INU NKWEEN̄ 06
Ike Owa Ke Ugwem Osa Ibene?
“Owu [Awaji] ore ogbuuruk ere ugwem okinan̄a isibi.” (Okwa Itọn̄ 36:9) Ire ochieek eyi ni? Usini ene ekibe ke kpunu ogwu orom. Ire ire atikọ, isibi ibe ke eji ekpọkpọk isibi ikeya. Ire, ire Jioba orom ugwem, mokaan̄ inu orọrọ ibak lek irom, ire okamun̄ ikeya ni? a Kpọ-nu mfufuk Baibul ofolek ubọk ugwem osabe ibene mè inu orọrọ eji ebechieek ibe ke ire atikọ.
1. Ike owa ke isinyọn̄ mè linyọn̄ osa ibene?
Baibul ibe: “Me ibebene, Awaji îrom isinyọn̄ mè linyọn̄.” (Ibebene 1:1) Owuwa ebi science michieek ibe ke inyọn̄ mè ijọn̄ ikaan̄ ibebene. Ike owa ke Awaji osa irom inu chi? Isa ‘unye kan̄,’ orere, ekwukwu mbuban kan̄ irom otutuuk inu, eyi igọbọ akpabin inyọn̄, ntoronyan̄ mè inyọn̄ ijọn̄.—Ibebene 1:2.
2. Keke orọ Awaji orombe inyọn̄ ijọn̄ yi?
Jioba “ìkarom [linyọn̄ yi] ibe ire ukpọk ukpọk, ire, ìrom ibe eluluk me lek.” (Asaya 45:18) Awaji irom linyọn̄ yi ibe ire ata uwu ere ebilene ebeluk ire mgbọ geelek. (Fuk Asaya 40:28; 42:5.) Ebi science ebe ke inyọn̄ ijọn̄ yi isibi esese. Ire me inyọn̄ ijọn̄ yi gaalek ke ebilene ebekọt iluk ugwem.
3. Keke osun̄ ebilene esese me lek anam?
Eyi irombe inyọn̄ ijọn̄ isan̄a, Jioba ororom inu okiluk ugwem igwook me emen. Idasi irom uti mè anam. Ire mgbọ irombe echa isan̄a ke “Awaji orom ene me mbet kan̄.” (Fuk Ibebene 1:27.) Keke orọ ebilene ekupbe esese? Eyi irebe ibe ke Awaji irom eji me mbet kan̄, eji mekọt ijeen̄ eru kan̄, kubọk ima mè unen oyerebet. Awaji irom eji inyi ekọt ekekween̄ usem, enwọọn̄ inu ojajaan̄ mè okwa. Eji si mikup esese me lek anam mije eji mekọt itọbọ ebum inyi Ogwu Ororom eji.
KWEEN̄ GBAALEK
Kween̄ inu okijeen̄ ibe ke ugwem ire mkpọ erombe mè mkpọ okijeen̄ ibe ke mfufuk Baibul ofolek inu nrom itatat. Kween̄ si inu eru echi okup me emen ebilene okijeen̄ eji ofolek Awaji.
4. Erorom ugwem
Ebilene ekibọkọ itọn̄ me lek inu ema ekpọbe me lek inu nrom irọ. Ire ikeya, ekene ke ebetọn̄ me lek inu ema ekpọbe me lek? Fit FIDIO yi, mè igbaan̄ ikpa idodo yi ogọgọọk.
-
Keke ke ebilene ekpọ me lek inu nrom irọ?
Uwu geelek ikakaan̄ ogwu onanama. Ire ikeya, ekene orom otutuuk inu? Fuk Iburu 3:4, mè igbaan̄ ikpa idodo chi:
-
Kpasi inu nrom okineme owu imumun̄?
-
Ire igbe ibe echieek ibe ke inyọn̄ mè ijọn̄ mè otutuuk inu geelek okup me emen ire mkpọ erombe ni? Bak lek eke?
