Iʼngeygwiseʼri Jesuseʼ eméy zanʉngwa ni waseyna riwiʉkwa naʼnare. Émari Niwipawseʼ Reʼgukʉngwasi Chusánari Jesukristu sakuku nari Niwipawseʼ anʉnkichoʼ una ni meʼzanʉkwéy kauʼ no.

Bibriáseʼri Jesú reʼgukʉnpana uyeʼri, Ikʉnusi awiri moru ɉina kuʼnawakʉ pari keywʉ anaʼwite una ni wásʉya ni. Ikʉ́nhari Kaʼseʼ nʉʼkin reʼgukʉkwéy kʉnʉna ni. Ey ʉwámeʼri, 1914seʼ pari ingumʉ́n du zanuʼ nari nakʉn nuga ni (Apocalipsis 12:7, 9).

Ingumʉ́n du zanuʼ nari nakʉn nugeʼki, Jesú, Sakuku nari Niwipawseʼ ʉnkaʼguna nameʼ, íkʉri igunámʉsʉn nuga ni. Ari Bibria sí aʼzawiʉngwa ni waseykumana nʉnna, ikʉ pin zʉnáy zánʉnseʼ, Bibria ʉnkʉriwí imaʼba yeyka ayéy uzweingwasi igunámʉsʉn nuga ni (Isaías 2:2-4). Nikamʉ zʉʼn ingumʉ́n awʉtari ʉnkaʼchuʼ nari, asinámʉsin du rinhuzoriri inʉ mikʉnari awkwa zʉpawgwi nanuʼ nari zweingwasi, windiwía awaki nuga ni. Bibriáseʼri du nari zoriri Niwipáw ʉndeʼgukʉn nugaʼba kukwéy kʉnanʉngwasi, igunámʉsa awaki nuga ni.

Kuʼnawa Jesú ʉndeʼgukʉn nugeʼki, Káʼseʼri ikʉ eyki reʼgusi zwein nuga ni. Niwipawseʼ Jesú kʉyanari: «Ɉwe miwʉna genʉnke reʼgukʉn núkʉkwa» (Salmo 110:2). Bin zanuʼgwi, Jesú ɉwe awʉna aseʼ kʉchunha awʉngwa ni awiri Niwipáw aʼnoʼkwa awʉn aʼɉúnʉya chʉwi aʼzʉnameʼ, chʉwi zanamʉ kʉchunha awʉngwa ni.

Ey unigeʼri, Niwipawseʼ Reʼgukʉngwasi Chusana eméy nikʉngwa ni:

• Niwipáw sí naʼzʉnʉn í digasáy winzoya ɉina kʉchunha awʉngwa ni. Bibriáseʼri iʼngwisin iʼngwisin tinku níkʉya zana kuwákʉya ni. Ey ʉwameʼ, Niwipáw urigasáy zoriri, íkʉri zi aʼzi zwein nugameʼ, bin zanuʼgwi kʉchona awʉngwa ni. Eméy unigeʼri, arunhá kazanʉngwa ni (Apocalipsis 17:15, 16).

• Sakuku ɉina kʉchunha awʉngwa ni. Niwipawseʼ Reʼgukʉngwasi Chusánari sakuku ɉina kʉchunha awʉngwa ni (Apocalipsis 19:15, 17, 18).

• Ikʉ du nikuʼ neyka kʉchunha awʉngwa ni. Du nanuʼ neyka zʉʼn nisiri Niwipáw aʼnoʼkwʉn aʼɉunuʼ neyka azi kizanʉngwa nanʉnno. «Du nikuʼ neyka kaʼseʼ kʉchunha ukumʉngwa ni» (Proverbios 2:22).

• Ikʉnusi awiri moru ɉina kʉchunha awʉngwa ni. Ikʉnusi awiri moru ɉina «ikʉ eygwi neki ʉnkʉreʼbesuʼ nanʉngwa» ni (Apocalipsis 20:3, 10).

Niwipawseʼ Reʼgukʉngwasi Chusana reʼgukʉn nugaʼba kwʉn aʼɉunʉyari, azi kizanʉngwa nanʉnno.

Jesukrísturi kuʼnawakʉ pari sakuku ɉina nikiza gwasiri ingumʉ́n nikʉngwa ni. Ey awi, íkʉseʼ pari 144 mir sakuku nari agagunasin nʉngwa ni (Apocalipsis 5:9, 10; 14:1, 3). Kaʼseʼ Niwipawseʼ aʼzʉnnáy ayéy zákusa awʉngwa ni. Ikʉ azi nisi igunamʉsʉngwa nanʉnno.

• Wichamʉ awiri wíchʉkwa neyka kʉchunha awʉngwa ni. «Iʼngwi kineki: “Naʼmʉchi naʼzʉnʉn neki yuʼ nanʉngwa ni”» awiri «eygwi neki awichuʼ nanʉngwa ni» (Isaías 33:24; Apocalipsis 21:4).

• Áziki zanuʼ nari tanʉ zanamʉ wesʉngwa ni. «Migʉmʉsínʉri tanʉ aʼzanʉngwa ni» awiri «azey azey viña kwa igera kinugin aʼwarin ʉnkiaʼsa awiri ínʉseʼ kineki igasuʼ nanʉngwa ni» (Isaías 54:13; Miqueas 4:4).

• Nikamʉ kwákʉchʉ meʼkusʉkwéy neyka aʼwesʉngwa ni. «Nʉpówruri nikamʉ áwʉya gugín ʉnkaʼmʉkanʉngwaʼsa awʉngwa ni, nikákʉchʉ auʼ nʉngwa ni» (Isaías 65:22, 23).

• Tari zwein nugari du zákusa awʉngwa ni. «Kaʼa tikirí zariri ɉomʉ zʉnʉndi zeyzey zanamʉ kwʉngwa ni, awiri tikirí zʉnékʉri asafrán zana tinzʉnpana awiri zeyzey zanamʉ kwʉngwa ni» (Isaías 35:1).

• Ikʉ aʼkwa kukwéy kʉnanʉngwasi eméy nikamʉ kawa ni í aʼzawín nuga ni. «Ma nʉʼkin Niwipáw ta yeyka awiri ma nʉgaʼsa una, Jesukristu, ɉwaʼsa awʉnʉngwa aʼzanʉn nugari, émari aʼkwa kukwa gwasi izʉna ni» (Juan 17:3).

Niwipawri duna ɉuna unakʉngwa nʉʼnkaʼmʉkanʉngwaʼsa unari aʼzʉna ni (Isaías 48:18). Iʼngeygwiseʼri ima ʉnkaʼmʉkanʉngwaʼsa awkwasi, eméy nikamʉ kawa ni riwiʉkwa nʉngwa ni.