ነሐሴ 26, 2022 | የታደሰው፦ መጋቢት 8, 2023
ሩሲያ

ወቅታዊ መረጃ—ብይኑ ተቀየረ | በእርጋታና በእምነት ስደትን መጋፈጥ

አጫውት

መጋቢት 1, 2023 የስታቭሮፖል ክልል ፍርድ ቤት ከወንድም አናቶሊ ጌዚክ እና ከባለቤቱ ከኢሪና እንዲሁም ከወንድም ቪክቶር ዚሞቭስኪ ጉዳይ ጋር በተያያዘ ውሳኔውን አሳውቋል። ቀደም ሲል በአናቶሊ እና በቪክቶር ላይ የተላለፈው ብይን ወደ ገደብ እስራት ተቀይሯል። በመሆኑም አናቶሊ የጉልበት ሥራ በሚሠራበት እስር ቤት የጉልበት ሥራ ለመሥራት አይገደድም። ቪክቶር ወዲያውኑ ከእስር ቤት ተለቅቋል። የኢሪና የገደብ እስራት ፍርድ አልተለወጠም። ሆኖም አሁን ወህኒ አትወርድም።

ኅዳር 14, 2022 በስታቭሮፖል ክልል የሚገኘው የጌኦርጊዬቭስኪ ከተማ ፍርድ ቤት በአናቶሊ እና በባለቤቱ በኢሪና እንዲሁም በቪክቶር ላይ የጥፋተኝነት ብይን አስተላልፏል። አናቶሊ የጉልበት ሥራ በሚሠራበት እስር ቤት ውስጥ የአራት ዓመት ከሁለት ወር እስራት ተፈርዶበታል። ኢሪና የአራት ዓመት ከሁለት ወር የገደብ እስራት ተላልፎባታል። ቪክቶር ደግሞ በስድስት ዓመት ከሁለት ወር እስራት እንዲቀጣ ተወስኗል፤ ከዚያው ከፍርድ ቤት ወደ እስር ቤት ተወስዷል።

የክሱ ሂደት

ጥቅምት 23, 2019

ፖሊሶች በጌኦርጊዬቭስክ በሚገኙ ሦስት የይሖዋ ምሥክሮች ቤቶች ላይ ፍተሻ አደረጉ። ፖሊሶቹ ፍተሻ በሚያደርጉበት ወቅት በእነዚህ የይሖዋ ምሥክሮች ቤቶች ውስጥ በኋላ እንደ ማስረጃ ሊያቀርቧቸው የሚችሏቸው ነገሮችን ደበቁ። አናቶሊ፣ ኢሪና፣ ቪክቶር እና ሌሎች ስምንት የይሖዋ ምሥክሮች ሌሊቱን ተይዘው ምርመራ ተደረገባቸው
ታኅሣሥ 30, 2019

በአናቶሊ፣ በኢሪና እና በቪክቶር ላይ የወንጀል ክስ ተመሠረተ
ጥር 23, 2020

ቪክቶር ለተጨማሪ ምርመራ ከተጠራ በኋላ በጊዜያዊ ማቆያ ጣቢያ እንዲቆይ ተደረገ። በቀጣዩ ቀን ማረፊያ ቤት ገባ
መጋቢት 23, 2020

ቪክቶር ከማረፊያ ቤት ተለቆ የቁም እስረኛ እንዲሆን ተደረገ
ግንቦት 6, 2020

ቪክቶር ከቁም እስር ነፃ የተደረገ ቢሆንም የጉዞ ገደብ ተጣለበት
ጥቅምት 6, 2021

ቪክቶር የተጣለበት የጉዞ ገደብ ተነሳለት
መጋቢት 10, 2022

ክሱ መታየት ጀመረ

አጭር መግለጫ

አናቶሊ ጌዚክ

የትውልድ ዘመን፦ 1967 (ኔዝሎብናያ፣ ስታቭሮፖል ክልል)

ግለ ታሪክ፦ በወጣቶች ማረሚያ ተቋም ውስጥ ይሠራ በነበረበት ጊዜ እዚያ ያሉ ወጣቶች ወደፊት ስለሚጠብቃቸው ነገርና ስለ ሕይወት ዓላማ ይጠይቅ ነበር። ከይሖዋ ምሥክሮች ጋር መጽሐፍ ቅዱስን ሲያጠና ለጥያቄዎቹ መልስ አገኘ። በ1997 ከኢሪና ጋር ትዳር መሠረተ። በ1998 ተጠመቀ

የሰጠው ሐሳብ

በዚህ ፈታኝ ጊዜ ብርታት የሰጠህ ምንድን ነው?

