унчукпазынаҥ Иовло кожо јети кӱн отургандар. Мыныҥ кийнинеҥ олор Иовты бурулап ла јабарлап баштаган.