Ire oriọọn̄ ni?
Owu mokọt iweek ikpa mè fidio okikpa mkpọ ofolek inu chi me jw.org me ibot usem chi “Was It Designed?” mè “Viewpoints on the Origin of Life.”
“Mije, uwu geelek îre ebilene ekinama. Ire, ogwu òkinama otutuuk inu geelek ìre Awaji”
5. Eji mikaan̄ inu okijeen̄ ibe ke mfufuk Baibul ofolek inu nrom ire atikọ
Me ikpa Ibebene ibot 1, Baibul ikpa ubọk inyọn̄ ijọn̄ mè ugwem okup me emen osabe ibene. Ire omokọt itoon̄ ejit me lek mfufuk yi sa ire urọk ikarege atikọ ni? Fit FIDIO yi, mè igbaan̄ ikpa idodo chi ogọgọọk.
-
Ire Baibul ijeen̄ ibe ke erom inyọn̄ ijọn̄ yi mè ugwem okup me emen me mbubak mgbọ 24 usen gweregwen ikike ni?
-
Ire mfufuk Baibul ofolek ubọk esabe irom mkpọ itat sa ire ikatat? Kpa wele nu?
Fuk Ibebene 1:1, mè igbaan̄ ikpa idodo yi:
-
Ebi science ebe ke inyọn̄ mè ijọn̄ ikaan̄ ibebene. Kpa ubọk ke eyi osa ije ikike me lek ere Baibul eji efukbe?
Usini ene ekikeek ibe ke Awaji irom asabọn inu echi onwenwene ikana inu echi omimiin̄. Fuk Ibebene 1:21, 25, 27, mè igbaan̄ ikpa idodo chi:
-
Ire Baibul ijeen̄ ibe ke Awaji irom asabọn inu oluk ugwem echi onwenwene ikana irin̄, anam, mè ebilene? Sa ire irorom otutuuk inu kpa chieen̄ kpa chieen̄? b
6. Ebilene ire inu nrom osisibi esese
Eji kpekup kubọk anam echi Jioba orombe. Fuk Ibebene 1:26, mè igbaan̄ ikpa idodo yi:
-
Bak lek erombe eji me mbet Awaji, keke ke eji ikakaan̄ eru ima mè njijin okijeen̄ ofolek mbet ene Awaji orebe?
USINI ENE EKIBE: “Mfufuk Baibul ofolek inu nrom ikare atikọ.”
-
Keke ke okeek? Keke orọ ofọọkbe ikeya?
ME MGBIDIM
Jioba orom inyọn̄ mè ijọn̄ mè otutuuk inu geelek okiluk ugwem.
Idodo
-
Keke ke Baibul ojeen̄ ofolek ubọk inyọn̄ mè ijọn̄ osabe ibene?
-
Ire Awaji irọrọ inyi asabọn inu oluk ugwem inwene ikana otutuuk inu okiluk ugwem sa ire irorom otutuuk inu cha ge ge?
-
Keke orọ ebilene ekupbe esese?
WEEK
Kpọ ubọk inu nrom okijeen̄ ibe ke ogwu orom omaan̄.
Kpọ ubọk ute ge okpabe mfufuk Baibul ofolek inu nrom inyi ogwu gwun̄.
Kpọ-nu mè ire ijejeen̄ ekijeen̄ ibe ke asabọn inu oluk ugwem ikinwenwene ikana inu echi omimiin̄ itat me lek Baibul.
“Did God Use Evolution to Create the Different Types of Life?” (Web article)
Kpọ-nu mè ire oka ukwuuk erọkọbe mè ofifi inu ebi science ekikween̄ ikijeen̄ ibe ke ire Awaji orom ugwem sa ikpọkpọk isibi ikeya.
a Inu Nkween̄ 25 mokpa nkeek Awaji ofolek ebilene.
b Me emen Baibul, usem “kpa chieen kpa chieen̄” isibi ogbogbo urum inu okiluluk ugwem.