አዲሱ ዓለም በአእምሮዬ ውስጥ ሁሌም ቁልጭ ብሎ ስለሚታየኝ ሕይወት ከንቱ እንዳልሆነና ዓላማ እንዳለው አስባለሁ። በቅርቡ ሁላችንም ፈተናዎች ያጋጥሙናል፤ እነዚህ ፈተናዎች ከሰው ሰው ሊለያዩ ይችላሉ። ፈተናዎቹን ለመወጣት ይሖዋን፣ ልጁንና እነሱ እስካሁን ድረስ ያደረጉልንን ነገሮች ማስታወስ ያስፈልገናል። በእነዚህ ፈታኝ ጊዜያት ይሖዋ እጄን እንደያዘኝና ሲያስፈልግ ደግሞ ብድግ አድርጎ እንደሚያነሳኝ ተሰምቶኛል።

ኢሪና ጌዚክ

የትውልድ ዘመን፦ 1972 (ጌኦርጊዬቭስክ)

ግለ ታሪክ፦ የልብስ ስፌት ሙያ ተምራለች። በ1997 ከአናቶሊ ጋር ትዳር መሠረተች

አናቶሊ ከተጠመቀ በኋላ ጥሩ ለውጥ እንዳደረገ ተመለከተች። ይሖዋ አፍቃሪ አምላክ እንደሆነ ስታውቅ መጽሐፍ ቅዱስን ለማጥናት ተነሳሳች። በ2008 ተጠመቀች

የሰጠችው ሐሳብ

ይህ አጋጣሚ ከይሖዋ ጋር ያለሽን ዝምድና ያጠናከረልሽ እንዴት ነው?

ኢሳይያስ 41:13 ሁሌም ከአእምሮዬ አይጠፋም፤ ይህ ጥቅስ ይሖዋ ምንጊዜም ከአጠገቤ እንደሆነና በሚያስፈልገኝ ጊዜ እጁን እንደሚዘረጋልኝ ያስታውሰኛል። ቤታችን ከተፈተሸበትና ምርመራ ከተደረገብኝ ጊዜ አንስቶ እስካሁን ድረስ ወደ ይሖዋ ይበልጥ እንደቀረብኩ ይሰማኛል። ወደ ይሖዋ ስጸልይ እንዲያረጋጋኝ፣ ሚዛኔን እንዳልስት እንዲረዳኝና ብርታት እንዲሰጠኝ እለምነዋለሁ፤ ይሖዋ ይህን ጸሎቴን ያልመለሰበት አንድም ጊዜ የለም።

ቪክቶር ዚሞቭስኪ

የትውልድ ዘመን፦ 1969 (ጌኦርጊዬቭስክ)

ግለ ታሪክ፦ በ13 ዓመቱ ሁለቱንም ወላጆቹን በሞት አጣ

የእህቱ ባል ከይሖዋ ምሥክሮች ጋር ካስተዋወቀው በኋላ መጽሐፍ ቅዱስን ማጥናት ጀመረ። የትንሣኤ ተስፋ በጣም አጽናናው። በ2003 ተጠመቀ

በ2006 ከናዴዥዳ ጋር ትዳር መሠረተ። ሦስት ልጆች አሏቸው። ቪክቶር በታሰረበት ወቅት ናዴዥዳ ሦስተኛ ልጃቸውን እርጉዝ ነበረች

የሰጠው ሐሳብ

በቁም እስር ላይ ሳለህ የይሖዋን ድጋፍ ያየኸው እንዴት ነው?

በቁም እስር ላይ ሳለሁ ስልክ ወይም ኢንተርኔት መጠቀምም ሆነ ከቤት መውጣት አይፈቀድልኝም ነበር። . . . ይህ ማለት ደግሞ ለቤተሰቤ የሚያስፈልገውን ነገር ማቅረብ አልችልም ማለት ነው። ባለቤቴ ዘጠኝ ወሯ ገብቶ የነበረ ቢሆንም አስቤዛ መሸመትም ሆነ በቅርቡ ለምትወለደው ልጃችን የሚያስፈልጉ ነገሮችን መገዛዛት አልቻልኩም። ሁኔታው የሚያሳዝን ቢሆንም ቤተሰቦቻችንና የእምነት ባልንጀሮቻችን በጣም ረድተውናል። ይሖዋ ወንድሞቻችንንና እህቶቻችንን ተጠቅሞ የሚያስፈልገንን ነገር ሁሉ አሟልቶልናል። ምግብና ልብስ ሰጥቶናል፤ አልፎ ተርፎም ስሜታዊ ድጋፍ አድርጎልናል።

ወንድሞቻችን ስደትን በደስታና በተስፋ እየተቋቋሙ ባሉበት በዚህ ጊዜ ይሖዋ “ለሚጠሩት ሁሉ ቅርብ” መሆኑን እንደሚያሳያቸው እንተማመናለን።—መዝሙር 145:18