Jisọs ore Ogwu Ibot ntitiin̄ ebi eyi Karais. (Ebi Efesọs 5:23) Jisọs ikup me emen inyọn̄ ikisa usun̄ “òrọriọọn̄ inu, mè igbe utoon̄-ejit” ikpulu ebi eyi kan̄ ikup me inyọn̄ ijọn̄ yi me chereyi. (Fuk Matiyu 24:45.) Ire Jisọs me lek kan̄ ogobo usun̄ yi mè inyi ọmọ unye ibe ikirọ usini ntumu-mfieek. Ire, usun̄ ya ibokukup inye ikisiki ibot inyi Jisọs mè ikisi ikwaan̄ inyi ebi ngwan̄ kè Karais. Ekene ore usun̄ yi? Ike owa ke usun̄ yi okisa ikpọ chieen̄ me lek kiji?

1. Ekene ore usun̄ “òrọriọọn̄ inu, mè igbe utoon̄-ejit”?

Jioba iwuuk lek ikisa ene ge mè iyaka ire sọntiik urum ebi ene inyi ebi eyi kan̄ ntọ-ubọk. (Malakai 2:7; Ebi Iburu 1:1) Eyi Jisọs okwube iraka, ire ebi otuchieen̄ mè ebi ugane ntitiin̄ ikup me Jeruselem ekpọ chieen̄ me lek ntitiin̄. (Ikwaan̄ 15:2) Ubọk yaage si, ire sọntiik urum ebi ugane ntitiin̄—Akpalek Okikpọ Ntitiin̄ Ebi Ata-Ikọ Jioba—ekisan̄a inorie emen ekwukwu isibi mè ikikpọ chieen̄ me lek ikwaan̄ ilolook ata etip. Urum yi ore usun̄ ‘òrọriọọn̄ inu, mè igbe utoon̄-ejit ogwu Jisọs osabe ito’ ibe ikikpọ chieen̄ me lek akpan ikwaan̄ chi. (Matiyu 24:45a) Otutuuk ebi Akpalek Okikpọ Ntitiin̄ ire ebi eyi Karais ekenbe aran̄, ebi ikakaan̄ ikpọchieen̄ igọgọọk Jisọs ikpulu me emen inyọn̄ ema esikwu.

2. Kpasi inorie emen ekwukwu ke usun̄ ogbegbe utoon̄-ejit okisan̄a isibi?

Jisọs ibe ke usun̄ ogbegbe utoon̄-ejit yi mokinyi ebi eyi Karais ogbo kan̄ “inorie me mgbọ me mgbọ.” (Matiyu 24:45b) Ike inorie eji ekirie okitap ubọk irọ mè eji ekaan̄ unye akpalek, inorie emen ekwukwu, orere ntọ-ubọk eji ekikaan̄ inan̄a me emen Usem Awaji—ikinyi eji unye eji eweekbe isasa ikup inye ikigbe utoon̄-ejit inyi Jioba mè ikirọ ikwaan̄ Jisọs obe mè eji ekerọ. (Timọti Eyi Adasi 4:6) Eji ekikaan̄ inorie emen ekwukwu yi me nkween̄mkpọ ntitiin̄, chinichini sekut, mè chinichini ilile, melek ikpa mè fidio kiji echi okitap ubọk inyi eji egobo etet inu Awaji oweekbe eji me ubọk mè ekerọ ibe mgbaan̄je kiji melek kan̄ inye.

 KWEEN̄ GBAALEK

3. Igbe ibe ebi eyi Jioba ekup me onineen̄

Akpalek Okikpọ Ntitiin̄ okineen̄ ikwaan̄ Ebi Ata-Ikọ Jioba igọọk me lek ntọ-ubọk kè Jisọs. Onineen̄ yaage okup me etete ebi eyi Karais me adasi ukot. Fit FIDIO yi.

Fuk Ebi Kọrint Eyi Adasi 14:33, 40, mè igbaan̄ ikpa idodo yi:

• Ike owa ke ere Baibul yi osa ijeen̄ ibe ke Jioba iweek ibe ebi Ata-Ikọ kan̄ ekup me onineen̄?

