ጥር 4, 2023 | የታደሰው፦ ኅዳር 17, 2023
ሩሲያ

ወቅታዊ መረጃ—እህታችን ተፈረደባት | ስደት ቢደርስባትም ሌሎችን ለመርዳት ቆርጣለች

አጫውት

ኅዳር 15, 2023 በኖቮኩዝኔትስክ የሚገኘው የኩዝኔትስኪ አውራጃ ፍርድ ቤት እህት ታትያና ሱሺልኒኮቫ ጥፋተኛ ናት የሚል ብይን በማስተላለፍ የአራት ዓመት የገደብ እስራት ፈርዶባታል። በአሁኑ ወቅት ወህኒ አትወርድም።

አጭር መግለጫ

ታትያና ሱሺልኒኮቫ

የትውልድ ዘመን፦ 1959 (ኮርኪኖ፣ ቼልያቢንስክ ክልል)

ግለ ታሪክ፦ የደህንነት መሐንዲስና የፋብሪካ ፎርማን ሆና ትሠራ ነበር። በ1979 ከሰርጌ ጋር ተጋቡ። ለአካለ መጠን የደረሱ ሁለት ሴቶች ልጆች አሏቸው

ከይሖዋ ምሥክሮች ጋር የተዋወቀችው በአንድ ዘመዷ በኩል ነው። ከባለቤቷ ጋር መጽሐፍ ቅዱስ ማጥናት ጀመረች። በይሖዋ ምሥክሮች መካከል ያለው ፍቅር ማረካቸው። በ1996 ሁለቱም ተጠመቁ

የሰጠችው ሐሳብ

የሌሎች ተሞክሮ ያበረታታሽ እንዴት ነው?

በምርመራ ላይ ስላሉና ችሎት ፊት ስለቀረቡ ወንድሞችና እህቶች የሚወጡት ርዕሶች ረድተውኛል። እነዚህ ርዕሶች ምን መጠበቅ እንዳለብኝ ልቤን አዘጋጅተውልኛል፤ ስለዚህ የእኔ ተራ ሲመጣ ፍርሃትም ሆነ ድንጋጤ አልነበረኝም። የታሰሩ ወንድሞቻችን ተሞክሮም በጣም ያስደንቀኛል። ተስፋ የሚያስቆርጡ የራሳቸው ተፈታታኝ ሁኔታዎች ቢኖሩባቸውም ውጭ ላሉ ወንድሞቻቸውና እህቶቻቸው የሚያበረታታ ደብዳቤ ይጽፋሉ።

የባለቤቴ የሰርጌ ምሳሌነትም በጎ ተጽዕኖ አሳድሮብኛል። ችሎት ፊት ሲቀርብ ልበ ሙሉና ቆራጥ ነበር። ነገ የሚገጥመውን በማሰብ በፍርሃት አልተሽመደመደም። ያስብ የነበረው ስለ ወንድሞቹ ነው፤ እነሱን ለማበረታታትና ለማጠናከር አጋጣሚዎች ይፈልግ ነበር። እኔም በምችለው ሁሉ ዙሪያዬ ያሉትን ለመርዳት ቆርጫለሁ። ራሴን በእንዲህ ዓይነት ነገር ማስጠመዴ ትርጉም ያለው ሕይወት እንድመራ ረድቶኛል፤ በራሴ ችግሮች ከመቆዘምም ጠብቆኛል።

እንደ ታትያና ሁሉ እኛም በይሖዋ እርዳታ ስደትን የተጋፈጡት “ታላቅ የምሥክሮች ደመና” የተዉትን ምሳሌ በመመርመር ብርታት እናገኛለን።—ዕብራውያን 12:1

የክሱ ሂደት

ሰኔ 8, 2021

የታጠቁ የፌዴራል ደህንነት አባላት በኖቮኩዝኔትስክ የሚገኙ ሦስት የይሖዋ ምሥክሮችን ቤቶች በረበሩ። ታትያና እና ባለቤቷ ሰርጌ ለሦስት ሰዓት ምርመራ ተደረገባቸው
ሰኔ 20, 2022

ክስ ተመሠረተባት። ክሷ ‘ሃይማኖታዊ ውይይት አድርገሻል እንዲሁም በስብሰባዎች ላይ ተሳትፈሻል’ የሚል ነው
ሐምሌ 22, 2022

በይፋ ክስ ተመሠረተባት
መስከረም 27, 2022

ክሷ በፍርድ ቤት መታየት ጀመረ። ዳኛው፣ የአሠራር ጥሰት ተፈጽሟል በማለት ክሱ ወደ አቃቤ ሕግ እንዲመለስ አደረጉ
ኅዳር 16, 2022

ክሷ በድጋሚ መታየት ጀመረ

በተጨማሪም ይህን ተመልከት

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች