“በጣም ከምቀርባቸው ልጆች ጋር ስሆን ነፃነት ይሰማኛል፤ ከዚያ ውጭ ካሉ ሰዎች ጋር መሆን ለእኔ በጣም ከባድ ነው።”—አለን

 “በጣም የምቀርባቸው ጥቂት ጓደኞች አሉኝ፤ ከዚህ የበለጠ እንዲሰፋ አልፈልግም። ከብዙ ሰው ጋር መቀራረብና ከማላውቃቸው ሰዎች ጋር ማውራት ይከብደኛል።”—ሳራ

 አንተስ እንደ አለንና ሳራ ይሰማሃል? በጣም የምትቀርባቸው የተወሰኑ ጓደኞች ያሉህና ሌሎች ተጨማሪ ጓደኞችን ማፍራት የሚከብድህ ዓይነት ሰው ነህ?

 ከሆነ ይህን ርዕስ በጣም ጠቃሚ ሆኖ ታገኘዋለህ!

•  ቡድን መፍጠር ምን ጉዳት አለው?

•  ምን ማድረግ ትችላለህ?

•  እኩዮችህ ምን ይላሉ?

 በጣም የምትቀርባቸው ጓደኞች ያሉህ መሆኑ ምንም ስህተት የለውም። ከተወሰኑ ሰዎች ጋር የቅርብ ጓደኝነት መመሥረትህ ተፈላጊ እንደሆንክ እንዲሰማህ የሚያደርግ ከመሆኑም ሌላ እነዚህ ጓደኞችህ ከነድክመቶችህ ሊቀበሉህ ፈቃደኞች እንደሆኑ ታውቃለህ።

 “በሌሎች መወደድና በአንድ ቡድን ውስጥ መታቀፍ ደስ የሚል ነገር ነው። ወጣት ስትሆን ደግሞ በሌሎች ዘንድ ተቀባይነት ማግኘት ትፈልጋለህ።”—ካረን፣ 19

 ይህን ታውቅ ነበር? ኢየሱስ በርካታ ጓደኞች የነበሩት ሲሆን ከእነሱ መካከል 12ቱ ደቀ መዛሙርት ይገኙበታል፤ ከ12ቱ መካከል ደግሞ ይበልጥ ይቀራረብ የነበረው ከጴጥሮስ፣ ከያዕቆብ እና ከዮሐንስ ጋር ነበር።—ማርቆስ 9:2፤ ሉቃስ 8:51

 ይሁንና ከተወሰኑ ልጆች ጋር ብቻ መቀራረብና ሌሎችን ማግለል ጉዳት ሊያስከትል ይችላል። እንዲህ ማድረግ ከሚያስከትላቸው ጉዳቶች መካከል፦

•   ጥሩ ጓደኝነት ልትመሠርት የምትችልበትን አጋጣሚ ያሳጣሃል።

   “ከአንተ ጋር ከሚመሳሰሉ ሰዎች ጋር ብቻ ጓደኛ መሆንህ አዳዲስ ነገሮችን ማወቅ የምትችልበትንና ከሌሎች ጥሩ ሰዎች ጋር የምትተዋወቅበትን አጋጣሚ ይዘጋብሃል።”—ኤቫን፣ 21

•   ኩራተኛ ሊያስመስልህ ይችላል

   “ከተወሰኑ ሰዎች ጋር ብቻ የምትቀራረብ ከሆነ ከሌሎች ጋር ፈጽሞ መቀራረብ የማትፈልግ ሊያስመስልብህ ይችላል።”—ሳራ፣ 17

•   በጉልበተኝነት ድርጊት እንድትካፈል ሊያደርግህ ይችላል

   “አንተ የጉልበተኝነት ድርጊት አትፈጽም ይሆናል፤ የአንተ የቅርብ ጓደኞች እንደዚያ ሲያደርጉ ግን ምንም ላይመስልህ እንዲያውም ሊያስቅህ ይችላል።”—ጀምስ፣ 17

•   ችግር ውስጥ ሊከትህ ይችላል፤ በተለይ ደግሞ ምንም ይምጣ ምን ከዚያ ቡድን መለየት የማትፈልግ ከሆነ ለችግር ልትዳረግ ትችላለህ።

