ከአንድ ሰው ጋር ስትተዋወቅ መጀመሪያ የምታቀርበው ጥያቄ “ስምህ ማን ነው?” የሚል ነው። ይህንኑ ጥያቄ አምላክን ብትጠይቀው ምን መልስ የሚሰጥህ ይመስልሃል?

“እኔ ይሖዋ ነኝ። ስሜ ይህ ነው።”—ኢሳይያስ 42:8

አምላክ ራሱ ለስሙ ትልቅ ቦታ ይሰጣል። ይህ ስም ሌላ አካል ለአምላክ ያወጣለት ሳይሆን አምላክ ለራሱ የመረጠው ስም ነው። ይሖዋ “ይህ ለዘላለም ስሜ ነው፤ ከትውልድ እስከ ትውልድ የምታወሰውም በዚህ ነው” ብሎ ተናግሯል። (ዘፀአት 3:15) በመጽሐፍ ቅዱስ ውስጥ የአምላክ ስም ሁሉን ቻይ፣ አብ፣ ጌታ ወይም አምላክ እንደሚሉት ካሉ የማዕረግ ስሞች ሁሉ ይበልጥ ብዙ ጊዜ ተጠቅሶ ይገኛል። በተጨማሪም አብርሃም፣ ሙሴ፣ ዳዊት ወይም ኢየሱስ እንደሚሉት ካሉ የግል መጠሪያ ስሞች ይበልጥ በብዛት ተጠቅሷል። ከዚህም በላይ ይሖዋ ስሙ እንዲታወቅ ይፈልጋል። መጽሐፍ ቅዱስ “ስምህ ይሖዋ የሆነው አንተ፣ አዎ፣ አንተ ብቻ በመላው ምድር ላይ ልዑል እንደሆንክ ሰዎች ይወቁ” ይላል።—መዝሙር 83:18

ኢየሱስ ለአምላክ ስም ትልቅ ቦታ ይሰጣል። አባታችን ሆይ ወይም አቡነ ዘበሰማያት ተብሎ በሚጠራው ጸሎት ላይ ኢየሱስ ተከታዮቹን “ስምህ ይቀደስ” ብለው ወደ አምላክ እንዲጸልዩ አስተምሯቸዋል። (ማቴዎስ 6:9) እሱ ራሱም “አባት ሆይ፣ ስምህን አክብረው” በማለት ጸልዮአል። (ዮሐንስ 12:28) ኢየሱስ በሕይወቱ ውስጥ ቀዳሚውን ቦታ የሰጠው የአምላክን ስም ለማስከበር ነበር፤ በመሆኑም “ስምህን አሳውቄአቸዋለሁ፤ ደግሞም አሳውቃለሁ” ብሎ ሊጸልይ ችሏል።—ዮሐንስ 17:26

አምላክን የሚያውቁ ሰዎች ለስሙ ትልቅ ቦታ ይሰጣሉ። በጥንት ዘመን የኖሩ የአምላክ ሕዝቦች የአምላክ ስም ጥበቃና መዳን እንደሚያስገኝላቸው ተገንዝበው ነበር። “የይሖዋ ስም ጽኑ ግንብ  ነው። ጻድቅ ወደዚያ በመሮጥ ጥበቃ ያገኛል።” (ምሳሌ 18:10) “የይሖዋን ስም የሚጠራ ሁሉ ይድናል።” (ኢዩኤል 2:32) በተጨማሪም መጽሐፍ ቅዱስ ይህ ስም የአምላክን አገልጋዮች ለይቶ እንደሚያሳውቃቸው ይገልጻል። እንዲህ ይላል፦ “ሕዝቦች ሁሉ፣ እያንዳንዳቸው በአምላካቸው ስም ይሄዳሉ፤ እኛ ግን በአምላካችን በይሖዋ ስም ለዘላለም እንሄዳለን።”—ሚክያስ 4:5፤ የሐዋርያት ሥራ 15:14

