David ñi nien 23 tripantu, feipi: “Ñi tremcülen mu ayünierpufiñ quiñeque hueche huentru. Raquiduamquefun doi tremli ñi duamhuenoafiel femngechi dungu, huelu fachantü petu niefiñ femngechi illutun”.

 David ñi cristiano chengen mu ayülei ñi feyentuafiel ta Chau Dios. Huelu femngechi che, ¿femürpupeafui Chau Dios ñi ayüqueel? ¿Chem raquiduamquei Chau Dios homosexual che mu?

•  ¿Chem pi ta Biblia?

•  ¿Chem pifel Biblia ñi feipin?

•  ¿Chumafui feichi che?

 Rupalechi tripantu mu, calerputui ñi raquiduam ta che ti homosexual che mu. Huelu pu cristiano inayentuquelafingün femngechi dungu pu che ñi raquiduam (Efesios 4:14). Iñchiñ taiñ raquiduamquen homosexual dungu mu ca caquelu dungu mu nentuquefiyiñ Biblia mu.

 Biblia pengeli homosexual dungu ñi cümenon. Peafiyiñ ñi chem pin.

•  “Chumngechi cudumuuqueimi quiñe domo meu, femlayaimi quiñe huentru mu” (Levítico 18:22).

•  ‘Chau Ngünechen eluñmaeyu engün, femngechi ñi inayal engün ti ünufal dungu mülelu ñi piuque mu. Pu domo ayühuelafi ta huentru, doi mai ayüniei ñi femal yehuen-ngechi dungu chaf domo engün. Huelu Chau Dios femngechi femcünulafui pu domo’ (Romanos 1:24, 26, TNM).

•  ‘Eluuquilmün tamün ngünencangeal. Fei Ngünechen tañi lonco ülmen-ngeelchi mülehue meu coneltulayai tati pu domo ca ti pu huentru re üñamyemequeulu ca ñihuaquelu no rume, cudumuuquelu chaf huentru engu no rume, ca ti pu hueñefe no rume, ca ti pu diñmangelu no rume, ca ti ngollife no rume, ca ti dallucafe no rume, ca ti pu coila ngünen-ngelu no rume’ (1 Corintios 6:9, 10).

 Com che mülei ñi inayafiel Chau Dios ñi huercün dungu. Feimu quiñeque che femquelu huesaque illutun, huelu ayüle ñi ayühulafiel ta Chau Dios, mülei ñi famentuafiel femngechi dungu (Colosenses 3:5).

 Biblia, ¿feipiquepei mai taiñ üdeafiel tati homosexual che?

 Femlai. Biblia quimeltui ta inei no rume taiñ üdenoafiel. Doi mai mülei taiñ cüme yeniehual com pu che iñchiñ, chumngechi mongen rume yeniele quiñeque engün (Hebreos 12:14). Feimu ñi ayetungeal, tañi inantucungeal ca quehuatungeal quiñe homosexual che, huesa dungu.

 Quiñeque ley ñi eluñmafiel mu ñi niehual epu huentru ca epu domo, pu rüf cristiano ¿catrütuquepefi mai femngechi dungu?

 No, femlai. Biblia ñi quimeltun, Dios eluñmafi ñi niehual huentru engu domo müten (Mateo 19:4-6). Ti ley eluñmafile epu homosexual che ñi niehual, pu cristiano quelluquelafi ca caiñetuquelafi rume. Pu gobierno eluhun mu ñi nentual femngechi ley ñi niehual pu homosexual che, nentuqueingün quimün pu che ñi raquiduam mu. Ngüneduamquelafingün Chau Dios ñi raquiduam femngechi dungu ñi femal engün. Biblia quimeltuqueiñmu taiñ reyüconcülenoal ti politico dungu mu (Juan 18:36). Feimu iñchiñ conquelaiñ femngechi dungu mu.

 Quiñe che deu homosexual ngelu, ¿elcünuafui feichi huimtun feichi che?

 Felei, cambiautuafui. Biblia quimeltui cuifi mu quiñeque che elcünuingün femngechi huimtun tañi cristiano ngerpual. Apostol Pablo quimfalcünui femngechi huimtun niele quiñe che conlayai Chau Dios ñi Gobierno mu, ca feipi ‘fei femngechi chengequefuimün quiñeque eimün ta cuifi meu’ (1 Corintios 6:11).

 Elcünufiel mu engün ti homosexual huimtun, feimu ¿doi illutuhuelafingün femngechi dungu? Femlai. Biblia feipi: ‘Fei tüfa nietuimün tati hue mongen, tati huengetuchi che, tati amulelu ñi hue chengetun’ (Colosenses 3:10). Felei, hue chefemngetulayai pürüm. Mülei ñi eluucüleal ñi nierpual cüme raquiduam fill antü.

 Quiñe che ayüle ñi ayühulafiel ta Chau Dios, huelu petu illutuniefile femngechi dungu, ¿chem mülei ñi femal?

 Femngechi raquiduam niechi che, mülei ñi eluhual ñi elcünuafiel cam ñi inanieafiel. ¿Chumngechi ngünengequei femngechi raquiduam? Biblia quimeltui: ‘Eluucülemün tamün ngünenieaeteu Chau Ngünechen ñi nehuen müten, fei eluuquilmün tamün ngüneaeteu quisu tamün illutuqueelchi huesaque dungu’ (Gálatas 5:16).

 Ngüneduamfilmi, tüfachi versiculo feipilai ti che ñi niehuenoal femngechi illutun. Doi mai papeltuniefile ta Biblia ca ngillatuniefile ta Chau Dios, femngechi nieai nehuen ñi connoal ti podngechi dungu mu.

 Femngechi dungu ñi rupan David, nütramcafiel mu tañi chau ca tañi ñuque nentui nehuen, fei feipi: “Entuñmael quiñe fanechi dungu troquihun, femngechi doi cüme duamün. Fei raquiduamün, ‘¿chumngelu nütramcalan cuifi mu?’. Cuifi nütramcafemli tañi huesa dungu ñi rupan huechengelu iñche, doi cüme mongen yenieafun”.

 Doi ayüucülequeiñ taiñ feyentufiel mu Jehová tañi ngülam. Maneluucüleaiñ Jehová tañi ngülam ñi norngen, ayühulmaquefi ñi piuque ta che. Inaniefiliyiñ, nierpuaiñ fentrenque cümelcan (Salmo 19:8, 11).