   “በጣም የሚቀራረቡ ጓደኞች ባሉበት ቡድን ውስጥ አንድ መጥፎ ሰው ካለ መላው ቡድን በተጽዕኖው ሊሸነፍና መጥፎ ድርጊት ወደመፈጸም ሊያመራ ይችላል።”—ማርቲና፣ 17

•   መሥፈርቶችህን መርምር

   የሚከተሉትን ጥያቄዎች ራስህን ጠይቅ፦ ‘ሕይወቴን ለመምራት ጥረት የማደርገው በየትኞቹ መሥፈርቶች ነው? ጓደኞቼ በእነዚህ መሥፈርቶች መመራት ቀላል እንዲሆንልኝ እያደረጉ ነው? ጓደኞቼን ላለማጣት ስል ማንኛውንም መሥዋዕትነት እከፍላለሁ?’

   የመጽሐፍ ቅዱስ መመሪያ፦ “መጥፎ ጓደኝነት ጥሩውን ሥነ ምግባር ያበላሻል።”—1 ቆሮንቶስ 15:33 የግርጌ ማስታወሻ

   “ጓደኞችህ አንተ የምትመራባቸውን መሥፈርቶች የማይቀበሉ ከሆነ ፈጽሞ አደርገዋለሁ ብለህ አስበህ የማታውቀውን ነገር ልታደርግ ትችላለህ።”—ኤለን፣ 14

•   ቅድሚያ የምትሰጣቸውን ነገሮች ገምግም

   የሚከተሉትን ጥያቄዎች ራስህን ጠይቅ፦ ‘ከጓደኞቼ ጋር ያለኝ ቅርርብ በጣም የጠበቀ ከመሆኑ የተነሳ ከእነሱ ጋር ያለኝን ጓደኝነት ላለማጣት ስል አቋሜን ለማላላት እፈተናለሁ? አንድ ጓደኛዬ መጥፎ ነገር ቢፈጽም ምን አደርጋለሁ?’

   የመጽሐፍ ቅዱስ መመሪያ፦ “እኔ፣ የምወዳቸውን ሁሉ እወቅሳለሁ።”—ራእይ 3:19

   “ከቅርብ ጓደኞችህ አንዱ ችግር ላይ ቢወድቅና ለእሱ ተገቢ ያልሆነ ታማኝነት ካለህ ስለ ጉዳዩ መናገርህ እሱን አሳልፎ እንደመስጠት ሆኖ ሊሰማህ ይችላል።”—ሜላኒ፣ 22

•   ተጨማሪ ጓደኞችን ለማፍራት ጥረት አድርግ

   ራስህን እንዲህ ብለህ ጠይቅ፦ ‘በደንብ ከማላውቃቸው ሰዎችም ጋር ለመቀራረብ ጥረት በማድረግ ተጨማሪ ጓደኞችን ማፍራቴ የሚያስገኝልኝ ጥቅም ይኖራል?’

   የመጽሐፍ ቅዱስ መመሪያ፦ “ስለ ራሳችሁ ፍላጎት ብቻ ከማሰብ ይልቅ እያንዳንዳችሁ ለሌሎች ሰዎች ፍላጎትም ትኩረት ስጡ።”—ፊልጵስዩስ 2:4

   “በሌሎች ዘንድ ያን ያህል ተወዳጅነት የሌላቸው ልጆች ምናልባትም በቤታቸው ውስጥ ብዙ ችግሮችን ተቋቁመው የሚኖሩ ሊሆኑ ይችላሉ። አንዴ ስትቀርባቸው ግን የራሳቸው ማራኪ ባሕርይ እንዳላቸው መገንዘብህ አይቀርም።—ብራየን፣ 19

 ዋናው ነጥብ፦ በጣም የምትቀርባቸው ጓደኞች ያሉህ መሆኑ ምንም ስህተት የለውም። ይሁንና ተጨማሪ ጓደኞችን ለማፍራት ጥረት ማድረግህ ይጠቅምሃል። መጽሐፍ ቅዱስ “ሌሎችን [የሚያረካ] እሱ ራሱ ይረካል” በማለት ይናገራል።—ምሳሌ 11:25