4. Usun̄ ogbegbe utoon̄-ejit okineen̄ ikwaan̄ ilolook ata etip kiji

Ilolook ata etip ore ikwaan̄ okukup ufiak ichit ebi eyi Karais me adasi ukot erọbe. Fuk Ikwaan̄ 8:14, 25, mè igbaan̄ ikpa idodo chi:

• Me etete ebi eyi Karais me adasi ukot, ekene okinyi ntọ-ubọk ofolek ubọk ebekisa ilook ata etip?

• Keke ke Pita mè Jọn erọ me mgbọ ebi otuchieen̄ ogbo kiban̄ enyibe ema ntọ-ubọk?

Ilolook ata etip ore ikwaan̄ okukup ufiak ichit eyi Akpalek Okikpọ Ntitiin̄ okineen̄. Fit FIDIO yi.

 Jisọs igon aban me lek ubọk ikwaan̄ ilolook ata etip osabe ikup ufiak ire. Fuk Mak 13:10, mè igbaan̄ ikpa idodo chi:

• Keke orọ ikwaan̄ ilolook ata etip okupbe ufiak inyi Akpalek Okikpọ Ntitiin̄?

• Keke orọ ikupbe ufiak ibe usun̄ “òrọriọọn̄ inu, mè igbe utoon̄-ejit” ikineen̄ ikwaan̄ ilolook ata etip me otutuuk linyọn̄ yi?

5. Usun̄ ogbegbe utoon̄-ejit okinyi ntọ-ubọk

Akpalek Okikpọ Ntitiin̄ okinyi ebi eyi Karais me otutuuk linyọn̄ yi ntọ-ubọk. Ike owa ke ema ekisa itumu ifieek ntọ-ubọk ebenyi ni? Kpọ ubọk akpalek okikpọ ntitiin̄ me adasi ukot esabe irọ eyi. Fuk Ikwaan̄ 15:1, 2, mè igbaan̄ ikpa idodo chi:

• Kpasi ufialek ke ebi eyi Karais me adasi ukot ekaan̄?

• Ebi owa ke Pọọlu, Banabas, mè ebi ofifi ife esi lek ibe enen̄e ufialek ya esun̄?

Fuk Ikwaan̄ 15:12-18, 23-29, mè igbaan̄ ikpa idodo yi:

• Sabum ema erọbe ntumu-mfieek, keke ke akpalek okikpọ ntitiin̄ me adasi ukot erọ me mgbọ ema ekiweek ntọ-ubọk Awaji ofolek ufialek ya?—Kpọ agba eyi 12, 15, mè 28.

Fuk Ikwaan̄ 15:30, 31 mè 16:4, 5, mè igbaan̄ ikpa idodo chi:

• Ike owa ke ebi eyi Karais me adasi ukot esa irọ mkpọ ofolek ntọ-ubọk akpalek okikpọ ntitiin̄ onyibe?

• Ike owa ke Jioba osa igbana nsiki-ibot kiban̄?

Fuk Timọti Eyi Òso Iba 3:16 mè Jemis 1:5, mè igbaan̄ ikpa idodo yi:

• Owa ke Akpalek Okikpọ Ntitiin̄ me chereyi okiweek ntọ-ubọk mgbọ geelek isikirọ ntumu-mfieek?

 ME MGBIDIM

Akpalek Okikpọ Ntitiin̄ ore usun̄ “òrọriọọn̄ inu, mè igbe utoon̄-ejit” Jisọs ogobobe. Ọmọ okinyi otutuuk ebi eyi Karais me linyọn̄ yi ntọ-ubọk mè inorie emen ekwukwu.

Idodo

• Ire ekene ogobo usun̄ “òrọriọọn̄ inu, mè igbe utoon̄-ejit”?

• Ike owa ke Akpalek Okikpọ Ntitiin̄ okisa ikpọ eji chieen̄ me lek?

• Ire ochieek ibe ke ire Akpalek Okikpọ Ntitiin̄ ore usun̄ “òrọriọọn̄ inu, mè igbe utoon̄-ejit” ni?