Mkpa ikisa uga ufieejit mè ito ijet ene. Eya orọ Baibul ogwenbe mkpa ogwu ochicha. (Ebi Kọrint Eyi Adasi 15:26) Me Inu Nkween̄ 27, eji mikween̄ ibe ke Jioba motim igak ogwu ochicha yi. Ire, keke oborọ ebi iwuwuuk lek ikwu ni? Me inu nkween̄ yi, eji mekween̄ mkpọ ofolek ofifi use eyi Jioba ochieekbe igbaalek—ọmọ mojomo ego ego ebilene inyi enenwọọn̄ ugwem ere mgbọ geelek. Ọmọ mojomo ema! Ire eyi mochubọk irọ ni? Ire ibojomo ema ifo emen inyọn̄ sa inyọn̄ ijọn̄ yi?

1. Keke ke Jioba oweek irọrọ inyi ebi ima kiji ikwakwaan̄?

Jioba ichubọk ikaan̄ ulọk isasa ebi ikwukwu inu me ugwem. Ogwu enerieen̄ ge okakaan̄ ichechieek ekigwen Jobu ikaan̄ utoon̄-ejit ibe ke Awaji ikpobowuuk ọmọ me mgbọ ọmọ isikwu. Itumu inyi Awaji ibe: “Owu môgwen emi, mâchechieek owu [inan̄a me udọn̄ ufuun̄].”—Fuk Jobu 14:13-15.

2. Ike owa ke eji esa iriọọn̄ ibe ke ebi ikwukwu mekọt ijomo me mkpa?

Mgbọ Jisọs okupbe me inyon̄ ijọn̄, Awaji inyi ọmọ unye isasa ijomo ebi ene. Jisọs ijomo gwun̄ enenwaan̄ okup akọp mè acha iba mè gwun̄ ogwu nwakpa ge. (Mak 5:41, 42; Luk 7:12-15) Ike mgbọ ojebe, Lajọrọs ogwu unene Jisọs okwukwu. Ikerere ibe ke Lajọrọs ikwu, ke mifuun̄ si mkpọ oso egwe ini, Jisọs isa ọmọ iyaka inu me ugwem. Mgbọ ibeekbe uriaak inyi Awaji isan̄a, Jisọs otataan̄ ukpo itumu ibe: “Lajọrọs, sibi na!” Mgbọ yaage “ogwu òkwukwu ya onanan̄a me udọn̄-ufuun̄ ya isibi inu”—me ugwem! (Jọn 11:43, 44) Keek-nu mbet lek unwọọn̄ obokup me ejit ebi ototun̄ ukan̄ kè Lajọrọs mè ebi unene kan̄!

3. Kpasi ikpọchieen̄ okup inyi ebi ima kwun̄ ikwakwaan̄?

Baibul ichieek use ibe: “Ebi ìkwakwaan̄ mejomo me mkpa.” (Ikwaan̄ 24:15) Ebi Jisọs ojomobe me mgbọ ikupbe me inyọn̄ ijọn̄ kpefo emen inyọn̄. (Jọn 3:13) Ema mibele ejit eyi ejomobe ema iyaka inu me ugwem me inyọn̄ ijọn̄ yi. Ubọk yaage si, sọnja mgbọ Jisọs mojomo ego ego ebilene inyi enwọọn̄ ugwem ere mgbọ geelek me paradais me inyọn̄ ijọn̄ yi. Jisọs ibe ke otutuuk ebi ikup me nkeek Awaji—ikerere ebi ebilene ewuukbe—mejomo me mkpa.—Jọn 5:28, 29.

 KWEEN̄ GBAALEK

4. Jisọs ijeen̄ ibe ke ọmọ mokọt ijomo ebi ikwukwu

Kween̄ gbaalek inu Jisọs orọbe inyi ogwu unene kan̄ Lajọrọs. Fuk Jọn 11:14, 38-44, mè igbaan̄ ikpa idodo chi:

• Ike owa ke eji esa iriọọn̄ ibe ke Lajọrọs ichubọk ikwu? —Kpọ agba eyi 39.

• Ire Lajọrọs ifo emen inyọn̄, ire okeek ibe ke Jisọs mosa ọmọ iyaka inu me ugwem me inyọn̄ ijọn̄ ni?

Fit FIDIO yi.

5. Mejomo owuwa ene!

Fuk Okwa Itọn̄ 37:29, mè igbaan̄ ikpa idodo yi:

• Ire ere owa ke ego ego ebi ebejomo ebeluk?

Ikare ebi itọtọbọ ebum inyi Jioba gaalek ke Jisọs obojomo. Fuk Ikwaan̄ 24:15, mè igbaan̄ ikpa idodo yi:

• Ire ekene ke oboma ibe ijomo me mkpa?

• Ike owa ke ikpọchieen̄ njomo-me-mkpa osa ikat ejit nga mè nte Phelicity?

 ME MGBIDIM

Baibul ichieek use ibe ke ego ego ebi ikwakwaan̄ mejomo me mkpa. Jioba iweek ibe ema ekpọk eluk ugwem, inyi Jisọs unye si ibe ijomo ema.

Idodo

• Ijojomo ebi ikwakwaan̄ ikukup me lek Jioba mè Jisọs?

• Ere owa ke ego ego ebi ebejomo ebeluk—ire emen inyọn̄ sa ire me inyọn̄ ijọn̄ yi? Keke orọ ofọọkbe ikeya?

• Keke orọ ochieekbe inye ibe ke ebi ima kwun̄ ikwukwu mekọt ikpọk iluk ugwem?