ነሐሴ 31, 2022 | የታደሰው፦ ጥር 26, 2023
ሩሲያ

ወቅታዊ መረጃ—ወንድም ተፈረደበት | ‘ይሖዋ ያለአንዳች ፍርሃት ከጎኔ የሚቆሙ ወዳጆች ሰጥቶኛል’

አጫውት

ጥር 24, 2023 በኬሜሮቮ ክልል፣ በኖቮኩዝኔትስክ የሚገኘው የኩዝንዬትስኪ አውራጃ ፍርድ ቤት፣ በወንድም ሰርጌ ሱሺልኒኮቭ ላይ የጥፋተኝነት ብይን አስተላልፏል። የስድስት ዓመት የገደብ እስራት ተፈርዶበታል። በአሁኑ ወቅት ወህኒ አይወርድም።

የክሱ ሂደት

ኅዳር 2019

መርማሪዎች የሰርጌን የስልክ ውይይቶች ጠልፈው ማዳመጥና ቤቱን በካሜራ መከታተል ጀመሩ
ሰኔ 3, 2021

የወንጀል ክስ ተመሠረተ
ሰኔ 8, 2021

ቤቱ ተፈተሸ። ሰርጌና ባለቤቱ ለምርመራ ተወሰዱ
ሐምሌ 15, 2021

በፌዴራል የአሸባሪዎች ዝርዝር ውስጥ የተካተተ ሲሆን የባንክ ሒሳቡ እንዳይንቀሳቀስ ታገደ
የካቲት 8, 2022

የአንድን ጽንፈኛ ድርጅት እንቅስቃሴ በማስተባበርና በማስቀጠል ወንጀል ተከሰሰ። የጉዞ ገደብ ተጣለበት
መጋቢት 30, 2022

ክሱ መታየት ጀመረ

አጭር መግለጫ

ሰርጌ ሱሺልኒኮቭ

የትውልድ ዘመን፦ 1957 (ኮርኪኖ፣ ቼልያቢንስክ ክልል)

ግለ ታሪክ፦ በኃይል ማመንጫ ጣቢያ ውስጥ ተቆጣጣሪ ሆኖ ይሠራ ነበር። አሁን ጡረታ ወጥቷል

በ1979 ከታቲያና ጋር ትዳር መሠረተ። ሁለት ልጆች አሏቸው

የሚስቱ ዘመድ ከይሖዋ ምሥክሮች ጋር አስተዋወቀችው። እሱና ታቲያና በ1996 ተጠመቁ

የሰጠው ሐሳብ

በዚህ ከባድ ጊዜ የረዱህ የትኞቹ የመጽሐፍ ቅዱስ መሠረታዊ ሥርዓቶች ናቸው?

ምሳሌ 17:17 ላይ የሚገኘውን “እውነተኛ ወዳጅ ምንጊዜም አፍቃሪ ነው፤ ደግሞም ለመከራ ቀን የተወለደ ወንድም ነው” የሚለውን ጥቅስ ከድሮም ጀምሮ እወደዋለሁ። ብቻዬን ልቋቋም በማልችለው በዚህ የስደት ጊዜ ደግሞ ይህ ጥቅስ ይበልጥ ሕያው ሆኖልኛል። ይሖዋ ያለአንዳች ፍርሃት ከጎኔ የሚቆሙና ሁኔታዎች ከባድ በሚሆኑበት ጊዜ እጃቸውን ሊዘረጉልኝ የሚችሉ ወዳጆች ሰጥቶኛል።

ወንድሞችና እህቶች ለአንተም ሆነ ለባለቤትህ ምን ድጋፍ አድርገውላችኋል?

ቤታችን ከተፈተሸ በኋላ ለምርመራ ተወሰድን። ቀድማ የተለቀቀችው ባለቤቴ ናት። ልክ ቤት ስትደርስ አንዲት ደፋር እህት ቤታችን ከች አለች። ሌሎች ብዙ ወንድሞችና እህቶችም ቤታችንን በማስተካከል አግዘውናል። በተጨማሪም አንድ የጉባኤ ሽማግሌ ሊጠይቀን መጥቶ ነበር፤ በወቅቱ እንዲህ ማድረግ በጣም አደገኛ ነገር ቢሆንም እኛን ለመጠየቅ ከመምጣት አላገደውም።

ኢየሱስ በዮሐንስ 13:35 ላይ “እርስ በርሳችሁ ፍቅር ቢኖራችሁ ሰዎች ሁሉ ደቀ መዛሙርቴ እንደሆናችሁ በዚህ ያውቃሉ” ብሏል። እኔና ታቲያናም እንዲህ ያሉ አፍቃሪ ወዳጆች በማግኘታችንና ይህን ፍቅር በገዛ ሕይወታችን ማጣጣም በመቻላችን ደስተኞች ነን።

ይሖዋ “በጭንቅ ጊዜ” ሁሉ ታማኝ አገልጋዮቹን እንደሚረዳቸው ማወቃችን በጣም ያጽናናናል።—መዝሙር 46:1