Otutuuk kiji mikaan̄ mkpọ eji ekima itatap mè ubọk eji ekiweek ibabala lek. Ire eji igọọk onineen̄ Baibul, eji mekọt ikitap mkpọ eji emabe eyi obokibele Jioba ejit. Kè eji kween̄-nu usini onineen̄ cha.

1. Kpasi onineen̄ obotap ubọk inyi eji egobo mkpọ eji ebekitap mè ubọk eji ebekisa ibala lek?

Igbe ibe eji “ekesa inu echi ekem ekem otu ewe ebala lek . . . me ubọk ògbegbe mè inwọn mè ijaan̄.” Igbe si ibe inu eji ekitap ikup me utana kubọk “ebi ìchechieek me lek Awaji.” (Timọti Eyi Adasi 2:9, 10) Kpọ-nu onineen̄ ini chi: (1) Inu eji ebetap ibore inu “ògbegbe.” Ike okimun̄ me nkween̄mkpọ ntitiin̄, ebi eyi Jioba ge ge mikaan̄ mkpọ ema ekima itatap, ire, inu eji ekitap mè ubọk eji ekisa ineen̄ ijeek kiji ikijeen̄ ulibi inyi Awaji ogwu eji ekitọbọ ebum inyi. (2) Itatap mkpọ echi okup “ekem ekem” isibi ibe ke eji kpebekitap mkpọ obokiriki ulọk ilaak me lek ebi ofifi ife mè iyaka ire ikitaba chieen̄ ebi ene inu me lek kiji. (3) Eji ekijeen̄ ibe ke mkpọ eji ekitap “inwọn mè ijaan̄” ire eji kpekigọọk ubọk ibala lek geelek osisibi. (4) Inu eji ekisa ibala lek ikijeen̄ ebi ofifi ife mgbọ geelek ibe ke eji ire ebi “ìchechieek me lek Awaji.”—Ebi Kọrint Eyi Adasi 10:31.

2. Ike owa ke ubọk ibala lek kiji obosa ikaan̄ mgbaan̄ me lek ebi bọn nte kiji?

Ikerere ibe ke eji mikaan̄ unen igogobo mkpọ eji ebekitap, mè ubọk eji ebekisa ibala lek, igbe ibe eji ekekeek mgbaan̄ mkpọ eji ekitap okikaan̄ me lek ebi ofifi ife. Eji eketap efuuk inyi eji ekakirọ mkpọ obokinaan̄ ene geege ejit, kpan̄asi ikeya, igbe ibe “ene geelek me etete kiji ikirọ inyi ejit ibele ogwu melek kan̄, mè ikirọ ene ya ata inu, mè inama ichechieek ene ya ibene.”—Fuk Ebi Rom 15:1, 2.

3. Ike owa ke ubọk ibala lek kiji obosa itaba ene inu me lek ata ntọbọ-ebum?

Eji ekisa itatap mkpọ onwọnwọn mgbọ geelek, ire, eji ekichubọk igbala chieen̄ ikpọ mkpọ eji ekitap isi nkween̄mkpọ ntitiin̄ mè ikwaan̄ uko. Eji kpebeweek ibe ebi ene ekpọ chieen̄ esiki me lek ata etip eji ekilook bak lek ubọk eji esabe ibala lek. Kpan̄asi ikeya, eji ekiweek ibe mkpọ eji ekitap ikitaba ebi ene inu me lek atikọ mè ikisa “itọn̄ ijet ijejeen̄ eyi eji ekijeen̄ ofolek Awaji Ogwu Unyan̄a kiji.”—Taitọs 2:10.

 KWEEN̄ GBAALEK

4. Ata ubọk ibala lek ikijeen̄ ulibi inyi Jioba

Keke ore okpan okpan inu oborọ ibe eji ekegbala chieen̄ ekpọ ubọk ibala lek kiji? Fuk Okwa Itọn̄ 47:2, mè igbaan̄ ikpa idodo chi:

• Keke ke eji ebetap eji esikeek ibe ke inu eji ekitap ikikaan̄ mgbaan̄ me lek ubọk ebi ene ekimun̄ Jioba?

• Ire igbe ibe eji ekekeek mkpọ ofolek ubọk ibala lek kiji eji esibesi nkween̄mkpọ mè iyaka ire isibi uko ni? Keke orọ ofọọkbe ikeya?

 5. Ubọk obosa irọ ata ntumu-mfieek ofolek mkpọ okitap mè ubọk okisa ibala lek

Fit FIDIO yi.

Mè ire inu eji etapbe inyenye ewe sa ikanye ewe, igbe ibe ikup me utana mè igbe mbet lek ere eji ebesi. Fuk Ebi Kọrint Eyi Adasi 10:24 mè Timọti Eyi Adasi 2:9, 10. Mè igbaan̄ ikpa inu orọrọ igbebe ibe eji ejit itatap mkpọ eyi . . .

• ikatana mè iyaka ire ikagbe mbet lek ere eji ebesi

• otataba ifiik, ikijeen̄ akpalek kiji, mè iyaka ire ikiriki ulọk ilaak me lek ebi ofifi ife.

Ikerere ibe ke ebi eyi Karais kpekup me irak ikan kè Mosis, ikan ya ikijeen̄ eji ubọk Jioba okisa imun̄ mkpọ. Fuk Ikan Òso Mgbọ Iba 22:5, me igbaan̄ ikpa idodo yi:

• Keke orọ eji ebejit ubọk ibala lek eyi okirọ ibe ebirieen̄ ekekup kubọk ebibaan̄ mè iyaka ire ebibaan̄ ekekup kubọk ebirieen̄?

Fuk Ebi Kọrint Eyi Adasi 10:32, 33 mè Jọn Eyi Adasi 2:15, 16, me igbaan̄ ikpa idodo chi:

• Keke orọ igbebe ibe eji ekekeek mè ire ubọk ibala lek kiji morọ ibe ebi ene me agan̄ eji ekiluk mè iyaka ire me ntitiin̄ kiji ekenaan̄ ejit?

• Mbet lek ibala lek echi owa ke okimalek imun̄ me agan̄ olukbe?

• Ire okeek ibe ke usini ubọk ibala lek cha ikagbe ogwu eyi Karais ni? Keke orọ ofọọkbe ikeya?

 ME MGBIDIM

Mgbọ geelek eji esirọ ata ntumu-mfieek ofolek ubọk ibala lek kiji, eji ekijeen̄ ibe ke eji mikaan̄ ulibi me lek Jioba mè ebi ofifi ife.

Idodo

• Keke orọ ofọnti kiji mè ubọk ibala lek kiji okupbe ufiak inyi Jioba?

• Onineen̄ echi owa obobem eji me mgbọ eji ekirọ ntumu-mfieek ofolek ubọk ibala lek kiji?

• Ike owa ke ubọk ibala lek kiji obosa ikaan̄ mgbaan̄ me lek ubọk ebi ofifi ife ekisa imun̄ ata ntọbọ-ebum?