ሐምሌ 1, 2021 በቼልያቢንስክ የሚገኘው የሜተለርጂቼስኪ አውራጃ ፍርድ ቤት የ75 ዓመት አረጋዊ የሆኑት ወንድም ቭላድሚር ሱቮሮቭ ጥፋተኛ ናቸው በማለት የስድስት ዓመት የገደብ እስራት በይኖባቸዋል።

ቭላድሚር ሱቮሮቭ

• የትውልድ ዘመን፦ 1946 (ቼልያቢንስክ)

• ግለ ታሪክ፦ የፋብሪካ ሠራተኛ ነበሩ፤ ቲያትር ቤት ተዋናይ ሆነውም ሠርተዋል። በተጨማሪም የሶቪየት የባሕል ማዕከል ውስጥ አስተዳዳሪ ሆነው ሠርተዋል። ሙዚቃ መድረስ እንዲሁም ጊታር መጫወት ይወዳሉ

  በ1973 ከቫለንቲና ጋር ትዳር መሠረቱ። በ1993 ተጠመቁ። ባልና ሚስቱ ኢጎር የተባለ ልጅ የነበራቸው ቢሆንም በ2014 በካንሰር ሕይወቱ አልፏል

ጥር 16, 2020 በቼልያቢንስክ ያሉ ባለሥልጣናት በ75 ዓመቱ ወንድም ቭላድሚር ሱቮሮቭ ላይ ምርመራ ማድረግ ጀመሩ። የቼልያቢንስክ ክልል መርማሪ፣ ወንድም ቭላድሚርን ሃይማኖታዊ እንቅስቃሴዎችን አደራጅተዋል በሚል ከሰሳቸው፤ ከተከሰሱባቸው ነገሮች መካከል ሃይማኖታዊ መዝሙሮችን መዘመር፣ መጸለይ እና መጽሐፍ ቅዱሳዊ ውይይት ማድረግ ይገኙበታል።

የካቲት 2020 ባለሥልጣናቱ በወንድም ቭላድሚር ላይ የወንጀል ምርመራ ማድረግ ጀመሩ፤ የጉዞ እገዳም ጣሉባቸው። ሰኔ 17, 2020 ወንጀል ሠርተዋል ተብለው ተከሰሱ። ወንድም ቭላድሚር፣ ይህ ስደት ያስከተለባቸው መከራ በሕይወታቸው ውስጥ ካጋጠሟቸው በጣም ከባድ ፈተናዎች አንዱ እንደሆነ ገልጸዋል። አክለውም እንዲህ ብለዋል፦ “አምላካችን ይሖዋ ፈጽሞ አልተወንም። . . . ከይሖዋ ጋር ያለን ግንኙነት በየጊዜው ይበልጥ እየተጠናከረ ነው። እኔና ቫለንቲና የይሖዋን እጅ አይተናል። ይሖዋ ውድ በሆኑት ወንድሞቻችን እና እህቶቻችን አማካኝነት ያበረታታናል፤ ያጠነክረናል እንዲሁም ያጽናናናል፤ ሌላ ጉባኤ ውስጥ ያሉ ወንድሞችም ጭምር አበረታተውናል።”

የወንድም ቭላድሚርን ጉዳይ እየተመለከተ ያለው ፍርድ ቤት የ73 ዓመት አረጋዊት በሆኑት በእህት ቫለንቲና ላይ መጋቢት 11, 2021 የሁለት ዓመት የገደብ እስራት ፈርዶባቸዋል። ሁለቱም a ይሖዋ ምንጊዜም ከጎናቸው ሆኖ እንደሚደግፋቸው እርግጠኞች ናቸው።—መዝሙር 118:6