1. ¿Chemu ayüucülequeiñ?

 IÑCHIÑ rume ayüucülequeiñ taiñ coneltulen Jehová ñi troquiñche mu. Iñchiñ yeniequeiñ Chau Jehová ñi üi, feimu quimeltuchequeiñ quisu meu. Ayüuqueiñ taiñ quelluafiel pu ñom piuquengelu ñi fautizahurpual (Hech. 13:48, TNM). Iñchiñ rume ayüuqueiñ ñi cüme tripan taiñ amuldungun. Jesús ca femngechi rume ayühui ñi cüme tripan tañi amuldungun tañi pu discipulo (Luc. 10:1, 17, 21).

2. ¿Chumngechi pengelkebiiñ müna manelbali taiñ amuldungumekel?

² Iñchiñ müna falintuquefiyiñ taiñ amuldunguquen. Ti apostol Pablo feipifi ta Timoteo ñi ngüneduamuhual chumngechi ñi yeniequen tañi mongen ca chumngechi tañi amuldunguchequen. Femngechi quisutu montuluhuai ca montulafi ta caquelu (1 Tim. 4:16). Taiñ amuldungun montulchequei llemai. Poyequefilu am iñchiñ ta Jehová, ngüneduamuuqueiñ chumngechi taiñ yeniequen taiñ mongen. ¿Chumngelu? Com taiñ femün meu, ayüqueiñ taiñ püramyeafiel ta Jehová. Cafei ayüqueiñ taiñ pengelcünual taiñ inaniequefiel taiñ amuldunguqueel (Filip. 1:27). Ca femngechi ngüneduamuuqueiñ chumngechi taiñ amuldunguchequen, ¿chumngechi am? Petu taiñ amuldungunon, cüme pepicauqueiñ ca ngillatuquefiyiñ ta Jehová taiñ quelluaeteu.

3. ¿Küme llowpeabüi mai kom che taiñ amuldungumekebel? Eipinge chem upai Islandia mapu mu.

³ Quiñeque mu, chumte cüdaullefuliyiñ rume taiñ amuldungulelafiel tati pu che, allcütuquelaeiñmu. Femngechi  dungu mu rupai taiñ peñi Georg Lindal. 1929 puulu 1947 tripantu quisu müten amuldunguquefui Islandia mapu mu. Taiñ peñi fentren che amuldungulelfi, huelu inei no rume poyerpulafi ta Jehová. Taiñ peñi feipi: “Epe com pu che duamtuñmalaeiñmu taiñ amuldungulelfiel”. Huelu feichi 1947 tripantu, puhuingün quiñeque misionero, tripalu Galaad pingechi escuela mu. Huelu ailla tripantu rupalu hula, quiñeque che mülelu fei mu fautizahurpuingün. *

4. Allkütungenoliiñ amuldungun mu, ¿chumngechi duamnagabüiñ?

⁴ Huesa duamqueiñ pinon mu ta che tañi estudiayal Biblia. Pablo ca femngechi duamfui, ¿chumngelu? Fentren judio feyentulaingün Jesús tañi Mesíasngen (Rom. 9:1-3). Raquiduamnge tüfa: eimi enseñalquepelafimi chi Biblia quiñe che, rume pepicauquepelaimi tami cüme enseñayafiel. Ca ngillatuqueimi tañi cüme amuleal ti estudio. Huelu ti che inaquelai ñi feipin ta Biblia. ¿Chem mülefui tami femal? Mülei tami fentecünual tami enseñayafiel. Ca raquiduamnge tüfa: quiñe no rume chi tami enseñalelquefiel Biblia fautizaulai. Femngechi dungu rupalmi, fei ¿“quim enseñachelan” piafuimi? Cam ¿“Jehová ayüquelai chumngechi tañi enseñachequen” troquiafuimi? Tüfachi troquiñ mu peaiñ epu dungu: 1) ¿Chemu feipiafuiñ ñi cüme tripaquen taiñ amuldungun? 2) Amuldungucheliyiñ ca quimeltucheliyiñ, ¿chem mülei taiñ loncontucual?

