ቃሉ በመጽሐፍ ቅዱስ ውስጥ ከተሠራበት መንገድ መረዳት እንደምንችለው፣ መንፈሳዊነት ማለት አምላክን ለማስደሰት ከልብ መፈለግና መነሳሳት እንዲሁም የእሱን አስተሳሰብ ማዳበር ማለት ነው። መንፈሳዊ ሰው በአምላክ መሥፈርቶች መሠረት ለመኖር እና የቅዱስ መንፈሱን አመራር ለመከተል ጥረት ያደርጋል። a—ሮም 8:5፤ ኤፌሶን 5:1

 ብዙውን ጊዜ መጽሐፍ ቅዱስ መንፈሳዊነትን ለማብራራት በንጽጽር ይጠቀማል። ለምሳሌ ከመንፈሳዊ ሰው በተቃራኒ “ዓለማዊ ሰው . . . ከአምላክ መንፈስ የሆኑትን ነገሮች [ወይም የአምላክን ትምህርቶች] አይቀበልም።” (1 ቆሮንቶስ 2:14-16) ከመንፈሳዊ ሰዎች በተቃራኒ ሥጋዊ ሰዎች ከልግስና እና ከሰላም ይልቅ “ቅናትና ጠብ” ይቀናቸዋል። (1 ቆሮንቶስ 3:1-3) ስም አጥፊ የሆኑና በንግግራቸው የልብ ጓደኛሞችን የሚለያዩ ሰዎች “የእንስሳ ባሕርይ ያላቸውና መንፈሳዊ ያልሆኑ” ተብለዋል።—ይሁዳ 19፤ ምሳሌ 16:28 b

በዚህ ርዕስ ውስጥ፦

•  መንፈሳዊ መሆን የምንችለው ለምንድን ነው?

•  መንፈሳዊነት አስፈላጊ የሆነው ለምንድን ነው?

•  መንፈሳዊነቴን ማሳደግ የምችለው እንዴት ነው?

•  መንፈሳዊ ለመሆን የግድ የአንድ ሃይማኖት አባል መሆን ያስፈልገኛል?

•  ስለ መንፈሳዊነት የሚነገሩ የተሳሳቱ ሐሳቦች

•  ስለ መንፈሳዊነት የሚናገሩ የመጽሐፍ ቅዱስ ጥቅሶች

 መንፈሳዊነት በአምላክ መልክ በመፈጠራችን ያገኘነው ችሎታ ነው። (ዘፍጥረት 1:27) አብዛኞቹ ሰዎች በዓይን ለማይታዩና ለማይዳሰሱ ነገሮች ከፍ ያለ ግምት የሚሰጡት ወይም ስለ እነዚህ ነገሮች ለማወቅ የሚፈልጉት ለዚህ ነው።

 በተፈጥሯችን ይሖዋ c አምላክ ያሉትን እንደ ሰላም፣ ምሕረትና ፍትሐዊነት የመሳሰሉ ባሕርያት የማንጸባረቅ ችሎታ አለን። (ያዕቆብ 3:17) በተጨማሪም አምላክ እሱን የሚታዘዙ ሰዎችን መንፈሳዊነታቸውን እንዲያሳድጉ ይረዳቸዋል።—የሐዋርያት ሥራ 5:32

 መንፈሳዊነት “ሕይወትና ሰላም” ያስገኛል። (ሮም 8:6) ከአምላክ የሚገኙት እነዚህ ስጦታዎች ከምንም ነገር በላይ ውድ ናቸው።

•   ሕይወት፦ አምላክ መንፈሳዊ ለሆኑ ሰዎች የዘላለም ሕይወት እንደሚሰጣቸው ቃል ገብቷል።—ዮሐንስ 17:3፤ ገላትያ 6:8

•   ሰላም፦ ይህ ከአምላክ ጋር የሚኖረን ሰላም ነው። በሥጋዊ ፍላጎታቸው ላይ ብቻ የሚያተኩሩ ሰዎች የአምላክ ጠላቶች ናቸው። (ሮም 8:7) አምላክ መንፈሳዊነታቸውን ለማሳደግ የሚጥሩ ሰዎችን “ከመረዳት ችሎታ ሁሉ በላይ [የሆነውን] የአምላክ ሰላም” በመስጠት ይባርካቸዋል። (ፊልጵስዩስ 4:6, 7) እንዲህ ያለው ውስጣዊ ሰላም ደግሞ በሕይወታቸው ደስተኛ እንዲሆኑ ይረዳቸዋል።—ማቴዎስ 5:3