ስሙ የአምላክን ማንነት በሚገባ ይገልጻል። ብዙ ምሁራን ይሖዋ የሚለው ስም “እንዲሆን ያደርጋል” የሚል ትርጉም እንዳለው ያምናሉ። ይሖዋ አምላክ “መሆን የምፈልገውን እሆናለሁ” በማለት ለሙሴ የተናገረው ሐሳብ የስሙን ትርጉም ማስተዋል እንድንችል ይረዳናል። (ዘፀአት 3:14) ይህ ጥቅስ እንደሚያሳየው የአምላክ ስም ትርጉም እሱ የሁሉ ነገር ፈጣሪ በመሆን የተጫወተውን ሚና ብቻ የሚያመለክት አይደለም። ከዚህ ይልቅ ዓላማውን ለማሳካት እሱ ራሱም ሆነ ፍጥረታቱ አስፈላጊውን ሁሉ እንዲሆኑ የማድረግ ችሎታ እንዳለውም ያመለክታል። የአምላክ የማዕረግ ስሞች እሱ ያለውን ሥልጣን፣ ቦታ ወይም ኃይል የሚገልጹ ቢሆኑም ማንነቱንና የፈለገውን የመሆን ችሎታውን የሚገልጸው ይሖዋ የሚለው ስሙ ብቻ ነው።

ስሙ አምላክ ለእኛ ትኩረት እንደሚሰጠን ያሳያል። የአምላክ ስም ትርጉም አምላክ እኛን ጨምሮ ለሁሉም ፍጥረታቱ ምንጊዜም እንደሚያስብ ይጠቁማል። ከዚህም በላይ አምላክ ለእኛ ስሙን መንገሩ እሱን እንድናውቀው እንደሚፈልግ ያሳያል። ደግሞም ስሙን የነገረን እኛ ስለጠየቅነው ሳይሆን በራሱ ተነሳስቶ ነው። በግልጽ ማየት እንደሚቻለው አምላክ እሱን እንድንመለከተው የሚፈልገው ከእኛ በጣም እንደራቀና ማንነቱ እንደማይታወቅ መንፈስ አድርገን ሳይሆን እውን እንደሆነና ልንቀርበው እንደምንችል አካል አድርገን ነው።—መዝሙር 73:28

ስሙን መጠቀማችን ከእሱ ጋር መቀራረብ እንደምንፈልግ ያሳያል። በምሳሌ ለማስረዳት ያህል፣ ልትቀርበው ለምትፈልገው አንድ ሰው ስምህን በተደጋጋሚ ነገርከው እንበል። ሆኖም ይህ ሰው በስምህ ሊጠራህ አይፈልግም። ታዲያ ይህ ሰው ከአንተ ጋር የመቀራረብ ፍላጎት እንዳለው ይሰማሃል? በጭራሽ! ከአምላክ ጋር በተያያዘም ሁኔታው ተመሳሳይ ነው። ይሖዋ ለሰው ልጆች ስሙን ያሳወቃቸው ከመሆኑም ሌላ በዚህ ስም እንዲጠቀሙ ይፈልጋል። በይሖዋ ስም መጠቀማችን ወደ እሱ መቅረብ እንደምንፈልግ ያሳያል። አምላክም ቢሆን “በስሙ ላይ ለሚያሰላስሉ [ወይም “ስሙን ከፍ አድርገው ለሚመለከቱ” የግርጌ ማስታወሻ]” ሰዎች ልዩ ትኩረት ይሰጣል!—ሚልክያስ 3:16

አምላክን ለማወቅ ልንወስደው የሚገባን የመጀመሪያውና ወሳኙ እርምጃ ስሙን ማወቅ ነው። ሆኖም ይህ ብቻ በቂ አይደለም። ስሙ የሚወክለው አካል ምን ባሕርያት እንዳሉት ማወቅም ይኖርብናል።