5. Taiñ küdawabel ta Jewba, ¿chemu kiñechi küme tripakelai?

⁵ Biblia feipi tati che inaquefilu Chau Dios ñi ngülam, com cüme tripaquei tañi femqueel (Sal. 1:3). Huelu quiñeque mu, cüme tripaquelai taiñ femqueel chumngechi taiñ raquiduamquefel. ¿Chumngelu? Peaiñ epu dungu. 1) Taiñ mongen mu ruparumeafuiñ huesaque dungu mu, feimu catrütuafeiñmu taiñ poyeafiel Jehová chumngechi taiñ ayüqueel (Job 14:1). 2) Quiñeque che catrütuafeiñmu taiñ amuldungucheal (1 Cor. 16:9; 1 Tes. 2:18). Femngechi dungu rupafule rume, Jehová ñi adquiñ mu cüme tripaquei taiñ amuldungun. ¿Chumngelu feipiafuiñ tüfa? Peafiyiñ.

6. Jewba, ¿chumngechi balintukebi taiñ amuldungun küdaw?

⁶ Jehová cüme ngüneduamquei chumngechi taiñ cüdauquen ca taiñ fentecünuquenon taiñ amuldungun cüdau. Fente taiñ piuqueyefiel mu ta Jehová, ayühunquechi amuldunguqueiñ allcütungenoliyiñ rume. Feimu Jehová falintuñmaqueiñmu taiñ cüdau. Pablo feipi:‘Ngünechen norngei, ca ngüyünentulayai eimün tamün femelchi dungu ca ti piuqueyehun tamün pengelelfiel femngechi tamün quellufiel meu  tati feyentulechi pu peñi ca lamngen. Fei petu amulei tamün femngechi femal’ (Heb. 6:10). Feimu llemai, yenofiliyiñ rume quiñe che ñi fautizahual, Jehová falintuñmaqueiñmu taiñ cüdau. Feimu rüfngefui ñi feipin ta Pablo, ngünam cüdahuelquelafiyiñ ta Jehová (1 Cor. 15:58).

7. Pablo tañi eipin, ¿chem kimelelkeiñmu?

⁷ Raquiduamnge ñi femün ti apostol Pablo. Quisu cüme quimeltuchequefui ca fentren che quellufi ñi cristianongerpual. Quiñeque mu, Pablo “cüme quimeltuchequelai” pingefui. Huelu Pablo feipilai fentren che tañi quellufiel, doi mai feipi tañi rume cüdahun (2 Cor. 11:23). Pablo reque, loncontucuaiñ tüfa: Jehová doi falintuquei taiñ rume cüdauquen ca taiñ fentecünunoal taiñ amuldungun cüdau.

8. ¿Chem longkontukuneaiñ taiñ amuldungun mu?

⁸ Taiñ amuldungun mu ayühulquefiyiñ ta Jehová. Quiñe rupa, Jesús huercüfi ta 70 discipulo ñi amuldungucheal engün. Fei ayühunquechi huiñotuingün. ¿Chumngelu? Pu discipulo feipingün: ‘Pu huecüfü cütu feyentuingün’. Huelu, ¿fei müten falin-ngepefui mai? Femlai. Jesús feipifi tañi pu discipulo: ‘Ayüuquilmün tamün allcütueteu ti pu huecüfü, huelu mai ta ayühuaimün tüfachi dungu meu: ñi deu huirintuculen tamün üi ta huenu meu’ (Luc. 10:17-20). ¿Chumngelu feipi Jesús? Quisu quimniefui, quiñeque mu fente cüme tripalayafui tañi amuldungun tañi pu discipulo. Cafei, feichi che ñi amuldungulelfiel pu discipulo, quimngequelai ñi cristianongerpupen mai. Cümefui pu discipulo ñi ayüucüleal tañi allcütueteu mu pu che. Huelu ca dungu mülefui ñi loncontucual engün: tañi nehuentu amuldungun engün, ayühulquefingün ta Jehová, fei ta doi falin-ngefui.

9. (Gálatas 6:7-9 tañi eipin, bentekünonoliiñ taiñ amuldungumekel, ¿chum tripai taiñ küdaw?

⁹ Fentecünunoliyiñ taiñ amuldungun, rumel mongen nierpuaiñ. Com piuque mu amuldunguliyiñ, eluhuaiñ Jehová tañi nehuen mu taiñ adnieaeteu. Fentecünunoliyiñ taiñ amuldungucheal, Jehová eluaiñmu taiñ rumel mongeleal, yenofiliyiñ rume quiñe che ñi fautizahual (papeltunge Gálatas 6:7-9).

10. ¿Chemu kiñeke che allkütukeiñmu ka kakelu allkütukelaiñmu?