•   የአምላክን ትእዛዛት ተማር እንዲሁም አክብር። መጽሐፍ ቅዱስን ማንበብህ ይህን ለማድረግ ይረዳሃል። ሰዎች መጽሐፍ ቅዱስን የጻፉት “በመንፈስ ቅዱስ ተገፋፍተው” ስለሆነ የአምላክን ሐሳብ የያዘ መጽሐፍ ነው። (2 ጴጥሮስ 1:21) ከመጽሐፍ ቅዱስ የምትማረው ነገር አምላክን “በመንፈስና በእውነት” ለማምለክ ይረዳሃል፤ ይኸውም የመንፈስ ቅዱስን አመራር ለማግኘትና ከአምላክ ፈቃድ ጋር በሚስማማ መንገድ ለመኖር ያስችልሃል።—ዮሐንስ 4:24

•   የአምላክን እርዳታ ለማግኘት ጸልይ። (ሉቃስ 11:13) አምላክ አንድ መንፈሳዊ ሰው የሚታወቅባቸውን ባሕርያት እንድታዳብር ይረዳሃል። (ገላትያ 5:22, 23) በሕይወትህ ውስጥ የሚያጋጥሙህን ችግሮች ለመወጣት የሚያስችል ጥበብም ይሰጥሃል።—ያዕቆብ 1:5

•   መንፈሳዊ ከሆኑ ሰዎች ጋር ጊዜ አሳልፍ። እንዲህ ያሉት ሰዎች መንፈሳዊነትህን እንድታሳድግ ያበረታቱሃል። (ሮም 1:11, 12) ከአምላክ ጋር የሚጋጭ አስተሳሰብ ካላቸው ሰዎች ጋር ጊዜ ማሳለፍ ግን መንፈሳዊነትህን ያዳክምብሃል።—ያዕቆብ 4:4

 አንድ ሰው ሃይማኖት ስላለው ብቻ መንፈሳዊ ነው ማለት አይደለም። መጽሐፍ ቅዱስ እንዲህ ይላል፦ “አንድ ሰው ሃይማኖተኛ እንደሆነ ቢያስብም እንኳ አንደበቱን የማይገታ ከሆነ ይህ ሰው የገዛ ልቡን ያታልላል፤ አምልኮውም ከንቱ ነው።”—ያዕቆብ 1:26 የግርጌ ማስታወሻ

 ያም ቢሆን መንፈሳዊ የሆኑ ሰዎች አምላክን እሱ በሚቀበለው መንገድ እንደሚያመልኩት መጽሐፍ ቅዱስ ይናገራል። መንፈሳዊ የሆኑ ሰዎች “አንድ መንፈስ” ብቻ እንዳለ እሱም የአምላክ ቅዱስ መንፈስ እንደሆነ አምነው ይቀበላሉ። ይህ መንፈስ አምላክን እንደ “አንድ አካል” ሆነው እንዲያመልኩት ያነሳሳቸዋል፤ ይህም “አንድ ላይ በሚያስተሳስረው የሰላም ማሰሪያ የመንፈስን አንድነት [በመጠበቅ]” አምላክን እንደ አንድ ቡድን ሆነው እንደሚያመልኩት የሚያሳይ ነው።—ኤፌሶን 4:1-4

 የተሳሳተ ሐሳብ፦ ሁሉም ፍጥረታት በውስጣቸው መንፈሳዊነት አለ።

 እውነታው፦ አምላክ የፈጠራቸው ነገሮች በሙሉ ለእሱ ክብር ያመጣሉ። (መዝሙር 145:10፤ ሮም 1:20) መንፈሳዊነት ሊኖራቸው የሚችሉት ግን ማሰብ የሚችሉ ፍጥረታት ብቻ ናቸው። በአንጻሩ እንስሳት የሚመሩት በደመ ነፍስ ስለሆነ ከአምላክ ጋር ወዳጅነት መመሥረት አይችሉም። በአብዛኛው ድርጊታቸውን የሚመራው ለሰውነታቸው የሚያስፈልገውን ነገር ለማሟላት የሚያደርጉት ጥረት ነው። (2 ጴጥሮስ 2:12) መጽሐፍ ቅዱስ መንፈሳዊነት፣ ከእንስሳዊ አስተሳሰብና ባሕርይ ጋር እንደሚቃረን የሚገልጸው ለዚህ ነው።—ያዕቆብ 3:15፤ ይሁዳ 19