ታኅሣሥ 8, 2022 | የታደሰው፦ የካቲት 15, 2023
ሩሲያ

ወቅታዊ መረጃ—መቀጮው ተቀነሰ | በይሖዋ ድጋፍ መተማመን

አጫውት

የካቲት 13, 2023 የቹቫሽ ሪፑብሊክ ጠቅላይ ፍርድ ቤት፣ በእህት ኒና ማርቲኖቫ እና በእህት ዞያ ፓቭሎቫ ላይ የተጣለው የገንዘብ መቀጮ ከ350,000 ሩብል (4,780 የአሜሪካ ዶላር) ወደ 80,000 ሩብል (1,092 የአሜሪካ ዶላር) እንዲቀነስ ወስኗል። በወንድም አንድሬ ማርቲኖቭ እና በወንድም ሚኻይል ዬርማኮቭ ላይ የተላለፈው የገደብ እስራት ግን አልተቀየረም።

ታኅሣሥ 22, 2022 በቹቫሽ ሪፑብሊክ የሚገኘው የአላቲርስኪ አውራጃ ፍርድ ቤት፣ በአንድሬ፣ በኒና፣ በዞያ እና በሚኻይል ላይ የጥፋተኝነት ብይን አስተላልፏል። ኒና እና ዞያ 350,000 ሩብል (4,780 የአሜሪካ ዶላር) የገንዘብ መቀጮ እንዲከፍሉ ተወስኗል። አንድሬ እና ሚኻይል ደግሞ ስድስት ዓመት የገደብ እስራት ተበይኖባቸዋል። በእርግጥ አሁን ወህኒ አይወርዱም።

አጭር መግለጫ

አንድሬ ማርቲኖቭ

የትውልድ ዘመን፦ 1964 (ባርናውል፣ አልታይ ግዛት)

ግለ ታሪክ፦ የግል ሹፌር ሆኖ ይሠራ ነበር

አንድሬ እና ኒና ከመጋባታቸው በፊት መጽሐፍ ቅዱስን አብረው ማጥናት ጀመሩ። በ1992 ተጋብተው ተጠመቁ። ሁለት ሴቶች ልጆች አሏቸው

የሰጠው ሐሳብ

በይሖዋ ላይ ያለህን እምነት ጠብቀህ እንድትኖር የረዳህ ምንድን ነው?

እንድጠራጠር የሚያደርግ ሁኔታ ሲፈጠር ቆም እልና ይሖዋ የትልቅ ቤተሰብ ራስ እንደሆነ ለማስታወስ እሞክራለሁ። ከእኔ እጅግ የላቀ ተሞክሮና አስደናቂ ጥበብ አለው። ደግሞም አንድ ጥሩ አባት እንደሚያደርገው እኔን ጨምሮ ለቤተሰቡ አባላት በሙሉ የሚያስፈልጋቸውን መመሪያ ይሰጣል። እንዲህ ያለውን መመሪያ በማግኘቴ አመስጋኝ ነኝ፤ መመሪያውን ለመታዘዝም የቻልኩትን ያህል እጥራለሁ። የምርመራው ሂደት የሚፈጥራቸውን አካላዊና ስሜታዊ ጫናዎች ለመቋቋም እንዴት እንደረዳኝ ተመልክቻለሁ፤ ከእሱ ቁጥጥር ውጭ ምንም ነገር እንደሌለ የሚያሳምነኝ ይህ ነው። ከእሱ ጋር ያለኝ ዝምድናም ተጠናክሯል።

ኒና ማርቲኖቫ

የትውልድ ዘመን፦ 1958 (ፐርቮማይስኪ፣ ቹቫሽ ሪፑብሊክ)

ግለ ታሪክ፦ የአጸደ ሕፃናት አስተማሪ ነበረች

እሷና አንድሬ ከይሖዋ ምሥክሮች ጋር መጽሐፍ ቅዱስን አጠኑ። በ1992 ተጠመቀች

የሰጠችው ሐሳብ

ይህን ስደት በጽናት መወጣት እንደምትችዪ የምትተማመኚው ለምንድን ነው?

ሙሴ ከባድ ውጥረት ውስጥ በነበረበት ወቅት ያጋጠመውን ነገር አስታውሳለሁ። ይሖዋ የስሙን ትርጉም አስታውሶት ነበር፤ ዓላማውን ለመፈጸም መሆን የሚያስፈልገውን ሁሉ መሆን እንደሚችል ነገረው። እኛን አገልጋዮቹንም መሆን የሚያስፈልገንን ሁሉ እንድንሆን ማድረግ እንደማይሳነው ተምረናል። ስለዚህ የይሖዋ ድጋፍ እስካልተለየኝ ድረስ ያለጥርጥር እንደሚሳካልኝ አውቃለሁ።

ዞያ ፓቭሎቫ

የትውልድ ዘመን፦ 1965 (ኢብሬሲ፣ ቹቫሽ ሪፑብሊክ)

ግለ ታሪክ፦ በሁለት ዓመቷ ወላጆቿን በሞት አጣች። ጡረታ ከመውጣቷ በፊት ቤቶችና ማኅበረሰባዊ አገልግሎት ኤጀንሲዎች ውስጥ ሠርታለች

በ2016 መጽሐፍ ቅዱስን ማጥናት ጀመረች። ስለ ይሖዋ ፍቅርና ለሰው ልጆች ስላለው ርኅራኄ ስትማር ልቧ ተነካ። በ2018 ተጠመቀች

የሰጠችው ሐሳብ

በዚህ ጊዜ የይሖዋን ድጋፍ ያየሽው እንዴት ነው?

