INU NKWEEN̄ 14
Keke Orọ Awaji Obaalek Ikaan̄ Ntitiin̄?
1. Keke orọ Awaji otitiin̄be ebi Ijeren me ukot ikaan̄ ni?
Awaji ititiin̄ bọn owot iman kè Ebereyam isa irọ ido mè inyi ema ikan. Igwen ido ya “Ijeren” mè isa ema irọ ebi ibekisun̄ ata ntọbọ ebum mè usem kan̄. (Okwa Itọn̄ 147:19, 20) Eya orọ, ebi ene me ido geelek mekọt ikaan̄ oruru inan̄a me lek Ijeren.—Fuk Ibebene 22:18.
Awaji igobo ebi Ijeren isa irọ ebi ata-ikọ kan̄. Mfufuk ukot ikaan̄ kiban̄ ijeen̄ ubọk ebi ene esa ikaan̄ oruru sa me ikekisiki ibot inyi ikan Awaji. (Ikan Òso Mgbọ Iba 4:6) Eya orọ, inan̄a me lek ebi Ijeren, ebi ufi ife mekọt iniriọọn̄ Awaji.—Fuk Asaya 43:10, 12.
2. Keke orọ ata Ebi Eyi Karais ekigbaan̄ ikup me obọp ge?
Ike mgbọ ojebe, ebi Ijeren kpeyaka ikaan̄ unwọn isi me lek Awaji, Jioba osasa ntitiin̄ Ebi Eyi Karais ito me irek ido ya. (Matiyu 21:43; 23:37, 38) Mgbọ keyi, Ebi Ata-Ikọ Jioba eyaka ikup me irek ebi Ijeren.—Fuk Ikwaan̄ Ebi Otuchieen̄ 15:14, 17.
Jisọs ititiin̄ ebi udun̄ kan̄ ibe elook ata etip mè etap ubọk inyi ebi ene enekana ebi udun̄ kan̄ me otutuuk ido. (Matiyu 10:7, 11; 24:14; 28:19, 20) Ikwaan̄ yi okije ire uyaka kan̄ me mgbọ keyi, eyi nkana-ngwook ukot keyi. Me adasi mgbọ me mfufuk, Jioba ichiaan̄ ititiin̄ efie efie ebi ene inan̄a me otutuuk ido itap me ata ntọbọ ebum. (Ichichili 7:9, 10) Ata Ebi Eyi Karais ekup me obọp ge, ikitap ubọk mè ikitap efuuk me owot ge ge. Me otutuuk linyọn̄ yi, ema ekinwọọn̄ nteme Baibul yaage me chinichini kiban̄.—Fuk Ebi Iburu 10:24, 25.
3. Ike owa ke ntitiin̄ Ebi Ata-Ikọ Jioba me chereyi osa ibene?
Bene me acha 1870, sọntiik urum ife ebi ikikween̄ Baibul mibene ikiweek imun̄lek atikọ echi Baibul ochechep me ujọn̄ọ mgbọ. Ema miriọọn̄ ibe ke Jisọs ira inyi Ebi Eyi Karais ikwaan̄ ilolook ata etip, eya orọ, ema enenikisi esese esese ido ikisilook ata etip Ama Ubọọn̄. Me acha 1931, ema ebebene ikichieek erieen̄ Ebi Ata-Ikọ Jioba.—Fuk Ikwaan̄ Ebi Otuchieen̄ 1:8; 2:1, 4; 5:42.
4. Ike owa ke Ebi Ata-Ikọ Jioba esa ikup me obọp ge?
Me adasi ukot, ntitiin̄ Ebi Eyi Karais me owuwa ido mikaan̄ oruru inan̄a me ubọk akpalek okikpọ ntitiin̄ orọriọọn̄ ibe ke Jisọs ore ogwu ibot ntitiin̄. (Ikwaan̄ Ebi Otuchieen̄ 16:4, 5) Ikeya si me chereyi, Ebi Ata-Ikọ Jioba ekikaan̄ oruru inan̄a me ubọk Akpalek Okikpọ Ntitiin̄, ema ire ebi ugane imimiin̄ isoon̄ me irek emen ekwukwu. Ema ekikpọchieen̄ me lek esese esese otu agọọk ikwaan̄ Ebi Ata-Ikọ Jioba, ebi ikikaba usem, igon ikpa, mè ikiche owuwa ikpa egebe igọọk me lek Baibul me esese ida usem oraraka efit gweregwen. Omọrọ, Akpalek Okikpọ Ntitiin̄ mokọt isanā inu echi emen ekwukwu okitap ene efuuk me emen isibi mè ikinyi mkpọ oboraka efit obop ntitiin̄ me otutuuk linyọn̄ yi ntọ-ubọk. Me ntitiin̄ ge ge, ebirieen̄ ebi imimiin̄ isoon̄ me irek emen ekwukwu ekire ebi ugane miya ire ebi ikikpọchieen̄ me lek Ntitiin̄. Ebirieen̄ chi ekisa ima ikpọchieen̄ me lek arọọn̄ Awaji.—Fuk Pita Eyi Adasi 5:2, 3.
Ebi Ata-Ikọ Jioba ekup me obọp ge ikilook ata etip mè ikitap ubọk inyi ebi ene enekana ebi udun̄ kè Jisọs. Kubọk ebi udun̄ kan̄, eji si ekilook ata etip inan̄a me uwu ire uwu. (Ikwaan̄ Ebi Otuchieen̄ 20:20) Eji ekekigọọk si ebi imama atikọ igbaan̄ ikween̄ Baibul. Ire, Ebi Ata-Ikọ Jioba kpekpọk ire gaalek ntitiin̄. Eji ire ototun̄ ukan̄ ge eyi okaan̄ Ute okakaan̄ ima. Eji ire bọn ute irieen̄ mè ibaan̄ ekikpọchieen̄ me lek ge ge. (Ebi Teselonaika Òso Iba 1:3) Eyi irere ibe ke Ebi Eyi Jioba ekup me obọp ge ikirọ inu okibele Awaji ejit mè ikitap ubọk inyi ebi ufi ife, ema eyaka ire ebi ikibele ejit ichit me inyọn̄ ijọn̄ yi.—Fuk Okwa Itọn̄ 33:12; Ikwaan̄ Ebi Otuchieen̄ 20:35.