¹⁰ Cüme piuquengele tati pu che, allcütuaiñmu. Jesús nütrami quiñe huentru ngani quetran fill püle. Huelu tati cüme mapu meu müten huli tati quetran (Luc. 8:5-8). Ti fill mapu ñi feipiel ta Jesús, adentulei pu che tañi piuque. Caquerumei ñi piuque tati pu che, feimu quiñeque allcütuquei, caquelu allcütuquelai (Luc. 8:11-15). Ti nganquelu quimlai chumngechi ñi tremal ti fün quetran. Ca femngechi iñchiñ quimlaiñ pu che chumngechi ñi llohual Biblia ñi feipin. Feimu, ¿chem mülei taiñ femal? Amuleaiñ müten taiñ amuldungucheal. Chau Jehová doi falintuñmaqueiñmu taiñ nehuentu cüdauquen, allcütungeliyiñ cam allcütungenoliyiñ rume (1 Cor. 3:8).

11. Allkütungenolu ume Noe, ¿chemu eipiabüiñ ñi küme tripan tañi amuldungun küdaw? (Pebinge unen adentun).

¹¹ Cuifi mu, pütrünque che amuldunguingün, allcütungelaingün. Ca femngechi Noé, 40, 50 tripantu mu amuldungupelafui (2 Ped. 2:5). Noé ayüpelafui ñi allcütuaeteu pu che, huelu Jehová feipilaeyu ñi femngechi rupayal. Jehová feipifilu ta Noé ñi deumayal ti huampo ruca, feipifi quisu  ñi conpual, ca tañi domo, pu fotüm ca tañi pu püñmo (Gén. 6:18). Jehová feipifilu ta Noé ñi chumtetuhual ca ñi chumterupayal ti huampo ruca, Noé raquiduampelafui com pu che tañi allcütunoaeteu. Fei Noé “fentren che conpulayafui ti huampo ruca mu” pipelafui (Gén. 6:15). ¿Chum tripai tañi amuldungun ta Noé? Chem che rume allcütulaeyu (Gén. 7:7). ¿Feipipei mai ta Jehová ñi cüme amuldungunon ta Noé? Femlai. Jehová ñi adquiñ mu, Noé cüme amuldungufui. ¿Chumngelu? Noé femi com tañi feipieteu ta Jehová (Gén. 6:22).

12. Allkütungenolu ume Jeremias, ¿chumi tañi ayüwküleal amuldungun mu?

¹² Ti profeta Jeremías doi 40 tripantu mu amuldungufui, allcütungenolu rume ca caiñetungelu rume. Fei fente tañi ayentungen ta Jeremías, huesa duamfui, pihuelafui tañi amuldungual (Jer. 20:8, 9). Huelu Jeremías fentecünulai tañi amuldungual ca ayühulquefeyu tañi amuldungun. ¿Chem quellueyu? Epu dungu mu raquiduamfui. 1) Ti cümeque dungu ñi amuldungulelfiel tati pu che, eluquefui tañi maneluhual engün (Jer. 29:11). Ca 2) Jehová dullifi ta Jeremías ñi dunguafiel tati pu che Jehová tañi üi mu (Jer. 15:16). Ca femngechi iñchiñ amuldunguchequeiñ Jehová ñi üi mu ca quelluquefiyiñ ñi maneluhual engün. Loncontuculiyiñ tüfachi epu dungu, ayüucüleaiñ taiñ amuldungun mu, allcütunoeliyiñmu rume pu che.

13. Marcos 4:26-29 tañi eipin, ¿chem kimeleleiñmu Jesu?

¹³ Rupachi antü mu, pu che maneluhurpuquei Jehová mu. Jesús entui quiñe nütram tañi quimeltual tüfa (papeltunge Marcos 4:26-29). Jesús nütrami quiñe nganquelu mu. Rupan nganlu, ñochiquechi tremquei ti fün, huelu aporialayafui tañi matu tremal. Huelu mai, mülefui tañi esperayal tañi tremal ti fün. Ca femngechi iñchiñ enseñalfiliyiñ quiñe che, mülei taiñ esperayal ñi inanierpuafiel Biblia ñi feipin. Cafei obligalayafuiñ ñi maneluhual Jehová mu. Iñchiñ quimlaiñ ti che chumül eluhuai tañi fautizahual, fei quimnolu am iñchiñ mülei taiñ nieal ta paciencia, ti nganquelu reque (Sant. 5:7, 8).