መጀመሪያ አካባቢ ሁኔታው ከባድ ነበር፤ በተለይ ለምርመራ የተጠራሁባቸው የመጀመሪያዎቹ ጊዜያት። ይሁንና የይሖዋን እጅ ለየት ባለ መንገድ ማየት የጀመርኩትም በዚሁ ወቅት ነው። ኢሳይያስ 41:10 ላይ ቃል በገባው መሠረት በየቀኑ ማለት ይቻላል ስሜታዊና መንፈሳዊ ድጋፍ ያደርግልኛል። አንድ ባልና ሚስት በአሁኑ ወቅት እያደረጉልኝ ላለው ነገርም በጣም አመስጋኝ ነኝ። እነሱም እንደኔ የወንጀል ምርመራ እየተደረገባቸው ነው፤ የራሳቸው ፈተናዎችም አሉባቸው፤ ሆኖም በየሳምንቱ በቤተሰብ አምልኮ ፕሮግራማቸው ላይ ይጋብዙኛል። እነሱ ጋር በሄድኩ ቁጥር በጣም ተበረታትቼ ነው የምመለሰው። ከፊቴ ይበልጥ ከባድ ሁኔታዎች እንደሚጠብቁኝ አውቃለሁ፤ ሆኖም ይሖዋ ከጎኔ እንደሆነ ስለማውቅ መጽናት እንደምችል እተማመናለሁ።

ሚኻይል ዬርማኮቭ

የትውልድ ዘመን፦ 1962 (አላቲር)

ግለ ታሪክ፦ የግንባታ ባለሙያ ነበር

ፍጻሜያቸውን ስላገኙ ትንቢቶች ከተማረ በኋላ መጽሐፍ ቅዱስ ትክክለኛ እንደሆነ አመነ። በ1996 ተጠመቀ

የሰጠው ሐሳብ

ስትፈራ ወይም ስትጨነቅ የሚያበረታታህ ምንድን ነው?

ልክ ጭንቀት ሲሰማኝ እጸልያለሁ፤ ከዚያም የግል ጥናት አደርጋለሁ። ቤት ውስጥ አንዳንድ ሥራዎችን አከናውናለሁ፤ ወይም ጫካ ውስጥ በእግሬ እንሸራሸራለሁ። ከወንድሞቼና ከእህቶቼ ጋር ጊዜ ማሳለፌም በጣም ረድቶኛል። አሉታዊ በሆኑ ነገሮች ላይ ማተኮር ወይም እንዲህ ቢሆንስ እያሉ ማውጠንጠን ጠቃሚ እንዳልሆነ ተምሬያለሁ። ትኩረት የማደርገው ከይሖዋና ከእምነት አጋሮቼ ጋር ባለኝ ዝምድና ላይ ነው፤ ይህም ይሖዋ ዓላማውን እንደሚፈጽም ያለኝን እምነት ጠብቄ እንድኖር ረድቶኛል።

በስደት እየጸኑ እንዳሉት ታማኝ ወንድሞቻችንና እህቶቻችን ሁሉ እኛም “እንደ አንበሳ ልበ ሙሉ” መሆን እንችላለን፤ የይሖዋ ፍቅርና ድጋፍ ስለማይለየን ፈተናዎችን በጽናት እንወጣለን።—ምሳሌ 28:1

የክሱ ሂደት

ሰኔ 23, 2021

አላቲር ውስጥ ብዙ ቤቶች ተፈተሹ
ጥቅምት 28, 2021

አንድሬ የጽንፈኛ ድርጅት እንቅስቃሴዎችን አስተባብረሃል ተብሎ የወንጀል ምርመራ ይደረግበት ጀመር። የጉዞ ክልከላዎች ተጣሉበት
ሚያዝያ 25, 2022

አንድሬ በይፋ ክስ ተመሠረተበት። ኒናም በክሱ መዝገብ ውስጥ ተካተተች፤ የተከሰሰችውም በጽንፈኛ ድርጅት እንቅስቃሴ ተሳትፋለች በሚል ነው
ሚያዝያ 26, 2022

ዞያ በጽንፈኛ ድርጅት እንቅስቃሴ ተሳትፋለች በሚል በይፋ ከተከሰሰች በኋላ በክስ መዝገቡ ውስጥ ተካተተች
ሚያዝያ 28, 2022

ሚኻይል የጽንፈኛ ድርጅት እንቅስቃሴዎችን አስተባብሯል በሚል በይፋ ከተከሰሰ በኋላ በክስ መዝገቡ ውስጥ ተካተተ
ነሐሴ 31, 2022

ክሳቸው በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች