ሰኔ 1, 2022 | የታደሰው፦ መስከረም 6, 2023
ሩሲያ

ወቅታዊ መረጃ—ወንድሞች ተፈረደባቸው | የይሖዋ ድጋፍ ስላልተለያቸው በአቋማቸው ጸንተዋል

አጫውት

መስከረም 5, 2023 በታታርስታን ሪፑብሊክ የሚገኘው የኒዥኔካምስክ ከተማ ፍርድ ቤት ወንድም ዴኒስ ፊላቶቭ፣ ወንድም ስታኒስላቭ ክልዩቺንኮቭ እና ወንድም ድሚትሪ ያርቻክ ጥፋተኛ ናቸው የሚል ብይን አስተላልፏል። እያንዳንዳቸው የስድስት ዓመት የገደብ እስራት ተፈርዶባቸዋል። አሁን ወህኒ አይወርዱም።

የክሱ ሂደት

ኅዳር 18, 2020

የፌዴራል ደህንነት አባላትና የታጠቁ አድማ በታኝ ፖሊሶች በኒዥኔካምስክ ከተማ የሚገኙ የ12 የይሖዋ ምሥክሮችን ቤቶች በረበሩ። ዘጠኝ ወንድሞችና ሦስት እህቶች ለምርመራ ተወሰዱ
ነሐሴ 24, 2021

የወንጀል ምርመራውን ተከትሎ ዴኒስ፣ ስታኒስላቭ እና ዲሚትሪ የጉዞ እገዳ ተጣለባቸው
ጥቅምት 7, 2021

ዴኒስ፣ ስታኒስላቭ እና ዲሚትሪ ክስ ተመሠረተባቸው። ክሳቸው “ለየት ያሉ ሃይማኖታዊ መዝሙሮች ዘምረዋል እንዲሁም ጸልየዋል” የሚል ነው
ጥር 27, 2022

ክሳቸው በታታርስታን ሪፑብሊክ ወደሚገኘው የኒዥኔካምስክ ከተማ ፍርድ ቤት ተላለፈ

አጭር መግለጫ

ዴኒስ ፊላቶቭ

የትውልድ ዘመን፦ 1980 (ኒዥኔካምስክ)

ግለ ታሪክ፦ በ1996 ከይሖዋ ምሥክሮች ጋር ተገናኘ። የአምላክ የግል ስም ማን እንደሆነና የሞቱ ሰዎች በምን ዓይነት ሁኔታ ላይ እንደሚገኙ የተማረው እውነት ልቡን ነካው። በ1998 ተጠመቀ

የሰጠው ሐሳብ

አስቸጋሪ ሁኔታ ውስጥ ብትሆንም እንኳ መንፈሳዊነትህን ለመጠበቅ የረዳህ ምንድን ነው?

በአሁኑ ወቅት በመንፈሳዊ ጦርነት ላይ እንደምንገኝ በሚገባ እገነዘባለሁ። መጽሐፍ ቅዱስ ላይ ከማነበው ነገር በመነሳት መጨረሻ ላይ ማን ድል እንደሚያደርግ፣ ማን ደግሞ እንደሚሸነፍ በእርግጠኝነት አውቄያለሁ። በዓለም ላይ የሚታየው ሁኔታ በፍጥነት እየተለዋወጠ ነው፤ አዲሱ ዓለም በጣም ቀርቧል። በቀረው አጭር ጊዜ ውስጥ እንደምንም ብለን እንጽና፤ ታማኝነታችንን እንጠብቅ እንዲሁም ከውድ ወንድሞቻችንና እህቶቻችን ጋር ተባብረን መሥራታችንን እንቀጥል።

ስታኒስላቭ ክልዩቺንኮቭ

የትውልድ ዘመን፦ 1982 (ኒዥኔካምስክ)

ግለ ታሪክ፦ የቪዲዮ ፕሮዳክሽን ድርጅት አለው። ቴምብር መሰብሰብና ወጣ ብሎ መዝናናት ያስደስተዋል

ከይሖዋ ምሥክሮች ጋር የተገናኘው በወጣትነቱ ነው፤ ያሳዩት ደግነትና ፍቅር ማረከው። በ1998 ተጠመቀ

በ2003 ከኦክሳና ጋር ተጋቡ። አንዲት ሴት ልጅ አለቻቸው

የሰጠው ሐሳብ

እንድትጸና ብርታት የሆነህ ምንድን ነው?

ወደ እውነተኛው ሕይወት በሚወስደው ጠባብ መንገድ ላይ ጉዞዬን ለመቀጠል ያለኝ ቁርጠኝነት እጅ እንዳልሰጥ ረድቶኛል። ሐዋርያው ጴጥሮስ በዮሐንስ 6:68 ላይ የተናገረው ነገር የእኔም ስሜት ነው፦ “ጌታ ሆይ፣ ወደ ማን እንሄዳለን? አንተ የዘላለም ሕይወት ቃል አለህ።” ከዚህ ሐሳብ እንደምረዳው ሰይጣን የተለያዩ መንገዶችን ሊጠቁመን ቢሞክርም ወደ እውነተኛው አምላክ የሚወስደው ጎዳና አንድ ብቻ ነው። ምንጊዜም የሚረዳንን፣ የሚደግፈንን እና ከጎናችን የማይለየውን አምላክ ትተን የት እንሄዳለን?

ዲሚትሪ ያርቻክ

የትውልድ ዘመን፦ 1984 (ኒዥኔካምስክ)

ግለ ታሪክ፦ ሰረብራል ፖልሲ የተባለ የጤና እክል አለበት። ትምህርቱን ካጠናቀቀ በኋላ የአካል ጉዳተኛ የሆኑ ልጆች በሚሠለጥኑበት ተቋም ውስጥ የሒሳብ ሠራተኛ ሆኖ ሠርቷል። በቅርቡ ደግሞ በቴሌኮሚኒኬሽን ድርጅት ውስጥ የሽያጭ ተቆጣጣሪ ሆኖ ይሠራ ነበር

በአሥራዎቹ ዕድሜ ውስጥ ሳለ መጽሐፍ ቅዱስ ማጥናት ጀመረ። ስለ ይሖዋ ባሕርያት የተማረው ነገር በጣም ነካው። በ1998 ተጠመቀ

በ2010 ከስቬትላና ጋር ተጋቡ

የሰጠው ሐሳብ

በጣም ጠቃሚ ሆኖ ያገኘኸው የይሖዋ ዝግጅት የቱ ነው?

ከድሮም ጀምሮ ለጸሎት ትልቅ ቦታ እሰጣለሁ። ይሖዋ አባቴ ባሳለፍኩት ሕይወት ሁሉ ከጎኔ ተለይቶኝ አያውቅም፤ አሁንም አብሮኝ እንደሆነ ይሰማኛል። ትክክለኛውን ነገር ማድረግ እችል ዘንድ ጥበብ እንዲሰጠኝ እጸልያለሁ። ልቤን እንዲያረጋጋልኝና ላለሁበት ሁኔታ ትክክለኛውን አመለካከት ለመያዝ እንዲረዳኝም እለምነዋለሁ።

ወንድሞቻችን፣ ይሖዋ የሚያስፈልጋቸውን ብርታት እንደሚሰጣቸው ይተማመናሉ፤ መዝሙራዊው ዳዊት “አምላክ ከጎኔ እንደሆነ እርግጠኛ ነኝ” በማለት የተናገረውን ሐሳብ እንደሚጋሩት ምንም ጥርጥር የለውም።—መዝሙር 56:9