14. ¿Chem kimelelkeiñmu tañi upan Quebec mapu mu?

¹⁴ Quiñeque lof mu, tati pu che cüdautuquei tañi fautizahual. Peaiñ ñi rupan epu lamngenhuen, Gladys ca Ruby Allen pingequefui. 1959 tripantu mu, feitachi epu lamngenhuen huercüngei ñi amuldungual quiñe pichi huaria mu Quebec mapu meu mülelu. * Tati pu che mülelu fei mu, allcütuquelafuingün tüfachi epu lamngenhuen. ¿Chumngelu? Llicalequefuingün tañi illcutuaeteu tati sacerdote ca tañi pu vecino. Gladys feipi: “Epu tripantu mu amuldunguquefuyu, inei no rume tripatuquelaeiñmu. Peeteu mu müten pu che, cerranacümquei tañi cortina. Femlu rume, fentecünuquelafuyu tayu amuldungual”. Rupai chi antü, fei pu che ñochiquechi eluhurpui tañi allcütual. Fantepu meu, cüla trahunche mülerpui feitachi huaria mu (Is. 60:22).

15. 1 Corintios 3:6, 7 tañi eipin, ¿chem kimelelkeiñmu taiñ amuldungun küdaw mu?

¹⁵ Com ti trahunche quelluntucuafui ñi fautizahual quiñe che (papeltunge 1 Corintios 3:6, 7). Raquiduamnge tüfa: quiñe amuldunguquelu elelfi quiñe tratado ta quiñe che. Huelu pepi huiñopemetulafi. Feimu feipifi ta cangelu peñi ñi  huiñopemetuafiel. Feitachi peñi amui, fei chillcatulelfi Biblia tati che. Fei ca mangelfi caquelu peñi tañi compañaeteu. Fei com engün quellufingün tati che ñi doi cüme hueniyeafiel ta Jehová. Fei fautizaule ti che, com pu quelluntucuquelu ayühuaingün (Juan 4:35-38).

16. Nienoliiñ newen ka kutran nieliiñ ume, ¿chemu ayüwküleaiñ?

¹⁶ Tami cutrancülen mu, pepi amuldunguhuelaimi chi chumngechi tami femquefel ta cuifi. Huelu huesa duamquilnge. Eimi ayüucüleafuimi tami petu coneltulen feitachi falin cüdau mu. Inaduamaiñ ñi rupan tati rey David. David ca tañi pu hueichafe engün, hueñeñmaeyu tañi pu familia pu amalequita. Fei David ca tañi pu hueichafe, amuingün ñi hueichayafiel pu amalequita, femngechi ñi yetuafiel tañi pu familia. Quiñeque amuingün, caquelu amulaingün fente tañi cansalen. Fei David ca tañi pu hueichafe, yemetui tañi pu familia ca müntüñmafi pu amalequita fentren falinque chemcün. Feimu huiñotulu engün, David feipi ñi hudamcangeal com tañi yemel engün. Femngechi tati hueichamelu ca tati pu amunolu, com trür llohuingün (1 Sam. 30:21-25). ¿Chem quimeltuqueiñmu tüfa? Feiti hueichafe cansalelu reque, eimi ca fempelaimi. Fente tami cutrancülen, amuldunguhuelaimi chi chumngechi tami femquefel ta cuifi. Huelu fentecünunolmi tami amuldungucheal ca quelluntucufilmi pu peñi ca pu lamngen ñi quimeltucheal, ca ayüucüleafuimi. Chumngechi ñi rupan David tañi pu hueichafe, tati pu hueichamelu ca tati pu amunolu, com llohuingün tañi yemel engün. Ca femngechi fautizaule quiñe che, com ti trahunche ayüucüleafui.

17. ¿Chemu mañumabiiñ taiñ Cha Chaw Jewba?

¹⁷ Müna mañumtuafuiñ ta Jehová. ¿Chemu? Jehová cüme quimniei taiñ obliganoafiel tati pu che taiñ allcütuaeteu. Jehová falintuñmaqueiñmu taiñ com piuque mu amuldunguchequen. Cafei enseñalqueiñmu taiñ ayüucüleal taiñ amuldungun mu (Juan 14:12). Feimu llemai, fentecünunoliyiñ taiñ amuldungual, ayühulafiyiñ ta Jehová.